MATEO 7
7
A'a peacuana baneineijji oya queamimishi poani pea ehuohuijji
(Lc 6.37-38,41-42)
1Jesosaa huohuitiica-aniapoa cuana jama ba'a: —¡A'a peacuana baneineijji oya queamimishi poani pea ehuohuijji! Jama poanijo Eyacuiñajjiya miquianaja mimishi ja'anei huohuicaje'yo. 2Jiquio ecua miquiaaya peacuana baneiaña oja mimishi ehuohuijji oya jayojja pea-ai Eyacuiñajjiya quiana baneipea-aicaje miquianaja mimishi ehuohui'yojji. Jamajjeya jiquio ecua miquiaaya peacuana baña oya jayojja pea-ai Eyacuiñajjiya quiana bapea-aicaje. 3-4¿Yajjajo shai miyaya peaja mimishi shahuabacuajiaña, jamatii mique mimishi shahuabajjima aña? Miya jiquio jayojja poani ba'a: Peaja ecojjajo miyaya shabo che bisonei enobiqui jaa baña, jamatii miquea ecojjajo acui queaquemonee enobiqui jaa miquea bajjima poani. Peacuana huohuiaña jama ba'a: “Epeejji, che miquea ecojjaneijo shabo bisonei jaa eya cajjajeamee'yocue.” Jamatii miquea ecojjajo acui queaquemonee jaa cajjajeajjima aña. Jama pomajje, ¿achajja peaja ecojjajo jaa shabo bisonei cajjajeaje'yo? Achajjapishana. 5Eyacuiñajjija epeejjinisho quiana jja coma, ¡queapamenee poso jjabaquiani! Ebionei acui queaquemonee miquea ecojjajo enobiqui jaa cajjajea'yocue. Majoya queaja'a quiaa baje shabo bisonei miquea epeejjija ecojjajo jaa ecajjajea'yojji.
6—A'a Eyacuiñajjija esohui queapame huohuiquijji joya ecua iñahuehua queamasenee poanicuana jamahuasijje. Ohuaya Eyacuiñajjija esohui cajaa acaje quenequenemajje. Jiquiajjaya ba'a: meisisi queanahuenee cuichicuana quiaca-ajja. Ohuaya jamatii quishicaje'yo queasosehuiso ani bajjimatii. Jama pea-aiya acachana cuaa Eyacuiñajjija esohui.—
7Jesosaa huohuitiica-aniapoa cuana jama ba'a: —Eyacuiñajji oe huohuiajjaneicue cua miquiaa saña huisojotii. E'ejojonei oya huohuiajjaneicue jiquio ecua dejjaa oja aquiana ejjajeaqui jaa sa-ajjanei'yomajje baca'yani jama pea-aiya oya acue. Jamajjeya Eyacuiñajji huohuiajjamajamajaneitiicue jiquio ecua dejja esecuejjanijo taaanequiani enobiquijji, jama pea-aiya pocue. Jama quiana pomajamajajo Eyacuiñajjiya equi secuejjani ca'apejocaje miquiana nobiquijji. 8Jamajjeya joya e huohuiajjamajamajajji poani Eyacuiñajjiya quiacaje. Joya e'ejojonei o sa-ajjajji poani Eyacuiñajjiya oya bameesahuacaje'yo. Joya esecuejo nequi taaamajamajajji poani Eyacuiñajjiya equi secuejjani ca'apejocaje o nobiquijji.
9—Bacue, miquianajaya bacuacuaa pahui huohuiajjacajje oja ijjiajji, ¿a'a quiaa oya mei quiame? ¡Chojja de! 10A'a ohua nahuoocuana huohuiajjacajje oja ijjiajji, ¿a'a quiaa peyo quiame? ¡Chojja de! Jama poca-ajja. 11Miquiaaya jamatii queamimishi epohua aquianacuana queapame quiapoquiaña miquianaja bacuacuana ohua huohuiajjacajje. Eyacuiñajjiya miquianaja Chii-ai Eyajo queapameneetii nequiya ca quiana ca oe aquiana queapame quiacapoquijetii ojjaña joya o huohuiajjaneijji poanicuana.
12—E'e, jamajjeya quiaa peacuana queapamenee apoquiacue. Jiquio ecua miquianaya ojo queapamenee jjapomeequisapoani jama pea-aiya acue. Miquianaya peacuananijje jama pomajje ojjañatii Eyacuiñajjija esohui Moisesja tehue, Eyacuiñajjija sohuihuohuijji poacuanaja etehue pea-ai jayojja ba'epoquijetii.—
Beca ejeojji jaajo huohuipea-aicapoa
(Lc 13.24)
13Jesosaa huohuitiica-aniapoa cuana jama ba'a: —Miquianaya nobicue esecuejjanibisoneijje. Ma pea esecuejjani queaquemonee nequijje ejeojji pea-ai ejaa queaquemo Cuaqui-aiyasijje epoqui'yojji. Queahuisoneecuana ma ejeojjijjeya poquica'yani. 14Ejeojji Eyahuasijje epoqui'yojji ca queabisonee jaa. Esecuejjani queabiso pea-ai. Jamajjeya iyehuiso cuana ma ejeojjijje poqui'yani queacamajajojoya.—
Ache acui shai nequi queapame oja jjajjajo bacajji huohuipea-aicapoa
(Lc 6.43-44)
15Jesosaa huohuitiica-aniapoa cuana jama ba'a: —Jjajaahuananeiquicue oe joya Eyacuiñajjija esohuihuohuijjinisho poanicuanajo. Ohuaya esohui queapame jayojja huohuicani, jamatii oya siajjepojjinei poani. Oya miquiananijje Eyacuiñajjija epeejjicuana jayojja miminequiani poemajje. Ebiajjejje queabei. Oja eyamiquipajje ca oya queamasenee poani ebiocuiñajji jayojja. 16Achajja oya nequiani, ache esohui huohuicani shajja-ajjaneimajje queaja'a baje quiaa. Bacue, ojjaña acuicuana bacajji ojaya ejjajjajo. Chama'neinei higojjajja acuishajji acuijo. Chama'neinei uvajjajja jjono acuishajjijo. 17Jamajjeya ojjaña joya acuicuana queapame poani oja jjajja queapame queabiquia poani o jayojjaya. Ojjaña acuicuana joya peajja nequi ojaya ejjajja pea-ai peajja, ijjiaca-ajja. 18Joya acui queapame poani oja jjajja ijjiacajji, peajja pojjeama. Oya jayojja joya acui peajja poani oja jjajja ijjiaca-ajja, queapame pojjeama poani. 19Jamajjeya ojjaña joya acuicuana ojaya ejjajja peajja poani jajajeaca'yojji edahuajeajji cuaquijo. 20Jama pea-aiya quianaja Eyacuiñajjija esohuihuohuijji poanicuana a'a queapame, a'a queamimishi poani bacajji oja eba'ejjijo, oja echacojjicuanajo pea-ai. Jiquio ecua acuicuana a'a queapame poani oja jjajjajo baña, jama pea-aiya oya bacajji majoya oja echacojjijo, eba'ejjijo pea-ai.—
Jesosaja epeejjicuana joya e'ejojonei poanicuana poquicaje'yo Eyahuasijje
(Lc 13.25-27)
21Jesosaa huohuitiica-aniapoa cuana jama ba'a: —Queahuisocuana jama poani ba'a: “Emeshimesenei, miya e-esemese poani.” Ojjañatii joya jama mimime poanicuana Eyacuiñajjiya huoojeacapoquianitii meshi Eyahuasijje enobiqui'yojji pojjeama poaje. Ojjaña joya ecue Chiija ejjashahuabaquijji e'ejojonei ajji poanicuana caca oe nobiquicaje'yo. 22Ojjaña meshijo ba'ecacuanaja mimishi huohui'yojji epojja poeajo queahuisocuaa eya jama huohuime acaje ba'a: “Emeshimesenei, ecuaaya miquea esohui huohuinequinaje queahuiso. Eshahuamasecuana huoojeacuayajeamee'yonaje dejjacuanaja eyamijo nequi mique bajjanijo. Dejjaja ajjima'neineicuana ecuaaya queahuiso apoquianaje pea-ai mique bajjanijo.” 23Ma esohui jama ajji poanaje eyaya huohuije jama ba'a: “Ecuea quiana bajjimanei. ¡Miquianaya caca queamimishineetii queahueshatii nequi'yocue ejo!”—
Jesosaa esohui ebameesahuajji huohuicapoa beca dejjaa equi beca iyapea-aicanajejo
(Mc 1.22; Lc 6.47-49)
24Jesosaa huohuitiica-aniapoa cuana jama ba'a: —Bacue, joya dejja e shajja-ajjajji poanicuana comaya ecuea esohuijo jjashajja-ajjaquiani. Oya ma ecua dejja queasapaja'aa equi mei queaca'abiajje emacojo iyacanaje jama. 25Majoya quijje ena queaquemonee poajo johui queaquemo oquenaje. Benitiitii poeyanaje equi aniyasijje. Oja iya equi queaca'a aninaje benija jeabichajeajjima poanaje ojaya equi mei queaca'anee emacojo aninajejojoya. 26Peacuana ca ma dejja jama pojjeama. Jamatii ecuea esohui shajja-ajjajeacani cuaa oya jayojja pea-ai ba'eajjajjejojoya. Jamajjeya oya ma ecua pea dejja queasapaquehuaa equi meshijajijotii huanasohuacuajicanaje jama. 27Majoya quijje ena queaquemonee poajo, johui queaquemo pea-ai oquenaje. Benitiitii poeyanaje equi aniyasijje. Majoya johuiya equi meshijajijo ani cuiacajjajeacanaje, beniya pea-ai jeabichajeacanaje.— Majoya Jesosaa esohui huohuipajeacapoa.
28-29Majotii anicacuana Jesosaa esohui huohuipajeacajo jjabaneineiquicapoa ojo. Mimima' anicapoa so'o Jesosaa queaja'anee esohui huohuicani shajja-ajjamajje. Ojayaneitii ebajeyojeyo poanaje queaja'a esohui huohuijji bacapoa cuaa, peacuanaja huohuijo pojjeama. Ma ecua Moisesja tehuehuohuijji poanicuaa huohuicani jama pojjeama bacapoa oya. Jamaya jjashahuabaquicacuanapoa Jesosajo.
अहिले सेलेक्ट गरिएको:
MATEO 7: ESE
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Copyright Mision Nuevas Tribus, 2006
