Maʼtɛ́as 7
7
Na kiguŋ na kilumin oóoʼ
(Lóʼk 6.37-38,41-42)
1Yə́sus ayɛ́ɛ agɛɛn əgín na ndə́b yuudi ɔnɔ́: «Agɛɛlɛ lɛ́ pádɛɛ́boóbɛ́n na koany, pəŋi tɛn podɛmbɛ́n pɔsɔ́g. 2Kɛ́lɛ lɛ́, wɛ omaʼkɛɛn ɔnnasáŋ na pɔsɔ́g, náan tɛn aa pálɛ́ɛ́ kɛɛnɛɛ́ panasáŋ na wɛ. Nɔfɛg nó pəŋi polɛ́ɛ́ kofɛgɛnɛɛ́ pɔsɔ́g, əgín na nólɛ́ aa Táán alɛ́ɛ́ koboófɛgɛnɛɛ́ tɛn pəŋi. 3Kɛ́lɛ tuə́ na wɛ áa waáfɛda ɛyaa ɛ́ kiguŋ yɛ́ ɛ́lɛɛ́ a niis nɛ́ woómóŋŋí, kilumin kilúd kɛ́ kɛ́lɛɛ́ káanɛ a nɛáŋ niis oʼtála ə́? 4Ɔmbɔ́ lɛ́ tuə́ aa wɛ olɛɛ́ ogodɛ́anɛ na woómóŋŋí wɔʼkɔ́: “Móŋŋí póŋ nkuúliogi kiguŋ kɛ́ kɛ́lɛɛ́ na wɛ a niis,” kɔmɔɛ́d lɛ́ kilumin kilúd kɛ́ kɛ́lɛɛ́ a niis nɛáŋ, oʼtálan əə́? 5Yɔɔ́ŋɛ́ná pusú wɔnɔ́ wɛ! Yaŋ ogoóliogi kilumin kɛ́ kɛ́lɛɛ́ a niis nɛáŋ, áay waalɛŋ kodɛ́ʼtɛganan agɛɛlɛ lɛ́ úliogi kiguŋ kɛ́ kɛ́lɛɛ́ a niis nɛ́ woómóŋŋí.»
Nkə aa ŋŋɔnɛá yaágɛɛlɛ na pɔnjɔ́ŋ ə́
6«Podɛyɛ́ʼkɛn na pobo, nkə kɛ́ kɛ́lɛɛ́ kifúŋiə́n, pólɛŋ koboyágasɛnɛ agobonóma. Podɛʼtágɛ́dɛ pɔnjɔ́ŋ pááŋan pálaŋ kɛnɔ kɛ́ pɔŋɔnɛá pólɛɛ́, púəgíʼtən agá.»
Ɔɔŋɔ́nɔɔn, Uunə́ən, kɔdɛ́daan a udíyoog
(Lóʼk 11.9-13)
7«Ɔɔŋɔ́nɔɔn, páaboyɛ́ʼkɛn. Uunə́ən, poɔgɔɔŋ. Kɔdɛ́daan a udíyoog, pə́əbuúbuən. 8Kɛ́lɛ lɛ́, nyɔ́ ɔɔ́gɔɔŋɔn, páamoyɛ́ʼkɛn. Nyɔ́ əə́guunə, ɔɔgɔɔŋ. Nyɔ́ ɔɔ́gɔdɛd a udíyoog, pə́əmuúbuən. 9Wɛ oyaán a ondáŋ wááŋan aa olɛɛ́ ogɛɛlɛ lɛ́, mɔɔ́n waaŋ amaʼkogoyɔ́ɔŋɔn yoom ɛ́ konɛ, óomoyɛ́ʼkɛn agá nɛdáán ə́? 10Ɔmbɔ́ lɛ́ ɛyɛ́g óomoyɛ́ʼkɛn uʼkud ə́? 11Pəŋi pá polɛɛ́ lɛ́ polɛ pɛbɛ́ pɛ́ pɔɔd, podɛɔ́gɔ agaáʼkɛ kɛɛ́ʼkɛn yoom yɛ́ ɛ́lɛɛ́ ɛbɛ́ na pɔɔ́n pááŋan, pɛnɛŋ pɛ́sɛ́g anɛ́ɛ́n na Sɛ waaŋan nyɔ́ alɛɛ́ a mɔɛn ə́! Nyɔ́lɛ́ alɛ ogolɔb lɛ́ adɛágɛɛ́ʼkɛn yoom ɛ́laŋ na pá páamoyɔ́ɔŋɔn ɔ!»
Ɛɛlɛ na sɔ́g nkə kɛ́ wɛ waányɔ́ŋɛn lɛ́ pɛ́ɛlɛ na wɛ
(Lóʼk 6.31)
12«Náan, “Nkə kiim kɛ́ wɛ olɛɛ́ waányɔ́ŋɛn lɛ́ pɔsɔ́g pɛ́ɛlɛ na wɛ, ɛɛlɛ tɛn náan wɛɛ́nyɔ́amɔɛ́d na pɔ́lɛ́”. Táá nkə kɛ́ pɛcɛm pɛ́ Moyíis pɛ́lɛɛ́ agɛbɛyáaʼkananɛ a kɛ́ɛg, ɔmbɔ́ tɛn kɛ́ palɔɛgɛʼ pɛbán pá Táán páyɛ́bɛdɛánánɛ.»
Pungə́ póbaan
(Lóʼk 13.23-24)
13«Sɔ́dɔ́ɔn yɛ́ a udíyoog wó ólɛɛ́ ommɔ́ɔ́mɔ́sɛ lɛ́ ngə́ yɛ́ mɔɔd əə́nim a yɛ́lɛ́ ɛlɛ mbubə́ə́n, udíyoog wə́ə́ŋ oʼpoangás. Piíŋ aa pálɛɛ́ əgusiəd ngə́ yɛ́ɛy. 14Kɔmɔɛ́d lɛ́ ngə́ yɛ́ yaágɛɛn na mɔɔd a ɔlaa, ɛlɛ ngə́ yɛ́ ɛlɛɛ́ mmɔ́ɔ́mɔ́sɛ, udíyoog tɛn wə́ə́ŋ ommɔ́sɛán. Pá pálɛɛ́ əguyə́ən yɛ́lɛ́ pɔ́dɛɔ́gɔ piíŋ.»
Kiɛd kɛ́laŋ, kíəguum tɛn modámádám mólaŋ
(Maʼt 12.33; Lóʼk 6.43-44)
15«Lóʼkɔ́dɔɔn na palɔɛgɛʼ pɛbán pá pɛnyaʼ. Pálɛ əgiim a udi wááŋan wɔnɔ́ pɔɔ́n pá todóm, kɔmɔɛ́d lɛ́ a ntɛ́m yɔɔbɔn a kaadɛ pálɛ pongɔʼ. 16A niə́siəd nɛɔ́bɔn aa polɛ́ɛ́ koboólɛŋɛɛ́. Pádɛ́agɛ́sa muliómíliómí a ɛŋɔlá, páʼkɛ́sa tɛn pɛʼpɔmá a kiliŋidiŋ. 17Kiɛd kiim kɛ́ kɛ́lɛɛ́ kɛŋɛʼ kíəguum modámádám mó mólɛɛ́ mɔŋɛʼ. Kɛ́ kɛ́abany kíəguum tɛn modámádám mó móabany. 18Kiɛd kɛ́laŋ kídiə́guum modámádám mó mobɛ́. Kɛ́ kɛ́abany kídiúm tɛn modámádám mólaŋ. 19Kiɛd kiim kɛ́ kídiə́guúmíí modámádám mólaŋ, kɛ́agaásom, páság kodagɛdɛ a yug. 20Náan aa kɛ́lɛɛ́ lɛ́, a niə́siəd nɛɔ́bɔn aa polɛ́ɛ́ kolɛŋɛɛ́ palɔɛgɛʼ pɛbán pá pɛnyaʼ póob.»
Na kosɔyɔ na kɛɛlɛ
(Lóʼk 6.46; Lóʼk 13.25-27)
21Náa Yə́sus ɔnɔ́ kə́mmú na pɔ́lɛ́: «Ɔdɛɔ́gɔ ungim nyɔ́ alɛɛ́ əgusəə lɛ́ “Sə́dúk, Sə́dúk áa” alɛ́ɛ́ kosɔ́dɛ́ɛ́ a Nɛlaamɛʼ nɛ́ a mɔɛn, ndóo. Nyɔ́ alɛ́ɛ́ kɛɛlɛɛ́ nɛnyɔ́ŋɛn nɛ́ Sɛ waam nyɔ́ alɛɛ́ a mɔɛn áa alɛ́ɛ́ kosɔ́dɛ́ɛ́ a nɛ́lɛ́. 22Ná wɔɔ́s ó pɛyɔm ólɛ́ɛ́ kiim əgiigií, piíŋ áa pálɛ́ɛ́ kɛʼtɛ́anɛɛ́ pɔ́nɔ́ na mɛ: “Sə́dúk, Sə́dúk! Adɛ́ a niiŋ nɛáŋ áa tɛyɛ́ɛ alɔɛgɛ pɛbán pɛ́ Táán a? Adɛ́ a niiŋ nɛáŋ áa tɛyɛ́ɛ agɛɛlanɛ mangán, tɛáŋɛ́ŋŋaŋ məŋun má mabɛ́ á?” 23A kɛnɛŋ kɛ́ɛg aa mɛ ndɛ́ɛ́ kubuyúlisinií na pɔ́lɛ́ nyɔʼkɔ́: “Pəŋi pá poágɛɛlanɛ kɔbɛ́, liógoon a udi wáam, ntɛboólɛŋɛn#7.23 Kɛ́lɛ náan a kálaʼtaʼ ɛ Pɛʼk 6.9 ”»
Noádɛʼ noádɛ́ɛ́ kaáwáag a kɛgon
(Lóʼk 6.47-49)
24Yə́sus aáság kubuúsiədin nkaʼtɛ́n yɛ́ɛnɛ, ɔnɔ́: «Nyɔ́ amóób nkə kɛ́ɛnɛ kɛ́ mbə́səə, áyɛɛlɛ nkə kɛ́ kɛ́lɛɛ́ a tɔgɛ́ɛ́ tóod alɛ wɔnɔ́ mɔɔd wo nsiŋ nyɔ́ yɛɛ́wáag noádɛʼ nuə́ŋ a kɛgon. 25Ná tɔɔ́ tuídə́əŋ, puní puə́yə́ə́gən, piə́nduŋ pímə́súgínə́ə́ kɔ, pigud pɛáfɛma kɔ na toɛn, núdiʼkə́əbugig lɛ́ nóyɛ́ɛ nogónáán a kɛgon. 26Kɔmɔɛ́d lɛ́ nyɔ́ amóób tɔgɛ́ɛ́ tóam, adiɛlɛ nkə kɛ́ ndɛɛ́ əgusəə kɔ, nyóon alɛ wɔnɔ́ kiyəg kɛ́ mɔɔd kɛ́ kɛ́ɛ́wáág noádɛʼ nuə́ŋ a ɔsáyɛ́n a mɔɛn. 27Ná tɔɔ́ tuídə́əŋ, puní puə́yə́ə́gən, piə́nduŋ pímə́súgínə́ə́ kɔ, pigud pɛáfɛma kɔ na toɛn, noáság kudə́əŋ a nsí bgulum, nuə́bumbúg nuim.»
Táán ayɛ́ʼkɛn pɛbán piim a ɔmbɔg á Yə́sus
(Mə́l 1.22; Lóʼk 4.32)
28Ná Yə́sus yɛɛ́mán kɛɛ́ʼkɛnan ndə́b náan, ungim yɛɛ́lɔ́b unuʼ ongás əgəə́wúunəni na wóow ombod ógaaʼkananɛ 29lɛ́ nɛaʼkananɛʼ niə́ŋ nɛ́dɛʼkɛ́ɛ wɔnɔ́ nɛ́ palɛŋ pɛcɛm, nɛ́yɛ́ɛ a nɛ́ mɔɔd nyɔ́ alɛɛ́ na nɛlaamɛʼ a ombɔg.
अहिले सेलेक्ट गरिएको:
Maʼtɛ́as 7: yatDBL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© Wycliffe Bible Translators Inc, 2015
