लूका 1:18-25

जकरियाले स्‍वर्गदूतलाई भने, “यो कुरा पक्‍का हुन्‍छ भनेर मैले कसरी पत्‍याउने? म त बुढो भइसकेको छु र मेरी जहान पनि बुढी भइसकेकी छिन्।” स्‍वर्गदूतले जवाफ दिए, “म परमेश्‍वरसँग रहने गब्रिएल हुँ। उहाँले नै मलाई तिमीसँग कुरा गर्न र यो सुसमाचार सुनाउन पठाउनुभएको हो। मैले भनेको कुरा ठीक समयमा पूरा हुनेछ। तर हेर, तिमीले मैले भनेको कुरालाई विश्‍वास नगरेकोले यो कुरा पूरा नहुञ्‍जेल तिमी बोल्‍न सक्‍नेछैनौ।” बाहिर मानिसहरू पर्खिरहेका थिए र जकरियाले ढीलो गरेकोमा अचम्‍म मानिरहेका थिए। जकरिया बाहिर आउँदा त उनी मानिसहरूसँग बोल्‍नै सकेनन्। त्‍यसो हुँदा तिनीहरूले मन्‍दिरभित्र उनले दर्शन पाए भन्‍ने कुरा थाहा पाए। उनले बोल्‍नै नसकेर बाहिर पर्खेर बसेका मानिसहरूलाई हातले इशारा गरे। जकरियाको पूजा गर्ने पालो सकिएपछि उनी घर गए। केही दिनपछि नै उनकी जहानको कोखमा गर्भ रह्यो। त्‍यसपछि उनकी जहान पाँच महिनासम्‍म कतै निस्‍किनन्। तिनले भनिन्, “यो काम प्रभु परमेश्‍वरले नै मेरो लागि गर्नुभएको हो। उहाँले ममाथि दया गरेर मलाई मानिसको निन्‍दाबाट जोगाउनुभयो!”