२ इतिहास 32
32
यरूशलेमलाई अश्शूरीहरूको धम्की
(२ राजा १८:१३-३७; १९:१४-१९,३५-३७; यशैया ३६:१-२२; ३७:८-३८)
1यी सबै कुरामा हिजकिया राजाले विश्वासयोग्यतासाथ परमप्रभुको सेवा गरे। त्यसपछि अश्शूरका महाराजा सनहेरीबले यहूदामाथि हमला गरे। सुरक्षित बनाएका सहरहरू तिनले घेरामा हाले र पर्खाल तोडेर सहरभित्र पस्ने आज्ञा आफ्ना सेनालाई दिए। 2सनहेरीबले यरूशलेम पनि आक्रमण गर्ने इच्छा गरेका जब हिजकियाले बुझे 3-4उनी र उनका अधिकृतहरूले सहरबाहिर जाने पानी काटिदिए। अश्शूरीहरू यरूशलेमछेउ पुग्दा तिनीहरूले पानी पाउन नसकून् भनी त्यसो गरिएको थियो। अधिकृतहरूले धेरै मानिसहरू लिई गएर सबै पानीका मुहानहरू थुनिदिए र तीबाट पानी बग्न बन्द भयो। 5पर्खाल मरमत गरी तीमाथि बुर्जाहरू बसाई सहरको बाहिरपट्टि एउटा पर्खाल बनाएर राजाले यरूशलेम सहरका बचाउको बन्दोबस्त अझ बलियो पारे। त्यसबाहेक पुरानो यरूशलेमको पूर्वीय भागमा माटो भरेर तयार गरेको जमिनमाथि बनाइएका सुरक्षा व्यवस्थाहरूको पनि तिनले मरमत गरे। तिनले धेरै ढाल र भालाहरू पनि बनाउन लाए। 6उनले सहरका सबै पुरुषहरूलाई फौजी अधिकृतहरूका अधिकारमा दिए र सहरका मूल-ढोकानिर खुला आँगनमा भेला हुने आज्ञा गरे। उनले तिनीहरूलाई भने, 7“सङ्कल्प गर र भरोसा राख। अश्शूरी महाराजा वा उनका अगुवाइमा आउने सेनाको डर नमान। उनीपट्टि भन्दा हामीपट्टि धेरै शक्ति छ। 8उनीसित मानवशक्ति छ तर हामीसित परमप्रभु, हाम्रा परमेश्वर हुनुहुन्छ र उहाँले हामीलाई मद्दत दिनुहुन्छ र हाम्रो लडाइँ लडिदिनुहुन्छ।” राजाका यी शब्दले मानिसहरूको हौसला बढ्यो।
9केही समयपछि सनहेरीब र तिनका सेना लाकीशमै हुँदा हिजकिया र तिनीसित यरूशलेममा भएका यहूदावासीहरूलाई सनहेरीबले यस्तो खबर पठाए: 10“म अश्शूरका महाराजा, सनहेरीब यो प्रश्न गर्दछु कि के कुराको भरोसामा तिमीहरू घेरामा परेका यरूशलेममा बस्न साहस गर्दछौ? 11परमप्रभु तिम्रा परमेश्वरले हाम्रा शक्तिबाट तिमीहरूलाई बचाउनेछन् भनी हिजकियाले भन्छन् होला; तर हिजकियाले तिमीहरूलाई छल्दै छन् र भोक र तिर्खाले मर्न लाउनेछन्। 12परमप्रभुको आराधना-स्थल र वेदीहरू नाश गर्ने अनि यहूदा र यरूशलेमका मानिसहरूलाई खालि एउटै वेदीमा मात्र आराधना गर्नू र धूप जलाउनू भन्ने उनी नै हुन्। 13म र मेरा पिता-पुर्खाले अरू जातिका मानिसहरूलाई के गरे, के त्यो तिमीहरू जान्दैनौ? के अरू कुनै जातिका देवताले ती मानिसहरूलाई अश्शूरका महाराजाका हातबाट बचाए? 14के ती सारा देशका कुनै देवताहरूले कहिल्यै हाम्रा हातबाट तिनीहरूका देश बचाएका थिए? तब तिम्रा परमेश्वरले तिमीहरूलाई बचाउनेछन् भनी कसरी सोच्दछौ? 15अब हिजकियाले तिमीहरूलाई त्यसरी धोका दिन र गलत बाटोमा लैजानदेखि आफैंलाई जोगाओ। उनका कुरामा पत्यार नगर! कुनै जातिका कुनै ईश्वरले कहिल्यै आफ्ना मानिसहरूलाई अश्शूरी महाराजाका हातबाट बचाउन सकेका छैनन्। त्यही प्रकारले तिम्रा परमेश्वरले पनि अवश्यै तिमीहरूलाई बचाउन सक्नेछैनन्!”
16अश्शूरी अधिकृतहरूले परमप्रभु परमेश्वर र उहाँका सेवक हिजकियाबारे अझ नराम्रा कुराहरू भने। 17महाराजाले लेखेका चिट्ठीले परमप्रभु इस्राएलका परमेश्वरको अपमान भएको थियो। त्यसमा “जाति-जातिका देवताहरूले मेरो शक्तिबाट आफ्ना प्रजालाई बचाएका छैनन् न त हिजकियाका परमेश्वरले नै मबाट आफ्ना प्रजालाई बचाउन सक्नेछन्,” भनी लेखिएको थियो। 18सहरका पर्खालमा उभेका यरूशलेमका बासिन्दाहरूलाई तर्साउन र हताश गराउन ती अधिकृतहरूले यो कुरा हिब्रू भाषामा कराई-कराई सुनाए। त्यसरी तिनीहरूले यरूशलेम सजिलैसित कब्जा गर्न खोज्थे। 19यरूशलेमका परमेश्वरबारे पनि तिनीहरूले त्यसरी नै भने, जसरी अरू जातिहरूका देवताहरूबारे भन्थे। ती देवताहरू मानिसहरूका हातले बनाएका मूर्तिहरू मात्र थिए।
20तब हिजकिया राजा र आमोजको छोरो यशैया अगमवक्ताले परमेश्वरलाई प्रार्थना गरे र मद्दतको लागि उहाँलाई पुकारे। 21परमप्रभुले एउटा स्वर्गदूत पठाउनुभयो र उनले अश्शूरी सेनाका सिपाही र अधिकृतहरूलाई मारे। बदनाम भएर राजा अश्शूर देशमा फर्किए। एक दिन आफ्नो देवताको मन्दिरमा राजा हुँदा उनकै केही छोराहरूले उनलाई तरवारले हानेर मारे।
22यस प्रकारले हिजकिया राजा र यरूशलेमका मानिसहरूलाई परमप्रभुले सनहेरीब, अश्शूरका महाराजाका शक्तिबाट र तिनीहरूका अरू शत्रुहरूबाट पनि बचाउनुभयो। उहाँले तिनीहरूलाई छिमेकीका सबै देशहरूसित शान्तिसँग बास गर्न दिनुभयो। 23धेरै मानिसहरू परमप्रभुलाई भेटी चढाउन र हिजकियालाई उपहार बोकेर यरूशलेममा आउँथे। त्यस बेलादेखि सबै जातिहरूले हिजकियालाई आदर गर्न थाले।
हिजकियाको बिरामी र घमण्ड
(२ राजा २०:१-३,१२-१९; यशैया ३८:१-३; ३९:१-८)
24त्यस बेलातिरै हिजकिया राजा बिरामी भए र झण्डै मरे। उनले प्रार्थना गरे र तँ निको हुनेछस् भनी परमप्रभुले तिनलाई एउटा चिन्ह दिनुभयो। 25तर हिजकिया अति घमण्डी भए। परमप्रभुले आफ्ना निम्ति जे-जति गर्नुभएको थियो, त्यसको निम्ति उनले परमेश्वरलाई धन्यवाद दिएनन्। त्यसकारण यहूदा र यरूशलेमले कष्ट भोग्नुपर्यो। 26तापनि अन्तमा हिजकिया र यरूशलेमका बासिन्दाहरू नम्र बने। यसकारण हिजकियाको मृत्यु नभएसम्म परमप्रभुले ती मानिसहरूलाई दण्ड दिनुभएन।
हिजकियाका धन र गौरव
27हिजकिया राजा अति धनी भए र सबैले उनलाई आदर गर्थे। उनले आफ्ना सुन, चाँदी, बहुमूल्य रत्नहरू, मसला, दाल र अरू दामीदामी कुराहरू राख्न भण्डार कोठाहरू बनाउन लाए। 28त्यसमाथि उनले अन्न, दाखमद्य, जैतुनका तेल राख्ने ढुकुटीहरू अनि गाई-गोरु र भेडाहरूका गोठहरू पनि बनाउन लाए। 29यी सबैबाहेक परमेश्वरले उनलाई गाई-वस्तु, भेडाहरू र अरू यति धेरै धन दिनुभयो कि उनले धेरै सहरहरू बसाले। 30गीहोन कुलो खनी खोलाबाहिर बगी जाने बाटो बन्द गरेर खोलाको पानी त्यस कुलोबाट यरूशलेमका पर्खालभित्र पुर्याउने यिनै हिजकिया राजा थिए। हिजकिया आफूले गरेका सबै काममा सफल भए 31र बेबिलोनी राजदूतहरू त्यस देशमा भएको ती असाधारण घटनाबारे सोधपुछ गर्न आउँदा पनि परमेश्वरले हिजकियालाई उनका चरित्रको जाँच गर्न आफ्नै इच्छाअनुसार गर्न दिनुभयो।
हिजकियाको शासनको अन्त
(२ राजा २०:२०-२१)
32हिजकिया राजाले गरेका अरू सबै कामहरू र परमप्रभुप्रति उनको भक्तिबारे आमोजको छोरो यशैया अगमवक्ताका दर्शनको पुस्तकमा र यहूदा र इस्राएलका राजाहरूको इतिहासमा लेखिएको छ। 33हिजकिया मरे र राजाहरू गाड्ने चिहानमा माथिल्लो भागमा गाडिए। उनको मृत्यु हुँदा यहूदा र यरूशलेमका सबै मानिसहरूले उनको ठूलो सम्मान गरे। उनका छोरा मनश्शे उनीपछि राजा भए।
अहिले सेलेक्ट गरिएको:
२ इतिहास 32: सरल नेपाली
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Simple Nepali Holy Bible © Nepal Bible Society, 2008.