Mateo 11
11
1Aden: Chuibennetan, cac abëd icquido nidannenubi auëshquiobi puduanec nidshun shubu dadpen yacno yacnombuen Esusën Nuquin Papan Chiaid Bëda chuibennepanëdash.
VI. ESUSËN DADPEN NABANAID
(Duc. 11.2—12.50)
Uan acten mentoanquidën chomiaido
(Duc. 7.18-35)
2Adnubien Uan acten mentoanquid quënën tsadunmiac tsadquimbi Esusën nabanaid chuisho tantiapanëdash. Adshun abëd icquido chuiquin: Esus chuitan, quequin nidmiac chochoshon Uambëd icquidon naden Esus chuituidpanëdash: 3Uanën: Chuitan, cac chobi. ¿Umbi cainaid Nuquin Papan Chomiaidquiobida ne? Mibi: Aidpenquio nebi, quenuc ¿utsidambi caimpe? quiosh Uan, caquien 4Esusën: Umbi nasho mimbi nëbi isbuedbëta nëbi mimbi tantiabued Uan chiec nid. 5Bëshuaidëmbi isbenosh. Nidte icsash tidinquebuedi bëdambuec capucuenosh. Dada daush daushpambo yec daicsaidquio bëdanosh. Pashuacbuedëmbi tantiabenosh. Adoshombic uënësaidi uincuenmiosh. Adoshombic atona nibëdquido Chiaid Bëda chuiquin Nuquin Papan bëdambuen iste chuibanosh, quequin Uan chiec nid.#11.5 Isa. 29.18-19 tantiaquinc Isa. 35.5-6 tantiaquinc Isa. 26.19 tantiaquinc Isa. 61.1 tantiaquinc cain nëid dada uapanëdash. Aid iste bunquin chotaquën onqueten dada uaid Isayas isbanta. Aden Nuquin Papan Chiaid tantiamiac Uanën: Nuquin tsusedpan chiampicpadquid Nuquin Papan Chomiaidquio Esus nec, quequin ubi tantiendac, capanëdash. 6Adshumbic: Nadentsen chuita. Umbi aden nabanaid tantiash chieshtoenquio icquin ubi tantiaquid Nuquin Papan bëdambuen isaidquio nendac, quiosh Esus, quequin chiec nid, cac nidannepondash Uambëd icquido.
Uan acten mentoanquid chiaid
(Duc. 7.24-35)
7Aido nidannebon abi datsidadquido tantiamequin Uan tantiaquin chiec Esus nadpondash: Shubu nibëdacno ¿atotsi isnuec mibitedi nidonda? ¿Piabiecquid cunquequidën ishcunaid isnuecta nidtionda? 8¿Aid isnuec nidenquio yec atotsi isnuec nidonda? ¿Dashcute bëdaidquio dasiuidquid isnuecta nidtionda? Dashcute bëdaidquio dasiuidquido atona dadpenquio icquido chuiquid tapan shubun tabadquido nec, quequin mibitedishun tantiec. 9Adquid icnuc ¿atotsi isnuec nidonda? Nuquin Papan oncamiaidën chuibansho tantianuec ma mibi nidondac. Adec abipadquid utsi nibëdnuc aid udictsëcquid Nuquin Papan oncamiaidquio Uan nec. 10Acten mentoanquid Uanën abia choshon chuite chuiquin Nuquin Papan naden dada uamiampid iquec:
Mibi chote chuiquidba chomendambi, Mado.
Chuiquid Tapambo choeque. Podquied nacnenacbimbuen aidëmbi: Bëdambo icquid choeque. Icsambuen nabanenquio icquin ënta, quequin chiendac, Mado,
quequin chuipampic.#11.10 Mad. 3.1 tantiaquin nëid chuipanëdash Esusën. 11Acten mentoanquid Uampadquid matsesën tishaid utsi nibëdec. Adquid icnuc chuiquidpenquio icbuedëmbi: Nuquin Papan namiacno tabadte iquec, quequin chuibansho tantiabenquid Uan uditsëc bëdambocquid iquendac. 12Acten mentoanquid Uanën tauaquin chuibansho cumapenen chieshënnëdacpadombuembidi umbi: Nuquin Papan namiacno tabadte iquec, quequin nëbi chuibansho: Ënmenu, caqui ënmetiapimbo iquendac. 13Ëndenquimboshë tauambuen nuquin tsusedpa Nuquin Papan ambi: Naden nata, quequin chiaid Moisesën Nuquin Papan namiaid chote tauaquin chuipampic. Adoshombic Nuquin Papan oncamiaidontsen. Adoshombic oncamiaid utsintsen. Aden Uan choambo icnuc Nuquin Papan ambi bëdambocquid chomete chuimiannepampic. 14Adembidi Uan chote chuiquin Nuquin Papan Ambi Chiaid dada uamepampic. Umbi oncamiaidquio Edias cuëmëdquid chomendambi, quenëdacpadembi Ediasbimbuecquid Uan chote chuipampic.#11.14 Mad. 4.5 tantiaquin nëid dada uapanëdash. 15Pabiate shëcuë choquidën Umbi Chiaid bëdambuen tantiata, quepondash Esus abi datsidadquido chiec.
16Aden chuisho tantiash chieshtocuededshobien Esusën naden chuipondash: Nuquin Papan Chiaid nëbi chuisho tantiesabo yec bacuëbo nëishnanacbitsëcquiec tabadquido mibitedi nec. 17Bacuë abentsëcshun: Umbi shoncanuc shëcshëcquec bidiadtanneta, cac ma mibi shëcshëcquec bidiadtannenquio icboc. Adecbidi cuëdënte uënësquiocquid ubi cuëdënnubi ma mibi shubienquio icboc, quiash bacuëbo cuëdnanec nëishnanacbitsëcquiec ma mibitedi icpayoc. 18Uan acten mentoanquid pete utsi utsien pesa niondash. Adecbidi acte paë uaid aquesambo niondash. Adquid icsho isash: Podobitsi icsa dapuduedashien nechitec, ma mibitedi quepondac. 19Adnubini Matsesën Tishaid yec choshon peshun acsho isash: Nua pedenneshun tantiadennuen acte paë uaid acquid nec. Adecbidi icsambocquidobëd icquid yec Doma yacnocquidon chuiquidën: Piucquid aidted bedta, quequin chiacpadec bedshumënquidbëd icquid nec, mibitedishun ubi capec. Adquid icnuc Nuquin Papan tantiamiac aidën chiacpadombuen nabansho issun: Bëdambo iquec, caindac, quepondash Esus.
Shubu dadpen icquid yacno yacnombuec tabadquido cuidte chiaid
(Duc. 10.13-15)
20Adshumbic Esusën shubu dadpen icquid yacno yacnombuec tabadquido cuidte chuibampanëdash. Nëbi shubu dadpen icquid yacno yacnombuen nadatiambo icquin nabanquin dadpen ismebenniombi. Aden ismiaqui: Icsambuen nabuedi Nuquin Papa tantiec bëdambuec tabadtiadquio iquebi, quetiadquidi chieshec adenquio iquec, queshun Esusën naden chuiquin chushcapanëdash: 21Shubu dadpen icquid Codasin yacnocquidobëta shubu dadpen icquid Betsaida yacnocquido icsho mibitedi Nuquin Papan cuidtequidombo nendac. Umbi nadatiambocquin nabanquin aido ismebocpadombuen ismiac shubu dadpen icquid Tido yacnocquidobëdi shubu dadpen icquid Sidon yacnocquido Nuquin Papa tantiaquid ictsempanëdash. Aden ismiaqui: Ai, icsambuec tabadquid nebi, queshun ismenuen dashcute icsatsëcquid dasiuidash isisapuc masequec shubibudequi icsainquio iquec ënëdtsempanëdash. 22Nuquin Papan abitedimbo cuidte uëshëmbi: Nadatiambo icquin nabanquin ismiacmaido nec, queshun Tido yacnocquidobëta Sidon yacnocquido bëdiactsëc cuidendac. Adoshombic: Nadatiambo icquin nabanquin ismiaqui mibitedi tantienquio icquido nec, queshun Codasin yacnocquidobëta Betsaida yacnocquido cumapenquien cuidendac. 23Adembidi nëmbo icquido Capednaun yacnocquidotedi chiec: Nuquin Papa yacno tabadtequido nebi ¿quecta mibitedi ique? Tantia. Chuinu. Ma mibitedi Nuquin Papan chian annëdënquiacno nësecatequidombo nepayoc. Ëndenquimboshë shubu dadpen icquid Sodoma yacnocquido cuidquin Nuquin Papan nibëdanmepampic. Umbi nadatiambocquin nabanquin mibitedi ismebocpadombuen ismiac aidon ambi icsambuen naid ëntsempampic. Aden abi icsaid ënsho Nuquin Papan aido cuidenquio icac nëbi aton matses abi ictsiash. 24Nuquin Papan matses abitedi cuidte uëshëmbi: Nadatiambocquin nabanquin ismiacmaido nec, queshun Sodoma yacnocquido bëdiactsëc cuidendac. Nuquin Papan Chomiaid icquin umbi ismebuedo Capednaun yacnocquidoen cumapenec sidquenuc cuidendac, quequin abi tantiesabo chuiquin Esusën chushcapanëdash.
Esusën: Mibi bëdamboshë iquec, Papa, quequin Nuquin Papa chiaid
(Duc. 10.21-22)
25Adshumbic Esusën naden Nuquin Papa chuipondash: Papa, mibi bëdamboshë iquec. Mibi yacnocquidon Icbo yec nidaidën icquidtedishun Icbobidi mibi nec, Papa. Adquid icquin mimbi tantiamiabi dadpen tantiaquidobëtambi: Cumapenen tantiaquid nebi, quequidombi tantiabi iquec. Adquid icnuc bacuën daëdpactsëc tantiacbimbuen tantiaquido icshobi mimbi tantiamiac. 26Aden mibi bunacpadombuen mimbi bëdambuen naic. Adquid yec mibi bëdamboshë iquec, Papa, quequin chuipondash Esusën. 27Adshumbic abi datsidadquido naden chuiuapondash: Cun Pan ambi tantiaidtedi ubi tantiamec. Umbi nabambuedbëta umbi nate abitedi cun Pa abentsëcshunquiobi tantiec utsibon tantienquio icnuc. Adembidi cun Pan nabanaidbëta ambi nate umbentsëqui abitedi tantiembi. Aden tantiaquin: Nëidtedi matses bëdambuen tantiamembi, queshun: Nuquin Papa nadquio iquec, quequin tantiamembi, quepondash Esus.
Cun Icbo ubi cata, quequin Esusën chiaid
28Adshumbic: Ubi tantiata. Dayacquiocquid yacbimbuecnuc mibi bëdambo icmembique. ¿Mitsipadequibi Nuquin Papa yacno puduedpatsia? quiash uinmambo icbuedëmbi ubi tantiasho Nuquin Papa yacno puduedtequid mibitedi icmembique. Ubi tantiata. 29Cun Icbo ubi cata. Cun iuambo icquin umbi chiacpadombuen nasho mibi bëdambuen isquin dayacquiocquid icmembi. Adquid icquin mibi ancaisambo nebique. Cun Icbo ubi cata. Adsho mibi bëdambo icmendambi. 30Mibi ancainquio icquin dayacquio icmequin bëdambuen mibi tabadmembique. Cun Icbo, ubi cata, quequin Esusën chuipondash.
လက်ရှိရွေးချယ်ထားမှု
Mateo 11: mcfNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2023, Wycliffe Bible Translators, Inc. All rights reserved.
