Mateus 16
16
Ag tỹ Jesus mỹ milagre to vĩ
(Mc 8.11-13; Lc 12.54-56)
1Kỹ pã'i ũ ag tóg Jesus tá junjun mũ. Ag tỹ ón kỹ ti ki jẽmẽ sór vẽ, ag tỹ kar kỹ ti kato vĩ jé. Kỹ ag tóg ti mỹ milagre to vĩ mũ. Ag tỹ ti jykre to: “Topẽ jykre mỹ vỹ?“ he sór vẽ. 2Hã ra Jesus tóg ag mỹ: “ta to jykrén há ãjag nỹtĩ, ẽmé to ke gé,” he mũ. “Rãkãnh kỹ ãjag tóg kanhkã ki ẽvãnh tĩ. Rãren kỹ ãjag tóg: “ẽmãn ke vẽ,” he tĩ. 3Kỹ ãjag tóg kusãg ki kanhkã ki ẽvãnh tĩ gé. Kanhkã pũr kỹ ãjag tóg sir: “ta vỹ kutẽnh mũ, kanhkã vỹ pũr mũ“ he tĩ. Tó há han ãjag tóg tĩ, rãre ve kỹ, kanhkã pũr ve kỹ ke gé. Hã ra ãjag tóg inh ki kagtĩg nỹtĩ, ãjag tỹ sỹ nén han mũ vég mũ ra. Hã kỹ ãjag tóg: “Topẽ jykre mỹ vỹ?“ he tĩ. 4Kórég ãjag nỹtĩ, ãjag tỹ Topẽ ki ge jãvãnh nỹtĩn kỹ. Ũri ke kar vỹ kórég nỹtĩ gé, ãjag ri ke. Milagre venh ke tũ ãjag tóg nĩ. Vãsỹ Topẽ vĩ tó tĩ ũ tóg nĩgtĩ, hã vỹ: Jonas, he mũ. Jonas tỹ nén ve ja ẽn ri ke hã ve jé ãjag tóg ke mũ, ũri,” he tóg, Jesus ti. Kỹ tóg ag ré kỹ tĩ mũ sir.
Fermento kãme ũ
(Mc 8.14-21)
5Kỹ tóg ti mré mũ tĩ ag mré tĩ mũ, goj nig mág kafã ũ ra. Tá junjun kỹ ag tóg ẽmĩ to jykrén mũ sir. Kã jatun kỹ ag tóg mũ ja nĩ. 6Kỹ Jesus tóg tag to ag kanhrãn mũ. “Fariseu mré Saduceu ag tỹ fermento há kamẽg nĩ,” he tóg mũ.
7Kỹ ag tóg jagnẽ mỹ: “ti tỹ ẽg tỹ ẽmĩ mãg tũ ẽn tó hỹn,” he mũ.
8Hã ra Jesus tóg ki kanhró nĩ, kỹ tóg ag mỹ: “inh ki ge há han tũ ãjag tóg nĩ ver. Hã kỹ ãjag tóg jagnẽ mỹ: “ẽmĩ tũ mỹ',” he mũ. 9Ver tóg ãjag tỹ to jykrén tũ tĩ'. Ẽmĩ tỹ 5 (ke) ẽn mĩ ẽkrén nĩ. Ũ tỹ 5 mil (ke) ag tóg ko kãn, hã ra tóg kén, ag kar tỹ ko mũ ra. Ti ke hỹn kẽj tỹ hẽ ri ke fãn?“ he tóg. Kỹ ag tóg ti mỹ tó mũ sir. 10Kỹ tóg ag mỹ: “jo ẽmĩ tỹ 7 (ke) ẽn ti, ũ tỹ 4 mil (ke) ag vỹ kó, hã ra tóg kén mũ gé, ag kar tỹ ko mũ ra. Ti ke hỹn kẽj tỹ hẽ ri ke fãn?“ he tóg. Kỹ ag tóg ti mỹ tó mũ gé sir. 11Kỹ tóg ag mỹ: “kỹ inh vĩ to jykrén nĩ,” he mũ. “Ẽmĩ tó tũ sóg nĩ. Fermento pẽ tó tũ sóg nĩ gé. To jykrén há han nĩ, ha mẽ. Fariseu mré Saduceu ag tỹ fermento há kamẽg nĩ,” he tóg, Jesus ti.
12Kỹ ag tóg vãhã to jykrén há han mũ sir. Ti tỹ fermento pẽ tó pijé'. Ti tỹ Fariseu mré Saduceu ag jykre tó ja vẽ. Ag jykre régre nỹtĩ hã to tóg: “ẽn kamẽg nĩ,” he ja nĩ, Jesus ti.
Pedro tỹ Jesus kãmén
(Mc 8.27-30; Lc 9.18-21)
13Kỹ Jesus tóg ẽmã tỹ Cesaréia Filipe ra tĩ mũ. Kỹ tóg ag mỹ: “tỹ sóg ẽprã ke fi kósin nĩ. Kỹ ag iso hẽ ri ke tĩ?“ he mũ.
14Kỹ ag tóg ti mỹ. “ũ ag tóg ã to: “João Batista vẽ,” he tĩ. Jãvo ũ ag tóg: Elias vẽ, he tĩ. Jãvo ũ ag tóg: Jeremias vẽ, he tĩ gé, jãvo ũ ag tóg: Topẽ vĩ tó tĩ ũ vẽ, he tĩ gé,” he mũ.
15Kỹ tóg ag mỹ: “ag jãvo ãjag hẽ ri ke tĩ, iso?“ he mũ.
16Kỹ Simão Pedro tóg ti mỹ: “tỹ ã Cristo nĩ. Topẽ kósin vỹ tỹ ã nĩ. Ũn rĩr nĩ ẽn kósin vỹ tỹ ã nĩ,” he mũ.
17Kỹ Jesus tóg ti mỹ: “Simão', João kósin',” he mũ. “Ẽprã ke tỹ ã mỹ tó pijé', inh jóg tỹ kanhkã tá nĩ ẽn tỹ ã mỹ tó vẽ. Hã kỹ tóg ã ve há han mũ, Topẽ ti,” he tóg. 18“Ha mẽ, tỹ ã Pedro nĩ, hã vỹ: pó, he mũ. Pó tag kri sóg isũ han mũ, tỹ ĩn ri ke ẽn, hã vỹ: “ã tỹ ag mỹ inh vĩ tó tugrĩn ag tóg inh ki genh ke mũ,” he mũ. Kỹ ũ tỹ inh ki ge kỹ nỹtĩ ag vỹ tỹ Topẽ ĩn ri ke nỹtĩ. Ag fár tỹ tũ' he mũ ra ag tóg rĩnrĩr mãn ke mũ. Tũ' henh ke tũ ag tóg nĩ. 19Ẽprã ke ag vỹ kanhkã ra mũnh ke mũ, ã vĩ ki. Ã hã mỹ sóg ti nón jafã finh ke mũ sir, save ti. Kỹ ã tỹ ũ mỹ: “kanhkã ra tĩg jé ã tóg ke mũ,” hen kỹ tóg ra tĩg mũ. Kỹ ã tỹ ũ mỹ: “kanhkã ra tĩg ke tũ ã nĩ,” hen kỹ tóg ra tĩg ke tũ nĩ,” he tóg, Pedro mỹ.
20Kỹ tóg ti mré mũ tĩ ag tỹ ti kãmén kamẽg mũ ver. “Ker ũ mỹ sỹ tỹ Cristo nĩ tó hẽ'“ he tóg mũ ag mỹ.
Jesus tỹ ti ter ke tó vén
(Mc 8.31–9.1; Lc 9.22-27)
21Kỹ tóg komẽr hã ti mré mũ tĩ ag mỹ ti jagtar ke kãmén mũ. “Kãnhmar sóg Jerusalém ra tĩg mũ ha,” he tóg. “Tá sóg hã ra jagtar ke mũ. Kófa ag vỹ iso kórég nỹtĩnh mũ, ha vem nĩ, Topẽ tũ to pã'i ag, Topẽ vĩ to ẽg kanhrãn tĩ ag ke gé. Ag tỹ isén ke vẽ, hã ra sóg kurã tãgtũ ki rĩr mãn ke mũ,” he tóg, Jesus ti.
22Kỹ Pedro tóg ti pin kỹ ti mỹ: “Senhor, Topẽ jé ã jy nĩgãn, ã tỹ ã jagtar ke tag vég tũ nĩ jé,” he mũ.
23Hã ra Jesus tóg vẽsỹjãm ẽvãnh kỹ ti mỹ vĩ tar han mũ sir, ti to jũ kỹ. “Kutĩg, Satanás,” he tóg, Pedro mỹ. “Isỹ Topẽ vĩ mranh han sór ã tóg mũ. Ã pijé Topẽ jykre tó mũ'. Ẽprã ke jykre vẽ, ã tỹ inh mỹ nén tó mũ tag ti,” he tóg.
24Kỹ tóg ti mré mũ tĩ ag mỹ: “ãjag tỹ inh mré kãmũ kỹ tóg há tĩnh mũ,” he mãn mũ. “Kỹ ãjag jykre tovãnh nĩ, ãjag tỹ isũ hã han jé. Ha vé, ag tỹ inh krunh tỹ inh kri fi kỹ sóg tĩg ke mũ, ag tỹ to isa kỹ isén jé, ha vem nĩ. Vẽnh nenh ke tũ sóg nĩ. Isỹ tag han ri ke han nĩ, ãjag tỹ inh mré mũ sór kỹ,” he tóg. 25“Ãjag tỹ ãjag jykre hã han kỹ ãjag tóg nũgme ki vár ke mũ. Jãvo ãjag tỹ isugrĩn ãjag jykre tovãnh kỹ ãjag krenkren ke mũ, ãjag kãgter ke mũ hã ra. 26Hẽn ri ke mũn ãjag hỹn ẽprã nén ũ há kar ve sór mũ, hã ra ãjag kuprĩg vỹ vãfor ke mũ. Kỹ tóg kórég nỹ. Ẽg tỹ ne tỹ ẽg kuprĩg kajãm ke tóg tũ tĩ, ẽg tỹ ti ve mãn jé,” he tóg. 27“Tỹ sóg ẽprã ke fi kósin nĩ. Kãtĩg mãn jé sóg ke mũ, kanhkã tá, isỹ jẽgnẽ jafã ag mré, inh jóg tỹ isỹ ũn mág han kỹ. Kỹ sóg vẽnh kar mỹ ag tỹ nén han ja ẽn kajãm ke mũ. 28Ha vé, ki hã sóg tó mũ. Ãjag kã mĩ ũ ag tóg Topẽ tỹ tỹ ẽg pã'i nĩ venh ke mũ, ag ter ke to hã, tag ki ẽg mré nỹtĩ ũ ag. Ẽprã ke fi kósin ẽn ve jé ag tóg ke mũ, ti tỹ tỹ pã'i nĩ ti. Inh hã vẽ,” he tóg, Jesus ti.
လက်ရှိရွေးချယ်ထားမှု
Mateus 16: kgp
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
