Luk 6
6
Zisɔs ɛnɛ alɛ Ɔkʉ kɛ ife yɛyeŋena
1Kɛ ife ɛmɔ yɛyeŋena, Zisɔs nɛ vɛnʉl vɛ oyeghe nɔnʉn owoo zaa kɛ ɛfɛnda. Vɛnʉl vɛ oyeghe nɔnʉn okese asiamɛ ayɛ asaŋgɛ ayɛ ɛnalɛ, ɔpʉsʉla yaa. 2Vɛnʉl vɛ Falasi ofii vo ala, “Ini nɛyele ɔmanɛ kɛɛ obe atɛna kɛ ife yɛyeŋena?”
3Zisɔs akaŋɛ navo ala, “Nɛ̂yegh man kɛ oŋgwe wʉ Ofilikpamɛ, ɔmanɛ kɛɛ Devit âyeli kɛ ɔkambɛlɛ wʉ izonu ɛ̂nɔŋgʉ ɔn nɛ ɔlʉŋgʉ ɔna ga? 4Ndalɛsɛ âza kɛ itimbe iyɛ Ofilikpamɛ, atɛŋɛ ɛkandɛghɛ kɛɛ ɔmalɛ, aya wʉ kɛlɛ ɔnʉl wʉ asala Ofilikpamɛ cas ɛnɛ alɛ nɛ âya. Ana kpaa vɛnʉl vɛ ɔ̂lɛ ɔlʉŋgʉ.” 5Saŋ Zisɔs akaŋɛ navo ala, “Kɛlɛ ɛmɛ, Wanɛ wʉ Ɔnʉlʉ, ɛnɛ mɛlɛ Ɔkʉ wʉ ife yɛyeŋena.”
Zisɔs akʉs kɛ ife yɛyeŋena
6Kɛ ife yidi yɛyeŋena, Zisɔs aza kɛ ɛca iyɛ vɛ Zu, âlɛ kɛ iteena. Ɔnʉmbʉsʉ wudi âlɛ fini wʉ ovoghu ɔnaghɛ kɛɛ ayana kôgusuwu. 7Vɛ Falasi nɛ vɛnʉl vɛ otee obe oliye itind yɛ váwa ɔn ɛkaŋɛ, asɔ ɔvɛl asi kɛ ɔn wʉ vátii ikil yɛ akʉs kɛ ife yɛyeŋena. 8Kpa sɛ Zisɔs âcili ye ɔmanɛ kɛɛ otese, akaŋɛ nɛ ɔnʉl wʉ âgusuwu ovoghu wɔɔ ala, “Mʉwa ɛsɛla, nɛ wʉ́coolu ndalɛsɛ ɔmɔnɛmɔ áyen kawe.” Amʉwa ɛsɛla, acoolu fini.
9Saŋ Zisɔs akaŋɛ navo ala, “De mɛfii anu kɛɛ fɛna ɛnɛ obe akɔla kɛ ife yɛyeŋena: Wʉ wáyel kasɛɛ aka wʉ wáyel ɛcɔcɔɔ, wʉ wáwal ɛyɛma aka wʉ wácɔ?”
10Ayen vo omwem, saŋ akaŋɛ nɛ ɔnʉmbʉsʉ wɔɔ ala, “Sambɛl ovoghu kuŋgughu”. Ayel asɔ, ovoghu ɔnaghɛ kɔkʉna caca. 11Kpa asɛma acɔ vɛ Falasi nɛ vɛnʉl vɛ otee obe kaka, saŋ ohee iyu nɛ valindi sɛ váyel nɛ Zisɔs.
Zisɔs acɔw acɛnda likwoŋ nɛ afaalɛ
12Kɛ ɔkambɛlɛ wɔɔ, Zisɔs aza kɛ ɛkɔŋg wʉ aveli, aca ife imem kɛ ivelena kɛ nɛ Ofilikpamɛ. 13Wʉ ɔsʉ ɔ̂wʉʉ, Zisɔs ayɛla vɛnʉl vɛ oyeghe nɔnʉn, acɔw vo likwoŋ nɛ ɔfaalɛ, ayel vo acɛnda ana: 14Saimʉn (wʉ aya ɔn ite ala Pita), wanɛŋgwan ɔna Andʉlʉ, Zemis, Zɔnɛ, Filip, Batolomi, 15Matiyu, Tɔmas, Zemis (wanɛ wʉ Afiyus), Saimʉn wʉ agɔla ala Wanɛ wʉ alɛ nɛ ɛsɛma, 16Zudas (wanɛ wʉ Zemis), nɛ Zudas Ɛskalɔt wʉ ásia Zisɔs.
Zisɔs ate vɛnʉl ndalɛsɛ válɛ vɛnʉl vɛ oyeghe nɔnʉn
17Wʉ âseni va kɛ ɛkɔŋg, acoolu kɛ oci wʉ ɔlɛ lendeŋ. Imbule yɛboona yɛ vɛnʉl vɛ oyeghe nɔnʉn ɛ̂lɛ fini nɛ icene wʉ imbule yɛ ɛnʉlʉ yɛ îsime kɛ ɔswaŋ ɔmɔnɛmɔ wʉ Zudiya, kɛ Zelusalem, nɛ kɛ ɛswaŋ iyɛ Taya nɛ Sidon iyɛ ɛlɛ kɛ okulu ɛzɔlʉ. 18Vɛnʉl vee ɔva wʉ váŋgwa sɛ Zisɔs ávɔl ɔtɛlɛ nɛ sɛ ákʉs vo kɛ vawaŋgɛ ovovu. Akʉs kpaa vɛnʉl vɛ mʉndʉ vacɔcɔ ɔna vo ɛcian. 19Vɛnʉl omwem ɔkana wʉ vápel ɔn kici yɛ ɔtavɛ osime kɛ ɛyʉl ɛna, ɔkʉsa vɛnʉl vɛ opel ɔn. 20Saŋ Zisɔs afiil kɛ nɛ vɛnʉl vɛ oyeghe nɔnʉn, akaŋɛ ala,
“Vicowenavɛ ayɛ nɛ anu vɛnʉl vɛ ɛcianɛvɛ,
kici yɛ Ɔtʉlʉ vɛ Ofilikpamɛ avɛ kɛlɛ vunuvu.
21Vicowenavɛ ayɛ nɛ anu vɛ nɛlɛ nɛ izonu kɛ aŋgiee,
kici yɛ náya nɛ́yile.
Vicowenavɛ ayɛ nɛ anu vɛ nɛliaa aŋgiee,
kici yɛ náse.
22Vicowenavɛ ayɛ nɛ anu ikil yɛ vɛnʉl ɔcɔna anu,
ikil yɛ ɔtɛna anu, ikil yɛ ɔcwa anu,
nɛ ikil yɛ ɔtɔwa vɛnalɛvɛ yɛcɔcɔ kɛ ito yunuvu,
kici ɛyamɛ Wanɛ wʉ Ɔnʉlʉ.
23“Sɛgha kɛ ife yɔɔ, nɛ wʉ́vine kpaa, kici yɛ wawʉ nɛ vicowenavɛ yɛboonavɛ kɛ ɔtalɛ-atʉlʉ. Kici yɛ kɛlɛ asɔ ɛnɛ vɛziavɛ ovovu ôyeli nɛ vɛnʉl vɛ ɔtɔwa kici yɛ Ofilikpamɛ.
24“Kpa náya ɛcian, anu vɛ nɛlɛ nɛ vɛnalɛvɛ,
kici yɛ nɛ̂ya ye ɛyɛma.
25Náya ɛcian, anu vɛ nɛya yile kɛ aŋgiee,
kici yɛ nálɛ nɛ izonu.
Náya ɛcian, anu vɛ nɛsee kɛ aŋgiee,
kici yɛ nália, nɛ kákɔl anu ɛyʉl.
26Náya ɛcian, ikil yɛ vɛnʉl omwem ɔtɔwa kasɛɛ kɛ ito yunuvu,
kici yɛ asɔ ɛnɛ vɛziavɛ vunuvu vakʉ ɔlɛ-yeli nɛ vɛnʉl vɛ ɔfiaa ala vo ɔtɔwa kici yɛ Ofilikpamɛ.
Teŋgi nini vɛnʉl vɛ ɔcɔna anu
27“Kpa kɛ nɛ anu vɛ nɛtambɛla kan namɛ, mɛkaŋɛ mɛla: Teŋgi nini vɛnʉl vɛ ɔcɔna anu, yele nini asɛɛ kɛ navo. 28Cowu nini vɛnʉl vɛ omowule anu imbus, vele nini kɛ vɛnʉl vɛ ɔnaa anu ɛcian. 29Ikil yɛ ɔnʉl ata we ikowu kan ɔnanɛ kiyee, nɛ wʉ̃fiili te ɔn kidighi kwɔɔ kpaa. Ikil yɛ ɔnʉl atɛŋɛ okuu wuwu wʉnelena, nɛ wʉ̃de ɔn nɛ átɛŋɛ wʉ kɛ atɛŋ kpaa. 30Na ɔnʉl ɔmɔnɛmɔ wʉ afii we ɔmanɛ; ikil yɛ ɔnʉl atɛŋɛ ɔmanɛ kuŋgughu, x-wama-fiye ɔn ga. 31Yeli nɛ vɛnʉl vedivi ndalɛsɛ wʉlii wʉla vo kpaa õyeli nawe.
32“Ini icowenavɛ ɛnɛ nákol, ikil yɛ nɛteŋg cas kɛlɛ vɛnʉl vɛ oteŋg anu? Masɛ vɛnʉl vɛ oyele ɛcɔcɔɔ kpaa oteŋgē vɛnʉl vɛ oteŋg vo. 33Ikil yɛ nɛyele kasɛɛ kɛ nɛ vɛnʉl vɛ vo kpaa oyele kasɛɛ kɛ nɛ anu, ini icowenavɛ ɛnɛ nákol? Masɛ vɛnʉl vɛ oyele ɛcɔcɔɔ kpaa oyele asɔ kɛ nɛ valindi. 34Ini icowenavɛ ɛnɛ nákol, ikil yɛ nɛpɔla kɛlɛ vɛnʉl vɛ nɛtes anu ala vákɔl anu? Masɛ vɛnʉl vɛ oyele ɛcɔcɔɔ kpaa, ɔpɔlā valindi kici yɛ vo kpaa otes ala vákɔl vo ɔmanɛmanɛ. 35Teŋgi nini vɛnʉl vɛ ɔcɔna anu, yele nini kasɛɛ navo, pɔla nini vo nɛ náma-tese wʉ nágbaal ga. Asɔ nɛ vicowenavɛ yunuvu vɛ́lɛ viboonavɛ, nɛ nɛ́lɛ ɔvɔnʉ vɛ Ofilikpamɛ wʉ obo ofo, kici yɛ oyelē asɛɛ masɛ kɛ nɛ vɛnʉl vɛ ɔsɛgha ɔn ga nɛ vɛnʉl vɛ ɔcɔ iyeli. 36Kɔl nini isonu kɛ nɛ vɛnʉl, ndalɛsɛ Ɛziavɛ wunu akɔla isonu.
Itunena vɛnʉl vedivi
37“x-Natune nini ɔnʉl ga, nɛ ɔmɔ átune anu ga. x-Nakaŋa nini anu ala ɔnʉl ayel cɔ ga, nɛ ɔmɔ ákaŋɛ nɛ anu kpaa asɔ ga. Gife nini vɛnʉl, nɛ Ofilikpamɛ ógife anu kpaa. 38Kie nini vɛnʉl vedivi, nɛ Ofilikpamɛ ókie anu kpaa ɔkal wʉsɛɛ, wʉ ɔwa nyɛla, nɛ ósuwe, nɛ vɛ́dʉŋgʉla we kɛ akasɛ. Kici yɛ kɛlɛ ɔkal wʉ nɛkala vɛnʉl vedivi, ɛnɛ Ofilikpamɛ ɔ́kal anu.”
39Saŋ Zisɔs atɛfa vo kpaa ɛkan yee: “Ipilesi ábɛ nɛ áte ipilesi wudi ɔwaa? Ikil yɛ ayel asɔ, nɛ vo omwem ɔ́gba kɛ ifel ga? 40Ɔnʉl wʉ ayeghe afo ɔnʉl wʉ ate ga, kpa ɔmɔnɛmɔ wʉ ayegh sɛva-sɛva, nɛ ábi ndalɛ ɔnʉl wʉ ate ɔn.
41“Âyel naa ɛnɛ wʉyene kɛlɛ icinighi kɛɛ ɛlɛ kɛ isi iyɛ wanɛŋgwan wuwu, saŋ wʉka-wa ɛkʉ nɛ igbinde wʉ alɛ kɛ iyuwu isi ga? 42Kâyel naa nɛ wʉkaŋɛ nɛ wanɛŋgwan wuwu wʉla, ‘Wanɛŋgwan, de nɛ mɛ́simi icinighi kɛɛ ɛlɛ kɛ isi iyuwu kwɔɔ,’ wʉ owe ɛŋga wʉka-simi man igbinde wʉ alɛ kɛ iyuwu isi ga? Owe ɛfiaa-fiaa wʉ ɔnʉlʉ, mbaa nɛ wʉ́simi igbinde wʉ kɛ isi iyuwu, sɛnɛ wʉ́yen gbaŋgaŋ wʉ wásimi icinighi kɛɛ isi iyɛ wanɛŋgwan wuwu.
Ɛtɛghɛ nɛ aduŋgu ana
43“Ɛtɛghɛ kɛsɛɛ kiyumwe aduŋgu ayacɔcɔ ga; ɛtɛghɛ kɛcɔcɔ kiyumwe aduŋgu ayasɛɛ ga. 44Asɔ ɔkɛva ɛtɛghɛ ɛmɔnɛmɔ kɛlɛ kɛ aduŋgu ana. Ɔmɔ ávɔŋga aduŋgu ayasɛvana kɛ ɛtɛghɛ kɛɛ ɛlɛ nɛ asaŋa ga. 45Ɔnʉl wʉsɛɛ ayelē vɛnalɛvɛ yɛsɛɛ kɛlɛ yɛ avɛl kɛ ɛsɛma ɛna. Ɔnʉl wʉcɔcɔ ayelē ɛcɔcɔɔ kɛ vɛnalɛvɛ yɛcɔcɔ yɛ avɛl kɛ ɛsɛma ɛna. Kici yɛ ɔnʉl atɔwā kɛlɛ ɔmanɛ kɛɛ alɛ kɛ ɛsɛma ɛna.
46“Ini nɛyɛla mɛ anu ala, ‘Ɔkʉ, Ɔkʉ,’ kpa nɛyele ɔmanɛ kɛɛ mɛkaŋɛ mɛla nɛ̃yeli ga? 47Ɔnʉl ɔmɔnɛmɔ wʉ ava kan namɛ, saŋ aŋgwa amʉ ayamɛ, ayele ɔmanɛ kɛɛ mɛkaŋɛ, máte anu ndalɛsɛ alɛ: 48Awʉ kɛ ndalɛ ɔnʉl wʉ ikil yɛ ala ɔn áma itimbe, nɛ átime sen tɛla kɛ ɛyaŋ, nɛ áwa otiŋi kɛ ɔvasɛ. Ɔkambɛlɛ wʉ ɔvɛla ɔva, ɛzɔl íyiv, nɛ íwo za tus itimbe iyɔɔ, kpa nɛ ɛ́bɛ nɛ ísuwe ɛnɛ wʉ ísend ga, kici yɛ ɔma ɛnɛ sɛva-sɛva. 49Kpa ɔnʉl wʉ aŋgwa amʉ ayamɛ, saŋ ayel ɔmanɛ kɛɛ mɛkaŋɛ ga, awʉ kɛ ndalɛ ɔnʉl wʉ awa otiŋi wʉsɛɛ ga, kpa ama itimbe kɛlɛ kɛ ɛyaŋ wa. Ɔkambɛlɛ wʉ ɛzɔl itus itimbe iyɔɔ, nɛ ísend caca.”
လက်ရှိရွေးချယ်ထားမှု
Luk 6: Iceve-Maci
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
©️2024 Luke Initiative for Scripture Translation
