ဆာလံ 27:7-14

အို​ထာ​ဝ​ရ​ဘု​ရား၊ အ​ကျွန်ုပ်​အော်​ဟစ်​သော​အ​သံ​ကို နား​ထောင်​တော်​မူ​ပါ။ အ​ကျွန်ုပ်​ကို​သ​နား၍ ထူး​တော်​မူ​ပါ။ ငါ၏​မျက်​နှာ​ကို​ရှာ​ကြ​လော့​ဟူ​သော အ​မိန့်​တော်​ကို ရှေ့​တော်၌ အ​ကျွန်ုပ်​သည် သ​တိ​ပြု​လျက်၊ အို​ထာ​ဝ​ရ​ဘု​ရား၊ ကိုယ်​တော်၏​မျက်​နှာ​ကို​ရှာ​ပါ​မည်။ အ​ကျွန်ုပ်​ကို မျက်​နှာ​လွှဲ​တော်​မ​မူ​ပါ​နှင့်။ အ​မျက်​ထွက်၍ ကိုယ်​တော်၏​ကျွန်​ကို ပယ်​တော်​မ​မူ​ပါ​နှင့်။ အ​ကျွန်ုပ်​ကို ကယ်​တင်​တော်​မူ​သော​ဘု​ရား၊ ကိုယ်​တော်​သည် အ​ကျွန်ုပ်​ကို မ​စ​တော်​မူ​ဖူး​သည်​ဖြစ်၍၊ အ​ကျွန်ုပ်​ကို စွန့်​ပစ်​တော်​မ​မူ​ပါ​နှင့်။ ကိုယ်​မိ​ဘ​တို့​သည် အ​ကျွန်ုပ်​ကို​စွန့်​သော်​လည်း၊ ထာ​ဝ​ရ​ဘု​ရား​သည် အ​ကျွန်ုပ်​ကို ချီ​ယူ​တော်​မူ​မည်။ အို​ထာ​ဝ​ရ​ဘု​ရား၊ ကိုယ်​တော်၏​လမ်း​ကို အ​ကျွန်ုပ်​အား​ပြ​သ​သွန်​သင်​တော်​မူ​ပါ။ အ​ကျွန်ုပ်၏ ရန်​သူ​တို့​ကြောင့် ဖြောင့်​သော​လမ်း​ထဲ၌ အ​ကျွန်ုပ်​ကို ပို့​ဆောင်​တော်​မူ​ပါ။ မ​မှန်​သော​သက်​သေ​ကို​ခံ​သော​သူ​တို့​နှင့် ညှဉ်း​ဆဲ​ခြင်း​ငှာ၊ ပြင်း​စွာ​အ​သက်​ရှူ​သော သူ​တို့​သည် အ​ကျွန်ုပ်​တစ်​ဖက်၌ ထ​ကြ​သည်​ဖြစ်၍၊ ရန်​သူ​တို့​အ​လို​သို့ အ​ကျွန်ုပ်​ကို အပ်​နှံ​တော်​မ​မူ​ပါ​နှင့်။ အ​ကယ်​စင်​စစ် အ​သက်​ရှင်​သော​သူ​တို့၏ နေ​ရာ​တွင်၊ ထာ​ဝ​ရ​ဘု​ရား၏​ကျေး​ဇူး​တော်​ကို ငါ​တွေ့​မြင်​ပြီ​ဟု ယုံ​မှတ်​စွဲ​လမ်း​ခြင်း​ရှိ၏။ ထာ​ဝ​ရ​ဘု​ရား​ကို မျှော်​လင့်​လော့။ အား​ယူ၍ ရဲ​ရင့်​သော စိတ်​နှ​လုံး​ရှိ​လော့။ ထာ​ဝ​ရ​ဘု​ရား​ကို မျှော်​လင့်​လျက်​နေ​လော့။