Májiye 5
5
Yesu n'awaare ti hirij hu
1Yesu ajuka hahooja hondu fe, n'asiro ti hirij hu, abe n'ariiko#5.1 Kóŋkeyin, an af'áyemi ti kaliiken ésuk i, aŋ'ariiko éehamin.. Eriboora yeene ni katof kaŋaaboo. 2N'áyemi ti kaliiken ésuk i kareyi fe.
Keeemo ku ti katoofu ku
(Luk 6.20-23)
3Yesu n'aaniin:
—Atoof ti kéemeyie ku kaanuku kasawulasawulo Atambatun,
ábuki Jáyi joone jooniin ju!
4Atoof ti keeemo ku ti biyiy bu,
ábuki Atambatun kabuutooriin!
5Atoof ti kéeneenie ku,
ábuki Atambatun kawuniiin etaam i kéekini yo!
6Atoof ti kéemaŋie ku káhabanein káhinu b'Atambatun ámaŋie bu,
ábuki akina kawuniiin bo kafaman!
7Atoof ti kiŋki kayubiyen bakaaku,
ábuki Atambatun kayubiyeniin yooŋ!
8Atoof ti bakate ñúwejet ñeekuure ñu,
ábuki boko kajuku Atambatun!
9Atoof ti kiŋki kaŋes káhinu ésuk i keebukan,
ábuki Atambatun kajokiiin naane bakañio!
10Atoof ti kéehihinooree ku aŋarkeyi naane káhinahin naane Atambatun ámaŋie i,
ábuki Jáyi joone jooniin ju!
11«Atoof t'aruun kane ésuk i kálafatinuun, káhihinooruun, abe n'iŋi kajuus keesok t'aruun beejakut uŋu húuma hu. 12Kikawuun kutoof dómbokun, ábuki hisiibanu hómbokun hondu ti kanahanuun t'etiir. Múniyo iyu yooŋ e ésuk i káhihinoore fu *eyiŋana yite Atambatun kéegilanuun ku#5.12 A̱juk yooŋ 2 Híyiaate hu 36.16; Epotor i 7.52..
Misis mu ni meejaaŋe mu
(Mark 9.50; Luk 14.34-35)
13—Aruun ariemo fu misis mu tu kúŋgowulan ku. Misis ifi mija ayak abin áami míneenia, iŋkut mijam, buŋ bu muwaree fu káhinu meesooñ meejam? It'iŋki mijak bija tu doon fe. Mo káfiitenee, ésuk i eŋ'ebin ekak te mo.
14«Aruun ariemo fu meejaaŋe mu tu kúŋgowulan ku. Hikinu heenutee t'etiir hirij hiyinaat kánuusiee. 15Naane yooŋ ejaaŋana: an árifaariit ejaaŋana, abe n'árut yo n'ésiwo, bare aŋ'ánind yo ti kaasooru ku kaanuku yeejaaŋan keeemo ku t'enuuf i fe. 16Iyu yooŋ i meejaaŋe moonuun muware fu kajaaŋan ésuk i, kaanuku man ni kajuk meejake mamm'árihin, abe ni kasokoroor Faafuun eeemo u t'etiir.
Yesu n'awaare iŋ'ite Eluwa yite Moyis
17—Atum'ariene man íñje ibine kanuutan naane *Eluwa yite Moyis esoke i, ni báhamin bite *eyiŋana yite Atambatun. Ibinut kanuutan bo, bare kaanuku beesokee bu fe ni bibaj. 18Iisokuun bifeeneŋ bu: naane bufor bu biyak i bifiyo fe n'etaam i, núhuunu neehaŋe nu káteti fe ti beekiñjee bu ti kaawiit kite Eluwa i utu nútowuto hikee-kee, ayak abin áami yooŋ beesokee bu te yo fe bibaja. 19Iŋ'ite ho aamo fu an af'awas hutoof yooŋ eluwa yeehaŋe i káteti fe, abe n'aŋ'aliiken bakaaku kéehin naane akina, o káyemi araan u ti *Jáyi jite Atambatun. Bare an éejeŋgine eluwa i, abe n'aŋ'aliiken bakaaku kéehin naane akina, o káyemi an ómbokun ti Jáyi jite Atambatun. 20Íñje isok fee n'aruun: afut'aŋ'árihin naane Atambatun ámaŋie i arihaŋ *Efarisiyeŋ i *n'émuse yite Eluwa yite Moyis, at'ariyooso hikee ti Jáyi joone.
Yesu n'awaare ti kayiŋat ku
21—Arijamajam kaanuku bonde busokee fu sifaaf úne: «Atum'a̱yool húŋgowulan#5.21 Kafakan ku 20.13; Buluwa bu 5.17.; an af'ayool húŋgowulan, n'aŋ'ajoonanee.» 22Íñje bare eenuun: an fe eeyiŋate t'áwiyo, o kajoonanee. An af'aane áwiyo: «A̱yakut hikaw!», n'aŋ'ajee ne o ti sifaaf site ejoonana i. An n'aane áwiyo: «Esoŋ yendu!», n'aŋ'áfiitenee sambuun. 23Náami af'a̱ja *t'Enuuf ite Atambatun kaanuku á̱ahin *kaasarah *t'ataabul u tundu wúhinee, abe n'á̱baŋino kaanuku áwiyi ayiŋatayiŋat t'awe, 24a̱naŋ doon d'a̱ja du kasarah hágila ataabul u, abe n'a̱ja ariijab aribukan aruun n'áwiyi; a̱haban, n'aŋ'a̱batuko a̱aja á̱hin kaasarah kúuwe.
25«An af'aane eeja n'awe keejoonanuun, a̱moken ariijamoor aruun ti bítim bu. Káhinaate ii, an u n'aŋ'ásiki aja asaan ajoonana u, ajoonana u n'ásiki asaan esulaan i, abe n'aŋ'a̱kulee. 26Abe íñje isok fee n'awe: at'á̱nuutin hikee t'ekulu i, a̱jendan kajaamu bija t'érirem eraan i tej.
Yesu n'awaare tu huŋotu hu ni haare hu keeseñee ku
27—Arijamajam kaanuku bonde busokee fu: «Atum'a̱ŋot n'an ariseñeit#5.27 Kafakan ku 20.14; Buluwa bu 5.18..» 28Íñje bare eenuun: an af'aŋolool anaare, áhina kaahoofoor, ábuki aheeka eeŋot ne o tu búwejeto. 29Arko díkini daatos du ifi díkinineŋ n'a̱ney ti kaahoofoor, a̱nuutan do, abe n'á̱fiiten do akambee. Ahaŋ kajaku doon difeeneŋ nu dútowuto t'awe, bala á̱fiitenee enii ereyi fe sambuun. 30Arko emoŋii yaatos i ef'ékinineŋ n'a̱ney ti kaahoofoor, a̱faran yo, abe n'á̱fiiten yo akambee. Ahaŋ kajaku doon difeeneŋ nu dútowuto t'awe, bala enii ereyi fe eja sambuun.
Yesu n'awaare ti kahooru kite haare hu
(Májiye 19.9; Mark 10.11-12; Luk 16.18)
31—Busokeesok yooŋ kaanuku: «An af'ahoor anaar'o, awarowar kakiñju kaawiit kite káwufoor kaanuku karoŋut#5.31 Buluwa bu 24.1..» 32Íñje bare eenuun: an af'ahoor anaar'o t'ajokutee n'ániine, atiŋgo ti kaahoofoor kane arko eeseño t'ake. Abe an af'asa anaare eehooree, áhina yooŋ kaahoofoor.
Yesu n'awaare ti kawaatu ku
33—Arijamajam yooŋ kaanuku bonde busokee fu sifaaf úne: «Af'a̱waat, atum'a̱jeeŋoor, bare á̱hin doon d'a̱waate du hágila Atemit a̱ane awe káhinu do#5.33 Esaraha i 19.12; Kayuunoor ku 30.2; Buluwa bu 23.22-24..» 34Íñje bare eenuun: af'ariene aruun káhinu dike doon, atum'ariwaat hikee. Atum'ariene: «Iwaati bufor bu», ábuki Atambatun ondu bo ti híyiaate. 35Atum'ariene: «Iwaati etaam i», ábuki báakakum boone. Atum'ariene: «Iwaati Serusalem», ábuki hikinu hite Áyi u ómbokun u. 36Atum'a̱ane yooŋ: «Iwaati hikawam», ábuki a̱yinaat káhinu kaawani kifeeneŋ keefañj man yooŋ kéebaani. 37A̱ane kep «hee» kane arko hee, «aaa» kane arko aaa. B'a̱yak bu kasoku fe á̱wutiyen, ti Setani tu búnuutina.
Yesu n'awaare tu hunukan hu
(Luk 6.29-30)
38—Arijamajam kaanuku bonde busokee fu: «An af'ábuji díkin, doone du yooŋ duwareewar kábuju; abe an n'ábuji káaŋiiŋ, koone ku yooŋ kuwareewar kábuju#5.38 Kafakan ku 21.24; Esaraha i 24.20; Buluwa bu 19.21..» 39Íñje bare eenuun: an af'áhinuun beejakut, atum'arinukan. An af'ámiñi ti kaarofaŋ kaatos ku, a̱waso yooŋ éemiñi ti kaamay ku. 40An af'akalamei kaanuku éesik kájufa kúuwe, a̱waso yooŋ éesik éfartuus íiwe. 41Abe asulaan af'asejani aniŋee#5.41 Kóŋkeyin, esulaan i bakate ku *Rom, man yooŋ bakan keeemo ku t'éŋguur i káyinooni kanoŋkooran an eetoofiin u éeyitin wañ wooniin., eenoŋkoorani a̱aja simeetar seereeŋe éñjune, a̱ja seereeŋe súñjune súsuba. 42An eelawi dike doon, a̱wuno; abe an n'aani a̱maageno doon, atum'a̱teñeko.
Yesu n'awaare ti kámaŋioori ku n'enatoora i
(Luk 6.27-28,32-36)
43—Arijamajam kaanuku bonde busokee fu: «A̱warawar kámaŋi áwiyi húŋgowulan#5.43 Esaraha i 19.18., abe n'a̱huuf anatoora úuwe.» 44Íñje bare eenuun: árimaŋi enatoora yeenuun, abe n'arilaw bija ti kiŋki káhihinooruun. 45Iyu, n'aŋ'áriwufoor kaanuku aruun ariemo fu biñi bite Faafuun eeemo u t'etiir. Ábuki aŋ'áhin taanak toone téerumin ti keejake ku ni ti kéenafute ku, n'áhin yooŋ etiir i yéenubin ti kiŋki kanij ajakee ni kéenijaariit ku. 46Af'árimaŋi bakan kéemaŋiuun ku barebare, hiin hisiibanu h'arija fu kabaju t'Atambatun? Humuum *esaa yite búhal bu, iyu ifi káhin! 47Arko ebuke yeenuun barebare k'af'arisaaf, aŋ'ariene árihinahin doon dómbokun? Humuum *kéemeyiit ku Atambatun, iyu ifi káhin! 48Faafuun eeemo u t'etiir aŋ'akuur but; aruun yooŋ áriyemi naane akina#5.48 A̱juk Esaraha i 19.2; Buluwa bu 18.13..
လက်ရှိရွေးချယ်ထားမှု
Májiye 5: cwt
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 1999, Wycliffe Bible Translators, Inc. All rights reserved.
