Májiye 3
3
Sambatiis n'awaare ésuk i
(Mark 1.1-8; Luk 3.1-18; Saaŋ 1.19-28)
1Abaj simit, Sambatiis n'abin t'eramba yite *Súde, aŋ'awaare aane:
2—Ariwatanooro kinij koonuun keejakut ku, ábuki *Jáyi jite Atambatun júlohenno!
3Saaŋ aamo fu an u i *Esayi *ayiŋana ite Atambatun asoke u aane:
«O aamo fu an u aa ataŋk t'eramba i aŋ'aane:
“Arifare bítim bu bija t'Anahaan u,
árihino búhuhu beejoŋoore#3.3 Esayi 40.3.!”»
4Saaŋ aŋ'asiimo kaawañ keerokee ni bihan bite éŋgelem. Abe n'aŋ'ayit nibaŋ eewuuj no hikeejio#3.4 A̱juk 2 Bákayi ku 1.8.. Buhoofooro boone, kukus ni májiŋin. 5Náami bakate ku Serusalem, nu Súde ereyi fe, nu tu músuk meeemo mu inde kaayelu kite *Surdeŋ fe iŋi kaja kaŋaaboo. 6Iŋi kasok tu buhooŋu bakaaku wuhoofoor wi káhine wu, abe Saaŋ *n'aŋ'abosteiin ti kaayelu kiŋki kaane Surdeŋ.
7Hi Saaŋ ajuke hu kaanuku *Efarisiyeŋ keehooje *n'Esaduseyeŋ iŋi kabin te o kaanuku eebosteiin, n'aaniin:
—Ñuroon ñondu! Aañ me aanuun fu árinooni kateyi Atambatun, makamu hunak hoone hite Kajoonan ku húlohenno? 8Arinij ajakee, áriiwufoor kaanuku ariwatanooraa kinij koonuun keejakut ku. 9Atum'ariene man kaanu kite: «Uni fu bakañi *Aburaham» kúnooni kákinineŋ n'arifak i? Íñje isok fee n'aruun: Atambatun áyinooni káhinu bujuju bondu béeyemi biñi Aburaham! 10Hineemak hu hifaraa bija kafiitu ñunukanuk ñu ti kíjiŋ ku. Nunukanuk fe neebukut miriyaay meejake, no kafiitiee, abe ni nífiitenee ti sineemak su. 11Íñje, ibosteuunboste nu móhujo iŋi káwufoor kaanuku ariwatanoorawatanooro kinij koonuun. Bare ake bibin eehaŋam sembe. Ihaŋahaŋ káteti te o kaanuku íijendin sikaku soone. O kabosteuun nu Búwejet Beenabe bu, ni sineemak. 12Ondu ni káwuranu ku tu sumoŋio, abe o káwaajin bajal bu n'éhaafiin i. O kanaŋu bajal boone ti níhindaa noone. Bare éhaafiin i, o kásufu yo ti sineemak séeketaariit.
Kaboste kite Yesu
(Mark 1.9-11; Luk 3.21-22)
13Tu kunak kondu, Yesu n'ánuutin *Gálile eeja ti kaayelu kite *Surdeŋ. N'aja ti Saaŋ kaanuku *eebostoo. 14Saaŋ n'aŋes biteñeko. N'aano:
—Eeman awe a̱waram fu kaboste? N'a̱sooñ a̱bin t'íñje?
15Bare Yesu n'aano:
—Wáahin iye honde. Iyu i waaware fu káhinu man b'Atambatun ákandijene bu ni bibaj.
Náami Saaŋ eeene hee. 16Yesu abostee ahaban kep, n'ánuutin tu móhujo mu. Náami bufor bu bihaŋa bífeŋgino bija te o. N'ajuk Búwejet bite Atambatun nu búwanein naane búnokoorum bite húleebaan, abe ni bilelan te o. 17Kaaji ni kíhaminn t'etiir bufor bu keene:
—An onde aamo fu añi úuma i ímaŋie u. Te o ti hikawam hutoofe fu#3.17 A̱juk yooŋ Élookiin i 2.7; Esayi 42.1..
လက်ရှိရွေးချယ်ထားမှု
Májiye 3: cwt
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 1999, Wycliffe Bible Translators, Inc. All rights reserved.
