Matius 8
8
Nolingasan i Tulun di Rumanai i Kojuvanjo
(Mar. 1:40-45; Luk. 5:12-16; 17:12-14)
1Nga nokoruuk nopo dii i Yisus mantad siri kulud#8:1 kulud: kotud om oguu dii marong i tongotulun do moisusuut maja Disido. 2Nga kivaro iso tulun do rumanai i kojuvanjo do rinumikot siri di Yisus om singkotud dii si gotuvangJo, om kadisido, “Tuan, nong kouvanganNu, olingasan okui Dika,” ka.
3Om porolojono dii di Yisus i longonJo do minangama disido, om pitangar do, “KouvanganKui, olingasankono,” ka. Om pogkama di Yisus turus do nolingasan dii isido. 4Nga kadi Yisus, “Adano marong sangkaabarai di tongotulun isai-isai osomungannu. Nga ongoino pogi si di imam om ipoontongno disido ino kojuvannu, om mangaabar do, ‘Nolingasan okuno,’ kanto. Om manaakkono do duvo tinan tombolog di imam onuonnu do isogit maja diri nisuu di Musa di pogulu, supaya oilaan di tongotulun vokon do nolingasanko,” kadi Yisus.
I Kotua do Soujor Minokilingos di Yisus di Susuuonjo
(Mat. 13:42, 50; 22:13; 24:51; 25:30; Luk. 7:1-10)
5Ontok diri lumombus i Yisus mongoi siri Bandar do Kaparnaum, om kivaro dii iso kotua do soujor do mantad Vonuvo Ruum sinumamung di Yisus do mokilingos di susuuonjo. 6“Tuan,” kadi kotua do soujor, “kivaro susuuonku do au marong kataru do nokimai kojuvanjo om poingoodop isido maino soi valaiku,” ka.
7Nga kadi Yisus, “Mongoi Okui soi valainu do mongolingos di susuuonnu,” ka.
8“Nga Tuan,” kadi kotua do soujor, “okukuvaan oku dii poindakod Dikau si valaiku do okonko kotumi oku di kuasaNu. Nga tangaronNu noopo, supaya olingasan i susuuonku. 9Oilaanku do kivaro kuasaNu, do ioku nopo diti nga kivaro monguasa dogon. Om ioku diti nogi nga kivaro soujor do kuasawonku. Om onuu nopo ponuuanku diolo ongoion nopo iri isuuku. Nong ‘Ongoipo soi,’ kangku di kotiso, isido pun mongoi. ‘Ongoipo siti,’ kangku di koduvo, isido pun rumikot. Irad nogi dino i turiponku, onuu nopo ipavaalku disido nga vaalon,” kadi kotua do soujor.
10Om oirananno dii marong i Yisus do nokorongou di tinangar di kotua do soujor. Om kaDisido di tulun samvaja-vaja Disido do, “PatangaronKu marong dikovu iti, insan tulunpo do Israil nga aupo insan Oku korongou do kivaro kaparsayaan do irad dino kagajo. 11Mitangar Oku dikovu, do oguu tulun di okonko bansa Joudi rumikot do mantad siri kosilauon om siri kotonobon do muruk diaki tokou iIbraim, iIsak om i Yakub do mangakan saralom Kopomorintaan do Kinoringan. 12Nga ikovu nogi tulun Joudi do roiton tulun do porintawon di Kinoringan pataamon siri labus i otuvong marong, i pantok do songiadan om sangarit-ngarit i nipon diolo do oolian kasansara,” kadi Yisus. 13Om kadi Yisus di kotua do soujor, “Sabap do aparsayakoi irad diri nokomoinu, ulino pogi do nolingasanno dii i susuuonnu,” ka. Ontok diri nakatangar i Yisus irad diri, om ontoki diri do nolingasan i susuuonjo si valaijo.
Oguu i Tulun Liningasan di Yisus
(Mar. 1:29-34; Luk. 4:38-41)
14Korikot dii i Yisus siri valai di Pitrus si Bandar Kaparnaum, naantangan dii Disido i tivanon di Pitrus do poingodop kangkagan. 15Kamawo dii di Yisus iri longon di tongondu, turus do nolingasan, om tungagno dii isido do mongoi muup do papaakan doi Yisus.
16Kotonob nopo dii i tadau om ongoino dii i tongotulun do mongovit di tongotulun rinosukan do rogon om i tulun do au kataru do pokilingasan di Yisus. Om isoi i tinangar di Yisus minonunsub di tongorogon, om nolingasan Disido i tongotulun au kataru. 17Iri nopo nolingasan di Yisus i tongotulun dii nga porikot di tinangaran di kinomoi di nabi Yasaya, i popolombus di tinangaran do Kinoringan di pogulupo, do irad diti, “Isidono sinumanganu do koluajan om kasangkat do toruol tokou,” ka.#Antangai Yasaya 53:4.
Ponudukan Nong Potingkukuro i Tongotulun di Uvang Maja di Yisus
(Luk. 9:57-62)
18Kaantangai nopo dii di Yisus do noliputan Isido di tongotulun do oguu marong, om ponuuno dii Isido diri tongotulunJo posodia do, “Sumondipau tokou,” ka. 19Nga kivaro iso tulun monunuduk do Undang-undang Ugama do Joudi do rinumikot mitangar di Yisus, do kadisido, “Guru, maja oku daa Dika inombo noopo i ongoionNu,” ka.
20Nga jawapno dii i Yisus disido do ka, “Iri nopo i tongodupot irad di kaakaa nga kiluvang, om i tongotombolog nga kirumuni. Nga Ioku nopo i Sinumiliu do Tulun om auso pantok do ingkojodon om odopon,” kadi Yisus.
21Kivaropo kavagu iso tulun di Yisus do mitangar Disido do maja daa, do kadisido, “Ba Tuan, nga uli okupo. Apataipo iamoku#8:21 iamo: iapa om olobong om maja oku nogi Dika,” ka.
22Nga jawapno dii i Yisus do ka, “Kayono, maja Dogo maino. Isaai nopo i tulun di aupo nakaanu do kovijaan do auso koovion om irino i mongolobong diri tulun di napatai,” ka.
Minoningkod i Yisus diri Sarup om i Umbak
(Mar. 4:35-41; Luk. 8:22-25)
23-24Om sakono dii i Yisus om i tongotulunJo si talud do sumondipau di botung tagajo. Nga ontok nopo di sumondipau iolo, nokoodop i Yisus siri talud. Om tigogi do sinumarup do ologod marong, om i vaig nga kiumbak do navajaan di sarup gosob do oruaino noponu do vaig iri talud diolo do nolimpakan do umbak. 25Om sumurauno dii i tongotulunJo, om ongoiono dii diolo posikai i Yisus do, “Posikno, Tuhan. Uupai ikoipo do matai tokouno dii diti!” ka.
26Nga kadi Yisus diolo di koposik, “Nokokuro do rumosi kou? Aatuk-atukpo dii dikovu do au marong aparsaya kou Dogon!” ka. Om tungagno dii i Yisus om pitangarno dii do potingkod marong di sarup om i umbak, om turus tinumingkod gosob do linumomomno#8:26 linumomom: minondod dii kavagu iri vaig.
27Nga kasangkat diolo nga osumboijanan dii om moitatangar dii iolo do, “Onu do tulun Isido diti, do i sarup om i umbak nga mikuboobojo do tangaranJo!” kadiolo.
Sinunsub di Yisus i Rogon si Duvo Tulun
(Mar. 5:1-20; Luk. 8:26-39)
28Korikot nopo dii oi Yisus siri sondipau siri Vonuvo Gadara, om kotindal mantad si talud, kivaro duvo tulun rinosukan do rogon do mantad siri kalabangan sinumamung Disido. Orongit marong iri rinosukan do rogon diri gosob do pantok diri nga auso kobulun tulun tumalib. 29Om gijakno dii iolo do ka, “Uu Tanak di Kinoringan! Kukuroyon ikoi Dika? MamataiKono naku dagai do aupo orikot i Tadau Kopongukuman?” kadiri tulun rinosukan do rogon.
30Nga nuka do au nogi songkuro osodu mantad pantok diri kivaro oguu marong vogok sonsungal-sungal mangakan. 31Nga pokitulungno dii marong i tongorogon di Yisus do, “Nong sunsubon ikoi Dika, potopiko ikoi silo tongovogok,” kadi tongorogon.
32Om suuo nopo dii di Yisus iolo, “Pogiduno silo,” ka. Om labusno dii iri tongorogon mantad siri tulun do tumopik si vogok. Nga korosukai nopo dii iri tongovogok di rogon om kinam-kinampo dii i tongovogok diri do santangkus-tangkus#8:32 santangkus-tangkus: songundak-undak rumuuk siri kurimbang do tasavat do lumavog siri vaig gosob do napatai kasangkat.
33Nga kaantangai nopo dii di tongotulun momimiara di vogok, om piogono dii iolo mogidu do muli siri bandar do mangaabar di tongotulun do nongapatai iri tongovogok om nolingasan iri duvo tulun rinosukan do rogon. 34Om korongou nopo dii i tongotulun siri bandar diri i inabaran diolo, om ongoino dii kasangkat diolo rumomut si di Yisus. Kosomungai nopo dii diolo i Yisus om mokitulung dii marong iolo Disido supaya mogidu Isido mantad siri vonuvo diolo.
လက်ရှိရွေးချယ်ထားမှု
Matius 8: LabukPKV
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 1995, Wycliffe Bible Translators, Inc. All rights reserved.
