မ︀တ︀်တ︀ႄး 4
4
လ︀ွင︀်ႈꩡ︀ဝ်ႛယ︀ေꩬ︀ုမ︀ႆ︀ႛ ၵ︀ုꩫ︀်ꩬ︀ူင︀်က︀ဝ်း
(မ︀ၢက︀ု 1.12,13; လ︀ုက︀ႃ 4.1-13)
1ဝႆ︀ၢးဢ︀မ︀ႂ်း ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛ ဢ︀ွꩫ︀်ႈက︀ႃထိူꩫ︀်ꩭႅင︀်ႛꩬ︀ီ ꩭႂ်ႛၵ︀ုꩫ︀်ꩬ︀ူင︀်က︀ဝ်းဢ︀ူ။ 2ဢ︀မ︀ႂ်းမ︀ႆ︀ႛ ꩬ︀ီꩬ︀ိပ︀်ၵ︀ိုꩫ︀်းꩬ︀ီꩬ︀ိပ︀်ဝꩫ︀်း ꩭႅတ︀်ႉတ︀ွင︀်ႇမ︀ႃးက︀ီး ꩡ︀ဝ်ႛယ︀ေꩬ︀ုတ︀ွင︀်ႇမ︀ႆ︀ႛလ︀ူင︀်မ︀ႃးꩫ︀မ︀်။ 3ꩫ︀ႆ︀ႇမ︀ႆ︀ႛ ၵ︀ုꩫ︀်ꩬ︀ူင︀်ꩫ︀ႆ︀ႇ ꩡ︀ဝ်ႛယ︀ေꩬ︀ုမ︀ႆ︀ႛမ︀ႃးꩬ︀ီ “မ︀ႂ်းꩡ︀ဝ်ႛပ︀ီꩫ︀်ႈၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛက︀ီး ꩭိꩫ︀်ꩫ︀ႆ︀ႇမ︀ႆ︀ႛ ဢ︀မ︀ိင︀်းꩭႂ်ႛꩬ︀ီ ဢ︀ဝ်ႈပ︀ီꩫ︀်ႈၵ︀ဝ်ႛမ︀ုꩫ︀်းလ︀ႃး” ꩫ︀ဝꩫ︀်ႇ။ 4ꩡ︀ဝ်ႛယ︀ေꩬ︀ုယ︀ႃႇ “က︀ျမ︀်းလ︀ိက︀်ႉမ︀ႆ︀ႛ
“က︀ူꩫ︀်းꩫ︀ꩫ︀ႆ︀ႇ က︀ိꩫ︀်ႈၵ︀ဝ်ႛꩬ︀ီꩫ︀ႆ︀ၢႈ ဢ︀ူꩵ︀ႈꩫ︀ႆ︀ႛ။
ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛ က︀ူႈဢ︀ꩫ︀်ႈမ︀ႆ︀ႛပ︀ိုင︀်ႈဢ︀ိင︀်ႈꩬ︀ီ ဝႃႈဢ︀ူꩫ︀မ︀်” ” ꩫ︀ဝꩫ︀်ႇ။
5-6င︀ႆ︀းက︀ီး ၵ︀ုꩫ︀်ꩬ︀ူင︀်ꩫ︀ႆ︀ႇ ꩡ︀ဝ်ႛယ︀ေꩬ︀ုမ︀ႆ︀ႛ ꩭွင︀်ႇက︀ႃဝီင︀်းယ︀ေရ︀ုꩬ︀လ︀ိမ︀်ꩬ︀ီ က︀ꩫ︀်ႛꩫ︀ိူဝ်ꩡ︀ိက︀်ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ꩭႂ်ႛꩬ︀ဝ်းယ︀ဝ်ႇက︀ီး
“ “ၸ︀ြႃးပ︀ီꩫ︀်ႈꩡ︀ဝ်ႛ ၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်မ︀ႆ︀ႛꩡ︀ႂ်ႇꩬ︀ီ မ︀ႂ်းမ︀ႆ︀ႛတ︀ီꩭႂ်ႛမ︀ိုင︀်ႇꩫ︀မ︀်။
ꩭႂ်ႛပ︀ူဝ်းတ︀ိꩫ︀်ႈမ︀ႂ်းမ︀ႆ︀ႛꩫ︀ႆ︀ၢႈက︀ေႃႇ ꩭိꩫ︀်မ︀ဝ်ꩡ︀ွက︀်ႉꩫ︀ႆ︀ႇ
မ︀ႂ်းမ︀ႆ︀ႛဢ︀ဝ်ႈမ︀ိုဝ်းၵ︀ဝ်တ︀ီꩭွင︀်းꩭႂ်ႛက︀ꩫ︀်ႈꩫ︀မ︀်” ꩫ︀ꩬ︀ီ က︀ျမ︀်းလ︀ိက︀်ႉမ︀ႆ︀ႛ ဝႃႈဝႆ︀ႇဢ︀ူ။
င︀ႆ︀းꩫ︀ႆ︀ႇꩬ︀ီ မ︀ႂ်းၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်ꩫ︀က︀ီး လ︀ုက︀်ႉꩫ︀ႆ︀ႇမ︀ႆ︀ႛဝႅꩫ︀်လ︀ူင︀်းၵ︀ွတ︀်လ︀ႃး” ꩫ︀ဝꩫ︀်ႇ။ 7ꩡ︀ဝ်ႛယ︀ေꩬ︀ုယ︀ႃႇ
“ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ပ︀ီꩡ︀ၢမ︀်းꩫ︀ꩬ︀ီက︀ေႃႇ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇဢ︀ူ”
ꩫ︀ꩬ︀ီတ︀ွပ︀်ပ︀ွက︀်ႉဢ︀ူ။ 8င︀ႆ︀းက︀ီး ၵ︀ုꩫ︀်ꩬ︀ူင︀်ꩫ︀ႆ︀ႇ ꩡ︀ဝ်ႛယ︀ေꩬ︀ုမ︀ႆ︀ႛ ꩡ︀ိက︀်ꩫ︀ွႆ︀ႈဢ︀ꩫ︀်ႈꩬ︀ုင︀်လ︀ူင︀်မ︀ႆ︀ႛ ꩭွင︀်ႇက︀ႃꩬ︀ီ မ︀ိူင︀်းလ︀ူင︀် ဢ︀ꩫ︀်ႈက︀ႃႈꩡ︀ိုဝ်ႈက︀မ︀်ၸ︀ႃမ︀ႆ︀ႛယ︀င︀်းꩫ︀ႆ︀ႇၵ︀ဝ် ၵ︀ႂ်ႈလ︀ႂ်ႈဢ︀မ︀်ꩫ︀ꩫ︀ႆ︀ႇပ︀ျႃးꩭႂ်ႛဢ︀ူ။ 9ယ︀ဝ်ႇက︀ီး “မ︀ႂ်းက︀ဝ်ႈမ︀ႆ︀ႛၵ︀ုပ︀်ႉၵ︀ဝ်ꩬ︀ီပ︀ႆ︀ၢႛက︀ီး ဢ︀မ︀ႂ်းၵ︀ဝ်တ︀င︀်းမ︀ိူင︀်း မ︀ႂ်းမ︀ႆ︀ႛꩭႂ်ႛက︀ွတ︀်” ꩫ︀ဝꩫ︀်ႇ။ 10ꩡ︀ဝ်ႛယ︀ေꩬ︀ုယ︀ႃႇ “ꩭိူဝ်း ၵ︀ုꩫ︀်ꩬ︀ူင︀်။ ဢ︀ွက︀်က︀ႃတ︀ႃႉ။
“ၸ︀ြႃးပ︀ီꩫ︀်ႈꩡ︀ဝ်ႛꩬ︀ူလ︀ိဝ်ႈမ︀ႆ︀ႛꩫ︀ႆ︀ၢႈပ︀ႆ︀ၢႛဝႆ︀ႈꩬ︀ီ မ︀ꩫ︀်းꩡ︀ဝ်ႛမ︀ႆ︀ႛꩫ︀ႆ︀ၢႈꩫ︀မ︀်ဝႃႈမ︀ိုင︀်ႇꩫ︀ႆ︀ႇ”
ꩫ︀ꩬ︀ီ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇဢ︀ူ” ꩫ︀ꩬ︀ီတ︀ွပ︀်ꩭႂ်ႛဢ︀ူ။ 11ꩫ︀ႆ︀ႇမ︀ႆ︀ႛ ၵ︀ုꩫ︀်ꩬ︀ူင︀်ꩫ︀ႆ︀ႇဢ︀ွက︀်က︀ႃꩬ︀ီ ၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ် ꩡ︀ဝ်ႛယ︀ေꩬ︀ုမ︀ႆ︀ႛ မ︀ႃးမ︀ိုင︀်ႇꩭႂ်ႛက︀ꩫ︀်ႈဢ︀ူ။
လ︀ွင︀်ႈꩡ︀ဝ်ႛယ︀ေꩬ︀ု တ︀ိူင︀်းက︀ႃလ︀ိလ︀ႄးမ︀ႆ︀ႛ က︀ူဝ်ꩭီတ︀်ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛ
(မ︀ႃက︀ု 1.14,15; လ︀ုက︀ႃ 4.14,15)
12ꩬ︀ြႃယ︀ေႃးꩭၢꩫ︀်တ︀ူက︀်ထွင︀်ယ︀ဝ်ႇꩫ︀ꩫ︀ႆ︀ႇꩫ︀ႆ︀ႛꩥ︀ိꩫ︀်းက︀ီး ꩡ︀ဝ်ႛယ︀ေꩬ︀ု ဢ︀ွက︀်က︀ႃတ︀ိူင︀်းက︀ႃလ︀ိလ︀ႄးဢ︀ူ။ 13ꩫ︀ႆ︀ႇꩫ︀က︀ေႃႇ မ︀ꩫ︀်းꩡ︀ဝ်ႛ ဝီင︀်းꩫ︀ႃꩡ︀ရ︀ႅတ︀်မ︀ႆ︀ႛယ︀ႃႇ မ︀ဝ်ဢ︀ူꩬ︀ီ ဝီင︀်းက︀ပ︀ေရ︀ꩫ︀ွင︀် ဢ︀ꩫ︀်ႈꩭိမ︀်းꩫ︀ွင︀်က︀ႃလ︀ိလ︀ႄး ဢ︀ꩫ︀်ႈꩡ︀ွက︀်ႉတ︀ိူင︀်းꩡ︀ႃပ︀ုလ︀ုင︀်ꩫ︀ၵ︀ႃ ꩫ︀ႃတ︀ႃလ︀ိမ︀ႆ︀ႛꩬ︀ိုင︀်က︀ႃဢ︀ူဢ︀ူ။ 14လ︀ွင︀်ႈꩫ︀ႆ︀ႇယ︀ႃႇ ဢ︀ꩫ︀်ႈꩫ︀င︀်ပ︀ရ︀ေႃးၸ︀ႅတ︀်ႉꩭေꩬ︀ႃယ︀ꩭူဝ်းဝႆ︀ႇꩫ︀ႆ︀ႇꩫ︀က︀ꩫ︀်ႈ ပ︀ီꩫ︀်ႈမ︀ႃးꩫ︀မ︀်။ 15ꩭေꩬ︀ႃယ︀ယ︀ႃႇ
“တ︀ူင︀်ႈတ︀ၢင︀်ႇက︀ႃလ︀ိလ︀ႄး တ︀ီႈဢ︀ꩫ︀်ႈဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ဢ︀ူ
ဢ︀ꩫ︀်ႈꩡ︀ွက︀်ႉယ︀ၢꩫ︀်ႈတ︀ိူင︀်းꩡ︀ႃပ︀ုလ︀ုင︀်ꩫ︀ၵ︀ႃꩫ︀ႃတ︀ႃလ︀ိ၊
ဢ︀ꩫ︀်ႈၸ︀ၢက︀်ႉဝꩫ︀်းဢ︀ွက︀်ꩫ︀မ︀်ႇယ︀ေႃတ︀ၢꩫ︀် ဢ︀ꩫ︀်ႈꩭိမ︀်းတ︀ၢင︀်းꩫ︀ွင︀်ꩫ︀ႆ︀ႇၵ︀ဝ်ꩴ︀း
16က︀ူꩫ︀်းဢ︀ꩫ︀်ႈဢ︀ူက︀ꩫ︀်ႛꩫ︀ႂ်း ဢ︀ꩫ︀်ႈꩫ︀မ︀်ႈꩬ︀ိင︀်ꩫ︀ႆ︀ႇၵ︀ဝ်
ဢ︀ꩫ︀်ႈလ︀ႅင︀်းလ︀ူင︀်မ︀ႆ︀ႛ ꩫ︀ႆ︀ႛꩭꩫ︀်ယ︀ဝ်ႇ။
က︀ူꩫ︀်းဢ︀ꩫ︀်ႈဢ︀ူက︀ꩫ︀်ႛတ︀ႂ်ႛတ︀ꩫ︀်းၵ︀ူဝ်းၵ︀ုꩫ︀်တ︀ႆ︀ၢႈꩫ︀ႆ︀ႇၵ︀ဝ်မ︀ႆ︀ႛ
ဢ︀ꩫ︀်ႈလ︀ႅင︀်းꩭုင︀်ႈယ︀ဝ်ႇ” ꩫ︀ꩬ︀ီꩭူဝ်းဝႆ︀ႇဢ︀ူ။
17လ︀ုက︀်ႉဢ︀မ︀ႂ်းက︀ူဝ်ꩬ︀ီ ꩡ︀ဝ်ႛယ︀ေꩬ︀ုယ︀ႃႇ “ꩬ︀ၢင︀်ဝွေက︀ꩫ︀်ႈတ︀ႃႉ။ မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛ တ︀ီတ︀င︀်ႛတ︀ေယ︀ဝ်ႇ” ꩫ︀ꩬ︀ီꩭူဝ်းတ︀ြႃးဢ︀ူ။
လ︀ွင︀်ႈတ︀မ︀်င︀ႃႈꩬ︀ီက︀ူဝ်ႇမ︀ႆ︀ႛꩭွင︀်ႇ
(မ︀ႃက︀ု 1.16-20; လ︀ုက︀ႃ 5.1-11)
18ꩡ︀ဝ်ႛယ︀ေꩬ︀ု ꩭိမ︀်းꩫ︀ွင︀်က︀ႃလ︀ိလ︀ႄးမ︀ႆ︀ႛၸ︀ၢႆ︀ႛက︀ႃက︀ီး တ︀မ︀်င︀ႃႈꩬ︀ွင︀်ပ︀ီႈꩫ︀ွင︀်ႇမ︀ႆ︀ႛꩭꩫ︀်ဢ︀ူ။ ꩬ︀ွင︀်ၵ︀ႃယ︀ႃႇ ꩬ︀ႅင︀်မ︀ုꩫ︀်ဢ︀ꩫ︀်ႈꩭွင︀်ႇဝႃႈ ပ︀ေတ︀ရ︀ုꩫ︀ၵ︀ႃ ၸ︀ူႛꩫ︀ွင︀်ႇမ︀ꩫ︀်းဢ︀ꩫ︀်တ︀ြေꩫ︀မ︀်။ ꩬ︀ွင︀်ၵ︀ႃ ꩫ︀ွင︀်မ︀ႆ︀ႛတ︀ွတ︀်ႉၵ︀ျေꩬ︀ီ ၵ︀ႃပ︀ႃႈက︀ꩫ︀်ႈဢ︀ူ။ 19မ︀ꩫ︀်းꩡ︀ဝ်ႛယ︀ႃႇ ꩬ︀ွင︀်ၵ︀ႃမ︀ႆ︀ႛ “မ︀ႃးလ︀ႃး။ က︀ꩫ︀်ႛလ︀င︀်က︀ဝ်ႈမ︀ႆ︀ႛ ꩡ︀ွမ︀်းလ︀ႃး။ က︀ဝ်ႈꩬ︀ွင︀်ၵ︀ိူဝ်မ︀ႆ︀ႛ ꩭၢင︀်းၵ︀ႃက︀ူꩫ︀်း ꩬ︀ွꩫ︀်ꩭႂ်ႛက︀ွတ︀်” ꩫ︀ဝꩫ︀်ႇ။ 20ꩬ︀ွင︀်ၵ︀ႃက︀ေႃႇ က︀ꩡ︀ူးၵ︀ျေၵ︀ွတ︀်ဝႆ︀ႇꩬ︀ီ က︀ꩫ︀်ႛလ︀င︀်မ︀ꩫ︀်းꩡ︀ဝ်ႛမ︀ႆ︀ႛ ꩡ︀ွမ︀်းက︀ႃဢ︀ူ။ 21မ︀ꩫ︀်းꩡ︀ဝ်ႛက︀ျွႃးက︀ႃဢ︀ိက︀်က︀ီး ၸ︀ူႛလ︀ုက︀်ႉꩡ︀ေပ︀ေတ︀ႄ တ︀မ︀်င︀ႃႈတ︀င︀်းꩬ︀ွင︀်ပ︀ီႈꩫ︀ွင︀်ႇ ယ︀ႃက︀ုꩫ︀ၵ︀ႃယ︀ေႃးꩭၢꩫ︀်မ︀ႆ︀ႛက︀ေႃႇ ꩭꩫ︀်ဢ︀ူ။ ꩬ︀ွင︀်ၵ︀ႃယ︀ႃႇ က︀ꩫ︀်ႛꩫ︀ိူဝ်ꩭိူဝ်းမ︀ႆ︀ႛ တ︀င︀်းၸ︀ူႛပ︀ူဝ်ႈၵ︀ဝ် ꩭၢင︀်ႛၵ︀ျေꩬ︀ီဢ︀ူဢ︀ူ။ ꩬ︀ွင︀်ၵ︀ႃမ︀ႆ︀ႛက︀ေႃႇ ꩡ︀ဝ်ႛယ︀ေꩬ︀ုꩭွင︀်ႇက︀ီး 22ꩬ︀ွင︀်ၵ︀ႃက︀ေႃႇ ꩭိူဝ်းတ︀မ︀ိူင︀်း ၸ︀ူႛပ︀ူဝ်ႈၵ︀ဝ်မ︀ႆ︀ႛတ︀မ︀ိူင︀်း ၵ︀ွတ︀်ဝႆ︀ႇꩬ︀ီ က︀ꩫ︀်ႛလ︀င︀်မ︀ꩫ︀်းꩡ︀ဝ်ႛမ︀ႆ︀ႛ ꩡ︀ွမ︀်းက︀ႃဢ︀ူ။
လ︀ွင︀်ႈꩡ︀ဝ်ႛယ︀ေꩬ︀ု ꩬ︀ွꩫ︀်တ︀ြႃး၊ ꩭူဝ်းတ︀ြႃးင︀ႆ︀း က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈဢ︀ူꩫ︀ီႈꩭႂ်ႛ
(လ︀ုက︀ႃ 6.17-19)
23ꩡ︀ဝ်ႛယ︀ေꩬ︀ု တ︀ိူင︀်းက︀ႃလ︀ိလ︀ႄးတ︀င︀်းတ︀ိူင︀်းမ︀ႆ︀ႛက︀ႃꩬ︀ီ ꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇၵ︀ဝ်မ︀ႆ︀ႛ ꩬ︀ွꩫ︀်တ︀ြႃးꩭႂ်ႛဢ︀ူ။ ၵ︀ၢဝ်ႈၵ︀ၢမ︀်းꩫ︀ီႈလ︀ွင︀်ႈမ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛက︀ေႃႇꩭူဝ်းꩬ︀ီ ၸ︀ူႛၵ︀ႆ︀ႛၸ︀ူႛꩡ︀ီပ︀်က︀ူႈၸ︀ꩫ︀်းမ︀ႆ︀ႛ ဢ︀ဝ်ႈꩫ︀ီႈꩭႂ်ႛဢ︀ူ။ 24ꩫ︀ႆ︀ႇမ︀ႆ︀ႛ ၵ︀ၢဝ်ႈၵ︀ၢမ︀်းလ︀ွင︀်ႈမ︀ꩫ︀်းꩡ︀ဝ်ႛꩫ︀ႆ︀ႇ မ︀ိူင︀်းꩬ︀ီရ︀ီယ︀ႃးတ︀င︀်းထၢဝ်မ︀ႆ︀ႛ ꩭူင︀်က︀ႃꩬ︀ီ က︀ူꩫ︀်းꩫ︀ႆ︀ႇၵ︀ဝ်က︀ေႃႇ ၸ︀ူႛၵ︀ႆ︀ႛ၊ ၸ︀ူႛပ︀ၢက︀်ႉယ︀ေႃးက︀ႃက︀ူႈၸ︀ꩫ︀်း၊ ၸ︀ူႛၸ︀ီꩭၢႆ︀ႇလ︀ွေႛ၊ ၸ︀ူႛမ︀ႃႛမ︀ူ၊ ၸ︀ူႛꩬ︀ိက︀်ႉၵ︀ိင︀်းတ︀ႆ︀ၢႈꩫ︀ႆ︀ႇၵ︀ဝ် မ︀ꩫ︀်းꩡ︀ဝ်ႛမ︀ႆ︀ႛဢ︀ဝ်ႈမ︀ႃးက︀ꩫ︀်ႈဢ︀ူ။ ꩡ︀ဝ်ႛယ︀ေꩬ︀ုက︀ေႃႇ ၵ︀ဝ်တ︀င︀်းမ︀ိူင︀်းမ︀ႆ︀ႛ ဢ︀ဝ်ႈꩫ︀ီႈꩭႂ်ႛဢ︀ူ။ 25င︀ႆ︀းꩬ︀ီ ၸ︀ုင︀်က︀ူꩫ︀်းꩫ︀ႆ︀ႇၵ︀ဝ်ဢ︀ၢꩫ︀်တ︀ၢꩫ︀် က︀ꩫ︀်ႛလ︀င︀်မ︀ꩫ︀်းꩡ︀ဝ်ႛမ︀ႆ︀ႛꩡ︀ွမ︀်းက︀ꩫ︀်ႈဢ︀ူ။ ၸ︀ုင︀်က︀ူꩫ︀်းဢ︀မ︀ႂ်းၵ︀ဝ်ယ︀ႃႇ လ︀ုက︀်ႉတ︀ိူင︀်းက︀ႃလ︀ိလ︀ႄ၊ ဝီင︀်းတ︀ေက︀ႃပ︀ေႃလ︀ိ၊ ဝီင︀်းယ︀ေရ︀ုꩬ︀လ︀ိမ︀်၊ တ︀ိူင︀်းယ︀ုတ︀င︀ႆ︀း လ︀ုက︀်ႉတ︀ိူင︀်းၸ︀ၢက︀်ႉꩫ︀မ︀်ႇယ︀ေႃတ︀ၢꩫ︀်ꩫ︀ႆ︀ႇၵ︀ဝ်မ︀ႆ︀ႛꩫ︀မ︀်။
လက်ရှိရွေးချယ်ထားမှု
မ︀တ︀်တ︀ႄး 4: kht
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2023 (Active), Wycliffe Bible Translators, Inc. All rights reserved.
