Genesi 19
19
Ãcõrẽba Sodoma, Gomorra sid̶a ãrĩna
1Queubod̶od̶e bajãnebema nezoca umébemara Sodoma purud̶e jũẽsid̶aa. Maʌ̃ne Abrahaʌ̃ tẽãbea Lora dji puru ed̶a wãbadama chũmasia. Mãwã b̶ʌd̶e Loba maʌ̃ bajãnebema nezocarãra unusia. Ara maʌ̃da ãdji audiab̶arid̶e wãsia. Wayaad̶eba chĩrãborod̶e cob̶eped̶a idji dratura egorod̶aa b̶arru tẽũ cob̶esia. 2Maʌ̃be Loba ãdjía jarasia:
–Mʌ̃ bororã, mʌ̃a bãrãa bed̶ea djuburiaya naʌ̃ diamasi mʌ̃ ded̶e cãĩne zed̶amãrẽã. Mama bãrã jĩrũra sʌgʌd̶ida panʌa. Nu diaped̶a wãnadua bãdji wãbʌdamaa.–
Maʌ̃ne bajãnebema nezocarãba panusid̶aa:
–Mãwãẽ́a. Naʌ̃ diamasi daira puru jãne cãĩnia.–
3Baribʌrʌ Loba mĩã sẽ jara b̶esia idji diguid̶aa wãnamãrẽã. Maʌ̃ carea Lo ume wãsid̶aa. Jũẽnacarea Loba djico biada osia idjab̶a paʌ̃ dji ẽsãbari neẽ́ b̶ʌda ocuasia. Maʌ̃da cosid̶aa.
4Wad̶i cãĩni naẽna jũma purud̶ebema umaquĩrãrãba Lo dera jũrã edasid̶aa. Cũdrarãda, drõãrã sid̶a duanasid̶aa. 5Maʌ̃be dajadaareba Loa b̶ia iwid̶isid̶aa:
–Naʌ̃ diamasi ẽberã bʌmaa zeped̶ad̶ara ¿sãma panʌ? Dajadaa enedua dairãra ãdji ume cãĩni carea.–
6Maʌ̃ne Lora dajadaa ãdjirã ume bed̶ead̶e wãped̶a dji ed̶a wãbadara bio jũãtrʌ nũmʌsia. 7Maʌ̃be jarasia:
–Achirã, mʌ̃a bãrãa bed̶ea djuburiaya maʌ̃ cadjiruara orãnamãrẽã. 8Baribʌrʌ mʌ̃a caurã umaquĩrã adua panʌda umé erob̶ʌa. Mʌ̃a ãdjira dajada b̶ʌya bãdjia quĩrĩã panʌ quĩrãca od̶amãrẽã. Baribʌrʌ naʌ̃ ẽberãrãra mʌ̃ diguid̶aa ze panʌ bẽrã mʌ̃a wagaida b̶ʌa. Maʌ̃ bẽrã ãdjira biẽ́ orãnadua.–
9Maʌ̃ne purud̶ebemarãba jarasid̶aa:
–Bʌra drua ãĩba dai purud̶e b̶ad̶e zesia. Maʌ̃ba id̶ira ¿dairãra jãwã quẽã b̶ʌca? ¡Ãyã wãdua! Bʌda ãyã wãẽ́bʌrʌ, daiba ãdji cãyãbara bʌda cadjiruaara od̶ia.–
Ara maʌ̃da Lora chãtad̶aped̶a dji ed̶a wãbada ãrĩni carea panasid̶aa. 10Baribʌrʌ bajãnebema nezocarã Lo diguid̶aa panʌba Lora ãdji jʌwaba ed̶a edad̶aped̶a dji ed̶a wãbadara jũãtrʌ nũmʌsid̶aa. 11Ara maʌ̃da ãdjia dji ed̶a wãbadama duanʌra jũma daub̶erreabisid̶aa, cũdrarãra drõãrã sid̶a. Maʌ̃ne ãdjirãra dji ed̶a wãbada jʌrʌ panʌba sẽsid̶aa.
12Maʌ̃be bajãnebema nezocarã Lo ded̶e panʌba idjía jarasid̶aa:
–Naʌ̃ purud̶e ¿bʌa ẽberãrãda dewara erob̶ʌca? Bʌ warrarã, bʌ caurã, bʌ wigurã, idjab̶a jũma naʌ̃ purud̶e erob̶ʌ sid̶a namabemada ãyã ededua. 13Daiba naʌ̃ purura jũma ãrĩnia. Ãcõrẽba ũrĩ b̶ʌa naʌ̃ purud̶ebemarãba bio cadjirua obadada. Maʌ̃ bẽrã Ãcõrẽba daira diabuesia ãdjirã cawa od̶amãrẽã.–
14Ara maʌ̃da Lora cũdra idji caurã ume bed̶ea bia panʌrã acʌd̶e wãped̶a jarasia:
–Pirab̶arid̶aped̶a namabemada isabe ãyã wãnadua. Ãcõrẽba naʌ̃ purura ãrĩya.–
Mãwãmĩna cũdrarãba crĩchasid̶aa Loba ijaramiada o b̶ʌda.
15Ʌ̃nadrʌbod̶od̶e bajãnebema nezocarãba Loa jarasid̶aa:
–Bʌ quimada, bʌ caurã umé panʌ sid̶a isabe ãyã ededua daiba naʌ̃ puru ãrĩbʌdad̶e beurãnamãrẽã.–
16Mãwãmĩna Lora isabe wãẽ́ b̶asia. Maʌ̃ bẽrã bajãnebema nezocarãba idjida, idji quimada, idji caurã sid̶a jʌwad̶e jidad̶aped̶a puru dajadaa erreb̶ari edesid̶aa ẽdrʌ b̶ʌd̶i carea. Mãwã Ãcõrẽba Lora idji ẽberãrã sid̶a quĩrã djuburiasia. 17Puru dajada bad̶acarea bajãnebema nezocarãba Loa jarasid̶aa:#19:17. Bajãnebema nezocarãba Loa jarasid̶aa. Griego bed̶ead̶e mãwã b̶ʌ́ b̶ʌa. Hebreo bed̶ead̶e nãwã b̶ʌa: “Idjia jarasia.”
–Ẽdrʌi carea pira wãdua. Jẽda acʌrãdua idjab̶a ni maãrĩ bid̶a naʌ̃ jewed̶ad̶e nũmerãdua. Beu amaaba eya baramaa wãdua.–
18Baribʌrʌ Loba jarasia:
–Mãwãẽ́a, mʌ̃ bororã. Mʌ̃ quĩrã djuburia jãʌ̃ eyad̶aa wãbirãdua. 19Bãrãba mʌ̃ra bio quĩrã djuburiasid̶aa purud̶ebemada ẽdrʌ eneped̶ad̶a bẽrã. Baribʌrʌ mʌ̃ra eya barama poya jũẽẽ́a. Pĩãca wãbʌrʌd̶e bãrãba dji puru ãrĩbʌdaba mʌ̃ra ota jidaisicada. Maʌ̃ba mʌ̃ra beaya. 20Nama caita puru zaqueda b̶ʌa. ¿Mʌ̃ra mamaa mĩrũ wãida b̶ʌca? Dji purura wãrãda caibe quirua. ¿Bãrãba maʌ̃gʌra ãrĩnaẽ́ame? Mʌ̃ra mamaa idu wãbid̶adua beu amaaba.–
21Maʌ̃ne Ãcõrẽ nezoca ab̶aʌba jarasia:
–Mãẽteara bia b̶ʌa. Bʌa jara b̶ʌ quĩrãca mʌ̃a iduaribiya. Bʌa jara b̶ʌ purura mʌ̃a ãrĩẽ́a. 22Baribʌrʌ isabe wãdua jãma jũẽi carea. Mʌ̃a ni cãrẽ sid̶a poya oẽ́a bʌ jãma jũẽi naẽna.–
Loba maʌ̃ purura wãrãda caibe quiruad̶a ad̶a bẽrã dji puru trʌ̃ra b̶esia Zoar.#19:22. Hebreo bed̶ead̶e Zoar trʌ̃ba jara b̶ʌa “caibe quiru.”
23Lo Zoard̶e jũẽbʌrʌbara ʌ̃mãdaura odjabʌrʌ basía. 24Maʌ̃bebʌrʌ Ãcõrẽba azupre uruada Sodomane, Gomorrad̶e bid̶a bajãneba jurrubisia. 25Maʌ̃ba puru umé panʌra, maʌ̃ purud̶e ed̶a duanʌra, idjab̶a chirua maʌ̃ jewed̶ad̶e b̶ʌ sid̶a jũma bá wãsia. 26Baribʌrʌ Lo quima caid̶u nĩba jẽda acʌsia. Ara maʌ̃da idjira ab̶ed̶a zarea tã ba nũmesia.
27Nurẽma diaped̶a Abrahaʌ̃ra wãsia Ãcõrẽ ume bed̶ea b̶ad̶amaa. 28Mamaʌba Sodomara, Gomorrara, jũma dji jewed̶a sid̶a acʌsia. Maʌ̃ne unusia dji ẽjũãra ʌ̃ta cowaga nũmʌda pea bad̶a cowabari quĩrãca.#19:28. Pea bad̶a cowa quĩrãca. Hebreo bed̶ead̶e nãwã b̶ʌ́ b̶ʌa: “Egoro cad̶a zareabibari tʌbʌ urua cowabari quĩrãca.” 29Ãcõrẽba puru maʌ̃ jewed̶ad̶e panʌra ãrĩnamĩna Abrahaʌ̃ra quĩrãdoaẽ́ b̶asia. Maʌ̃ carea Abrahaʌ̃ tẽãbea Lora Sodoma ãrĩbʌrʌd̶ebemada ãyã ẽdrʌ edesia.
Lo caurãba warrarã toped̶ad̶a
30Mãwãnacarea Lora Zoar purud̶e b̶aida wayasia. Maʌ̃ carea idji caurã ume ẽjũã eyaid̶a b̶ʌmaa wãsia. Mama ãdjira eya uriad̶e panesid̶aa. 31Ewari ab̶a dji cau nabemaba dji tẽãbemaa jarasia:
–Dadji zezara drõãda quirua. Maʌ̃ awara nama naʌ̃ ẽjũãne ni ab̶aʌ umaquĩrãda neẽ́a dadji edad̶amãrẽã jũmarãda quima edabada quĩrãca. 32Maʌ̃ carea dadji zezaa uva b̶a aseada dobid̶ia beu b̶emãrẽã. Mãwã osid̶ara idji ume poya cãĩnia idji warrada eropanani carea.–
33Ara maʌ̃ diamasi ãdji zeza Loa uva b̶a aseara dobisid̶aa. Lora beu b̶eped̶a idji cau nabemada araa wãped̶a idji ume cãĩsia. Baribʌrʌ Lora beu b̶ʌ bẽrã cawaẽ́ basía idji caura cãĩ b̶aped̶a ãyã wãnada. 34Nurẽma dji nabemaba dji tẽãbemaa jarasia:
–Mʌ̃ra nuena diamasi dadji zeza ume cãĩsia. Nane bid̶a uva b̶a aseada dobid̶ia bʌ sid̶a idji ume cãĩmãrẽã. Mãwã dadji zeza warrarãda eropanania.–
35Ara maʌ̃ diamasi uva b̶a aseara ãdji zezaa dobisid̶aa. Maʌ̃be dji tẽãbemara idji ume cãĩsia. Baribʌrʌ Loba cawaẽ́ basía dji caura cãĩ b̶aped̶a ãyã wãnada. 36Mãwã Lo caura umena b̶iogoa panesid̶aa ara ãdji zezad̶eda. 37Maʌ̃be dji nabemaba umaquĩrã warrada tosia. Dji trʌ̃ra b̶ʌsia Moab.#19:37. Hebreo bed̶ead̶e Moab trʌ̃ba jara b̶ʌa “zezad̶eba.” Moab abadad̶eba moabitarãda yõsid̶aa. 38Dji tẽãbema bid̶a umaquĩrã warrada tosia. Dji trʌ̃ra b̶ʌsia Benamí. Benamíneba amonitarãda yõsid̶aa.#19:38. Benamí trʌ̃ba jara b̶ʌa “mʌ̃ ẽberãrã warra.” Hebreorãba amonitarãra “benijamon” abadjid̶aa.
လက်ရှိရွေးချယ်ထားမှု
Genesi 19: emp
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2011, Wycliffe Bible Translators, Inc. All rights reserved.