लूकाल 24
24
येसु मर्रा जीवाते तेदंतोर
(मत्तयाल 28:1-10; मरकुस 16:1-8; योहान 20:1-10)
1पजा वारमता मोदाटा रोजु इत्ते अय्तारम हक्केरेन पोळ्द पेय्सका मुन्नेन, आ मुर्ताह्क अव तयार कीता गमागमा गब्बु वायना वस्तुक पीसि येसुन इरता बोंदातगा एवतां. 2एवतस्के बोंदाता हरदुक अड्डम ताससि मत्ता बंडा पक्काक दोब्बिसि मत्तदुन अव हूळतां. 3अस्के अव मुर्ताह्क लोप्पो होळियसि हूळतां अय्ते अवुंक अगा येसु सामिना पीनगु दिसा हिल्ले. 4अव इदुना बारेमते इल्हा बल्हा आता इंचि विचारमते मननेंकेन अचानक इव्वुर मनकालोर जगा-जगा मेर्सना कपडिं केर्सि अवुनगा वासि निलतुर. 5अस्के अव इरगा वेरियसि तल्ला हिळु वराहचि दंडम दोस्तां. पजा ओर मनकालोर अवुन इल्हा इत्तुर. “जीवाते मनना मनकन हातोरव्टे बारि पह्कसेक मंतिट? 6-7ओर इग्गे हिल्लोर, हामुरताल जीवाते तेदतोर. ओर मीवातोनि गालिल एरियाते मननेंके मीकु, ‘मनकना रूपमते पुटतोन नाकुन पापि मनकालोरा कय्दे पीसि हियमळ जर्गार, पजा ओर नाकुन क्रुसुनपोर्रो वेलाड वाट्सि हव्कानुर. गानि नना मूड रोजकुने मर्रा जीवाते तेदकन. इवन्नि निजम आयनुंगें,’ इंचि वेह्चि मत्तोर. इद मीकु मति हिल्लेना?” इंचि इत्तुर. 8अस्के अव मुरताह्कुंक येसु मुन्ने वेहता पोल्लें मति वातां.
9पजा अव मुर्ताह्क बोंदातगा हूळता पोल्लेन बोंदातगाटाल मल्सि होंचि पदाकोंडु प्रेरितुल्कुंक आनि अगा मत्ता कळमता अंटोर सिस्युल्कुंक वेहतां. 10अव मुर्ताह्कुने, मगदलेनि नाटेना मरियम, योहानि, याकोबुना यावल मरियम, इंका अवुनतोनि मत्ता मुर्ताह्क. इवे मुर्ताह्क अव हूळतव, केंजतव अन्नि पोल्लें प्रेरितुल्कुंक वेहतां. 11गानि प्रेरितुल्कुंक आ मुरताह्कुना पोल्लें अट्टिगेन अनपिस्तां. अदुनहाटीं अवुना पोल्लेन ओर नम्मा हिल्लुर. 12अयना पत्रु अगटाल तेदसि बोंदातेके विततोर. अगा लोप्पो होळियसि हूळते, सिराप येसुना पीनगुन हुटसि मत्ता कपडिं बल्हा मत्तव अल्हे अरसि मत्तद दिसता. अगा अल्हा हूळसि इल्हा बल्हा आता इंचेके ओनद-ओरे मनसुने विचारम कीसेके मल्सि लोन होत्तोर.
इमाउस नार होनना हरदे येसु दिसंतोर
(मरकुस 16:12-13)
13अदे रोजु येसुना सिस्युल्कुनाल बोरो इव्वुर इमाउस इनना नार होंचेके मत्तुर. अद नार येरुसलेम सहरताल दग्गेर-दग्गेरा पदाकोंडु किलोमिटर्क लक्कु मंता.#24:13 इद वचनमते येसुना सिस्युल्कुनाल इत्ते, सिराप ओना पन्नेंड सिस्युल्कुनाल इंचि आयो गानि येसु वेहताप ताकानोरव्टेटाल बोरो इव्वुर. 14ओर इव्वुर येरुसलेमते जर्गता अन्नि गटनन बारेमते वळ्कसेक होंचेके मत्तुर. 15ओर अव पोल्लें वळकसेके होंचेके मननेंके येसु अचानक कुद्दु ओरगा वासि ओरतोनि कलियसि ताकालय दल्गतोर. 16गानि ओर बोर आंदुर इंचि ओर्क इव्वुर्क एरपाट आयाकोंटा कियमळ जर्गता. 17पजा येसु ओर्कुन, “मिमेट बव पोल्लेना बारेमते वळ्कसेक ताकसंतिर?” इंचि पूसकीतोर. अस्के ओर इव्वुर दुक्कमते अग्गेन निततुर. 18पजा ओर इव्वुरगटाल वरोर किलयुपास इननोर, “इव रोजकुने येरुसलेमते जर्गता गटनन बारेमते नीकु एरपाट हिल्लेना? पंडुगुंक वातोरव्टेटाल इव गटनां तेळियवोन निमे वरोने मंतिना?” इंचि जवाब हीतोर. 19अस्के येसु, “बव पोल्लें आंदुं?” इंचि पूसकीतस्के ओर इल्हा वेहालय दल्गतुर. “नासरेत नाटेना येसुना बारेमता पोल्लें आंदुं दादा. ओर इसंटा मनकल मत्तोर गदा, ओर बतल वेहिना, बतल किय्यिना पेनदा ताकततोने कियुंदुर. ओर पेनदा कबुरतोर मत्तोर. लोकुल्कगुडा ओन बेसतोर इंचि इनुंदुर. 20गानि मावा पेद्दा पेर्मालोर, अदिकारिल्क ओन्क हामुर सिक्सा हियमळ गावाले इंचि ओन पीसि पिलातुसना कय्दे हीतुर. पजा लोकुल्क ओन क्रुसुनपोर्रो मोल्लां कोह्किसि हव्कतुर. 21गानि इस्राएल लोकुल्कुन पगातोरा कयदाल ओरे होळसियानुर इंचि मोमोट आसे पळतोम. इव अन्नि गटनां हन्नेट रोजे जर्गतां.”
22“अचोने आयका मावाव्टेटाल इच्चुं मुर्ताह्कगुडा माकुन इचंत्रमते अरहतां. अव इय्याला हक्केरेन बोंदातगा होंचि मत्तां. 23गानि अगा अवुंक येसुना पीनगु दिसा हिल्ले. अदुनहाटीं अव मल्सि वासि, माकु पेनदा दूतां दिसतां, अव माकु येसु जीवाते तेदतोर, इंचि वेहतां, इंचेके अव मुर्ताह्क माकु वेहतां. 24अवुना पोल्लें केंजसि मातोनि मत्तोर इच्चुर बोंदातगा होंचि हूळतुर. अय्ते अव मुर्ताह्क बल्हा वेहतांगो अल्हेन मत्ता, येसु अगा मनाहिल्लोर,” इंचि वेहतोर. 25अस्के येसु ओर्कुन, “अरे बुद्दि तक्को लोकुरिटा, पेनदा कबुरतोर मुन्ने वेहचि मत्ता पोल्लेन मिमेट बस्के नम्मंतिर? 26पेन लोहता पिसागोटना किरिस्तु स्वर्गमता महिमाते होळियका मुन्ने ओर इवन्नि तकलिप बोगांचेपींता,” इंचि इत्तोर. 27पजा, मूसाना नियमते, अंटोर पेनदा कबुरतोर रासता पोल्लेने, अल्हेने दर्मसास्त्रमते ओना बारेमते बगा-बगा रासि मंतानो अवुनंता येसु ओर्कु बेस तेळियानाल वेहतोर. 28पजा ओर्क होनना मत्ता नाटुक दग्गेर एवतुर. अस्के येसुंक इंकिच्चो मुन्नेळ्क होनानद मंता इत्ताप ओर्क अन्पिस्ता. 29अदुनहाटीं ओर ओन, “इंदके पोळ्द होत्ता, इय्याला निमे इगेन महगा आगा दादा!” इंचि वेल्लेन विनंति कीतुर. अस्के येसु ओरगा मननाहाटीं ओरतोनि लोप्पो होत्तोर.
30पजा येसु ओरतोनि कलियसि गाटो तिनालय उदतस्के, हारितुन पीसि पेनदुक दन्यवाद कीतोर. पजा दान तुकडां कीसि ओर्क हियालय दल्गुतोर. 31अल्हा हारि तुकडां हियानेंकेन ओरा इव्वुरा कळ्क जग्गरा आतां आनि ईर येसु आंदुर इंचि एरपाट कीतुर. गानि येसु ओर्क दिसाकोंटा मायम आतोर. 32पजा ओर इव्वुर ओरद-ओरे, “हरपीसि मनातोनि वळकसेके ताकानेंके ओर मनाकु दर्मसास्त्रमते रासि मत्ता पोल्लेना निजम अर्तमतुन बेस तेळियानाल वेहतोर. अस्के ओना पोल्लें केंजसि बच्चोन बेस अनपिच्चेक मत्ता!” इंचेके वळ्ककुत्तुर.
33पजा ओर अगटाल बिराना तेदसि मर्रा तिरियसि येरुसलेम होत्तुर. होत्तस्के अगा पदाकोंडु मंदि प्रेरितुल्क अल्हेने कळमता लोकुल्क उंदगा जमा आसि मत्तद ओर हूळतुर. 34अस्के आ जमातोर, “हो, इद निजमे! येसु सामि जीवाते तेदतोर. ओर सिमोन पत्रुंक दिसतोर,” इंचि वळकसेके मत्तुर. 35अस्के ओर इव्वुरगुडा हरपीसि होननेंके बतल-बतल जर्गता, इंका येसु हारितुन उराहचि ओर्क हियनेंके ओर येसुन बल्हा एरपाट कीतुर, इदंता अंटोर्क वेहतुर.
येसु ओना सिस्युल्कुंक दिसंतोर
(मत्तयाल 28:16-20; मरकुस 16:14-18; योहान 20:19-23; प्रेरितुल्कुना कबाह्क 1:6-8)
36ओर इव्वुर इव पोल्लें अंटोर्क वेहचेकेन मत्तुर, अच्चोटेन येसु ओरा नड्डुम वासि निलतोर. निल्सि, “मीकु अंटोर्क सांति दोर्कि,” इंचि इत्तोर.
37अस्के ओर अंटोर, ‘मोमोट बूतमतुन हूळसंतोम,’ इन्कुंचि इरगा वेरियतुर. 38गानि येसु ओर्कुन, “मिमेट इच्चोन बारि वेरियतिर? मीवा मनसुने नावा बारेमते अनमानम बारि वाता? 39नावा कय्क-काल्कुन हुळाट! नाकुन इट्टिस हुळाट, ननाने आंदुन! बूतमकु हव्विं-बोक्कां मन्नों गानि नाकु मंतां,” इंचि इत्तोर. 40इल्हा वळकसेके येसु ओना कय्क-काल्कुन ओर्क हुपिस्तोर. 41अस्के ओर वेल्लेन कुसिते, इल्हा बल्हा आता इंचेके इचंत्रम आसि ओर्क पुरागा विस्वासमगुडा आसेके मनाहिल्ले. येसु ओर्कुन अल्हा हूळसि, “मिहगा बतलन्ना तिनालय मंतना?” इंचि पूसकीतोर. 42अस्के ओर ओन्क उंदि बोळस्ता जिम्मा तुकडा हीतुर. 43पजा येसु अद तुकडातुन ओरा मुन्नेन तित्तोर.
44तित्तारित्ते येसु ओर्कु, “इव पोल्लें बव इत्ते, नाकुन हव्कका मुन्ने नना मीवातोनि मत्तन, अस्के मीकु वेहतव आंदुं. मूसाना नियमते, पेनदा कबुरतोरा पुस्तकाल्कुने आनि बजन संहिताने रासि मत्ता अन्नि पोल्लें निजम आयनदे मत्ता,” इंचि इत्तोर.
45पजा दर्मसास्त्रमते रासि मत्ता पोल्लें तेळियना इंचि येसु ओर्क तेल्वि हीतोर. 46हीसि ओर्कुन इल्हा इत्तोर. “दर्मसास्त्रमते रासि मत्ताप, किरिस्तुंक वेल्लेन तकलिपकु वासि ओर हायानुर, पजा मूड रोजकुने मर्रा जीवाते तेदानुर इद अदे पोल्ले आंद. 47पापाल्क मापि आयनाहाटीं मनसु मार्सकुनुळ अव्सरम मंता. इदे कबुरतुन येरुसलेमताल सुरुव कीसि, दुनियाता अन्नि देसेल्कुना लोकुल्कुंक किरिस्तुना अदिकारमते वेहमळ जरगार. 48इव अन्नि पोल्लेंक मिमेटे गवाइ मंतिर. 49इंका नावा पेनबाबाल हींतन इंचि पोल्ले हीता आ पवित्र आत्मातुन नना मिहगा लोहांतन. गानि बदवेरदाका अय्ते स्वर्गमताल पवित्र आत्माता ताकत मीपोर्रो रेय्योनो, अदवेरदाका मिमेट इदे येरुसलेम सहरते मंटु,”#प्रेरितुल्कुना कबाह्क 1:8 इंचि इत्तोर.
येसुना स्वर्गमते तेदसि होनमळ
(मरकुस 16:19-20; प्रेरितुल्कुना कबाह्क 1:9-12)
50पजा येसु ओर्कुन येरुसलेम सहर दग्गेरा मनना बेतानि इनना नाटाहेके ओतोर. ओसि ओर ओना कय तेहचि ओर्कु आसिर्वाद हीतोर. 51ओर्क आसिर्वाद हियानेंकेन येसु ओरागटाल लक्कु आतोर. पजा ओन पेन स्वर्गमते तेहाचि ओता. 52अस्के ओर अंटोर येसुंक टोंगरां ऊनसि, मोळ्किसि अगटाल वेल्लेन कुसिते येरुसलेम सहर मल्सि होत्तुर. 53पजा ओर बस्केळक गुळिते जमा आसि पेनदा स्तुति कीसेके मनुंदुर.
လက်ရှိရွေးချယ်ထားမှု
लूकाल 24: esg-Deva
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2022, Wycliffe Bible Translators, Inc. All rights reserved.
