Matiye 8
8
Zezú ŋgɛ́rɛ njuku ndɛ́ɓɛ a há̧na
(Mrk 1:40-45; Luk 5:12-16)
1Gelka Zezú ɗere a tûl kon dáy, njukuri ɓá ŋgɛ̧́náké tɔ́ŋ nɛ́. 2Nǎŋnɔ́, njuku ndɛ́ɓɛ a há̧na, ta̧m gí gbaŋa Zezú, a gí huku tísiri a mbɛlɛ́, a sa hí̧ nɛ́ ɓá: «Gáŋmbây, mɔ zi lé, mɔ e ŋgɛ́rɛ mǐ!» 3Zezú ndara ndɔ̂ʼɛ, a ɗa nɛ́ a sa: «Mi zi dá, mɔ́ ziŋ ŋgɛ́rɛ!» Núnmbɛ̧́nɛ́ nɔ́, záŋmá ndɛ́ɓɛ ɔ ka mûn nɛ́. 4Dáy Zezú vbara nɛ́ a sa: «Mɔ́ zi ná saɓayké hí̧ njuku a há̧na! Mɔ́ sé tɔ́ʼɔ mûn nɔ́ hí̧ gáŋnjuku nzáʼaká̧na, a mɔ́ niŋ hɛ̧púna ka sáŋna a Mɔyíze vbíy, ɓay a tɔ́ʼɔ hí̧ njukuri too ɓá, mɔ́ ziŋ ŋgɛ́rɛ dá.»
Zezú ŋgɛ́rɛ njukupéna a gáŋnjuku a ŋgawbére a Rɔmɛri̧
(Luk 7:1-10)
5Zezú kaw rí ɓil pû a Kapɛrnahûm, lé gáŋnjuku a há̧na, ka kaw tûl a ŋgawbére a Rɔmɛri̧ ísɔ́t, gí ziŋ nɛ́, 6a vú hí̧ nɛ́, a sa: «Gáŋmbây, njukupéna a mǐ, e ka záŋmá a gel ní ŋgɛ́rɛ mambá, mûn nɛ́ hú ŋgboro mbêw!» 7Zezú sa hí̧ nɛ́: «Mi e séna, a sé ŋgɛ́rɛ nɛ́.» 8Dáy gáŋnjuku a ŋgawbére sa: «Gáŋmbây, mi zi ma, ɓay a mɔ́ gí rí ɓil hɛlɛ a mí nyá. Mɔ́ saɓay mbêw yáŋ, lé njukupéna a mǐ e ziŋ ŋgɛ́rɛ. 9Mǐ, mi erú ka gáŋnjuku ka kaw tûl ní, ka mi kaw lá kuriri, mi erú ka ŋgawbéreri a bɔʼɔ ní, ka lá nzáʼa ní. Mi sa hí̧ njuku mbêw ɓá: “Mɔ́ sé! Lé ké sé.” Mi sa hí̧ njuku a féké ɓá “Mɔ́ gí! Lé ké gí!” Rá̧ a sa hí̧ njukupéna a mǐ “Mɔ́ niŋ hɛ̧ nɛ́! Lé ké niŋ!” » 10Gelka Zezú láɓay nɔ́y, ké kaw yér dáy, a sa hí̧ njukuri ka tɔ́ŋ nɛ́y: «Katína, mi sa hí̧ wǎyri gbátɓay, a ɓil a njuku a Izirayɛ́lri too, mi zi kó njuku ka e a mára̧ láɓulaw ɓá báŋa a njuku nɛ́ nyá. 11Dáy, mi sa hí̧ wǎyri ɓá, njukuri ɓá ŋgɛ̧́náké e gí a ŋgboro a tɛ̧́na a sêe rá̧ a ríŋa sêe, kú e gí kaw nzáʼa lâʼa mbêw kuu Abaraham, Izák rá̧ Zakob a ɓil Pû a Gáŋvbôn. 12Dáy, njukuri ka Gáŋvbôn mɔny Pû mɛ̌ zoko ɓay a kuriri, kú e ní kuriri kɔ̧ kála, a ɓil tirí̧ma, a goló kú e vú ka sɔ̧́ sîl a kuriri!»
13A falké, Zezú sa hí̧ gáŋnjuku a ŋgawbéreri ɓá: «Mɔ́ resé pû a mɔ̌! Ké ná hí̧ mɔ́, ɓá báŋké nɔ́ ka mɔ́ láɓulaw sé tûlké!» Núnmbɛ̧́nɛ́ a goló, njukupéna a mɛ̌ ziŋ ŋgɛ́rɛ.
Zezú ŋgɛ́rɛ máfáy a Píyɛ́r rá̧ njuku a fékéri
(Mrk 1:29-34; Luk 4:38-41)
14A falké, Zezú sé ɓil hɛlɛ a Píyɛ́r, a gé ziŋ máfáy a mɛ̌ erú ka záŋmá pélé. 15Zezú gé ɗa ndɔ̂ʼɛ dáy, ké ziŋ ŋgɛ́rɛ, a uru a ɓá hɛ̧sɔ̧́na hí̧ nɛ́.
16Ka bɔʼɔlêw ká̧y, kú fa̧ njuku záŋmá têm ɓékéri ɓá ŋgɛ̧́náké, gí hí̧ Zezú. Ka ŋgboro a ɓay a mɛ̌, Zezú ní têm ɓékéri ɓá ŋgɛ̧́náké, a ŋgɛ́rɛ njuku záŋmári̧ too. 17Nǎŋnɔ́, niŋ ɓá báŋké nɔ́ ka ɓay a porofɛ́t Ezayí tí sáy ɓá: «Ké nyá kpɛrɛ a manárí̧, a réhol záŋmá a manárí̧ ka̧n tûlé.»
Njukuri ka zi ɓay a tɔ́ŋ Zezú
(Luk 9:57-62)
18Gelka Zezú kó njukuri mára̧ ɗɔ́ŋ nɛ́y, ké sa hí̧ gunbɛʼɛri ɓá kú he sé helkála fâ̧w, a ŋgboro sá̧. 19Dáy, njuku tɔ́ʼɔ sáŋna a há̧na gí gé lé, a sa hí̧ nɛ́ ɓá: «Gáŋnjuku, mi e tɔ́ŋ mɔ́ sé gel too ka mɔ́ e sénay.» 20Dáy Zezú resa hí̧ nɛ́ ɓá: «Gáʼanri̧ erú ka lɔ̂ʼɔ nâm a kuriri, ndoyri erú ka vûn a kuriri. Dáy Gun a njuku, zi tí ka gel, ɓay a ɓá tûlé ka̧nrú̧ nyá.»
21Njuku a féké mbêw a bazeŋ a gunbɔʼɔ a Zezúri sa hí̧ nɛ́ ɓá: «Gáŋmbây, mi vú hí̧ mɔ́, mɔ́ pɔŋ ŋgboro hí̧ mí, a mí sé goro bâa a mǐ rá̧.» 22Zezú resa hí̧ nɛ́ ɓá: «Mɔ́ tɔ́ŋ mi, a mɔ́ pɔŋ hûlri kú goro hûl a kuriri.»
Zezú pom kúna
(Mrk 4:35-41; Luk 8:22-25)
23Zezú rí ɓil kumbôn dáy Gunbɛʼɛri tɔ́ŋ nɛ́. 24Núnmbɛ̧́nɛ́, gáŋ kúna uru, a laŋ mbii, gbélém mbii uru a zaʼa kumbôn lé, Zezú e ka nâm. 25Gunbɛʼɛri ta̧m gí gbɛ́ŋɛ́, a toma nɛ́ ka vbá̧nzáʼa a sa: «Gáŋmbây, mɔ́ pɛ̧́ rú, rú e hûl!» 26Dáy, Zezú toma, a sa hí̧ kuriri ɓá: «Ɓayhí̧ i ŋgú wɔ́w lé, njuku mbílaw kpú nyári̧?» Dáy, ké uru, a pom kúna rá̧ mbii lé, gel rená yím. 27Kuriri too, kú kaw yér, a sa: «Njuku nɛ́, ɓá njuku a sí̧ rá̧ mbii rá̧ kúna lá nzɛ́ʼɛ lé?»
Zezú ŋgɛ́rɛ njuku záŋmá têm ɓékéri sére
(Mrk 5:1-20; Luk 8:26-39)
28Gelka Zezú ka̧ kála mbii, ka tísiri a Gadareniyɛ̧, njukuri sére tɛ̧́ a tûlpâl, gí ziŋ nɛ́. Kú erú ka záŋmá têm ɓéké, a ŋgbɔ́rɔ mambá, njuku ka zi ɓay a tá ŋgboroké zi tí yá. 29Dáy, kú vbá̧nzáʼa a sa: «Gun a Gáŋvbôn, a̧hí̧ mɔ́ zi ziŋ rúy lé? Mɔ́ gí ɓá rú tɔ́ʼɔsêe ɗambɛl rá̧ nâmké, ké ka̧ lé?»
30A gbaŋa kuriri kpay, kɔsɔri ɓá ŋgɛ̧́náké kaw ɛ́ lâʼa. 31Têm ɓékéri gɔ́ŋ Zezú a sa: «Mɔ̌ mí zi ɓay a ní rú lé, mɔ́ pé rú kɔ̧ mûn a kɔsɔ nɔ́rí̧!» 32Dáy Zezú sa: «I sé!» Têm ɓékéri tɛ̧́ ka mûn a njuku ráyri̧, a sé ri mûn a kɔsɔri. Núnmbɛ̧́nɛ́, kɔsɔri too ŋgú ɗere ŋgêŋ, a lé mbii a hú kɔ̧rú̧. 33Njukuri, ka kaw koro kɔsɔri, réka ŋgúna sé pû, a gé saɓay a hɛ̧ri̧ ka ziŋ kuriri rá̧ hɛ̧ ka ziŋ njuku sére nɔ́rí̧ ka erú ka záŋmá têm ɓékéri. 34Nǎŋnɔ́, njuku pûri tɛ̧́ too, a sé ziŋ Zezú. Gelka kú gé ziŋ nɛ́, kú vú hí̧ nɛ́ ɓá ké kála a ɓil kaw a kuriri.
လက်ရှိရွေးချယ်ထားမှု
Matiye 8: pnz
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2023 CABTAL
