Matiye 11
11
Gunbɔʼɔ a Zâŋ Batís
(Luk 7:18-35)
1Gelka Zezú ɔrɔ saɓay hí̧ gunbɛʼɛri bôo a sére, ké kála a goló sé tɔ́ʼɔhɛ̧ hí̧ njukuri, a tɔ́ʼɔɓay lá pûri a ɓil kawké.
2Zâŋ Batís e ka vûn sɛl a láɓay a Kiris rá̧ hɛ̧ri̧ a ké niŋ. Ké pé gunbɛʼɛ a fékéri 3sé vbí Zezú Kiris ɓá: «Mɔ̌, pé kaw ɓá njuku pɛ̧́ njukuri ka e gína lé? Malé rú kaw zoko njuku a féké ɓáy lé?» 4Zezú sa hí̧ kuriri ɓá: «Kú sé sa hí̧ Zâŋ hɛ̧ a kú kó, ka a lá. 5Râ̧wri̧ kó gel, njuku bɔʼɔ belyári séséna ɓá béláké, njuku ndɛ́ɓɛri ziŋ ŋgɛ́rɛ, njuku súkú tí yári láɓay, hûlri toma, kú tɔ́ʼɔ Bélaɓay hí̧ njuku fóyári. 6Béla káwa hí̧ njuku ka zi ta̧ a ɓil láɓulaw a mɛ̌, ɓay tûl ní yáy!»
7Gelka, gunbɔʼɔ a Zâŋ Batísri rekála dáy, Zezú mbí ɓay a sa sé tûl a Zâŋ hí̧ njukuri ka e a gelké. Ké vbí kuriri ɓá: A̧hí̧ rá̧ i sé kónáké ka lawkɔ́r lé? Kâ̧wŋgbá ka kúna laŋ lé? Háy! 8Dáy a̧hí̧ i sé kónáké lé? Njuku ri gári a béláké lé? Háy! Njukuri ka ri gári a béláké e a ɓil béla káwa, a kaw a ɓil pû a mbâyri! 9Dáy a̧hí̧ i sé kónáké lé? Porofɛ́t a há̧na lé? Katína, dáy mi sa hí̧ wǎyri, ké ɓá njuku ka ndé porofɛ́t ɓáy. 10Zâŋ ɓá njuku ka Gáŋvbôn tí saɓay a mɛ̌ a ɓil Mbété ɓá: «Mɔ́ lá, mi e pé njuku nzáʼapéna a mǐ tí ɗambɛl hí̧ mɔ́, ɓay ké mɔny ŋgboro hí̧ mɔ́.» 11Zezú sa ɓáy ɓá: Katína, njuku a há̧na ka ndé Zâŋ Batís zi tí yá, a tu ɓá, njuku ka hɔ̧́ nyá tapát a ɓil Pû a Gáŋvbôn, ndé nɛ́ ka hɔ̧́na. 12Tí a ɓil nâm ka Zâŋ Batís tɔ́ʼɔɓay ka̧ sénɛ́, njukuri ɗɔ́ŋ Pû a Gáŋvbôn a ŋgɛ́rɛ, dáy njuku ŋgɛ́rɛri kaw ɛ́ ŋgboro ɓay nyá pûké. 13Porofɛ́tri too rá̧ sáŋna a Mɔyíze saɓay a Pû a Gáŋvbôn, sé ka̧ nâm a Zâŋ Batís. 14Dáy, wǎy mí zi ɓay a lánáké lé, Zâŋ ɓá Eli, a kú saɓay a gína a mɛ̌. 15I lá ɓá táŋáké, ka wǎyri mí erú ka súkú lánákéy!
16«A̧hí̧, mi e ɓá lé njuku a ŋgɛŋnɛ́ nɛ́rí̧ lé? Kú kaw ɓá báŋa gun a léléri ka mára̧ kaw laɓára, dáy a nzé ŋgbɔ́ŋɔ a ŋgɔ̧rɔ̧ ɓay ziŋ há̧narí̧ a vbá̧nzáʼa: 17“Rú ul madokâ̧w ɓay nday, i zi ndá nday yá! Rú ɗí si̧ŋ réhûl, i zi réhûl yá!” 18Ɓayhí̧lé Zâŋ Batís gí, ké zi lâʼa hɛ̧ nyá, a nzó hɛ̧ nyá, dáy njukuri sa: “Í kó njuku nɛ́, e ka têm ɓéké.” 19Gun a njuku gí, ké lâʼa, a nzó, dáy njukuri sa i kó: “Njuku a ǎ̧y kɛrɛ ɓá, ɓay a lâʼa rá̧ nzó vôn! Ké kaw ɓá mbáŋa a njuku mára̧ lari lambôri rá̧ njuku niŋ ɓékéhɛ̧ri̧.” Dáy rɔ̧́na a Gáŋvbôn tɔ́ʼɔ mûn nɛ́ ɓá ndáráké ka ŋgboro a hɛ̧ niŋa a mɛ̌.»
Pûri ka zi láɓulaw hí̧ Zezú yáy
(Luk 10:13-15)
20Dáy, Zezú tí nzáʼa ziŋ njuku pûri, a ké niŋ hɛ̧sáʼamari̧ ɓá ŋgɛ̧́náké ka rúy, ɓayhí̧lé njukukéri zi fere káwa a kuriri yá. Dáy a sa: 21«Lelêe hí̧ mɔ́, mɔ̌ njuku Korazɛŋ, lelêe hí̧ mɔ́, mɔ̌ njuku Bɛtsayida! Ɓayhí̧lé hɛ̧sáʼamari̧ a kú niŋ a pû a wǎyri, kú mí niŋ ka Tîr rá̧ Sidɔ̂ŋ, ɗiɓaŋ dá ka njuku pûkéri e niŋ gel hûl, ka ri gári sêe, ka ɓá súgú nɔ́ tûl a kuriri, ka fere káwa a kuriri. 22Katína, mi sa hí̧ wǎyri gbátɓay, sêe walɓay a Gáŋvbôn lé, e ŋgbɔ́rɔ mambá hí̧ wǎyri, tá ɓala a njuku a Sidɔ̂ŋ rá̧ Tîr. 23A wǎyri njuku a Kapɛrnahûmri̧, i kɛrɛ ɓá Gáŋvbôn e ɓá wǎyri he sé nûnalê lé? Bɔʼɔ mbêw yá, ké e ɗere wǎyri sé pû hûlri! Ɓayhí̧lé hɛ̧sáʼamari̧ ka Gáŋvbôn niŋ a gel a wǎyri, mí niŋ ka Sɔdɔ̂m, pû Sɔdɔ̂m tí ɓewa yá. 24Dáy, mi sa hí̧ wǎyri gbátɓay, sêe walɓay a Gáŋvbôn, e ŋgbɔ́rɔ mambá hí̧ wǎyri, tá ɓala a njuku a Sɔdɔ̂mri̧.»
Zezú sa í gí gel ní gí ziŋ ɔʼɔ
(Luk 10:21-22)
25A falké, Zezú sa: «Bâa, Gáŋmbây a nûnalê rá̧ a tísiri, mi zi awá hí̧ mɔ́, ɓay ka mɔ ten táŋa hɛ̧ ka mɔ́ ɓá mú njuku a rɔ̧́nakéri, rá̧ njuku hɛ̧túnari̧ hí̧ njuku a tɛ̧́wkéri. 26Katína Bâa, ɓá nǎŋ pé mɔ zi ɓá hɛ̧ké ké niŋ.
27Bâa a mǐ, ɓá hɛ̧ too kɔ̧ ɓil ndɔ̂ʼɔní, njuku a há̧na zi tu Gun nyá, mí zi tí ɓá Bâa yáy. Nǎŋnɔ́ njuku a há̧na zi tu Bâa yá, mí zi tí ɓá Gun nyáy, rá̧ njukuri ka Gun zi tɔ́ʼɔ Bâa hí̧ kuriri.
28I gí gel ní, wǎyri ka ta̧ ka hóla a zínáké, a mi hí̧ wǎyri ɔʼɔ. 29Í mbí jûk a mǐ ka̧n sôl a wǎyri, a i pɔŋ mí tɔ́ʼɔhɛ̧ hí̧ wǎyri, ɓayhí̧lé mi kaw ɓá njuku law a vónáké, táŋ hɔ̧́ mûn, i e ziŋ ɔʼɔ ɓay a wǎyri. 30Katína jûk ka mí ɗí wǎyri ɓá í hol, zi tí ɓá hóla a zínáké yá, ɓá hóla ka zi yáy.»
လက်ရှိရွေးချယ်ထားမှု
Matiye 11: pnz
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2023 CABTAL
