Matiyò 1
1
Hwèlalòhwèlì hwe Lìhwendè là ama Yerzù
(Luk 3.23-38)
1Nanù ndi mòtende mò imbamba jà ama Yerzù Krirztò mò hwèlì. Yerzù à mà uhwɛ̀lɛ̀lɛ ndi ò mòtende mò ama kiŋgɛ̀ Dàhwitì. Dàhwitì mɔ̀ hvɛ à mà uhwɛ̀lɛ̀lɛ ndi ò mòtende mò ama Abràhamù.
2Abràhamù à mà hwɛ ndi è rzàŋgò yà ama Irzàkì. Irzàkì mɔ̀ ndi à mà hwɛ è rzàŋgò yà ama Jèkɔ̀bù. Jèkɔ̀bù à mà hwɛ è rzàŋgò yà ama Judà nà wònyànyàŋgò hwa enì. 3Judà nà jòjìyɛ̀ wà eni Tamà wɔ̀ ndi hwa mà ŋya Pɛ̀rɛrzì nà Rzɛrà. Pɛ̀rɛrzì ndi à mà hwɛ è rzàŋgò yà ama Hɛ̀rzɔ̀nì. Hɛ̀rzɔ̀nì ndi à mà hwɛ è rzàŋgò yà ama Ràmì. 4Ràmì à mà hwɛ ndi e rzàŋgò yà ama Àminadàbì. Àminadàbì mɔ̀ hvɛ à mà hwɛ ndi è rzàŋgò yà ama Nàrzɔ̀nì. Nàrzɔ̀nì mɔ̀ hvɛ ndi à mà hwɛ è rzàŋgò yà ama Rzàlmɔ̀nì. 5Rzàlmɔ̀nì nà jòjìyɛ̀ wà eni Ràhabɛ̀ wɔ̀ ndi hwa mà ŋya Bòwarzì. Bòwarzì nà jòjìyɛ̀ wà eni Lutì wɔ̀ ndi hwa mà ŋya Obɛ̀dì. Obɛ̀dì mɔ̀ à mà hwɛ ndi è rzàŋgò yà ama Jɛ̀rzɛ̀. 6Jɛ̀rzɛ̀ mɔ̀ ndi à mà hwɛ è rzàŋgò yà ama kiŋgɛ̀ Dàhwitì.
Kiŋgɛ Dàhwitì nà jòjìyɛ̀ wà ama Urziya wɔ̀ ndi hwa mà ŋya Rzòlòmɔ̀nì. 7Rzòlòmɔ̀nì mɔ̀ ndi à mà hwɛ è rzàŋgò yà ama Rèhòbòwàmì. Rèhòbòwàmì ndi à mà hwɛ è rzàŋgò yà ama Àbijà. Àbijà mɔ̀ hvɛ ndi à mà hwɛ è rzàŋgò yà ama Arzà. 8Arzà mɔ̀ hvɛ ndi à mà hwɛ è rzàŋgò yà ama Jèhòrzàhvàtì. Jèhòrzàhvàtì mɔ̀ hvɛ mɔ̀ ndi à mà hwɛ è rzàŋgò yà ama Jèhòràmì. Jèhòràmì mɔ̀ hvɛ ndi à mà hwɛ è rzàŋgò yà ama Urzìya. 9Urzìya mɔ̀hvɛ ndi à mà hwɛ è rzàŋgò yà ama Jòtàmì. Jòtàmì mɔ̀ hvɛ mɔ̀ ndi à mà hwɛ è rzàŋgò yà ama Aharzì. Aharzì mɔ̀ hvɛ ndi à mà hwɛ è rzàŋgò yà ama Hèrzekaya. 10Hèrzekaya mɔ̀ hvɛ ndi à mà hwɛ è rzàŋgò yà ama Manarzɛ̀. Manarzɛ̀ mɔ̀ hvɛ ndi à mà hwɛ è rzàŋgò yà ama Amɔ̀nì. Amɔ̀nì mɔ̀ hvɛ mɔ̀ ndi à mà hwɛ è rzàŋgò yà ama Jòrzaya. 11Jòrzaya mɔ̀ ndi à mà ŋya Jèkòniyà nà wònyànyàŋgò hwe eni, ò lìŋgi lìrzàkò ema hwatò hwa Bàbìlɔ̀nì hwa mà tiye hwatò hwa Irzàyɛ̀lì ò njuma, rzìi hwa hwà ɛ̀ndɛ̀nɛ̀ nàa lìrzàŋgò ema hwa mà uhwane ò njuma ò èkòmè ya awu.
12O mburzà hwene hwèyà hwe arzɛ natɛ̀ɛ nà è hvònda ema hwa mà ŋya Yerzù, imbamba jà ama Yerzù ì mà hwɛ ndi: Jèkòniyà ndi à mà hwɛ è rzàŋgò yà ama Rzɛ̀yàltìyɛ̀lì. Rzɛ̀yàltìyɛ̀lì à mà hwɛ ndi è rzàŋgò yà ama Rzèrubàbɛ̀lì. 13Rzèrubàbɛ̀lì ndi à mà hwɛ è rzàŋgò yà ama Abùdì. Abùdì ndi à mà hwɛ è rzàŋgò yà ama Èlìyàkìmì. Èlìyàkìmì mɔ̀ hvɛ à mà hwɛ ndi è rzàŋgò yà ama Arzɔ̀. 14Arzɔ̀ ndi à mà hwɛ è rzàŋgò yà ama Rzàdɔ̀ki. Rzàdɔ̀ki mɔ̀ hvɛ ndi à mà hwɛ è rzàŋgò yà ama Akimi. Akimi ndi à mà hwɛ è rzàŋgò yà ama Èlìyùdì. 15Èlìyùdì ndi à mà hwɛ è rzàŋgò yà ama Èlìrza. Èlìrza hvɛ ndi à mà hwɛ è rzàŋgò yà ama Màtanì. Màtanì mɔ̀hvɛ ndi à mà hwɛ è rzàŋgò yà ama Jèkɔ̀bù. 16Jèkɔ̀bù ndi à mà hwɛ è rzàŋgò yà ama Jòrzɛ̀hvù. Jòrzɛ̀hvù ndi à mà hwɛ mòjòmɛ̀ mò ama Màlìyɛ̀. Màlìyɛ̀ ndi à mà ŋya Yerzù. Yerzù a hwɛ̀lɛ̀hwɛ̀ Krìrztò.
17Ene ŋgàna è uŋmɛ̀lɛ̀ ndi nanù ema, ò mà hwɛ lìyòme là nyɔ̀ŋgɔ̀nì nà inɛyi, lìwòtèyà è hvònda yà ama Abràhamù lì ùka è hvònda yà ama kiŋgɛ̀ Dàhwitì. Ò mà hwɛ hvɛ lìyòmɛ̀ là nyɔ̀ŋgɔ̀nì nà inɛyi lìwòteyà è hvònda yà ama kiŋgɛ̀ Dàhwitì natɛ̀ɛ nà è hvònda ema hwatò hwa Bàbìlɔ̀nì hwa mà tiye hwatò hwa Irzàyɛ̀lì ò njuma rzi hwa hwà ɛ̀ndɛ̀nɛ̀ nàa lìrzàŋgò ema hwa mà uhwane ò njuma. Ò mà hwɛ̀ hvɛ ndi lìyòmɛ̀ là nyɔ̀ŋgɔ̀nì nà inɛyi lìwòteyà è hvònda ema hwatò hwa Bàbìlɔ̀nì hwa mà tiye hwatò hwa Irzàyɛ̀lì ò njuma rzi hwa hwà ɛ̀ndɛ̀nɛ̀ nàa lìrzàŋgò ema hwa mà uhwane ò njuma natɛ̀ɛ nà è hvònda ema Yerzù à mà ŋyahwe.
Hwèŋyàyèlì hwe ama Yerzù Krìrztò
(Luk 2.1-7)
18Nanù ndi hwèŋyàyèlì hwe ama Yerzù hwe mà hwɛ: Màlìyɛ̀ è nyàŋgò yà ama Yerzù à mà hwɛ ndi mɔ̀ɔmbɔ̀ mò ŋgɔ̀ndɔ̀ ema à rzi hwiyɛ̀ munyanà. À mà hwɛ ndi ehwàndà yà ama Jòrzɛ̀hvù. Ndèŋgàna Màlìyɛ̀ à è ɛndɛ ò lì hwahwà, Jòrzɛ̀hvù hwa mà emba nanù ema Màlìyɛ̀ à mà hwɛ nà lèmì, ò lì akèyà nà è ŋginyà yà Èlìŋgɛ̀ yà Wòtani. 19Kànàtɛ̀ Jòrzɛ̀hvù è mùnyanà wà eni à mà hwɛ ndi mòtò wà gbamù, à rzi lìŋgàne lì jàneyà Màliyɛ̀ ìrzɔnì. O èŋgànɛ̀lɛ̀ à mà lùtèya ò ŋmèma ò lì hvaŋga ehwàndà ò jututa. 20Ò maŋga màlùtèyà mà eni rzi è aŋgèlì yà ama Lohwɛ̀ è mò jèeya ò ndɔ̀tɔ̀. Rzi eŋge aŋgèlì è mò òhwèyà nanù ema, “Jòrzɛ̀hvù è ŋmanà wà mòtende mò ama Dàhwitì, ò rza òka wɔ̀ŋgɔ̀, ò lì wòwà Màlìyɛ̀ nàa jòjìyɛ̀ wà aŋgɔ̀, èhwanja Èlìŋgɛ̀ yà Wòtani è mà mò rzihwèya rzi à lìta. 21À ò ŋya ŋmanà wà mùnyanà, o ò mò kpɛ̀ ndi lìinà Yerzù, èhwanja à ò òŋgirzɛ hwatò wà eni ò wòhwe wò awu.” 22Hwenè hwe arzɛ hwe mà gbèyɛnɛ ò lì òndìrzɛ eyà ema Lohwɛ̀ à mà òme è mòòhwèlì wà èlìŋgɛ̀ ò lì òhwa nanù ema,
23“È òkànèyà mɔ̀ɔ̀mbɔ̀ mò ŋgɔ̀ndɔ̀ ema mò rzi hwi munyanà mò lìta lèmì,
mò ŋya ŋmanà wà mùnyanà,
hwa ò mò hwɛlɛ ndi Èmànùwɛ̀lì.”
Jàànda jà lini lìinà lì hwèlì ndi nanù ema, “Lohwɛ̀ à hwèlì nà irzɔ̀.” 24È hvònda ema Jòrzɛ̀hvù à mà ìmòwè ò ijɔ̀ à mà gbèya mamɛ è aŋgèlì yà Lohwɛ̀ è mà mò òhwèyà. À mà wòwà Màlìyɛ̀ ò lì hwɛ è jòjìyɛ̀ yà eni. 25Ndi natɛ̀ɛ Màlìyɛ̀ à mà ŋya è ŋmanà, Jòrzɛ̀hvù à rzi mò hwiye nà jòjìyɛ̀ yà eni. Jòrzɛ̀hvù rzìi à kpɛ̀ òŋgò ŋmanà lìinà Yerzù.
လက်ရှိရွေးချယ်ထားမှု
Matiyò 1: bri
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
