मती 4
4
कलउ ईसूय अंदजावतेरा
(मरकूस 1:12-13; लूका 4:1-13)
1हना तयोमरे सुद बिरुवा ईसू टयंगाब ततेर अगी अगुवाइतिरिया। अरू हंडा कलउ ईसू अंदजावगेय लगाय दोहोना। 2हंडा ईसू चालीस दिन अरू चालीस रइत उपासरेय दोहोना। अरू हना तयोमरे हाँय रंगेगतिरिया। 3हनते कलउ वेगनेनखन हाँय एचेरेय कतातेड, “आम भगवानरीग बेटा हवे दो, नाःआ दिरिकून रुटी बड़ाँः लगाम हुकुमगोड।”
4दो ईसू कतातेड, “भगवानराः कागदरे नाःआ इया ओजाःतो इदा,
मनुवा रुटी एकलाते ओरोय जियावनेना,
मनदो भगवान कतायता हना मेमेडटोंग सरवनते हाँय जिनियाःता।”#दो. नि. 8:3
5हना तयोमरे कलउ भगवानराः सुद सहररे ईसूय गोःयाडीग अरू भगवानराः ओड़ाःरे उसूल दोहोना हना सड़ुम मुंधनीरे एचे चड़ाँगोतेडीगखन, 6ईसू एचेरेय कतातेरा, “आम भगवानरीग बेटा हवे दो डेगानमे। भगवानराः कागदरे नाःआ इया ओजाःतो इदा,
भगवान सेरमो देसरिकुःआ बराहीलकू एचेरे
आम बदीरेय हुकुमवाकूता,
अरू
बराहीलकू अँकू तिःईते आम कसड़ुः अतेकू रेममेता
जेमहा आम काट दिरिरे अहा लगाः।”#सेरेंगकून 91:11,12
7दो ईसू हाँय एचेरेय कतातेरा, “भगवानराः कागदरे नाःआ इया हों ओजाःतो इदा,
आमरीग परबू भगवान अहम लहरावगेय।”#दो. नि. 6:16
8हना तयोमते कलउ ईसू मीटोंग मुरुक उसूल पहाड़रेय गोःयाडीग अरू हाँय चउंदीसराः जमा देसकून अरू हना देसकूनराः आन-धाने उदुःवातेरिया। 9अरू हाँय ईसू एचेरेय कताया, “आम ईंग तबेरकेडखनमे जागिंग दो, नाःआ जमाकून आम लगायिंग जिमागोडता।”
10दो ईसू हाँय एचेरेय कतातेड, “ने कलउ, ईंग अते ञीर जुवाःमे। भगवानराः कागदरे नाःआ इया ओजाःतो इदा,
आमरीग परबू भगवानमे जाग अरू हनाँय एकलाम सेवा।”#दो. नि. 6:13
11हनते हाँयग कलउ ईसूय अड़ाःगोतेडीग अरू ओहेन सेरमो देसरिकुःआ बराहीलकू ईसू एचेरे वेजेडखनकू सेवातिरिया।
ईसू सेवाय बुँहड़ीतेरा
(मरकूस 1:14,15; लूका 4:14,15)
12हना तयोमरे तोनोंगीग ईसू एचेरेय कतातेरा, एहुना जेहेलरे इदानिया, माःआन। हनालगा ईसू गलील छतर अगीय कुदायान। 13तोनोंग दिन तयोमरे ईसू नसरत सहर अते उडुंगनेनखन, जबुलून अरू नपताली गोतोररिकुःआ होड़कू दोहोना हना छतरराः, हुडिंग समुंदरते धरीराः कपरनहूम सहर सेनेडखन हंडाय दोहोना। 14भगवानराः कागदरे, भगवानराः बड़रा कता होड़ एसयाह कतातेरा हना कता पुराः लगा नाःआ इया होयानेना,
15“जबुलून अरू नपताली राइजरिकुःआ होड़कू,
एरदन नईराः मार परोमरिकुःआ होड़कू,
समुंदर धरीराः दूररेकू दोहोनता,
अरू गलील छतररिकुःआ बेगर एहूदाकू,
16अंदरारेकू दोहोना, हँकुःआ होड़कू मुरुक विड़चेड़तो मरसलकू ञेलतेरा,
अरू बेर निंदावारेय उडुंगगुःता,
हनन इया गुजुःराः बोतोरतेकू दोहोना हँकुःआ होड़कूराः जीव मरसलयान।”#एस 9:1,2#4:16 नंडा ओजाःतो इदा, हना मरसल ईसू बदीरे उदुःगेतना। एहुना 1:4 रेपे ञेल।
17दो हना वरीते ईसू परसारगे लगाय बुँहड़ीतेरा अरूय कतातेड, “भगवान अपे एचेरे राइजगे लगाय बुँहड़ीकेरा। हनालगा अपे कसूर अते जीवपे कुदा।”
चइरगोटोंग चेलाकूराः रराः
(मरकूस 1:16-20; लूका 5:1-11)
18मी दिन ईसू गलीलराः हुडिंग समुंदर धरी धरीय सेन मेला बार होड़ वगीयाकिने ञेलतेरा। मी होड़राः ञाव दोहोना सिमोन अरू हनाँयकू कतावा पतरस। अरू बोहोतराः ञाव दोहोना अंदरियास। दो हँकिन केंवटाकिन दोहोना अरू जालते हकूकू दाःआ। 19दो ईसू हँकिन एचेरेय कताया, “ईंग देह दूरबा वेग। दो ईंग एचेरे अबा होड़कू राः अगूदारिंग बड़ाँवबाता।” 20दो हननमेला हँकिन अँकिनराः फेका जालकून अटू एंडातेडखन ईसूरिकिनाः चेलाकिन बड़ाँवयान।
21हनते हँकू अरू तोरेकू सेनेड दो जबदीरिकिनाः बेटाकिन एकूब अरू एहुना, ईसू ञेलतेडकिना। हँकिन अपात सुदा डोंगारे दुड़ुःकेडखन जालकू तुला सोझावा। दो ईसू हँकिन होंय राःतेरा, 22अरू हँकिन ओहेन डोंगा अरू अँकिनरीग अपात अटूतेडखन ईसूरिकिनाः चेलाकिन बड़ाँवयान।
ईसू होड़कूय नपायतेरा
(लूका 6:17-19)
23हनते ईसू जमा गलील छतररे सेनेडखन हँकूराः अरजी ओड़ाःकूनरेय चेडतेडकुःआ। हाँय होड़कू एचेरे भगवानराः राइजराः नपाय सरवने परसारतेरा अरू अबड़ाहा होड़कू अरू जमा बरानाः बेमरियातेकू दोहोना हँकुःआ होड़कूय नपायगोड ञवना। 24हाँयराः ञाव जमा सिरिया राइजरे जगावयान, अरू हाँय बदीरेकू अयूमतेरा, हँकुःआ होड़कू अँकूरिकुःआ हसूत होड़कू, अरू भूतकू समसावनेना हँकुःआ होड़कू, भपरी होड़कू अरू लकवा ञेडतेडकुःआ हँकुःआ होड़कू, हँकू जमाकू हाँय एचेरेकू अगूतेडकुःआ। अरू हाँय हँकुःआ जमा होड़कूय नपायतेरा। 25गलील छतर अरू दिकापुलीस राइज अरू एरुसलेम मरंग सहर अरू एहूदिया छतररिकुःआ होड़कू अरू एरदन नई मार परोमरिकुःआ मुरुक बगरा होड़कू ईसू देह दूरकू ओतोंग वेजेडा।
လက်ရှိရွေးချယ်ထားမှု
मती 4: kfp
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© (Active) Wycliffe Bible Translators, Inc. All rights reserved.
