Wïlöölö 2
2
1Køøre nø, maal ki piny athum ki cwääc, këël gïïa thööth na en yïthge bëët.
2'Ba na tïme na bïriet nïne, ni Jwøk tïïe moe moa tïïe bëët ee nø thöör, eni ree ajwöme ri bïriet nïne kanya løny tïïe moe bëët moa tïïe. 3Køøre Jwøk bïriet nïne agwïëdhe, ni tïïc gø ni ena kur keere na mare, kiper beeye dïcäŋ mana jwöm ree yie ki tïïc kanya løny tïïe moe ki jammi bëët moa cwääe.
Kanya Ö Jwøki Na Cwääc Dhaanhø
4Man beeye luum cwääc mana cwääc maal ki piny ki gø. Kanya ö Wuuö Jwøki na cwääc maal ki piny, 5kar kaaca poot bäŋ teeŋ gïn mo thiinh mo cwøl na abuŋŋö mo otuy yïth ŋøøm bäät piny; ni bäŋ teeŋ gïn mo marr mo otuy bäät ŋøøm, kiper Wuuö Jwøk gïn cwøl ni køth en poot käre jääŋŋö bäät piny. Kar kaaca thuwø poot bäŋ dhaanhø mo purö wïth ŋøøm. 6'Ba da rwöc mo wø ööa wøk ki yïth ŋøøm mo jwøya piny bäre. 7Ni ö Wuuö Jwøki ni cwääc dhaanhø ri ŋøøp piny, ni kooth jam kwøw um dhaanhø, ni tïm dhaanhe ni ree da jwïëy mo kwøw.
8Ni ö Wuuö Jwøki ni piith ajïniina yi kanya cwøl ni Ëden na en jï løø kur tuul-cäŋ. Ni cïp dhaanhø mana cwääe kaace. 9Ni ö Wuuö Jwøki ni wëëk ŋøøpøgø tuuö ki teeŋ jenni bëët mo nëëni ni mïërö, ni beyø kiper cam. Ni jaadha näk jaath kwøw thuwø ena dï ajïniinøgø; këël jaadha näk jaath wø ŋäc gïn mo beer ki gïn mo raac ki køøre ena kaace thuwø.
10Yi kar kanyøgø da naam mo wø kwönnö ki yi Ëden mo jwøya ajïniinøgø. Ni ö naamøgø ni pääŋ ree keere ni tïme na näm aŋween. 11Ni nyeŋ mana dïkwøŋ cwøl ni Picön, ni caatha deŋ ŋööm Ëwlath bäre kanya näk yie da warkey. 12Ni warkey mar paanøgø beer; ni paanøgø yie da gïn mo cwøl ni bedöla, na näk dwøø mo ŋwääi ni met, ki cöyam, na näk waŋ kïdi mo pere leth. 13Ni nyeŋ riet naam maya cwøl ni Giyön, ni caatha deŋ ŋööm Kuuc bäre. 14Ni nyeŋ dää naam maya cwøl ni Thëgerø, ni cøøa ya Aciria jï løø kur tuul-cäŋ. Ni ŋweer naam cwøl ni Upareeti.
15Ni ö Wuuö Jwøki ni lwør dhaanhø ni kïth gø ya ajïniinna en Ëden kiper nee puure nee gwøe. 16Ni ö Wuuö Jwøki ni kööm dhaanhø ni kööe, ni «Løny jïrï ki man cämï ri nyïïjenni bëët jaak moa en ya ajïniina. 17'Ba jaath wø ŋäc gïn mo beer ki gïn mo raac ki køøre, kär nyïïe camï. Kiper dïcäŋo kööï ni nyaare camï camø, ï puta thøø møn.»
18Køøre Wuuö Jwøk aköö, ni «Ba doo beer ki man bëët dhaanhe keere. Beerra man cwääa ki ŋat mo kønynya gø mo orømø kipere.»
19'Ba Wuuö Jwøk lääc paap ki wec maal bëët ee nø cwääc ri ŋøøp piny. Ni käl geni baŋ dhaanhø kiper nee nyeŋ mo cak geni ki gøøni nee neene. Køøre dhaanhø nyeŋ gïïa näk kwøw bëët acaae, ni nyeŋ moa cak ge ki geni aput tïmö na nyeŋ moge. 20Ni ö dhaanhe ni cak nyeŋ lääc paac bëët ki nyeŋ wec maal ki nyeŋ lääc paap bëët. 'Ba kar kaaca poot bäŋ kunyi mo orømø mo onø joot kiper Adam. 21Køøre Wuuö Jwøk nyeŋ dhaanhø amooe ki niine mo thööth døc ni bute. Ni ö Wuuö Jwøki ni kän wøk ki cöön ŋëëdö aciel røk ŋëët dhaanhø, ni kïth kar ŋëëdö ki rïŋ dëël. 22Ni ö Wuuö Jwøki ni tïïc ŋëëdö mana käl ri dhaanhø na dhaagø, ni kïth gø baŋ dhaanhø.
23Køøre dhaanhø aköö,
ni «Man ennø, beeye cöö mana ö wøk ri cuu 'moa;
ni beeye dëël mana käl rïŋ dëëra.
Eno cwøl na dhaagø,
kiper eni käl wøk ka dëër dïcwøø.»
24Kiper manøgø nø, dïcwøø wänni ki menni owiie ni dwätge na aciel ki cïïe, ni tïmge na dëël aciel.
25'Ba kar kaaca dhaanhø ki cïïe ge bëëdö ni ge cäädhi ka dëëtge jaak, ni bäŋ laac wïc jïge.
လက်ရှိရွေးချယ်ထားမှု
Wïlöölö 2: AnyuB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© The Bible Society of Ethiopia