ማቲወስት ወንጌል 6
6
ፈወነ 6
ምፅዋት ይወነውዝቍዝ
1«እቅ ክታት ቓልጛንስ ይርን ክታቀሰው ሰቭድየንት እቀ በዊል ፃቫይርነጘ ጣጝቅቅጭጥን፤ ኣለዝየ ሲመይ ፅበው ክታይርቲስ ወየ ችጛይርነቅም።#ማቲ. 23፡5። 2እጅርዝ በዊል ኪብርጥጘ በንጝ ጝታምፅዋትድ ምኵራቭዝመ ጒደነዝ ጨቨቅ ቱትለ ዋስጛ ፃቨቍ ተክዘጥ እቂዝጘ ክትንም ክታምፅዋትድ እቅ ቓልጛንስ ይርን ፃቭትርነ፤ እማንዝ የኵን፤ ጛይ ጝታወየድ ምሉዝ ለምርጝኵ። 3ክት ኣራንድ ማፅውትራንድ ክለወ ናንድ ፃቨውድየንት ክፃግቭ ናንድ ኣርቒነ። 4ክምፅዋትድ ስውርዝ ኣነ፤ ስውርዝ ፃቭኑድየንት ቓለው ኪርም ክወየድ ግልፅዝ ኪፍልጡ።»
ፀለውት ፃልየነውዝቍዝ
(ሉቃ. 11፡2-4)
5«ፃልይርናንድ ተክዘጥ እቂዝጘ ኣትርነ፤ ጛይ እቅ ቓልጛንስ ይጝ ምኵራቭዝመ ጒደነዝ ጨቨቅ ችብርጝ ፃልየነው ቀንጘኵ፤ እማንዝ የኵን፤ ጛይ ጝታወየድ ምሉዝ ለምርጝኵ።#ሉቃ. 18፡10-14። 6ክት ኣራንድ ፃልይራንድ ክጝን ክፍሊል ጥውር ክቢለድ ዲቭር ስውርዝ ፅበው ኪርትል ፃልይ፤ ስውርዝ ፃቭኑድየንት ቓለው ኪርም ክወየድ ግልፅዝ ኪፍልጡ።
7«ፃልይርናንድ ኣኽዛቫኒዝጘ ጊነትቍ ቃላን ደግምግምርና ሊልፍትርነ፤ ጛጭስ ኒቒስን ዲግመነውዝ እደረ ወሽጡ ተከኵ።#1ነገ. 18፡25-29። 8እንዝ ማጥን ጛት ተክትርነ፤ ምላሰንድም ክታይር ክትን ጨዊጝቀ ክታጭስ በንዘውድየንት ኣርቐኵ። 9ነስየ ፃልይርናንድ እንት ይጥን፦
‹ሲመይ ፅብረር ይናኣይርወ!
ክሽድ ኪብርነ።
10ክምጝግስትየን ተትርነ፤
ከፈቃድሸን ሲመይስ ኣረጘ፣
እኒዝጘም ዝቨትል ኣርነ።
11እልቱ ይናሚድየንት ንጭ ነቅ።
12ይን ይናት ቢድለቍድዛት ይቅር ይናንትጘ፣
ክትም ይናበደልድየንት ይቅር ይ።
13ይናት ጭቓ ዊገይስቅ ቓዝጚ
ፊተነል ድውተ፤
ምጝግስት፣ ኻይልም፣ ክቭርም፣
ዘላልም ኩ የጝ፤
ኣሚን።›#6፡13 እኒን ግሪኪዝዊል እጀውም፤ ኣነጚ ኽፅምትቍ ትርጕማኒስ ችጝሸኵ።
14«ክትን ክታት ቢድለቍድዛት ይቅር ይርንሽ ሲመይ ፅበው ክታይርም ክታት ይቅር ይጡ። 15ክትን እቀ በደልድየንት ይቅር ዪይርንሽ ግን፣ ሲመይ ፅበው ክታይርም ክታበደልድየንት ይቅር ያውም።»#ማቲ. 11፡25-26።
ፃም ፃመነውዝቍዝ
16«ፃምርናንድ ተክዘጥ እቅ ጝታፃመነውድየንት እቅ ቓልጛንስ ማጥን ጝታጋፅድ ጨቅጛንትጘ ክትንም ክታጋፅድ ፃምልውዝትርነ። እማንዝ የኵን፤ ጛይ ጝታወየድ ምሉዝ ለምርጝኵ።#እሳ. 58፡5። 17ክት ኣራንድ ፃምራንድ ክጋፅድ እቓጭ፤ ክኣውርድየንትም ቅቫት እቓጭ። 18እንዝም ክፃምድ ስውርዝ ፅበው ኪርስ ጭቝ ኣርቕሽተው፣ ላየ ኣውማው እጅርዝ ግን ሲውርሸው ኣጡ፤ ስውርዝ ፃቭኑድየንት ቓለው ኪርም ክወየድየንት ግልፅዝ ኪፍልጡ።»
እማንተው ኻፍት
(ሉቃ. 12፡33-34)
19«ናዘ ዀው፣ ማርትዝ ጨቅሸው፣ ቓፅጝም ኪልጝ ስው እን ዝቨይል ክታቕምስ ኻፍት ኣኽቭትርነ።#ያይ. 5፡2-3። 20ኽሽስ ናዘ ዃው፣ ማርትዝም ጨቅሻው፣ ቓፅጝም ኪልጝ ስይጘው ሲመይል ኻፍት ኣኽቭጥን። 21ክኻፍትድ ፅበዊል ክእዘንድም ጝግል ኣጡ።
22«እል ሰውነትዙ መብራት የጝ፤ ክእልድ ትኽኑ ኣቐውዝየ ክሰውነትድቅ ብሩኽ ኣቐኵ። 23ክእልድ ፅውዝጅነ ኣቐውዝየ ግን ክሰውነትድቅ ምሉዝ ጥመዝ ስርሸው የጝ ኣቐውድ። ነስየ ክግል ፅበው ብርኻንድ ጥመ ኣቐውዝየ፣ ጥመድሰ ኣወየው ወሰው ኣጡ?
24«ላው እጅር ሊጘ ኣደርጥዝ ቅምሽጠ ቸላውም፤ ላውድ ቀን ሊጘትረድ ሽክተኵ፤ ዊንም ላውድ ኪብርዝ ሊጘትረድ ነቀኵ፤ እደረስም ጊንዝቭዝም ሊንስ ቅምሽትርነ ቸላይርነቅም።»
ጨጝቅሸነው ጥውሻይየጘ
(ሉቃ. 11፡34-36)
25«እንዝ ማጥን፦ ‹ውር ዅንቅ? ውር ዝይንቅ? ውርስ ሲርንቅ?› የነውዝ ጨጝቅሽትርነ የኵን፤ ዅረይስ ርዅየ፣ ኣልቨይስም ሰውነት ዲቋውመ? 26እስቲ ሲመይቱ ቢረቍ ዚልቅድዛት ቓልጥና፤ ፊዛቍም፤ ኣይራቍም፤ ቅፋነልም ድዋቍም፤ ኣነጚ ሲመይ ፅበው ክታይርድ ጛት ሚግቨኵ፤ እደስለ ዚልቂስመ ክትን ጭቕጘ ዲቍርነቅ ኣይርነቃ? 27ኣየውጚ! ክታማኽሊስ ጨጝቅሽ ጝሊግዚል ላው ቈሪ#6፡27 ጝሊግዚል ላው ቈሪ፦ ላው ላው ትርጕማንድ «ጝድሚል ላው ግርየ» ይጘኵ። ቈሽጠ ቸለውድ ኣው የጝ?#መዝ. 39፡5-7።
28«ሲረነው ኣልቨዝ ማጥንስ ውርቃጥ ጨጝቅሽርና? እስቲ በራኸይዝቍ ኣቨቭድዛት ቓልጥና? ሰራሸነውዝ ልቕርዳቍም፣ ምቃቍምም። 29ኣነጚ ንጕስ ሰለሙን እኳ እድቝጠ ጝክቭሪስቅ ጛጊስ ላይሸንትጘ ሲረየውም የኵን።#1ነገ. 10፡4-7፤ 2ዚመ. 9፡3-6። 30እፈ እምንት ጒድልድርነቅ ክታትርነ! እደረ ንጭ እትል ኣምር ልየል ሊቨው በራኸይዙ ፃቀድየንት እነሽ ሲሰው ኣቐውዝየ ክታትሰ ኣወሽ ሲሳው? 31እንዝ ማጥን፦ ‹ውር ዅንቅ? ውር ዝይንቅ? ውርስ ሲርንቅ? የነውዝ ጨጝቅሽትርነ› የኵን። 32ኣኽዛቫንድም እንዛት ችጝጥጘ በነነውዝ ጨጝቅሽጘኵ፤ ክትን ግን ሲመይ ፅበው ክታይርድ እንቅ ክታጭስ በንዘው ኣቐጘ ኣርቐኵ። 33ክትን ኣቕርናንድ እጝቂስቅ በዊል እደረት ምጝግስቲዝመ ፅድቂዝ በንጥን፤ ላየ ላየድቅ ክታጭስ ቈሺትጡ። 34እንዝ ማጥን ኣምርስ ኻስቨነውዝ ጨጝቅሽትርነ፤ ኣምርቱ ጭጝቅትድ ኣምርስ ኣጡ፤ እጝቅ ግርየድ ጝቕምቱ ችግር ፃየው የጝ።»
လက်ရှိရွေးချယ်ထားမှု
ማቲወስት ወንጌል 6: ኽምጣኣኪ
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
