युहनाल 3
3
येसु अनि निकुदेमोस
1परीसि लोकुरकनिगा निकुदेमोस पोरोयतोर वरोर मानेय मतोर ओर यहुदिलोरा महा सभातोर सदस्य मतोर। 2ओर नरका येसुना हेरे हन्जुन इतुर, “हे गुरुजि निमा परमेस्वरनिकेडाल माकुन करहान साटि वातोन इन्जोर माक पुन्तोरोम, बाक्याकि परमेस्वर आपुनासंग हिलेर ते निमा किन्तोन इव चमत्कारता बुतोंग बोरायि कियापरोर।” 3येसु ओन उत्तर हितुर, “नना निकुन खरोय खरोय वेहान्तोना, बोरायि पुनाल जनम येतोर आयनुर ते ओर परमेस्वरना राज्यतिगा हन्दिला परोर।” 4अनि निकुदेमोस ओन पुच्चेमातुर, “मानेय मुदियाल आतपा पजा बदाम असा जनमा येतपरान्तोर? बाक्याकि जन्म येतान साटि ओर दुसरो बेरा आपुना अवहारिना पोटालोपा हन्दिला परोर।” 5येसु उत्तर हितुर, “बसके वरोर मानेय एर अनि पवित्र आत्माते जनम येतान्तोर असकेय ओर परमेस्वरना राज्यतिगा हन्दिला परान्तोर इन्जोर नना निकुन खरोय खरोय इन्तोना। 6अवाल-बाबोनिगाडाल जनम आन्तोर ते ओर मेन्दुलता संबन्दते जनम आन्तोर मति आत्मिक जिवाता जनम पवित्र आत्माते आन्ता। 7‘निकुन पुनाल जनम येताना जरुरि मन्ता’ इन्जोर नना निकुन इतान अदेन आश्चरय केमा 8वळिय बगा दान्ता इच्चा मन्ता अगा दान्ता अनि निमा अदेना पोल्लो केन्जान्तोन मति ओद बगाडाल वान्ता अनि बगा दान्ता इन्जोर निमा पुनवि। पवित्र आत्माते जनम आतोरक इदाम लेहका मन्तोरक।” 9निकुदेमोस ओन उत्तर हितुर, “इव पोल्लोंग बदाम आय परान्तांग?” 10इद केन्जुन येसु ओन इतुर, “निमा इस्रयेल लोकुरा गुरु मन्तोन ते वने इव पोल्लोनुंग समजेमायवि? 11ओद खरोयतुन माक पुन्तोरोम इन्जोर नना निकुन खरोय खरोय इन्तोना अनि अदेन माक हुळतोरोम अदेना बारेते गवाहि इन्तोना, ते वने निमाट मावा गवाहितुन विस्वास केविट। 12बसके नना निकुन दरतिता ओद पोल्लोंग आन्तांग अदेना बारेते वेहतान अनि निमाट विस्वास केविट, ते मिकुन स्वरगताल पोल्लोंग वेहकान ते बदाम विस्वास कियाकिट? 13स्वरगता बारेते केवल ननाय पुन्तोना बाक्याकि नना मानेयतोर मरि स्वरगताल वातोना अनि स्वरगतिगा बोरे बसकेय हनोर मति केवल ननाय हतोना। 14अनि बदाम मूसाल वारु पल्लातिगा उन्दि पितळिता तेरासतुन बळगाते दोहच पोरो कितुर अदामे लोकुरक नना मानेयतोर मरिन वने हव्काना साटि कुरुस पोरो अन्जिहला पहाजे#गिन २१:४-९, 15बाक्याकि बोरायि ओनागा विस्वास कियानुर ओन अनन्त काळता जिवा पुटार इन्जोर।”
16परमेस्वर आपुनोर वरोरे मरिनिगा बोरायि विस्वास केविर ते ओना नाश आयमाकि मति ओन अनन्त काळता जिवा पुटि इन्जोर परमेस्वर आपुनोर वरोरे मरिन हियान साटि इद दरतिता लोकुरकुन पकाय मया कितुर। 17दरतिता लोकुरकुन दन्डता न्याय हेविर इन्जोर परमेस्वर आपुनोर मरिन दरतितिगा लोहोर मति ओना द्वारा लोकुरकुन मुक्ति पुटान साटि दरतितिगा लोहतुर। 18ओनागा विस्वास किन्तोर ओरकुन दन्डता न्याय आयो मति बोर ओनागा विस्वास केवोर ओर परमेस्वरनोर वरोरे मरिनिगा विस्वास केवोर इन्जोर ओनागा दोषि ठहरे मातोर। 19परमेस्वर इद दुनियाता न्याय कियानाता कारण इद मन्ता: परमेस्वरना खरोय बाताल मन्ता इद तोहान साटि नना परमेस्वरनोर मरि उन्दि वेळिचि लेहका दरतितिगा वातान। मति लोकुरक ओद वेळिचितुन मया केवोर आतुर। लोकुरकुन आन्दार लेहका पाप कियाना गिरदा वान्द बाक्याकि ओरक पकाय खराब बुतोंग केवालोर मतोरक। 20बाक्याकि बोरायि पाप किन्तोर ओर वेळिचिता विरोद किन्तोरक अनि ओरा खराब बुतो लोकुरा मुने प्रगट आयार इन्जोर वेळिचिता हेरे वायोर। 21मति बोर खरोयता हरिते ताकान्तोर, ओर आपुना बुतो परमेस्वरना इच्चाते किन्तोर इन्जोर ओना बुतो प्रगट आयान साटि ओर वेळिचिता हेरे वान्तोर।
येसुना बारेते बपतिस्मा हेवाल युहन्नाना गवाहि
22असके पजा येसु अनि ओनोर चेलालोरक यहुदिया प्रदेशतिगा वातुरक अनि अगा ओरक बपतिस्मा हिन्दुरक अनि येसु ओरा संगे मतोर। 23बपतिस्मा हेवाल युहन्नाल वने शालेम पोरोयता सहेरता हेरे एनोन पोरोयता नाटेनिगा बपतिस्मा हिन्दुर बाक्याकि अगा पकाय एर मता। अनि लोकुरक वास बपतिस्मा येतिन्दुरक। 24बाक्याकि बपतिस्मा हेवाल युहन्नान ओद बेरावनाह जेहलतिगा वाटसिवोर#मत्ति १४:३; मर ६:१७; लूका ३:१९,२० । 25अगा बपतिस्मा हेवाल युहन्नानोर हुचुक चेलालोरक अनि वरोर यहुदि मानेयसंग यहुदि रितिरिवाजता सापसुप कियाना नियमता बारेते#३:२५ बपतिस्मा उन्दि शुद्धिकरन लेहका मन्ता इन्जोर इद बहस बपतिस्माता बारेते आन्दु। वाद-विवाद आत। 26अनि ओरक बपतिस्मा हेवाल युहन्नाना हेरे वास ओन इतुरक, “हे गुरुजि यरदन नदिता ओद पकाड निमा बपतिस्मा हियाला आस मतोन असके वरोर मानेय नियासंग मतोर अनि ओरे मसिहा आन्दुर इन्जोर ओना बारेते निमा वेहच मतोन। इदेक ओर वने लोकुरकुन बपतिस्मा हियाला आतोर अनि पकाय लोकुरक ओना हेरे हन्दिला आतोरक।” 27बपतिस्मा हेवाल युहन्नाल इदाम उत्तर हितुर, “परमेस्वरना इच्चा आयो अचोवनाह बोरायि मानेय बाताले पुटिहिला परोर#३:२७ बपतिस्मा हेवाल युहन्नाल उत्तर हितुर, “बोदवनाह मानेयतुन स्वरगताल बाताले पुटो अचोवनाह ओन बाताले पुटिला परो”।। 28‘नना मसिहा आयोन मति ओना मुने लोहतोर आन्दान’ इदाम नना वेहता पोल्लोतुन निमाटेय नावा गवाह मन्तोरिट#युह १:२०। 29अनि दुलहिनसंग मरमिंग कियाला दान्तोर ओरे दुलहाल आन्दुर। मति दुलहालना गोतियाल ओना हेरे नितस दुलहान केन्जान्तोर, अनि ओर दुलहाना पोल्लोते पकाय गिरदा आन्तोर इदाम लेहका नना वने येसुनोर मदत केवाल गोतियाल आन्दान अनि ओना बारेते केन्जुन इदेक नावा गिरदा पुरा आतु। 30ओर हजोर आयिर अनि नना हुडलोर आयिकान इन्जोर जरुरि मन्ता।”
31युहन्नाल बपतिस्मा हेवाल असा ओरकुन इतुर, “बोर स्वरगताल वातोर ओर सबोयताल हजोर मन्तोर। इद दरतितिगा जनम आतोर ओर केवल मानेय आन्दुर अनि ओर केवल इद दरतिता बारेते वळकान्तोर मति स्वरगताल वातोर ओर सबोयताल हजोर मन्तोर। 32अनि बाराय आयि ओर स्वरगतिगा हुळतोर अनि परमेस्वरनिगाडाल केन्जतोर अदेना गवाहि हिन्तोर, मति बोरे ओना गवाहितुन स्विकार केवोर। 33अनि ओना वेहतांग पोल्लोनुंग स्विकार किन्तोर ओर परमेस्वरनिकेडाल हिता पोल्लो खरोय मन्ता इन्जोर गवाहि हिन्तोर। 34बाक्याकि परमेस्वर लोहतोर ओर परमेस्वरना पोल्लोंग वेहिन्तोर, बाक्याकि परमेस्वर पवित्र आत्मातुन पकाय हिन्तोर। 35अनि परमेस्वर बाबाल आपुना मरिन मया किन्तोर अनि ओर सबोय पोल्लोतिगा अदिकार ओना कयते हितोर#मत्ति ११:२७; लूका १०:२२। 36परमेस्वरना मरिनिगा विस्वास किन्तोर ओनेय अनन्त जिवा पुटार मति परमेस्वरना मरिनिगा विस्वास केवोर ओन अनन्त जिवा पुटो आयार मति परमेस्वरना होंग ओनागा मन्दार।”
လက်ရှိရွေးချယ်ထားမှု
युहनाल 3: fmu
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© (Active) Wycliffe Bible Translators, Inc. All rights reserved.
