Yeso‑ka yo‑yose mai tamine 24
24
Feri‑ya Baoro hiyarane
1Amoni 5 toheya, Deoso‑ka yama‑bone‑ya mai da‑daa mai‑ka hidi i‑di Ananiya, Yodeo mai‑ka hidi mai one toha, i‑di Tetoro ne, mai kamakeni, i‑di Feri‑ya i‑di Baoro tamine mai hiyarabonehe. I‑di Tetoro ati yanani amosi ba‑basi tene.
2Baoro‑ya mai haana, Baoro tamine‑ya Tetoro hiyare,
“Feri, owati timitahi. Amosabote amatini. Tika yama wato ihi oda‑ya mai nofawaha, tiwa ene oda tabaro nafi amosi ba‑basi nineni.
3Tiwa ene amosa, tiwa oda nofi nafineni.
4Owati damaraboneni. Owati fa‑famaraba naboneni.
5Baoro ati kasiro, ati ene Yodeo mai dama mai yorotokana, mai yawi kitineni. Nasare‑ka mai‑ka hidi Baoro amane.
6Baoro ene Deoso‑ka yobe towe tohebona, oda waratonane. Mose ati‑nima oda nabone,
7I‑di Risiyasi‑ta oda‑ya bisine, Baoro‑ya towakamene.
8Risiyasi oda‑ya yosene, tiwa‑ya. Oda ati timitiya, Baoro towe‑ya tiwatowahaboneni.” Tetoro ati nemonane.
9“Hehe, Tetoro ati‑nima yama tohani.” Yodeo mai nafi ati nineni.
10Baoro ati‑ya Kofenado mitebona, yehe‑ya Baoro‑ya haane, Feri‑ya Baoro hiyarawahe,
“Wana mai ati dami‑ya oda dami‑ka yama‑ya tikadikateni. Owati timitiya, yama tiwatowahaboneni.
11Ai amoni 12 kana‑ya Yerosare‑ya okaroni, Deoso‑ya okahiyarabonehe.
12Owa‑ya mai we‑wee owa‑ya mai awiya, Deoso‑ka yobe‑ya mai wee·orihi, Deoso‑ya mai hi‑hiyara‑ke yobe bi‑bidi ne‑ya mai wee·orihi, sidadi‑ya mai wee·orihi, owati ihi mai ibi weerihi teni onaroni.
13Owa ene‑mone mai ati na, owa ene tohi awirani. Keyehe‑ya mai hirinineni.
14Nasare‑ka ama·oni mai ati na, fara ama·oni. Deoso‑ka hawi‑ya Nasare‑ka mai sa‑sawi‑nima osawi, Deoso‑ya mai kahiyara‑nima okahiyara, Deoso ati‑ya i‑di Mose kanahanomata, ati‑ya mai mi‑mita‑mete mai kanahano na, ati onofa oteni.
15Mai ihi amosamaro, mai ihi amosaramaro mai na, mai aba, mai kitamabone Deoso ati nemata, ati‑nima yama nabone‑ya mai nimana, fara nima·onahari teni.
16Deoso ati nima·ona ene owa noko wadateni, owa ene amosabonehe. Deoso ohiyariya, owatibodi owa‑ya weerihi, ai one‑ya ohiyariya, owatibodi owa‑ya weerihi teni.
17Wana mai ati dami‑ya yama yaki‑ya owinamaro, hibayata okoma, oka mai dami‑ka yinero‑bona owakama, Deoso‑ka yama‑bone daa·onabone onani.
18Deoso‑ka yama‑bone daa·ona, Deoso‑ka yobe‑ya owitare, Yodeo mai one Asiya‑ka kamake, owa‑ya mai awa, owa hare owa‑ya mai nahori awira. Mai wee·oni awirani.
19Owa ene towe‑mani, tiwa‑ya mai kama, owa tamine tiwa‑ya mai kamina neni.
20Oda‑ka hidi mai noki‑ya owaa, owati‑ya mai mita, owa ene amosarihi na‑mone mai ati na, owa ene‑ya mai kaminahi.
21Owati ohare‑ta towe toha awineni. Mai bai‑ya owaa, mai‑ya ohiyarineni.
‘Ai aba, ai kitamabone tamine okamina ihi owa‑ya mai watani.’ Ona.
Owati yanara‑mani, sibara neni.” Baoro ati nemonane.
22Baoro ati fawaneya, Deoso hawine tamine‑ya Feri watowahe, mai‑ya hiyarawahe,
“Hibareya, sodado mai‑ka hidi webote i‑di Risiyasi kame, ati omitamataseya, owatowahebonane.” Feri ati nane.
23Sodado mai‑ka hidi‑ya hiyare,
“Baoro‑ya tika sodado sawiho. Honita tohe sibare, hiniya kanarayaho. Hika mai ati yobiniya, Baoro‑ya mai kasoma, mai yobiniyahi.” Feri ati nemonane.
24Makobote Feri fadi‑ya fame Baoro ati‑ya mai mitabone, mai kakamineni. Feri Yodeo one‑ya idimari, fadi oni Dosira toha,
“Yeso Kirisito ati tinofe tamine omitebonane.” Feri ati nane.
25“Yeso ati ai nofiya, ai ene amosa, Yeso ati‑nima ai naboneni. Makobote ai ene‑ya Deoso kadikebonane.” Baoro ati ne.
Ati ene Feri habo siitone,
“Tikamahi. Tiwati omitamatasaba awineni.” Feri ati nane.
26“Baoro ati omitanadiya, yinero‑ya owa‑ya daaneba awane, see·okanebonaha.” Feri atibodi ati ne.
Baoro hiyare, ati‑ya kamitanadine.
27Wana mai ati famamakiya, i‑di Bosiyo Fesito kofenado tohawahe, Feri kofenado tohami awire, hiniya tokomane. Yodeo mai‑ya ya‑yainihibona, Baoro seekani awire, yaditone waasa nane.
လက်ရှိရွေးချယ်ထားမှု
Yeso‑ka yo‑yose mai tamine 24: jaaNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ