Yahiya 1

YAHIYA

Si Isa yana Palman Tuhan bay dari manusiyaꞌ

1Ni panagnaan, ndang luu na Palman. Maka Palman ilay ndang wā dambuwaꞌ ka Tuhan. Boꞌ na, Palman yana Tuhan. 2Niyaꞌ gi luu junyaꞌ, ndang tibuuk Palman ka Tuhan. 3Boꞌ Palman ilay, iya na man bay mapayak mimon-mimon. Niyaꞌ gi silay luu oy maka oy na bong saꞌ Palman man bay mapayak. 4Iya ilay yana poonan kaallum, boꞌ kaallum na ina yana sūꞌ man manusiyaꞌ ngita arat-tabiat Tuhan. 5Sūꞌ looy ilay ninag na pin njawom lindom, boꞌ yaꞌ luu lindom tumanjataꞌ niiya.

6Na song hallom, luu disu lalla bay inuwakilan meꞌ Tuhan inawnan si Yahiya#(1.6) Yahiya inawnan ntuu yana Yahiya ma Tukang Mandi, saꞌ ga ilooy ma bay nuwat kitab tuu. 7nohoꞌ masaplagan jama pasal sūꞌ looy supaya luu na dapat mimon manusiyaꞌ pitsayaꞌ niiya. 8Meꞌ kasohean bay mista, si Yahiya na mismu sūꞌ looy, boꞌ ko ssaꞌ. Arapun iya ilay bay jaꞌ sinohoꞌ makila sūꞌ looy, 9yana sūꞌ sabanna ma pitu pa junyaꞌ marantaan pamiki manusiyaꞌ. 10Sūꞌ looy ilay yana Palman man Tuhan bay mapayak junyaꞌ. Salla na, san ya bay pitu pa junyaꞌ, yaꞌ san tasayu jama bong soy ya. 11Iya ilay bay lahil ni lahat bangsa ma bay peneꞌ na lagi sukuꞌ na, sugaꞌ yaꞌ du ya bay hinasi meꞌ da. 12Sugaꞌ sagannap ma bay ngahasi iya maka pitsayaꞌ niiya, lay buwanan na kapatut dari anak Tuhan. 13Sugaꞌ sila ilay bay dari anak Tuhan, saꞌ meꞌ karuha anak manusiyaꞌ bay pinamaddihan, batan saꞌ man pabuwatan manusiyaꞌ, arapun sila ilay bay dari anak Tuhan man sabapan pabuwatan Tuhan.

14Na Palman ilay bay dari manusiyaꞌ sampay lay gi pingkaꞌ magdambuwaꞌ ka kami. Biddaꞌ na ehe aseꞌ na maka bana sadjaꞌ mimon bitsala na. Kami mismu bay kasakup ehe kaayaran na, yana kaayaran Anak tungga ma bay pitu lakka man Mmaꞌ na Tuhan.

15Iya na silay ilooy ma bay binitsala meꞌ si Yahiya jaman na bay mandi jama. Jaman looy siꞌ, lay si Yahiya ngahowap masaplag pasal iya, yuk na, “Ituu na situ ilooy ma bay bāꞌ ku pasunuꞌ man aku. Sugaꞌ ni sabana na, duhuꞌ gi silay ya man aku sabap yaꞌ gi ku bay pinamaddihan, ndang luu na ya.”

16Na sabap biddaꞌ na ehe aseꞌ Anak Tuhan, tinggi-maninggi na supaat bay takoleꞌ tabi sikamimon ma pitsayaꞌ niiya. 17Maruhuꞌ, bay pamuwan Tuhan yana saraꞌ ma bay pinasampay meꞌ Nabi Musa. Pag batnaa, ilooy na baw pamuwan na yana aseꞌ ka kabanahan pinasampay meꞌ si Isa Almasi. 18Na inawnan Tuhan, yaꞌ bay pingkaꞌ takita leꞌ manusiyaꞌ. Sugaꞌ lay na baw ya pinalahil ningkitabi meꞌ Anak tungga na, yana Tuhan du ma tattap njawom atay Mmaꞌ na.

Si Yahiya ma Tukang Mandi mitsala pasal Almasi

(Matiyu 3.1-12; Malkus 1.1-8; Lukas 3.1-18)

19Na hallom maka hallom na, lay taaka meꞌ siga pa-mmean Yahudi ndooy ni Jerusalem pasal pabuwatan si Yahiya mandi jama. Dari lay sila nawag siga imam ka ga panubuꞌ si Libay kasohean,#(1.19a) Si Libay ilay anak Nabi Yaꞌkub. Panohoan Tuhan ni Nabi Musa isu-isu siga panubuꞌ si Libay dari tukang ngantanan langga bangsa Yahudi. boꞌ da sinohoꞌ pilay nilaw bong iya na Almasi#(1.19b) Hatiyan Almasi, ilooy ma bay inuwakilan meꞌ Tuhan magsultan. Katakka na ndang bay tinunaꞌ meꞌ kanabi-nabihan njawom kitab. Njawom tunaꞌ da, Almasi yana disu panubuꞌ Sultan Daud maka pinamaddihan ni Betlehem. Pag takka na, labbos na kawasa mimon banta sukuꞌ na. Maka pamarinta na yaꞌ luu katapusan na. Sangkon lay ya bay inagad meꞌ mimon bangsa Yahudi. atawa ssaꞌ gi. 20Dari pag tilaw da, yaꞌ na ya bay paalang, magti yuk na, “Saꞌ situ aku Almasi.”

21Yuk da na baw, “Bong ko saꞌ Almasi, soy baw ina ko? Kau na kina Nabi Eliyas?”#(1.21a) Jaman si Yahiya magpamandi jama, kuwan bangsa Yahudi, masi ngagad katakka Almasi. Njawom kitab Yahudi ndang luu bay tinunaꞌ duhuꞌ Nabi Eliyas pōꞌ manyap ni katakka Almasi (ndaun Kitab Nabi Malakay 4.5-6). Dari sabapan tunaꞌ looy njawom kitab, honaꞌ-honaꞌ kasohean Yahudi, bong si Yahiya saꞌ gi Almasi, mareꞌ iya na Nabi Eliyas.

Iya tampung na, “Ssaꞌ du ba.”

Tilaw da, “Bong meꞌ naa, soy tu ko la? Kau na kina nabi looy ma pinag-agad meꞌ bangsa tabi?”#(1.21b) Ni awwal jaman, Nabi Musa bay nunaꞌ luu gi disu nabi meꞌ iya du pinatakka meꞌ Tuhan ni sinōng, meꞌ iya du turunan bangsa Yahudi. Pag takka na, subay ya inasip meꞌ da (ndaun Kitab Tawrat, Duteronomi 18.15).

Iya tampung si Yahiya, “Ssaꞌ du ba.”

22“Hati,” yuk da, “soy baw ko la? Baan nu na ba kami bong soy ko mari luu tapamāꞌ kami ni ga jama ma bay nohoꞌ kami. Oy tapamāꞌ nu pasal dī nu?”

23Pag tampung si Yahiya, “Aku na situ jama ma bay inawnan meꞌ Nabi Isaya bay jaman na nunaꞌ njawom kitab, yuk na, ‘Luu sina mintu lalla ngahowap masaplagan jama ni lahat lau-lau. Yuk na ina mintu, Paintongun bi na lān ni katakka Papuꞌ.’ ”#(1.23) Hati na, nohoꞌ sila nawbatan dusa da mari sila saddiya na mmeꞌ ni Papuꞌ pag takka na (ndaun Kitab Nabi Isaya 40.3).

24Na ni baanan looy siꞌ ma bay sinohoꞌ, luu du bay lamud siga guru ni palhimpunan Parisi.#(1.24) Siga Parisi yana disu palhimpunan guru langkaw ma basag mogbogan saraꞌ Nabi Musa. 25Dari yuk da, “Bong ko saꞌ Almasi atawa Nabi Eliyas atawa nabi looy ma pinag-agad, ongoy baw ko taggahaꞌ mandi jama?”

26-27Iya tampung si Yahiya, “Ngkon ku itu mandi jama ka boheꞌ supaya sila saddiya ni katakka ilooy ma pasunuꞌ niyaku. Boꞌ sabana na, luu na situ ya ntuu lamud ka kaam, sugaꞌ yaꞌ tasayu bi bong soy ya. Iya ilay, yaꞌ luu pangabut-ngabut ku niiya. Yaꞌ san ku tawop makkasan ingkot tumpaꞌ na.”

28Na si Yahiya ilay siꞌ bay mitsala meꞌ looy ndooy ni Betani ni dambilaꞌ Sōng Juldan mman na mandi jama.

Bili-bili Tuhan

29Pag meꞌ sumawung, takita si Yahiya na si Isa pasōng pa mman na. Dari yuk na ni baanan jama ndooy, “Alu na lalla ma ginalla Bili-bili Tuhan#(1.29) Njawom saraꞌ Nabi Musa, subay bangsa Yahudi numbaliꞌ disu bili-bili taun pa taun man nambunan bay dusa da. Sugaꞌ ilooy ilay yana sipat sadjaꞌ ni pabuwatan Almasi bbos-bbos bay nongan umu na man muwasan dusa manusiyaꞌ. Dari ilooy silay ngkon si Yahiya bay nganggalla si Isa “Bili-bili Tuhan.” ma muwasan dusa manusiyaꞌ. 30Iya na sina bay awnan ku ma pasunuꞌ niyaku. Sugaꞌ patingkat ya man aku batan yaꞌ gi ku bay pinamaddihan, ndang luu na ya. 31Aku tu maruhuꞌ, yaꞌ gi bay katoonan ku bong soy lalla ma pasunuꞌ niyaku. Sugaꞌ lay ku sinohoꞌ pitu mandi siga pagkahi ku bangsa Israil supaya sila saddiya ni lalla looy pinakila ninsila. 32-33Sibuwa ilay, yaꞌ gi katoonan ku bong soy mintu Almasi. Sugaꞌ jaman ku bay sohoꞌ Tuhan mandi jama ka boheꞌ, ndang bay na palahil na niyaku bong pooy meꞌ ku ngila Almasi. Yuk Tuhan, ‘Bong ko mintu ngita lalla tinampihan meꞌ Rū Sutsiꞌ, boꞌ yaꞌ na lakka man baran na, ilooy na silay Almasi ma mandi jama ka Rū Sutsiꞌ.’ Dari pag taabut ku bay mandi iya, lay du bana takita ku Rū Sutsiꞌ duwai man taꞌ langit meꞌ dagbos atsang, boꞌ na nampi taꞌ baran na sampay yaꞌ na bay palakka. 34Boꞌ na, pagka tud lay na du bay takita ku meꞌ looy, ituu situ man ku kabāꞌ na basta tud mawjud du lalla looy Anak Tuhan.”

Siga mulit ma bay duhuꞌ-duhuꞌ mmeꞌ ni si Isa

35Pag meꞌ sumawung, luu na baw balik si Yahiya ndooy ni bihing Sōng Juldan. Maka luu du ndooy duwa mulit na. 36Pag-anu siꞌ, takita si Yahiya na baw si Isa pingkaꞌ. Dari yuk na ni ga mulit na, “Ndaun bi ba, alay na lalla ma ginalla Bili-bili Tuhan.” 37Pag takale jaꞌ meꞌ siga mulit na halling na, ilooy ma lay na baw sila patuhut ni si Isa. 38Pag teleꞌ si Isa, takita na na sila patuhut niiya. Dari yuk na, “Marean ta luu maksud bi niyaku.”

Pag tampung da, “Niyaꞌ ba Tuwan Guru, arapun tilaw kami jaꞌ bong ninggai mman nu tamban.”

39Iya halling si Isa, “Tu kam bi na doꞌ ba, boꞌ bi sa pakitahan ku.” Dari lay du sila mmeꞌ niiya sampay lay na du takita da lumaꞌ man na pahantiꞌ. Maka lay na doꞌ sila ndooy mman na labba man ga lisag mpat kohap sampay kasangoman na ga sila.

40Na awon disu ninsila ma bay patuhut ni si Isa yana si Andru, danganakan si Saymon Pitel. 41Dari pag poleꞌ si Andru, lay doꞌ piha na danganakan na si Saymon. Pag tatammu na, yuk na, “Luu na la takka Almasi! Boꞌ lay gi kami sitammu ka iya!” (Hatiyan Almasi, ilooy ma bay inuwakilan meꞌ Tuhan magsultan saumu-umu.)

42Pag-anu, lay na boo na si Saymon pa mman si Isa. Pag takita ya meꞌ si Isa, yuk na, “Kau na bitu hati si Saymon, anak si Yahiya.#(1.42) Yahiya tuu saꞌ situ Yahiya ma Tukang Mandi. Damikiyan saꞌ du Yahiya ma bay nuwat kitab tuu. Sugaꞌ batnaa, awnan ta na ko si Sipas.” (Ni pallun Yahudi hatiyan Sipas sibuꞌ du ka hatiyan Pitel ni pallun Greek. Hatiyan da sikaduwa yana “batu.”)

Si Pilip ka si Natanyel mmeꞌ ni si Isa

43-44Pag meꞌ sumawung, doman na baw si Isa pilay pa Jalil. Takka ndooy siꞌ, lay ya sitammu ka disu lalla inawnan si Pilip, jama Betsayda, yana kawum mman ga si Andru ka si Pitel. Dari yuk si Isa niiya, “Tu ko, mmeꞌ na ko niyaku.” Dari lay du ya mmeꞌ.

45Na yaꞌ gi siꞌ sila bay lakka mandooy, lay doꞌ si Pilip miha bagay na si Natanyel. Pag tatammu na, yuk na, “Lay kami la sitammu ka lalla looy ma bay tinunaꞌ meꞌ Nabi Musa ka ga kanabi-nabihan njawom kitab. Awon na hati si Isa, lalla man Nasaret, anak si Yusup.”

46Yuk si Natanyel baw siꞌ tu, “Hidjab na ko ba. Yaꞌ baw bilay la luu oy maka oy na mahap pōꞌ man Nasaret!”

Yuk si Pilip siꞌ tu, “Ē, sūng ta na doꞌ ba. Pakitahan ta na doꞌ ko.”

47Pag ndaꞌ si Isa luu na si Natanyel pasōng pa mman na, yuk na, “Atu na disu lalla tud pulnaꞌ bangsa Israil, yaꞌ pandoy ngandustaꞌ.”

48Yuk si Natanyel, “Uy la, pooy meꞌ nu kakila aku?”

Pag tampung si Isa, “Niyaꞌ gi ko siꞌ bay linganan si Pilip, ndang bay na siꞌ ko takita ku pasindung ni poon igira.”

49Pag tabista si Natanyel talus si Isa, ilooy ma yuk na, “Tuwan Guru, tud bana-bana du bitu la kau na Anak Tuhan, sultan bangsa kami Israil!”

50-51Yuk si Isa baw siꞌ tu, “Hati, ilooy na man nu pitsayaꞌ sat ku siꞌ bay māꞌ lay ko takita ku pasindung ni poon igira? Baan ta ko banahan, ngita gi sina ko mintu siga pakaradjaan kahaylan-haylan labi man inaa. Batan takita bi du sina mintu langit bukaꞌ sampay siga malaikat magduwai-dutai#(1.50-51a) Marean ta maksud si Isa bay mitsala meꞌ looy man na maintoman sila pasal bay upihan Nabi Yaꞌkub ni awwal jaman. Njawom upihan na, bay ya ngita haron pa sulgaꞌ man siga malaikat Tuhan magduwai-dutai. Na haron looy ilay yana sipat ni si Isa sabap iya lān pa Tuhan. Kuwan siga malaikat, yana sipat ni jinisan supaat ma takka ni manusiyaꞌ basta sila tibuuk ka si Isa. Ndaun Panagnaan ni Awwal Jaman 28.12. njataꞌ ku, yana Anak Manusiyaꞌ.”#(1.50-51b) Papuꞌ Isa nganggalla dī na Anak Manusiyaꞌ sabap minsan ya Anak Tuhan lakka man sulgaꞌ, lay baw ya dari manusiyaꞌ. Pamāꞌ kitab Nabi Danyel ni juran 7 ayat 13-14, Anak Manusiyaꞌ yana disu lalla lakka man Tuhan ma bay binuwanan kapatut magsultan ni mimon manusiyaꞌ. Pamarinta na natas saumu-umu maka sinumba ya meꞌ mimon bangsa.

လက်ရှိရွေးချယ်ထားမှု

Yahiya 1: sjm

အရောင်မှတ်ချက်

မျှဝေရန်

ကူးယူ