Mark 3

Gimu ka pitti maatenta

(Elloŋ Matiye 12.9-14, Lik 6.6-11)

1Gaa Iisa kaatiɗe ga deeɗe un̰n̰a payya girco Yawudigeyyo ka giraaniti. Gaa lekkiɗo iŋaa gimu maa ga pitti maatenta. 2Guu giimi elelɗiya samaane Iisa, baŋ ga rayyaddaa aɗɗe gimu kaaka ma meene ta nambiti, guu gassiyyee botol ka luumiyti unco taattuweeco Yawudigeyyo. 3Gaa Iisa beneyyiyyee oko gimu ka pitti maatenta kaaka gaa: «Wacu! Asu warra iŋee ɗaɗɗakkico giimo.» 4Gaa inniɗiy giimi kotti ma aaye iŋaa gaa: «Hukumnigeetine oyowwine ma meene ta nambiti ke lewɗo samaane e, e ke lewɗo miɗɗa? Ke najjiyicca hayaatanti gimi e, e baŋ ke duwiyyee ga maatiɗo?» Guu giimi pa ƴapawɗe ka. 5Gaa Iisa elliɗiy paracco ma boŋso o ga zorontoyye asan gu galbigeeco talta. Gaa beneyyiyyee oko gimu gata gaa: «Taariya piccum.» Gaa maa ga taariyya pitti ga rayyidiɗe. 6Guu Pariziyennigee oomiɗe koɗok min ger ka giraaniti kaaka, gu deeɗe timma ma giimi ma gayaa lubbi sultan Erod Antipas#3.6 Gimtee Erod ma gayaa lubbi pa, ay Yawudigee ma gayaa oko hikimiyco Roomennigeyyo taata. Erod Antipas pa ay guberner ka kiɗaayee ku Galilee o ku Pereya. Guta pa ma gicco Pariziyennigee gi galawwiyoo ɗa. Maa gu loboɗɗo sawa pa, ay asan gu aŋkica ɗa giraaniti Iisa. ku maa gu boodiɗo ma ka diyawti Iisa.

Giimi maani jobokkaa Iisa

7Gaa Iisa tirriyɗe payya ma jobookeetee biití baharre ta yaata tee ta Galilee. Guu giimi maani jobbiyya. Giimi kotti pa asaa min kiɗa ta Galilee o ta Yudee, 8o min geegar ka Zerizalem o min kiɗa ta Idumee, o min kiɗa ma aaye ta tappití ƴiiro ta Yurden ma sorotta diiman, o ma aaye katta geegar ka Tir o ka Sidon. Giimi ku maani kotti pa asee asan gu giyyiko garrarritee maa ga leelo. 9Gaa Iisa beneyyiyyoo oko jobookeetee gaa gu ellee markaba ku maa gu giimi ku maani kotti alɗiya siiƴa ɗa. 10Mileŋ ga rayyide giimi maani ma parayya, ay ɗakko appe gu giimi ma lekka paraayi baadalɗe gu aŋkiɗo eesiti. 11Maa gu giimi maa gu awaaradgee deegeyye pa elliyya, guu darsiɗe unti, guu ayyaɗɗo goo: «Kii ay Runti Mellayi!» 12Gaa Iisa pa uwwiyyoo atarre ma makko gaa: «Aɗoŋ beneyya ɗa oko giimo baŋ na ay we.»

Iisa aparra orro o seera n̰amaakee

(Elloŋ Matiye 10.1-4, Lik 6.12-16)

13Gaa Iisa deeɗe kalpa jappiti, gaa kolliɗiy miɗi maa ga aŋka, gu asiyyee. 14Gata pa apire orro o seera miɗi, gaa oyyiyyoo seme gaa ‘n̰amaakee’. Gata pa apiriy ku maa gu deeɗo tan̰awwo ma gata o ga akkiy n̰amakko gu deeɗica tasawwo kabarre ta daana oko giimo, 15o ga biryoo gudirane maa gu deeɗiy petekko awaaradgee ma bamakkiy giimi. 16Kooko pa ay n̰amaakee ku orro o seera guta: Simo, maa ga Iisa oyyiyee seme daare gaa Piyer#3.16 Elloŋ Yaaya 1.42 o Matiye 16.16-18., 17o Zak ma sinti kee Yaaya ma ay rontee Zebedee, gaa Iisa pa oyyiyo seme gaa Buwanerzee ma goo ‘Ronti Galgilti’#3.17 Iŋee gi galgilo garaa boŋso. Ronti Galgilti pa ay giimi ma boŋossa koɗokka guu makaɗɗo aleŋ galgilo., 18o Andire, o Pilip, o Bartelemi, o Matiye, o Toma, o Zak ma ay runti Alpee, o Tadee, o Simo ma deyekka gu guta ma ay Yawudigee hikimiyicca kiɗaaco, 19o Yudas Iskariyot ma akkiya bira Iisa picco giimo.

Iisa o Belzebul

(Elloŋ Matiye 12.22-32, Lik 11.14-23, 12.10)

20Gaa Iisa yookiɗe giiri. Guu giimi maani asiɗe timma payya namma ga Iisa ma jobookeetee alɗo gasakka ɗa wikinne ka tiyaawi. 21Maa gu gimtee ku katta giyyikiti kabarre taata, guu asiɗe asan gu aŋka gu asikkiki kaata ma guu o gu beneyya aacco goo gi kayaati Iisa aaye ɗa payya. 22Aalimnigee ku Kitamniti Muusa pa asee pe min Zerizalem. Guu beneyɗo goo: «Gata ga Belzebul#3.22 Belzebul pa ma ay tattuwco awaaradgeyyo gu kolaa kulla goo Seetanne. ma ay tattuwco awaaradgeyyo, kalappiya! Ay ma gudirane maa ga berewwiyee ga peteɗɗiy awaaradgee!» 23Gaa Iisa kolliɗiy gaa beneyyiyyoo ma masal gaa: «Seetanne petekkaa pe gaa me Seetanne? 24Guu melleeti mulunniti nekerkití mulunnico beenannico, gi mulunnico taata galaa. 25A guu giimi ku giiri bokaa ka aatti girco, ga girco kaaka ɗemekka. 26A Seetanne appe pa kulla, gaa nekerra ma ziiti ka, gii mulunniti ɗeddiɗe gi gudiranti daa ɗa payya, batakka. 27Lekka ɗa gimu ma gederra ga un̰n̰iɗo girti oko gimu ka amma ga deeɗiy sokka lawtee, illa gaa gederre ga onniyya ƴa omma, hatta gaa deeɗiy sokka ka pe. 28Na beneyyatoŋca seene, Mella saamayyayoogu zunubgeeco giimi paracco o n̰ilawco parattí maa gu n̰eleɗɗiya. 29Gaa gimu soopa n̰ilca Ruuhanti Mellayi, ga Mella saamayyeegu ɗa ta kaw zunubgeetee, asan gu zunubgeetee kotti maa ga leelo masalla ɗa ta kaw.»

30Iisa pa beneyyiyoo goŋŋa asan gu beneyye goo ga aarinne kalappiya.

Yaati Iisa o seneetee

(Elloŋ Matiye 12.46-50, Lik 8.19-21)

31Gii yaati Iisa o seneetee asiɗe warra renta min giiri, guu n̰aamiɗe gimu ga deeɗiya kolla. 32Giimi maani pa nowotte gu kadarɗiya Iisa. Gaa gimu kaaka deeɗiyee beneyya gaa: «Giyyu! Yaacum o seneecam waraɗɗiyam renta, gu aŋkiɗum.» 33Gaa Iisa tiiliyyee gaa: «Yaatu ay we, o seneetaw ay ini we?» 34Gaa Iisa elliɗiy giimi ma nowotte gu kadarɗiya kotti, gaa beneyyiɗe gaa: «Kooko appe ay yaatu o gu ay seneetaw, 35asan ga kulla gimu aɗe ma leeway gaari maa ga Mella aŋka ay sintu, o gi suttu, o gi yaatu.»

လက်ရှိရွေးချယ်ထားမှု

Mark 3: mmy

အရောင်မှတ်ချက်

မျှဝေရန်

ကူးယူ