मत्ती 2
2
ज्योतिषयां रा आणा
1जां राज्जा हेरोदेस यहूदियां प्रदेश पर राज करेया करदा थिया, तिन्हा दिनां बिच ही यहूदियां प्रदेश रे बैतलहम कस्बे अन्दर यीशु पैदा होए, ते तिन्हेरे पैदा होणे रे थोड़े समय का बाद किच्छ ज्योतिषी जे तारे भी पढ़दे थिये, से पूरवी देसां का यरुशलेम सहर बिच आई करी ए पूच्छणा लगे, 2“से मुंडा कुते पैदा होए रा है जिनिये यहूदी लोक्कां रा राज्जा बणना? किजोकी असा पूरब दिसा बिच से तारा दिख्खेया जे तिसेरे पैदा होणे रे बारे बिच दसदा अते असी तिसेरी अराधना करणा आए रे हिन।” 3ए सुणी करी राज्जा हेरोदेस घबराई गेया अते तिसेरे अलावा कने यरुशलेम सहर रे बाकि मणू भी फिकर बिच पेई गे। 4“तां राज्जा हेरोदेस ने यहूदी समाज रे सब बड्डे पुरोत्त जो अते शास्त्रियां जो इकट्ठा करी के तिन्हा जो पूच्छेया, पवित्रशास्त्र रे हिसाब कने मसीह जो कुते पैदा होणा चाएदा?” 5“बड्डे पुरोत्तां ते शास्त्रियां ने हेरोदेस राज्जा जो बोल्लेया, यहूदियां प्रदेश रे बैतलहम कस्बे बिच, किजोकी मीका भविष्यद्वक्ता ने पवित्रशास्त्र बिच इय्यां लिख्खे रा है:
6‘ओ बैतलहम, तू जे यहूदा प्रदेश बिच है,
तू कुसी भी तरिक्के कने यहूदा रे अधिकारियां अन्दर सबका छोटा नी है किजोकी तेरे बिच का इक्क अधिपति ने निकलणा,
जिनिए मेरे इस्राएल रे मणूआं री दिख्ख-रिख्ख करणी है।’”
7तां हेरोदेस राज्जा ने तारेयां जो पढ़ने वाले तिन्हा ज्योतिषियां जो चुप-चाप सदवाई करी तिन्हा का पूच्छेया, कि से तारा ठीक कुस बेल्ले लिब्बेया थिया ताकि से ए जाणी सके कि से मुंडा कुस बेल्ले पैदा होया थिया। 8ते हेरोदेस राज्जे ने तिन्हा ज्योतिषियां जो ए बोल्ली करी बैतलहम कस्बे भेज्जेया, “जाओ, तिस निक्के रे बारे अन्दर ठीक-ठीक पता करो, ते जां से मिल्ली जांगा तां मेरे जो खबर देई देयो ताकि मैं भी आई करी तिसेरी अराधना करी सकां।” 9से राज्जे री गल्ल सुणी करी चली गे, अते जिस तारे जो दिख्खी करी से बैतलेहम कस्बे तिकर पूज्जे थिये, से तिन्हेरे अग्गे-अग्गे बदेया करदा थिया ते तिस जगाह् पर आई करी रुकी गेया जित्ते से बच्चा थिया, 10ए दिख्खी करी से ज्योतिषी बड़े वरी खुस होए। 11से मणू घरे रे अन्दर गे अते तिन्हा ज्योतिषियां ने तिस मुंडे ते तिसेरी मां मरियम जो दिख्खेया, ते मुँह रे भारे पेई करी बच्चे री अराधना कित्ती, ते अपणे-अपणे थैल्ले खोल्ली करी तिन्हा जो सोना, गंधरस अते लोबान री भेंट चढ़ाई। 12पर परमेश्वर ने इक्क सुपने अन्दर तिन्हा ज्योतिषियां जो सावधान करी दित्तेया कि से वापस हेरोदेस का ना जाण, इधेरे तांइ से मणू राज्जे जो बिना दस्से इक्क अलग रस्ते का अपणे देस जो हटी गे।
मिस्र देस जो जाणा
13जां से ज्योतिषी मणू चली गे, तां प्रभु रे इक्क स्वर्गदूत ने यूसुफ जो सुपने अन्दर आई करी बोल्लेया, “उठ, तिस निक्के जो ते तिसेरी मां जो लेई करी मिस्र देस जो नह्सी जा, ते जां तांइ मैं तिज्जो नी बोलगा, तां तांइ तित्ते ही रेयां, किजोकी हेरोदेस राज्जा इस निक्के जो मारणे तांइ तोप्पेया करदा है।” 14तां से रात्ती ही उठ्ठी करी निक्के अते तिसेरी मां जो लेई करी मिस्र देस जो चली गेया। 15ते हेरोदेस राज्जा रे मरणे तांइ तित्ते ही रेया, इधेरे तांइ कि से वचन पूरा होई जाओ जे प्रभु ने होशे भविष्यद्वक्ता रे जरिए बोल्लेया थिया,
“मैं अपणे पुत्तर जो मिस्र देस का सद्देया।”
हेरोदेस रा छोटे बच्चेयां जो मरवाणा
16जां हेरोदेस राज्जे ने ए दिख्खेया, कि ज्योतिषियां ने तिस कने धोखा कित्तेया है, तां से बड़े वरी गुस्से कने भरी गेया। तिनिये मणूआं जो हुकम देई करी भेज्जेया ताकि से बैतलहम कस्बे अते तिसेरे नेड़े-भेड़े रे सबणी इलाकेयां बिच रैह्णे वाले दो साल्ले रे या इसका छोटे सबनां मुडेंया जो मारी दैण। हेरोदेस ने ए सब ज्योतिषियां रे दस्से रे बेल्ले रे हिसाब कने कित्तेया जां तिन्हा ने से तारा दिख्खेया। 17तां से वचन जे यिर्मयाह भविष्यद्वक्ता रे जरिए तिस जगाह् रे बारे बिच बोल्लेया गे रा थिया जित्ते याकूब ते तिसेरी लाड़ी राहेल रैहन्दे थिये, से पूरा होया,
18“रामाह कस्बे बिच बड़ा वरी रोण-पिट्टण सुणित्तेया, रोणा अते बड़ा मात्तम,
राहेल अपणे निक्केयां तांइ रोया करदी थी, अते चुप होणा नी चाह्ंदी थी,
किजोकी से अवे मरी गेरे थिये।”
मिस्र देस का वापस हटणा
19हेरोदेस राज्जे रे मरणे का बाद, प्रभु रे स्वर्गदूत ने मिस्र अन्दर यूसुफ जो सुपने अन्दर आई करी बोल्लेया, 20“उठ, निक्के अते तिसेरी मां जो लेई करी इस्राएल रे देस अन्दर चली जा, किजोकी जे मणू निक्के री जान लैणा चांह्दे थिये, से मरी गेरे हिन।” 21से निक्के ते तिसेरी अम्मा जो कन्ने लेई करी मिस्र देस का निकलेया अते इस्राएल देस जो हटी आया। 22पर जां यूसुफ ने ए सूणेया कि यहूदियां प्रदेश बिच अपणे प्यो हेरोदेस री जगाह् पर अरखिलाउस राज करेया करदा है तां से तित्ते जाणे का डरेया, फिरी सुपने बिच परमेश्वर का चितौणी पाई करी गलील प्रदेश बिच चली गेया। 23अते तित्ते नासरत नां रे कस्बे अन्दर जाई बसेया, ताकि से वचन पूरा होई जाओ, जे भविष्यद्वक्ता रे जरिए यीशु रे बारे बिच बोल्लेया गेया थिया:
“तिसने नासरत का होणा।”
လက်ရှိရွေးချယ်ထားမှု
मत्ती 2: CDHNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
