MATIU 12
12
Chisɔsi an mu suin tee ma mansa a
(Maki 2:23-28; Duku 6:1-5)
1Chu mɔɛ n 'na suin tee dɔndɔ ma, Chisɔsi ni sɛnɛ dɔndɔ ɔ tandin tena wan, an bɛ a fɛ denɛ n na. Kɔnkɔɛ na‑a a fɛ den chɛ n bia wan. Mbɛ an bun‑da sɛnɛ chɛ ɔ chin fenɛ tɛ‑a an boo a, an mbe ta‑a a yoyɛ‑a, an mbe a daun. 2Mbɛ mɔɛ chɛ nu, miin ni ka Fayisii n na, an 'na tindanɛ, an‑na a fɔ, an dɔ, “Chisɔsi,” an dɔ, “a yen bɛ, i fɛ denɛ n mbe ka wai an chɛ‑a suin tee ma. An mbe ka koe min ma‑a, a ma nyin. Mmɔ 'a sawa ma a fɔ ni ka, mbɛ mɔɛ ɛ chɛ ma wan suin tee ma.”
3Mbɛ Chisɔsi‑a a fɔ, a ɔ, “Ɛ wan n yii ma, mbɛ wo‑a a kan fan Yataa 'a gboo ɔ, Mansa Defidi na‑a koe min ma. Kɔnkɔɛ na‑a a bia kɛn, an bɛ a fɛ mɔɛ n na, 4a don‑da buɛ min dɔ Yataa 'a chenɛ a. A sin, biidi min been ni Yataa ma, a bɔ‑a wan a a, mbɛ an‑na a daun. A na‑a mmɔ 'a sawa an yɔn ka e. A mu min na, mmɔ 'a sawa na‑a a fɔ wan, mbɛ mɔ ɔ mɔ ee an biidi chɛ daun, mɔɔ dechee mɔɛ chɛ nu miin mbe mmɔ tɛ ɔ Yataa a. 5A yɛ to, wo‑a a ɔ sɔn fan, mbɛ mɔɛ miin mbe mmɔ tɛ ɔ Yataa a, an mbe wai chɛ wan Yataa 'a kata ɔ suin tee wɛɛ ma. Suin tee sawa yɔn ma ben ni to chɛ ma. Chɛɛ Mosisi 'a sawa gboo ma chɛ ya ni sawa yɔn na. 6N ni a ma din wo tena, mbɛ mɔɛ ɛ wan nɛ min benden mu Yataa 'a kata chɛ ma. 7Yataa‑a a fɔ wan a 'a gboo ɔ, a ɔ, wo e na to yasi bɔ‑a a tena, a ɔ, wo ni chinchimaya an yian dechee wo nyɔn na. Ni wo na‑a bai chɛ ɔ gbɛ wan tee, wo nii wo tɛɛ si‑a mɔɛ n ma miin ma ko yama kan kɔ kan ma ni. 8N fan, Mɔ Gbu 'a Denɛ, n fan mu mansa a suin tee ko a.”
Chisɔsi‑a kaminɛ baun, suin tee ma
(Maki 3:1-6; Duku 6:6-11)
9Chisɔsi ka‑a nɔ, mbɛ a ta‑a bɛnɛ ɔ samun chɛ chenɛ a. 10A‑a a a tinsɔn fan, mbɛ mɔɛ chɛ n tɛ ɔ nɔ, kamin dɔndɔ ni wan nɔ, min boo dɔndɔɛ gbaaen ni a ma. A tima chɛ a gbɛ, Chu mɔɛ chɛ nu, miin ni Fayisii n na nɔ, an dɔ, “Nn ma a ɔ sɔn, ni mmɔ 'a sawa dɔnden fan mu, mmɔ ni mɔɛ a baun suin tee ma.” An‑na chɛ fɔ, koe min na mu, an toen ni an ni koɛ be a ma.
11Chɛɛ a ɔ, “Wo wɛn mbe ka nɛ, ni sa dɔndɔɛ ma‑a wo dɔndɔ wɛɛ boo a, mbɛ a bea‑a sonɛ ɔ suin tee ma, wo ee a to nɔ, a ni fa. Wo‑a a bɔ wan nɔ. 12Wo e chɛ ma wan suin tee ma sa ko a. Sa sin na ma kan ni mɔɛ a. Chɛ an‑na a fɔ, a nyin fan mɔ ni ko chɛndɛ ma mɔ gbu a suin tee ma.” 13Mbɛ a‑a a fɔ kamin chɛ ma, a ɔ, “I boo ɔ tan.”
Mbɛ kamin chɛ‑a a boo ɔ tan. Mbɛ a ma‑a yɔ a boo dɔndɔɛ, a baun‑da fion. 14Mbɛ Fayisii chɛ nu, an bɔ‑a. Mbɛ an ta‑a an kun puin tena Chisɔsi ma, an mbe ma buɛ min dɔ an ni a fa.
Yataa‑a a boo sɔ wai chɛ mɔɛ min ma
15Chisɔsi‑a a ɔ sɔn Chu mɔɛ chɛ nu, miin ni Fayisii n na, an ni an yii na chii tena, koe min ma koe a a. Mbɛ a ka‑a an kaina chɛ. A ni ta tena kɛn, fanka fanka bea‑a wan a fɛ. Mɔɛ miin gbɛɛ gbandien ni fanka chɛ tɛ ɔ, a‑a an baun fan, 16chɛɛ a‑a an na si wan, a ɔ, an ma a fɔ mɔ ɔ mɔ ye, mbɛ an‑na an baun. 17A na‑a chɛ fɔ, min mbe a ma, Yataa na‑a bai min don a 'a gbonka chɛ mɔɛ Aisaya da ɔ a fɔ koe a, a ni bɔ a a. 18Yataa 'a bai chɛ, Aisaya na‑a min na ben, a ɔ,
“Mɔɛ yen ko, n‑na n boo sɔ min ma, n 'na wai chɛ koe a.
A ko a di n ye, a sin a wakoe‑a n faa chima to.
N mbe n Nyina bea‑a wan a fɛ.
Ɛ a ɔ yian‑da wan mɔɛ n gbɛɛ a dunya ɔ, mbɛ n fan Yataa, mabɔ ee n 'na kaa tɛenɛ ma.
19A faa chimaen mu yɔ tɔnɛnɛ,
a sin mbe ee yonka tɛ.
20A ee a faa a kɔɔ‑a chɛ n ma, miin gboo ɔ faen mu.
Ɛ toa si‑a wan chɛ n kɔɔ, miin fanka an fandi ma.
Ɛ a ma‑a wan aan tea ni ma tea,
21mbɛ a sin, mɔ ɔ mɔ ɛ na‑a a kai fa‑a an na.”
Sitana an mbe ee gbasaya be Chisɔsi ma
(Maki 3:20-30; Duku 6:43-45; 11:14-23; 12:10)
22Chɛ gbakɔ, mbɛ mɔɛ dɔ n na‑a wan kamin dɔndɔ a Chisɔsi tena, nyina yama ni min fɛ. Nyina yama chɛ, an‑na a ma wan kamin chɛ ya te‑a, a sin nii che koɔ‑a. Mbɛ Chisɔsi‑a a baun, a‑a a ma a koɔ‑a, mbɛ a ya wɛɛ a ka‑a, a‑a kaina yen. 23Mɔɛ miin gbɛɛ ni ka nɔ sɔ ɔ, an tɛnɛ‑a wan koe chɛ a. Mbɛ an dɔ an nyɔn ma, an dɔ, “O, mɔɛ min bɔ‑a Mansa Defidi 'a dambi ɔ, a wakoe fɔen fan mu. An mɔna chɛ an mbe na bɔ ka a 'a dambi ɔ?”
24Chɛɛ Chu mɔɛ chɛ nu, miin mu Fayisii a, an‑na koe chɛ a min fan. Mbɛ an‑na a fɔ wan, an dɔ, “Nyina yama n 'na mansa chɛ, min tɔ mu Bɛɛsɛbu, an mbe ka gbasaya chɛ be tena a ma, nyina yama n gbain koe a mɔɛ n fɛ.”
25Mbɛ Chisɔsi‑a a ɔ sɔn kɛn, koe min ni mɔɛ chɛ n yii ma, a‑a a fɔ wan an ye, a ɔ, “Ni chɛɛ ma‑a mɔɛ n tɛ chɛnyɛ kan kɔ kan dɔ, an chɛnyɛ chɛ ɛ yɔn fan. A yɛ to, ni koɛ ma‑a duu min dɔ mɔɛ n tɛ, a duu chɛ ɛ te wan. Suunɛ wɛɛ ɛ ka wan, koɛ ɛ a yɔn fan. 26Chɛ an fɛ mu, ni Sitana ee kuiɛ dɔndɔya ɔ a bɔ n na, a 'a mansaya ee ta‑a ya ɔ ma. Ni a‑a a bɔ nyina yama n gbain mɔɛ n fɛ, a 'a mansaya ɛ bea‑a wan. 27Mbɛ a sin, wo ta mɔɛ n bɛɛ, an mbe nyina yama n gbain fan mɔɛ fɛ. Chɛɛ wo e a fɔ n fan ma, wo ɔ, n mbe a ma tena Bɛɛsɛbu 'a gbasaya an dɔ. Wo ta mɔɛ n gbu mbe koe miin ma tena, an fan mbe a ɔ yian, mbɛ tea ee wo boo ɔ. 28N mbe ee nyina yama n gbain tena mɔɛ n fɛ Bɛɛsɛbu 'a gbasaya ɔ. Chɛɛ n mbe an gbain tena Yataa Nyina 'a gbasaya an dɔ. Chɛ‑a a ɔ yian fan, mbɛ Yataa 'a mansaya ɛ gbɛ wo tɛ ɔ.”
29Mbɛ Chisɔsi‑a Sitana ya yɔ kamin gbasayaen ba, a ɔ, “A yɛ to, ni mɔ ɔ mɔ toen mu a ni don kamin gbasayaen ba 'a chenɛ a punka koe a, mɔɔ ni a‑a a chii pɛn, a e na to a 'a chenɛ a punka‑a.”
30Mbɛ a ɔ te to, “Mɔɛ min mbe ee n ko a, n chɛɛ ma nyɔɛ mu a a. Mɔɛ min mbe ee n deman‑da a a kan koe a kaina dɔndɔɛ, ɛ a a fasan‑da wan. 31Chɛ an fɛ mu, n ni a ma din wo tena, mbɛ Yataa ɛ a boo bɔ wan wo 'a ko yama kan kɔ kan dɔ, chɛɛ a ee a boo bɔ‑a a Nyina main koe ɔ. 32N fan, Mɔ Gbu 'a Denɛ, ni mɔ ɔ mɔ‑a n main, Yataa ɛ kun fan a ni a boo bɔ a ɔ. Chɛɛ ni mɔ ɔ mɔ‑a Yataa Nyina main, a ee a boo bɔ‑a a mɔ sima chɛ 'a main chɛ ɔ, dunya chɛ ɔ, a basan dunya nama a, min mbe na tena.
33“Kɔnɛ mu a gbɔɛ an na. Kɔn chɛndɛ ɛ gbɔ chɛndɛ an be, mbɛ kɔn yama sin‑na gbɔ yama be. 34Wo yauaen ba chɛ nu yɔ ka. Bai chɛndɛ kan kɔ kan mbe ee che bɔ‑a wo da ɔ. A mu min na, mɔ gbu ɛ bai min sa, ɛ ka a faa ɔ wan. 35A chia dɔndɔ gbe chɛ a, mɔ chɛndɛ ɛ ko chɛndɛ an ma, a mu min na, a faa ɔ gbɛen fan mu. Chɛɛ mɔ yama sin mbe ko yama an ma, a mu min na, a faa ɔ finden fan mu.
36“N sin, n ni a ma din wo tena, mbɛ ni Yataa na‑a tima min na mɔɛ n gbɛɛ gbɛmbo koe a, a tima chɛ a, mɔ ɔ mɔ‑a a ɔ yian‑da wan, fen‑na a ma, a ni bai faun faunɛ n sa. 37Wo da a bai n mbe wo yɛi‑a wan, wo da a bai n ni disa be wo ma.”
Mɔɛ n‑na Chisɔsi ɔ tisa, kamaya koe ma koe a
(Maki 8:11-12; Duku 11:29-32)
38Mbɛ Chu n 'na sawa kan mɔɛ n dɔ nu, an bɛɛ Chu chɛ n na, miin ni Fayisii n na an tɛ ɔ, an‑na a fɔ Chisɔsi ye, an dɔ, “Ticha, nn toen mu i ni kamaya koe chenama wa dɔndɔ ma wɛ. Kamaya koe min mbe che a ɔ yian‑da nn na, mbɛ i 'a gbasaya kaen mu Yataa an tena.”
39Mbɛ Chisɔsi ɔ, “Wo mɔ bonda chɛ nu, wo yau yama yama, wo sin mbe ee dan ko a. Chɛ an fɛ mu, wo e n dɔ tisa tena kamaya koe ma koe a. Chɛɛ wo ee tɔmɔsi dɔndɔ wɛɛ ma sɔn‑da, mɔɔ dechee Yataa‑a tɔmɔsi min na ben a 'a gbonka chɛ mɔɛ Chona a, a 'a mɔɛ n tena. 40N fan, Mɔ Gbu 'a Denɛ, n mbe tee sawa ni pimbi sawa ya‑a wan fii chima ɔ, yɔ Chona na‑a tee sawa ni pimbi sawa ya buɛ min dɔ nyɛ wa bu ɔ. 41A sin tee min na Yataa ɛ ma‑a dunya gbɛmbo‑a, Ninifɛ mɔɛ n bɛɛ mbe an kɔɔ sɔ‑a wan a ka saya ɔ, an bɛ wo mɔ bonda chɛ sima n na. Mbɛ an‑na wo yɛi siiya bɔ Yataa tena. A mu min na, an‑na an kan kɔ sɔ wan an 'na ko yama n na, kɛn Chona‑a Yataa bai sa an tena. Mɔɛ yen ko wo tɛ gbɛ, min benden mu Chona ma, chɛɛ wo bandenɛ ɛ wo boo bɔ koe a wo 'a ko yama n dɔ. 42A sin tee min na Yataa ɛ ma‑a dunya gbɛmbo‑a, musu min ni mansa a Seba chɛnyɛ ɔ, a wɛɛ‑a a kɔɔ sɔ‑a wan a ka saya ɔ, mbɛ a‑a wo yɛi siiya bɔ. A mu min na, a na‑a ka wan dunya danka a, na koe a, a too ma sɔ‑a Sɔɔmon 'na yiimatɛ bai n ma. Mɔɛ yen ko wo tɛ gbɛ, min benden mu Sɔɔmon ma, chɛɛ wo ee wo to sɔ tena a ma.”
Chisɔsi‑a tai tɛ, a si nyina yama ma mɔɛ n fɛ
(Duku 11:24-26)
43Chisɔsi ɔ, “Wo e wan dechee yɔ nyina yama ɛ mɔɛ min fɛ. Ni nyina yama chɛ ka‑a a fɛ, nyina chɛ ɛ ta wan ben ben‑da kaina ɔ gbaa gbaaenɛ ɔ, ɛ a ya a kan‑da kaina ɔ chimaenɛ a, a suin koe a. Chɛɛ a ee kaina ma sɔn. 44Ɛ si wan, a‑a a yii na chii, a ɔ, ‘N ka‑a kaina, ka wɛ, n mbe yɛ to nɔ.’ Ni a na‑a, mbɛ a‑a a ma gbaaenɛ tan, a sin mbe ee kun kɔɔ, a dɔndɔ gbe ee bea to a fɛ. 45Chɛɛ ɛ a bɔ nyina yama wɔnfea chee wan, miin yau an ni ben a ma, mbɛ an gbɛɛ ma‑a kamin chɛ fɛ. Chɛ‑a a ma wan gbɛ, kamin chɛ ma buɛ ni yaua‑a kaka, a ni ben a kɔma ma. Ɛ ma‑a ka wan wo ko yama ma mɔɛ bonda chɛ sima n na, wo wɛn mbe ka ban‑da n dɔ.”
Chisɔsi de na‑a a tena, an bɛ a dɔ kaima n na
(Maki 3:31-35; Duku 8:19-21)
46Chisɔsi ɛ koɔ tena chɛ wan mɔ fanka chɛ tena, mbɛ a de na‑a, a sɔ‑a baa ma, an bɛ a dɔ kaima n na. An toen ni an ni a yen. 47Mbɛ mɔ dɔndɔ‑a a fɔ a ye, a ɔ, “I de n yen ko sɔ ɔ baa ma i ma kɔn‑da, an bɛ i dɔ kaima n na.”
48Chɛɛ Chisɔsi‑a a fɔ wan, a ɔ, “Wo ma n de sɔn, wo ma n dɔɛ n bɛɛ sɔn.” 49Mbɛ a‑a a boo sɔ a fɛ denɛ n ma, a ɔ, “N de n fan nɛ, a basan n dɔ kaima an na. 50A mu min na, mɔɛ miin mbe kooya be‑a Fa Yataa ma, an fan mu n de a, an fan mu n dɔ kaima n na, an bɛ n dɔ musuma n na.”
လက်ရှိရွေးချယ်ထားမှု
MATIU 12: KONONT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
New Testament in Kono © The Bible Society of Sierra Leone, 2006.
