Lukas 21
21
Hwe sugwe a’ge en uang Allah paget pesi wene
(Markus 12:41-44)
1At Yesus en asogo mo’gulentesirik, orogole edenogo il yerentesi ’gal e, is aphwami enilmu oruak a’ge pema uang Allah paget peti ogola pogumu ebano ’gwelabugukhwe il yerentarok welaga. 2Yerentarok oruakma, at hwe sugwe ilmu erlak a’ge mesik wagarik e, uang sen modok wei a’ge ’biren ’gwelabisokhwe il hesiat. 3-4Asogo ’gwelabisokhwe il yerentesirik e, aphwami disogo mo’gulentesi,
“Is aphwami onouang a’bikmu e’gerlakma a’ge ’gegilogo pegesa ai, weiyat ’gela’ge o. A’geat de, at hwe sugwe ilmu erlak a’ge ai nak e, wei nak oso’boru o’go ’balogo no a’ge ’berlegat pesi ai en e, modok a’bik ’gela’geat pesi o, oluk demat mo’gulhentegis o,” oluk mo’gulentesi.
“Allah owi werik ai aphwami en modok muluktua ani o,” oluk mo’gulentesi wene
(Matius 24:1-2; Markus 13:1-2)
5Asogo mo’gulentesirik, Allah owi helep orogole modok ’bogun wiak werigisa a’ge emin, o il opsogo di a’ge yu a’ge Allah paget pegesa a’ge emin, enil yetharok welat erliktugukhwe, at Yesus en disogo mo’gulentesi,
6“His o henil yethogu legep eba, pobuk helep mesik ukpo erlakma en modok moluksogo hwikhouwa a’ge oruak ani o,” oluk mo’gulentesi.
“Naduk naduk disogo wiagaphonobua ani o,” oluk mo’gulentesi wene
(Matius 24:3-14; Markus 13:3-13)
7Wene asogo mo’gulentesimu, is en, at Yesus ebam hin wokhogulat e, disogo mo’gulegisa,
“Nue! Wene mo’gulnentigen ano re, metnerlige en ema o. Ebe eigoluk tagokhwe, ’ge a’ge naduk tagoma nenede we’gerlema,” oluk mo’gulegisema, 8at Yesus en e, disogo mo’gulentesi,
“Aphwami en lalhonobuano oluk e, henebabut heberlogo welemis o. Aphwami enebe a’bigat en, ononuk an nonuk a’ge tuelak poluk disogo il wema ani o,
At wema egesa ano an nebe wegi yuat o, ogulat,
Ema ogwi ano arat horok lau waga o, ogulat, il wema ano, is ai eniak demat oluk henesa’go holholuk ene’berlik lagup o. 9Is nin pema en,
Weim obogwi, ogulat,
Enebe mesik a’ge en homi pebisogo mukho lebigonobogwi o, ogulat, oluk ogwi holuk e, yuk oguptik henede o’borlogouk ogup o. Naduk naduk asogo ema a’geat de, o ologun pam ema a’ge ai re, perlene ema erlak o,” oluk mo’gulentesirik e, 10wene mesik disogo mo’gulentesi,
“Aphwami ena’gul onuk lo’bok weim ’gagalugulat, ap ononuk logo onosi eneragam a’ge lo’bok weim ’gagalugulat, ’gagalholuk weim obogukhwe, 11mouk lok onogorlok a’ge erlanghasulat, o di owi yu owi so’boru modok obuk la’guk eselat, ou ebabut wiak a’ge enebam agalat, di a’ge yu a’ge onogorlok a’ge tagenebasulat, ’bogorl pam en tu puk a’ge lalhasulat, tua o.
12A’ge re, ai ’berlegat owan tu erlak oruakhwe re, naduk-naduk e, aphwami en henebe tenakhonoboluk, di obotut yu obotut takhonobogulat, o se’ban ogumu wokhonoboluk lagalat, herle wusogo onobogumu ’gwelakhonobogulat, ap ononuk logo a’ge emin, ap ’gain gubernur lak emin, ene’bek wokhonoboluk lagalat, tua ai re, is en e, an nonuk ogulat,
His at osi, oluk asogo takhonobouwa ani o. 13Asogo takhonobouwa ai pam e, an tisokhwe henil niogu legep a’ge yu obok ’baksogo mo’gulontouwagoluk panoasuak ema o. 14-15#Luk. 12:11,12Ye, ai erlige re, his en wene o’go mo’gulentagup a’ge, an en henede ’gagalogo mo’gulhentaikmu re, is wene henebam pouwa a’ge eba en,
His heniak ai erlak o, oluk o’go u a’ge erlak ema ani o. Ai en e, owan takhonobo erlak oruakhwe, his honogola en,
Wene asogo a’ge nebam pogwi holuk, nebe erlele hwerlaigoluk e, o’go ’ge a’ge mo’gulentaik, oluk henede perik erlagat wolomup o. 16Ye, henaiklak henialak en, honuelak henarilak en, his wokhonoboluk e, owene enebam pogulat, no’gorlogulat, tugumu eba henebi lagalat, henebe ado modok wathonobogulat, tua o. 17Ye, is aphwami ’berlegat en e, an nonuk oluk,
His e, at osi o, oluk henebe enebit modok hontouwa o. 18A’geat de, henebe nalorogup erlak o, u ’gela’ge re, henasu hena’gul pam eba mesigat holuk mesik nalema modok erlak o. 19Holuk e, henede ha’buktak poluk e, henepe mosogoat wolorogup holuk e, noburlal-hoburlal hwerlagup ani o,” oluk mo’gulentesi.
O Yerusalem aphwami o’borlma a’ge en
sebelua egei wene
(Matius 24:15-21; Markus 13:14-19)
20At Yesus en asogo mo’gulentesirik, wene mesik disogo mo’gulentesi,
“Is ap tentara a’ge en o kota Yerusalem ai modok leget wusogo pouwa holuk e,
O lerak poluk wollo’gen dagalogo watnonobua ano arat horok lau waga hegi o, oluk henede opomup o. 21-22#Hos. 9:7Ai erlige re, disogo ema, asogo ema, oluk, is ap Allah iak pelal wokho pegesa a’ge ebano en egesa ai emin hegit emagoluk e, aphwami wiak togwi a’ge wene yogodak ya pam enebam pouwa ai en, his o Yudea da ya welema a’ge holuk, dom pam hweiye ligagalat, o Yerusalem welema a’ge holuk, o kota ano ukpoluk hweiye ’bogolugulat, tit o. Ye, o esa’goma igowi wolorogup a’ge holuk e, o kota yema ’gu orogup o. 23Ai erlige re, o yema modok wik-wiaksogo tagenebasulat, Allah olot het aphwami yema enebam pasulat, tua ai en e, is hwami enemalik onogolarak a’ge emin, enemalik pou agamu wogontogwi a’ge emin, wiak houwa ai eige! Nede o! 24Aphwami pema re, ’garok pam waronobogulat, pema re, herle wusogo o di owi yu owi enebi lagalat, tua o. Ye, o kota Yerusalem yu, aphwami o’borl o’gwe a’ge onoyuk en al ’besil-’besal tagonoboluk, o sebelu ’gu agalat welema a’geat de, modok sebelak welema erlak o. We, Allah en,
Is aphwami o’borl o’gwe a’ge, o Yerusalem hwerli yu hwerli pamat sebelak welema, oluk epesi hegitsogoat welema o,” oluk Yesus en mo’gulentesi.
An abat daklau wegi ano pobuk weigoluk tagokhwe, disogo ema ani o,”
oluk mo’gulentesi wene
(Matius 24:29-31; Markus 13:24-27)
25 #
Yes. 13:10; Yeh. 32:7; Yoe. 2:31; Wah. 6:12,13 At Yesus en asogo mo’gulentesirik e, pobuk mesik disogo mo’gulentesi,
“Henede we’gerlogo re, mo emin, dugwi emin, hwesagal emin, ai mu ’gela’ge pelalisoam hagup o. Ye, ’gwiangma yema ik laut omugwe lok ye’gelak welago a’ge ano ogo anni wiak hererim hau wagalat e, iak loksogo ’bukhwak osolomma re, is aphwami ena’gul onuk lo’bok onogorlok emarik enede porua ani o. 26Ye, ’bogorl pam enanni a’bik a’ge ono’borlogouk hogulomma, is aphwami en e,
Di tagalat, yu tagalat, tua ano arat ema hegi, oluk onogorlok en enede modok erlak ema ani o. 27#Dan. 7:13; Wah. 1:7Ai erlige re, an abat daklau wegi ano nannisogo o hena ogola ’bu agokhwe, enil nioluk erlik a’bik nobua o. 28Wene ’berlegat ema egi ai re, arat edip serlelhasu holuk e, his honogola en e,
Delnonobua ano arat horok lau waga o, oluk, henebe inotluk hena’gul lekho welemis o,” oluk mo’gulentesi.
Wene e ara ebam elitsogo mo’gulentesi wene
(Matius 24:32-35; Markus 13:28-31)
29At Yesus en asogo mo’gulentesirik e, wene mesik ebam elitsogo disogo mo’gulentesi,
“Di agan, yu agan emin, e ara emin, tiso ano pobi tit! 30E ai e’gela lologo ’bisoam pobuk erlit sebeliso holuk e,
Yogo. O yogodak hebi ema hegi, oluk honomuat henede en pobi togu legep ani o. 31Ai ’gela’ge re, an en,
Disogo ema, asogo ema, oluk mo’gulhentegis ano ebe agoam henil holuk honogola en e,
Allah eragam onobouwa ano arat horok lau waga hegi, oluk henede opomup. 32Disogo ema, yusogo ema, oluk mo’gulhentegis ai, aphwami o yogodak oruak a’ge enebe logon erlak om erlakma en owan oruakhweat, ’berlek ema o, oluk demat mo’gulhentegis o. 33’Bogorl emin, ’gwiang emin, erlak ema a’geat de, an niak ai re, modok erlak ema erlak o,” oluk mo’gulentesi.
Enebabut heberlogo welemagoluk enesa’go weregei wene
34At Yesus en wene asogo mo’gulentesirik e, e’berlik disogo mo’gulentesi,
“Di a’ge yu a’ge sakho werakho honogum ningsogo no’gulat, ik honuk-honuk tuogoluk no’gwi a’ge ano no’gulat, di a’ge yu a’ge ’gwiangma a’ge paget mennei yat horok eberugulat, asogo til denagalat henebabut heberlak erlak wongat oruakma, 35’baik sepna en al ’besilogo weriso ’gela’ge, an wene egi a’ge ai mesik erlige tagalat, aphwami ’gwiangma a’ge modok ’berlegat wiagabenebiselat, his henemin wiagaphonobuano oluk e, henebabut heberlogo wolomup o. 36Disogo yusogo ’berlegat ema egi ano tagokhwe re, henannisogo henepe mosogo woloroguptik, hene’gerli erlaksogo nologotma edik oruakma, an abat daklau weik ano hentau weik en e, nin hwedik nan hwedik se’banat ogulat e, henebabut heberlogo welemis o,” oluk mo’gulentesi. 37#Luk. 19:47Wene asogo mo’gulentesirik e, pobuk at Yesus o dakha osokhwe Allah owi werikmu en, wene mo’gulentasulat, o hik osokhwe dom Zaitun duk pam se’ban il ligagalat, taga laga. 38Asogo tisokhwe, aphwami ’berlek ebano at iak holuogoluk e, Allah owi werikmu hubet siaksogo odoktu waga legesa.
လက်ရှိရွေးချယ်ထားမှု
Lukas 21: Wul
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
