MATIYUT 11
11
Yetut kin wakkaawak nduk, Yaya Yiime Wuppiige Menggerak nen nappiyareegerak wone
(Luk 7:18-35)
1At Yetut nen it at oone waganggwi 12 nogo inaruk wappunuk, o time nen nage nagagirik, aakumi inawi tini lombok wone mamunirage, aakumi obeelom wone yorage, eerikit nduk, nagagerak.
2At Yaya Yiime Wuppiige Menggerak nogo keele maarogo piigo menggam logonet, Keritut eerit nage nogo aruk konengge nagagirik, at oone waganggwi mendek Yetut owagam nappiyareegerak. 3Nappiyareegerak Yetut owagam wogo nogogwaarik, yogo logonet, ”At woroorak yugu nogo kat aret wagandak ilik, peebi aap alik ambi woraagin nduk, tokkogo logomun a?”
4Yogo mbareegwa, Yetut nen, ”Kinaruk konenggwi yi inom, kinigen kogwe yi inom, Yaya yori nanip o. 5Inigen mbuk mendek inigen obeelom ogwe, inendop maluk mendek tu op nogwe, inawin aaga'ne kunik mendek lek ogwe, inaruk logu mendek inaruk konenggwi, kanggwi iinok, ineenik agago mippiige, ndi, inamendek lek nogo obeelom wone yorogwe, eeke kogotak yi, yori nanip o. 6Ndi, kit an eeke minggirak paga kineebi nombakulik kiinok ti, kiniki ale'nggen aret logomunggup o,” yinuk, yoragagerak.
7Yorage mbareegi, it nogo iniyok paga nogwe iigak, Yetut nen it aakumi kuwak aago nogo Yaya eeke abok yorage logonet, ”Kit nano mendek kaawok nduk, karume aakumi lek me nogotak? Piinde nogo o wiya nen nage-wage eeke kaawok nduk, nogotak ya? 8Nano mendek kaawok nduk nogotak? Aap ambi yum kigirikwe yirik kaawok nduk, nogotak ya? Wologwe! Yum kigirikwe mban yikwi ti, aap inendagembogut iname time mban yiko menggaarak o. 9Ndi, nonggop nduk nogotak? Aap Ala wone yorage menggerak nabi ambi kaawok nduk, nogotak mbakop? Wologwe! Kit kogotak nogo ti, Ala wone yorage menggerak nabi mendek aret kwe, aap mondok tiyanak lombok aret kogotak o, yinuk, yokkiragi o. 10Ala nen ari logonet, Kat noorak tu yaruwak nduk, an nen aap yonggo aa'nduk nappege neyaamunggun o, yinuk, yo'nereegerak liiru mbanak nogo ti, at Yaya aret nduk yereegerak o. 11Aap Yaya Yiime Wuppiige Menggerak endage warak lombok nda'nagagerak kokwak, it kumi inaagalogwe togop ti, ambi ndaganakulik kwe, Ala abu'me piige minggim time it tebenak wonogwe nogo Yaya tiyanak irimbaga lombok aret logogun o, yinuk, abet aret yokkiragi o. 12At Yaya Yiime Wuppiige Menggerak nogo nen wone yokkirage nagagerak eyom paga nen nok yogondak kuli, at mbogut paga mendek abu'me piige minggim tebenogo pugwi, ndi, aakumi inoone omaawi paga nen unde eeko logowak nduk, wakkogwe, eeko menggaarak o. 13Yaya awo waga'lek kagak, Ala wone lengganak liiru mbanak nogo pekkenok, ineenu ogwe, it Ala wone yorogo nogogwaarak nabi-nabi nen yorogwe, eeko nogogwaarak paga o peebi eeriyak lombok wone pagak yereegerak nogo 14kinikime woorak mbakwi kiinok, at Eliya woroorak nogo ti, eebe Yaya aret kaamunggup o. 15Kinaruk wonage kenok ti, liirogon aret konenggo logonip o.
16Ndi, it aakumi o yogondak wonogwe yi, nano paga wakka o. It wologwe-aabologwe aakumi kuwak eeko menggam yini kunit it mban-mban wone onggo-onggo agan nugu logonet, 17Nit ndawi tiyanggirogoorak kwe, kit eebe wakwi lek. Ndi, le ndawi tiyanggirogoorak kwe, kit eebe yogwe lek, agan nugwi nogo pogom kit togop aret agan nugwi kiigi o. 18At Yaya nogo nen mbi inom, eyoonggen amburu inom, nenggeelik wagagerak me, kit nen, Aap inikime kugi lik yegerak o, yinuk, yogo monggotak. 19Ndi, an aap aret nda'nagagirak nogo, mbi inom, eyoonggen amburu inom, nenet wagarak me, kit nen, Mbi inom, anggur amburu inom, ugun lagap agan mban nenet nege logonet, it pemerintah inake kuwak eeko menggaarak inom, it aap maluk eeko menggaarak inom, iniki kunik menggerak yi kaanip o, yinuk, yo'nogo monggotak kwe, Ala iniki warak nen koonit nage nogo ti, it eeko menggaarak abok aret eekwi paga obeelom aret kogo logogun o,” yinuk, yoragagerak.
Yi o ndi o abet mbaka'lek kenok yoragagerak wone
(Luk 10:13-15)
20Yorage nagagirik, it aakumi at nen eerubok mendek apit aret eerit nage nagagim wonogo menggaarak nogo nen it iniki koombunuk, inomaluk mbo pulik me, Yetut nen it mberirage logonet, 21”Kit aakumi Korarin mendek inom, Mbayitayira mendek inom, mondok kinabuwa o. Eerubok mendek kit kiname time eeke kogotak nogo, o Tut Tiron time eeke logonetak en, it aakumi time mendek maan togon inayum maluk yikkologwe, purok inagabolo paga yikut eerogo pakwi, eeko logonet, inomaluk muk mbo penetak o. 22Peebi kinowak looniyak eyom paga it aakumi o Tut Tiron mendek nogo mbuuluk negen inooke logonet, kit perak, mondok nggwok lombok kinoorigin me, kinabuwa o, yinuk, yokkiragi. 23Ndi, kit aakumi Kaperenaum mendek yi, Nit mbogut paga nagawan me, tiyappinanigin o, yinuk, yogo ogotik? Mondok lek o. Eerubok mendek kit kiname eeke kogotak nogo, o Torom time eeke logonetak en, o eebe nogo lek eeppega'lek, o yogondak kuli yi paga logonetak kwe, eeke inigen kaga'lek me, inomaluk mbo pega'lek wonogo mbareegwa. Ala nen lek eerogo piyareegerak nogo ndak-ndak, kit kunduk lek eerogo pinagagin lek nduk yogo ogotik? Lek o. Ala nen it aap kambunuk nogo menggam time aret mondok wuppinanigin, mbako logonip o. 24Peebi kinowak looniyak eyom paga it o Torom wonogogwaarak nogo mbuuluk negen inooke logonet, kit perak mondok nggwok lombok aret kinoorigin o, yinuk, yokkiragi o,” yoragagerak.
”Kiniki yanggongginabikit nduk, nowagam woraanip o,” yoragagerak wone
(Luk 10:21-22)
25Yorage nagagirik, o ti eyom paga at Yetut nen at ogoba yoge logonet, ”Mbogut-nggween unde nogoba wa! Kat eeriyak yi nogo, it aap iniki warak inom, iniki ngget inom, ineenu ogwe iyo, nobappunuk, it elege-aabologwe ngget ndarak mendek mban paganogo yoragagindak me, wa! 26Yi eereegindak nogo ti, kinikilom mba'nuk eereegindak me, nogoba wa, yokkigi o.”
27Yorage nagagirik, aakumi ambinom yorage logonet, ”An nogoba nen yi mendek ndi mendek abok aret an unde logokit nduk, eeppaneegerak. Ndi, Ala aput yi ti, it aakumi mondok ineenggo'lek nogoba alik mban eenu menggerak. Ndi, nogoba ti, aakumi mondok ineenggo'lek at aput an nalik mban neenu minggirak. Ala aput an lombok nen it aakumi nogoba ineenu aruwak nduk, paganogo yoraakit mba'nuk, yorage neenok mban ineenu ogo menggaarak.
28Kit yabu nabenak mban eeko logonet, anggon-panggon eekkinake yi, an nen kiniki yanggongginabikit nduk, nowagam wa'nip o. 29-30An nayum yonggolak kinomba langgumbinagage, ndi, luurik-maarak kinoba pinagage, eeke ti, aaninggin lek teeluk aret me, an nayum yonggolak kinomba ko'nok, noba yanggonak niniki tebenak logonet, eeke minggirak nogo mamunggolaanip o. Aaninggin kagak mamunggologwe kiinok, eerit nogo logonet, Niniki yanggo yigi, yinuk, yogo logomunggup o,” yoragagerak.
လက်ရှိရွေးချယ်ထားမှု
MATIYUT 11: WNO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
