KEJADIAN 8
8
Faa tuak-ka nate'e
1Manetualain ta nafandele heni Noh ma basa bana lala'en, fo sama-sama loon nai ofak ndia dalek. Manetualain fe anin-na mai, de nalosa oe ndia mulai ma'da. 2Ana kena basa oemata manai daebafak-ka buin-na ma basa lelesu oe manai lalai-a. U'dan-na lea, 3de oe-a, ana boetai ma'dan. Basa faik natun esa limahulu boema, oe-a ta madema so'on. 4Nai hataholi Yahudi-la bula ka hitun-na, fain sanahulu hitu boema, ofak ndia hala neme letelepak Ararat-ta poin-na. 5Oe ma'da nakandoo, de nai hataholi Yahudi-la bula ka 10-na, fain 1 boema, mulai lita letek-kala poin-nala.
6Basa faik haahulu boema, Noh soi heni ofak-ka jendelan esa, 7de ana po'i manupui kaa esa. Manupui ndia ta fali ma'in leo ofak-ka mai fa, te ana laa neu mai nakandoo, losa ma'da makandondook faa oek-ka. 8Basa boema, Noh po'i kalua sina esa neu, fo ana mete, ade oe ndia memak ma'dan so do beik. 9Tehu hu kande, oe-a bei potin-na daebafak-ka lala'en-na, de kalua sina ndia ta hapu mamanak fo ana sa'e fa. Boema, ana fali ma'in leo ofak-ka mai; Noh solok liman-na neu, de ana ko'o-nan, boema ana tao falik-kana leo ofak dale neu. 10Noh bei nahani faik hitu seluk, boema ana po'i seluk kalua sina ndia neu. 11Le'donoso boema, manupui ndia, fali ma'in leo Noh mai te, ana kaa neni ai setun-na doon esa, bei momo'dok. Besak ia, Noh bubuluk nae oe ma'dan so. 12Noh nahani faik hitu seluk, boema ana po'i manupui kalua sina ndia, neu la'iesa seluk; de oek ia soona, manupui ndia ta fali ma'in leo Noh mai so'on.
13Nai lelek Noh teun 601, fo nai hataholi Yahudi-la bula ka esan-na, fain esa boema, oe-a ma'da henin tuu-tuu so. Boema Noh soi heni ofak ndia jendelan-nala, de ana mete leo boboa-kaisun neu. Ana mete te, dae-a ma'da henin tuu-tuu so. 14Neu hataholi Yahudi-la bula ka dua-na, fain duahulu hitu, te daebafak-ka ma'dak so.
15Boema, Manetualain nafa'da Noh nae, 16“O moo o saoinam-ma, o anam-mala loo saoinan-nala, kalua meme ofak ndia dalek mai leona. 17Kalua heni basa manupui-la, ma bana fe'e-fe'ek-kala, nau matua do ana boe, fo ala bisa lamade'u, fo ala tapasasala leo daebafak-ka lala'en-na leu.” 18Boema, Noh kalua neme ofak ndia dalek mai, sama-sama no saoinan-na, anan-nala loo saoinan-nala. 19Basa manupui-la, ma bana manai ma'dak lain-nala, ala kalua loo esa-esak nonoon.
Noh tunu-hotu tutunu-hohotuk
20Boema, Noh taon-na mei tunu-hotuk esa, soaneu Manetualain. Ana ho'un-na manupui mata-matak-kala beke esak, ma bana fe'e-fe'ek fo bole na'a paan-na, beke esak, boema ana tunu-hotun da'di leo tutunu-hohotuk nanatunuk nai mei tunu-hotuk ndia lain. 21Tutunu-hohotuk ndia, boomenin-na tao namahoko Manetualain dalen-na, boema Ana dodoo nai dalen dalen-nae, “Neukose Au ta soo-supa seluk daebafak ia so'on, hu kande hataholi daebafak-ka tatao-nono'in; Au bubuluk, hataholi daebafak-ka dudu'a-aafin ndia, mangalauk neme bei muli-solun-na mai. Neukose, Au ta tao amopo-amate basa mahahae maso'dak, fo bei kaso'dak-kala so'on, sama leo besak-ka Au taok ia. 22Metema daebafak ia, beita mopo fan soona, neukose hapu tataas esa, no fai sele-nggalik ma fai ketu-koluk, fai makasufuk, ma fai mato'bik, fai hanas ma fai oefaak, lele'dok ma le'odaek.”
လက်ရှိရွေးချယ်ထားမှု
KEJADIAN 8: twu
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ