ATÜNNAK 18
18
A Hta Law Vai Ah Mawng Abraham Am Shaitak Pek Ci
(Heb 13:2)
1Mamre sing ghing theing bung ah Abraham ah ma ah Bawipa ang dang ah mawng cu; khaw hnüüp lunglai yah ung Abraham naw a phung m’kawt pei ah ngo ne dan netah, 2Chang sing thum ng’düi sei hmuk ci. Ani cu a hmuh gui vai am va lut ne, a hmai naw m’dek tawn khai ah kawp neta, 3“Bawipa, kei ah im ah kä ng’düm ah kä hteit en ba vä, kei naw ka ning khin na gui cang khai nei. 4Nami khawpha nami m’si nak vai tui ka law püi khai nei, shin ah sing ghing ah kaa ah ng’düm cang vä. 5M’htut ka law püi khai, cun ei neta nami hteh ung nami thagui om khai nei. Ka im ah nami law cu nami na chang m’sui ah kyak ci, cun ah kyasei ka ning khin ah gui cang khai nei” ci sei,
ngami naw, “Na bä ni, kami om khai nei” cik ci gui.
6Abraham cu ang ghit ah kyong ah va lut ba neta Sarah am, “M’htut den cu akyang ah la ne, m’htut cu pyang ä” ci na neta, 7amät cu sei chum nak ah dawng ne, akyom pi, akplan pi sei pat hta cu la ne, akyaang ah a pyan vai ah changshäm tumat am ap ci. 8Cun kawn ah sathau ni, sei suuk ni, sei sa ni law püi ne, sing ghing ah kaa ah ani naw khin na gui sei, ngami naw ei awk ci gui.
9Cun kawn ah ngami naw, Na chu Sarah cu a hawi ang?” cine ng’shik ci gui.
Abraham naw, “K’pyu kyong ah om ci nei” cik ci.
10Ngami ungka tumat naw, “A cha kaw nak ung, ka law ba khai, cun yah ung na chu Sarah cu pami hta ah hta lawk khai” cik ci.
Cun a cicu m’kawt ah akpung lam ah om ciah Sarah naw ng’yak ci. 11Abraham la Sarah cu ghi law pyi ci goi. Sarah cu a chashui phi kä om ba ci. 12Cun ah kyasei Sarah cu amät gaih neta, “Kei phi ka ghi lawk ci, ka cei phi ghi lawk ci, Kani ip om ba hning kheng khai aw?” cik ci.
13 Bawipa naw Abraham am, “A i ah kyasei Sarah naw, kei ka ghi pyi ci, ka hta law kheng khai aw, cine a gaih ang? 14Bawipa ah kä m’khüt a i om ne ang? Ka pyen ah mäih ah acha kaw nak ung ka law ba khai, Sarah cu pami hta ah hta khai nei” cik ci.
15Sarah cu kyi law neta kä ka gaih ci nei cine ng’ciing ci. Ani naw, “Akcang ah na gaih ci nei” cine pyen nak ci.
Sodom Mang Gaw Ah Hmawk Ah Abraham Ah Ng’paa Nak
16Cun ah chang gui cu hteit ba u ne, Sodom mang gaw ah dang nak ung gawk ci gui, Abraham naw tha tuba gui ci. 17Bawipa amät naw, “Kei naw ka bi law vai cu, Abraham am ka m’yih ung kä bä khai, 18Ani ah htangshon gui cu dämduh ne m’gäi ciah pakhui ah kyak khai gui. Chang pakhui avan cu ani awn hriham ka pek khai. 19A hta gui la a htangshon gui naw kei ah ng’thu ngai u ne, düng ci la bä ci ami bi vai ah, m’cäi gui khai ah ani cu ka ghü ci. A cun ah ami om ung ani ah hmawk ah ka shaitak phung cu ka kümbe sak khai” cik ci.
20 Bawipa naw Abraham am, “Sodom la Komorrah ung ami kyah m’lau nak cu däm aih ne, ami cheishoh nak da aih sei, 21ami kyah m’lau nak ah mawng ka ng’yak cu akcang ah a kyak la kä cung acu ah hteit ne ka teng khai” cik ci.
22Hnih goi cu Sodom gawnu lam ah hteit ci goi, Bawipa cu Abraham awn k’pawih shüt ci goi. 23Abraham naw Bawipa cu k’et neta ang shi cu, “Chang ni gui cu changshe gui awn a täng ah akcang ah na m’di gui khai ma? 24Cun ah gawnu ung chang ni hmakip a om ah a kyak ung phi gawnu avan na m’di khai ma? Chang ni hmakip ah hmawk ah kä na k’phyawn khai ma?
25Chang ni gui cu changshe gui awn a täng ah kä na ngawn en gui vai nei. Cun ah na bi ung chang ni gui naw changshe gui ah mäih ah m’katnak cu gah lawk khai gui nei. Cun ung kä bä khai nei, khomdek m’khoichak ciah Bawipa cu düng ciah kä kya ne ang” cine ng’paa nak ci.
26 Bawipa naw, “Sodom gawnu ung chang ni hmakip ka hmuh ah a kyak ung gawnu avan ka phyawn sak khai nei” cik ci. 27Abraham naw, “Bawipa, kei cu m’dek khui la m’vut ah ka kyak ci. Nang ngawn kä ka khinkha ung phi, na m’gein ne ka ng’thu na ngaih pe ä. 28Chang ni hmakip kä be ne phlikip lei hma bäng a law ung mä, chang hma ah hmawk ah avan na m’di khai ma” cine ng’paa na ba ci.
Bawipa naw, “Chang ni phlikip lei hma ka hmuh ah a kyak ung, shin ah gawnu cu kä ka m’di khai nei” cik ci.
29Abraham naw, “Chang ni phlikip bäng a om ung mä” ci ba khäta,
Khanpughi naw, “Chang ni phlikip a om ung kä ka m’di khai nei” cik ci.
30Abraham naw, “Bawipa ka pyen bamä khai, na m’lung kä she en sä, chang ni thumkip bäng a om ung mä” ci ba ci.
Ani naw, “Chang ni thumkip a om ung kä ka m’di khai nei” ci ba ci.
31Abraham naw, “Bawipa na bä ni, ka ng’yoi bamä khai, chang ni m’ku bäng a om ung mä” cine ng’yoi ba ci.
Bawipa naw, “Chang ni m’ku a om ung kä ka m’di khai” cik ci.
32Abraham naw, “Bawipa, kä m’lungshe en ä bäi, hnü ät bäng ka pyen ba khai, changni sing gha bäng a om ung mä” cine ng’yoi ba ci.
Bawipa naw, “Chang ni gha a om ung kä ka m’di khai nei” ci ba ci. 33Abraham awn ani ng’thu yawp kawn ah Bawipa cu kai ba ci, Abraham phi im ah hteit ba ci.
လက်ရှိရွေးချယ်ထားမှု
ATÜNNAK 18: CBC
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Cho Bible Common Language © Bible Society of Myanmar, 2016.