ATÜNNAK 17
17
Thukhän M’hnüt Nak Ah Vun-Ah Nak
1Abram a khawkum 99 a law sang ung Bawipa cu Abram ah ma ah dang law neta, “Kei cu Hlüngtai ciah Khanpughi ah ka kyak ci, ka ng’thu ngai ne angtäi sei düng cicu na bi vai. 2Nang am thukhän ka ning pek khai, ka ning pung piah sak khai” cine pyen nak ci. 3Abram cu a hmai m’kyum ne kawp khätah Khanpughi naw, 4“Kei naw thukhän ka ning pek ci, nang cu pakhui akda ah pa ah na kyak khai ciah phi shai ka tak ci. 5Na ming cu Abram ah kä kya ba ci, Abraham ah kyak ci, a i ah kyasei ci ung nang cu chang pakhui akda ah pa ah ka ning pyang pyi ci nei. 6Nang cu pakhui akda ah ka ning shon sak khai, amshah gui cu ghangpughang ah kyak khai gui. Nang ah htangshon gui cu da u ne pakhui ak chün ah kyak khai gui.
7“Kei naw ka shaitak cu nang la na htangshon ung ng’täi ciah thukhän ah ka küm sak khai. Kei cu nang la na htangshon ah Khanpughi ah ka kyak khai. 8Tuhbäi khin ah kya ne na om nak ah shin ah khaw cu nang la na htangshon am ka ning ap khai. Kanaan khaw avan cu na htangshon naw angtäi sei khäm khai gui, kei cu ngami ah Khanpughi ah ka kyak khai.
9Khanpughi naw Abraham am, “Nang naw phi, nang la na htangshon naw ngawi yä thukhän ami läk vai ah shaitak na bi vai. 10Pami ah nami hta phung ung vun-ah nak nami bi vai ah nang la na htangshon naw nami yum vai. 11Vun-ah nak nami bi cu kei la nangmi ah ng’lak ung m’hnütbäi nak ah thukhän ah kyak ci. 12Nami htangshon ung pami ah nami hta phung cu hnüüp cheit a lüng ung vun-ah nak nami bi vai. Nami changshäm naw nami kyong ah a hta nak la nami chang hleih phi vun-ah nak nami bi pek vai. 13Changshäm ah hta la chang hleih phi vun-ah nak nami bi pek vai. Cun cu ka thukhän nangmi ung angtäi ah a om ah mawng pumsa awn m’hnüt nak ah kyak ci. 14Vun-ah nak kä bik ciah pami cu kei ah chang ah kä kyak khai, ani cu kei ah thukhän m’shet ciah kyak ci nei” cine pyen ci.
15Khanpughi naw Abraham am, “Na chu cu Sarai ah kä na khü ba vai, tuhbäi ung tün ne aming cu Sarah ah kyak ci. 16Ani cu hriham ka pek khai, ani ung hta pami ka ning pek khai. Ani cu hriham ka pek khai, ani cu chang pakhui gui ah nu ah kyak khai. Ani ah htangshon gui cu ghangpughang ah kyak khai gui.
17Abraham naw a hmai naw m’dek tawn khai ah kawp neta, amlung kyong ah gaih ne, a khawkum phia law pyi ciah chang cu hta ba hning khai aw? Khawkum 90 law pyi ciah Sarah cu hta hning khai aw?” cine amlung kyong ah ngaih-tüh neta; 18Abraham naw, “A i ah kyasei Ishmaela naw ka pakhui kä ah m’düng hning vai ang?” cine ng’shik ci.
19Khanpughi naw, “Na chu Sarah cu pami ah hta khai, aming cu Isaak ah na sui khai. Kei naw ka thukhän cu ani la ani ah htangshon am ka pek khai, cun cu ng’täi ciah thukhän ah kyak khai. 20Ishmaela ah phäh ah nang naw na ng’yoih cu ka ng’yak ci, ani am hriham ka pek khai, a hta akda, a htangshon akda ka pek khai. Ani cu bawimang gha lei goi ah pa ah kyak khai. A htangshon cu pakhui küi ah kyak khai. 21Cun ung phi tuhbäi chü, Sarah naw a hta law nak vai ah na htapa Isaak am kei naw thukhän ka pek khai” cik ci. 22Cun kawn ah Abraham cu ng’thu püi yawp neta Khanpughi cu kai ba ci.
23A cu hnüüp Khanpughi ah ng’thu ngai neta Abraham naw a htapa Ishmaela cu vun-ah nak bi pek ci. A im ung om ciah pami avan la changshäm, chang hleih gui phi vun-ah nak bi pe gui ci. 24Abraham cu amät vun-ah nak a bi yah ung a khawkum 99 lawk ci. 25A htapa Ishmaela cu a khawkum kum gha lei thum lawk ci. 26Ngani cu hnüüp ät ung a täng ah, 27Abraham ah changshäm gui awn a täng ah vun-ah nak bik ci goi.
လက်ရှိရွေးချယ်ထားမှု
ATÜNNAK 17: CBC
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Cho Bible Common Language © Bible Society of Myanmar, 2016.