Matìo 3
3
Tsʉ̂ Dzɔ̌n Fùghùu mùghù ŋ Kə̀zə̀
(Mâk 1:18; Lûk 3:1-18; Dzn 1:19-28)
1An tsuʼu n te mò, Dzɔ̌n fùghùu mùghù ŋ Kə̀zə̀ ŋ kaʼ tsughu tsə̀ndə̄ghā è Kə̀zə̀ a lùʼû naʼn wo aŋ ŋgwə̀n è Dzùdîa. 2#Mat 4:17; Mâk 1:15 Ù n nâʼn wò enyəa, “Ti màʼa nlò ghəa ghɛʼɛ à biigh gho, tɔŋlo enyəa fɔ̂e u kəwālā wə n sū.” 3#Èzy 40:3 Dzɔ̌n wən lǒ ghùw wəla ghùwshʉ̀ghà Èzayà fə dzɛ̂ naŋā kùu ndùw wən enyəa,
“Ghùw buʼu kwəla wò kə̀bɔ̀ŋ aŋ ŋgwən, nàʼn wò enyəa,
‘Fəghaan naŋa nlò dzì â Mughu ù te,
nə̀ghàso nlò dzǐi mò â wə̄n.’ ”
4 #
2Ud 1:8
Dzɔ̌n fə̀ dzəə̄n tsəgha təndzʉ̄ mo ghe təm sughu aŋ gûw è kə̀anyòm kə̀ lì ko ghe tɔŋlo enyəa à lò kɔʼdzəm, mò ù ŋ kɔlɔ tsəghà wò kwùu fə gûw fò alo esā. Fʉghàzəa u wə̄n wə n lo təbe àsùghò fə̀dɔ̂ŋ. 5Aghî am mbùʼ è Dzùdîa e dzə̀m n nyəŋo tsə̀ghà ko a vʉ̀a wə̄n; a àsùghò ghì a Yɛ̀lusalɛ̀m ghò àsùghò ghî a nàʼà mə̀là n lǒ a ŋgùŋù tə dzughù è Dzodàn. 6Ghe m bughò zàa wò vùŋ u ghee enyəa ghe ŋ ghəəŋ bonlo, Dzɔ̌n m fughuu tsughu ghee â mùghù ŋ Kə̀zə̀ mo an dzughù è Dzodàn.
7 #
Mat 12:34; 23:33 Ghəa Dzɔ̌n kôʼ ghî a Falàsîi à ŋgee bughōo, àsùghò ghì a Sadùwsîi ghò, ghe bughoo alebùghò nî mùghù ŋ Kə̀zə̀, ù m fəŋso dzɛ̀ â ghee enyəa, “Ghɛ̀ fwi wən, à ghɛ̀ bɔŋ tsʉ̀ ndùghò enyəa ghɛ̀ lo nû alenɔ̀ɔsə an ndzəgha kəla kə bughò lo a? 8E ghəəŋ nduw nlò ghəa ghəla a lo aledèe tsughu enyəa ghɛ̀ ŋ ghəa ghɛʼɛ à biigh a ti màʼà. 9#Dzn 8:33 E kwo ghɛ̀ lô moʼò enyəa ghɛ̀ lo nû alezə kətuw abugho ghɛ̀ dzâa tsùghù dzə̂ enyəa, ‘Abə̀làhâm lǒ tsele waʼa.’ Tɔŋlo enyəa to Zə̀ kə̀ nîi kɔʼ tia ghən kə fənsò fughuu kɔʼ awɛ a te â Abə̀làhâm. 10#Mat 7:19 Ndzàm bùʼ lò nû êzə̄ŋ ghe shia naŋa an chi e fəkàʼ, è ləmlo enyəa mo kâʼ fə̀ yo alemʉ twam ù dzûŋ wò, a m gbò kpàa màʼà kàʼ fə te fo.
11Ŋ̀ ghɛ fɛ fughuu â mùghù ŋ Kə̀zə̀ mò aledèe tsughu enyəa ghɛ̀ n tì màʼà ghəa ghɛʼɛ à biigh gho. Ghùw wəla ù lo kuūwn bughōo a bàâ mùghò m mùghò tsəghà sə; Ŋ̀ kâ bùʼ kɔʼ kpè alebòʼò gùw tə wə̄n, ù lô ghɛ̀ à mùghù ŋ Kə̀zə̀ ŋ kuuwn fughuu an Zuʼ tə Kəzə̀ àsùghò wə̀n mò a te. 12Ù lò â kwònɛ̀lɛ aŋ ghu alefoōn nughù kɔʼ təŋgòʼ a te, ù fwə̀là naŋā ndûw an tɔ̀e a kə̀twɛ̄; ù daŋso kâaŋ kpâa ndûw ghùw u te wo aŋ wə̀n wəla u nyəə̄m tsəghà yo.”
Yɛso bùghò nì mùghù ŋ Kə̀zə̀
(Mâk 1:9-11; Lûk 3:21-22)
13A n tsùʼu n te mò, Yɛso n zə̀ghàa wò Galèlîi enyəa e bughò tò Dzɔ̌n fughu wə̄n â mùghù ŋ Kə̀zə̀ mò an dzughù è Dzodàn. 14Dzɔ̌n m fəma kèe aletūe, ù m bvʉ â Yɛso enyəa, “Ghù sò bùghò ênzə̂n enyəa M̀ fughuu wô ghù â mùghù ŋ Kə̀zə̀ mò a, mò à kì ghû alelaām fughu mugho â mùghù ŋ Kə̀zə̀ mò a?” 15Yɛso m fwə̀n bɛ̀lɛ̀ ndùw wən enyəa, “Na to e doʼo tsughuu ko êzə̀; tɔŋlo enyəa e lo tsəghatsəgha an sə kə Kə̀zə̀.” Dzɔ̌n fi boo kɔʼ nû.
16Ghəa ghe fughu tsughu Yɛso â mùghù ŋ Kə̀zə̀ mò êzə̀, ù mo e daŋso səa kɔʼɔ wò an dzughù, wala kə n nùghù tsʉ̀ è tsughu, ù ŋ kòʼ Zuʼ tə Kəzə̀ tə̀ zəgha tsughu wô aŋ ghùe wə ebùŋu, tsùghù bùghò mǎa tsughu an tuw kə wə̄n. 17#Dzs 22:2; Sms 2:7; Èzy 42:1; Mat 12:18; 17:5; Mâk 1:11; Lûk 9:35 Ghe mo e zuw dzə̀ saʼ tsughu wô alo kəwālā enyəa, “Wən lǒ wɛ waŋā, Ǹ duʼn nû ghàʼ à wə̄n.”
လက်ရှိရွေးချယ်ထားမှု
Matìo 3: agq
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
