Крар 18
18
Павел Каринфда
1Гьадалай кьулухъ Афинаяр туна, Павел Каринфдиз фена. 2Ана адал ПӀунтӀасдай тир Акуьл лугьудай са чувуд ва адан паб ПрискӀа гьалтна. Абур Италдай и мукьвара атанвайбур тир, вучиз лагьайтӀа Клавдас пачагьди вири чувудриз Римдай экъечӀна хъфин эмирнавай. Павел абурун патав фена. 3Павелни Акуьла са пешедин устӀарар тир – абуру алачухар цвадай, гьакӀ хьайила Павел абурухъ галаз кӀвалахиз амукьна. 4Гьар Киш юкъуз ам синагугда чувударни муькуьбур вичин чӀалал гъиз алахъзавай.
5МакӀедандай Силавни ТӀиматӀей хтайла, Павела вири вичин вахт вязер ийиз серфна. Ада чувудриз Иса – Месигь я лугьуз шагьидвал ийизвай. 6Чувудри и карда адаз акси жез, адан хатурдик хкуьрайла, ада вичин пекерал ацукьнавай руг югъурна абуруз лагьана:
– Куьн кьиникьин тахсир куьди жеда! Зак са тахсирни квач, гила за фена маса халкьарикай тирбуруз чирвилер гуда.
7Синагугдай экъечӀна ам Аллагьдиз ибадат ийизвай Юст ТӀитӀес лугьудай касдин кӀвализ фена. Адан кӀвал синагугдин патав гвай.
8Синагугдин кьиле авай Криспа ва адан вири хизан Реббидихъ ийизвай имандал атана. Павелаз яб гайи гзаф кьадар каринфвийрини, имандал атана, цик акахьун къачуна.
9-10Са йифиз Павелаз ахварай Реббиди лагьана:
– КичӀе жемир, вахъ Зун гала. И шегьерда зи инсанар гзаф ава, вак хкӀадай са касни жедач. Гьавиляй рахух, кисмир.
11Аллагьдин Гафуникай чирвилер гуз, Павела ана йисни зур акъудна.
12Галиян Ахайда гьаким тир чӀавуз чувудар, вири сад хьана, Павелал гьавалат хьана. Ам кьуна абуру дувандиз гъана 13ва лагьана:
– И кас, Къанундив кьан тийизвайвал Аллагьдиз ибадат ая лугьуз, инсанар вичин рекьиз гъиз алахънава.
14Павела сивяй гаф акъуддалди, Галияна элкъвена чувудриз лагьана:
– Чувудар, куьне и касди чӀехи са чӀуру кар авуна лагьана адак тахсир кутазвайтӀа, за квез яб гудай. 15Амма гьуьжет гафарикай, тӀварарикай ва куь Къанундикай физватӀа, абурай кьил куьне акъуда. Заз и крара дуванбег жез кӀанзавач.
16Галияна абур дуванханадай акъуд лагьана. 17Инал халкьди синагугдин кьиле авай СастӀен кьуна, дуванханадин вилик адаз гатун кьуна, амма Галияна и кардиз гьич ябни ганач.
Павел АнтӀиахдиз хтун
18Са кьадар вахтунда Павел Каринфда амукьна. Ахпа, иманийриз сагърай лагьана, ам гимида аваз Суьриядиз фена. Адахъ галаз ПрискӀа ва Акуьл рекье гьатна. Кинхерейдай экъечӀдалди, Аллагьдин вилик авур вяд куьтягь хьунин лишан яз, ада уьлгуьчдалди вичин кьил твана. 19Абур Эфесдиз акъатна. ПрискӀа ва Акуьла гьана туна, Павела фена синагугда чувудрихъ галаз ихтилатар ийиз хьана. 20Абуру адавай чпихъ галаз са кьадар вахтунда амукьун тӀалабна, амма ам рази хьанач.
21– Аллагьди гайитӀа, куь патав зун мад хкведа, – хъфидайла, лагьана ада.
Павел гимида аваз Эфесдай хъфена. 22Кесардиз атана, гимидай эвичӀна, винелди Ярусалимдиз фена, ана авай иманийрал кьил чӀугуна. Анай ам АнтӀиахдиз рекье гьатна. 23Са кьадар вахт АнтӀиахда акъудна, шегьердай шегьердиз физ, ГалатӀни Фиригъ тирвал къекъвез, Павела вири тилмизрин руьгь генани мягькемарзавай.
Павелан пуд лагьай сиягьат
АпӀалас Эфес шегьерда
24Гьа чӀавуз Эфесдиз АпӀалас лугьудай са чувуд атана. Вич Искендерандай тир АпӀалас кӀелнавай инсан тир. Калам адаз хъсандиз чидай. 25Реббидин рекьикайни адаз хъсандиз чирвилер ганвай. Адаз чизвайди анжах Ягьяди цик акахьун къачу лугьузвайди тиртӀани, ада лап рикӀивай ва галай-галайвал инсанриз Исадикай чирвилер гузвай. 26Ам гьа идакай синагугда викӀегьвилелди рахаз эгечӀна. ПрискӀадизни Акуьлаз адан ван хьайила, абуру ам чпин кӀвализ тухвана Аллагьдин рехъ вуч затӀ ятӀа мадни дуьм-дуьз чирвилер хгана. 27АпӀаласаз Ахайдиз физ кӀан хьайила, Исадихъ иманийри адаз хъсан рехъ хьурай лагьана. Абуру Ахайда авай тилмизриз АпӀалас кьабулун паталай чарни кхьена. Аниз атана агакьайла, ада Аллагьдин берекатдик кваз имандал атайбуруз зурба куьмекар гана. 28АпӀаласа халкь авай чкайра чувудрихъ галаз ийизвай гьуьжетра, абурун фикирар дуьз туширди къалурдай, Каламдикай бине кьуна, Иса – Месигь тирди чӀалахъ жедайвал субутдай.
လက်ရှိရွေးချယ်ထားမှု
Крар 18: ЛезПК
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Институт перевода Библии, 2010-2024