Maatteeo 9
9
Aaꞌnyĩk Yeesu tuhuulliahit hũbũna
(Tigiil Maarko 2:1-12; ꞌLuuka 5:17-26)
1Baa õtõd Yeesu haahũl nẽ abaahĩ ũũk ĩĩcĩ ꞌtaaũn cĩ õlõ cĩnĩĩng. 2Ma hĩdĩĩkoothong, irriongatta eeta ũgẽẽgĩ eet ꞌcĩ alalliaa ẽlẽ oongi lotoonwa. Ma baa acĩn Yeesu lemiinit cĩnĩĩng ko, ikia ĩĩnnĩk eet ꞌcĩ alalliaa ẽlẽ ho, “Ngeertĩ, aꞌnyĩĩk ꞌthĩnĩt hõkõm. Ũtũngtoothĩk nganiit ꞌthẽccanẽẽta cugunnẽẽgĩ.”
3Ma nĩngaata, othoothito ꞌlimmanniooha ũgẽẽgĩ cĩg nyattal cĩ Mũũꞌtha nyaagwaana ĩĩtõ, “Aĩ ẽẽtĩ ciee hĩĩnĩ Nyekuc!”
4Baa aga Yeesu muhẽẽnĩt cĩnĩĩng ko, nĩngĩtĩ annẽẽkĩ, “Inni ummuhit thooꞌthiok ꞌcĩg ĩĩn ꞌriiring ꞌthinneetinii cugguung ko? 5Thõõth iina ꞌcĩ ammũjĩ, ꞌcĩ hannẽẽkĩ eet icci alalliaa ẽlẽ ho, ‘Ũtũngtoothĩk ꞌthẽccanẽẽta cugunnẽẽgĩ,’ hode ꞌcĩ hannẽẽkĩ, ‘Tĩnga tõõ’? 6Nẽẽthĩ, heterꞌtheekuung naa ngaatĩ aꞌnyahĩ Ngeertĩ Eeto makaaꞌthĩt ꞌcĩ ammaannĩkĩ eet ꞌthẽccanẽẽt, loota nĩnga.” Nĩngĩtĩ annẽẽkĩ Yeesu eet ꞌcĩ alalliaa ẽlẽ ho, “Tĩnga! Dũhan lotoonu bĩĩt ĩĩcĩ olu.”
7Nĩngĩtĩ ĩꞌngaannĩ ẽẽtĩ noho, wẽtẽttẽl hũũk ĩĩcĩ olu. 8Ma baa acĩn lothippiti thõõth icci ho, iita aꞌngalilli nẽẽg gẽrrẽẽt ũdũt nẽ ĩdĩhĩthĩt Nyekuc ꞌcĩ aaꞌnyĩk eet makaaꞌthĩt ꞌcĩ aaĩ noho ho.
Aũ Yeesu Maatteeo
(Tigiil Maarko 2:13-17; ꞌLuuka 5:27-32)
9Ma baa ĩtĩnga Yeesu nĩngaata ũũha, ikia ẽdẽẽnyõthĩ eet umwa ꞌcĩ haĩ Maatteeo iccioloongan ngaatĩ aayyi ẽẽtĩ ꞌcĩ alũt occoro. Ma ho, ũtũvvũ ĩnõõnnõ ĩĩnnĩk “Ijjia nũaa nganĩĩta.” Nĩngĩtĩ ĩꞌngaannĩ Maatteeo nĩĩcĩ noho nẽ ũnũ ĩnõõnnõ.
10Ma baa nga aduhi Yeesu ꞌcieethaa cĩ Maatteeo hĩ nuyyiook cĩgĩnnĩg, iita eeta ꞌcĩg mẽẽlĩg ꞌcĩg alũt occoro hĩ ꞌthẽccanniook vẽlẽk hiita hadahit ꞌgẽẽn hĩ ĩnõõnnõ. 11Ma baa adtuuha Variꞌtheei thõõth icci ho, iita ijinit nuyyiook cĩgĩnnĩg ĩĩttĩk, “Inni hudukto ꞌlimmannioohiti cunuung hĩ eet ꞌcĩg alũt occoro hĩ ꞌthẽccanniook ko?”
12Ĩko nẽẽ ĩthĩk Yeesu thõõth icci nẽ ẽdẽc ĩhõõggõ ĩĩnnĩk, “Hõllõngaa eet ꞌcĩg abũnnaa ꞌcĩg adiim akĩĩm, eet ꞌcĩg õmmõõrĩ ꞌcĩg adiimi. 13Õõt da nõõ umuddia thõõth baa aduha ꞌBuuhi cĩ Nyekuci aĩ, ‘Haccamanaa naa tamaati, hõllõngaa haccamanaa ꞌgaarrieenit,’#Tigiil ꞌBuuk cĩ Hoꞌthẽa 6:6 hadiimmuung naa ngagiit atamaatĩk ꞌgoonogu. Baa hõllõngaa hakuu naa hikia hũtũvva eet ꞌcĩg abũnnaa. Hakuu naa havva ꞌthẽccanniook.”
Jinẽẽnĩt ꞌcĩ hẽdẽtaanĩ eleeti
(Tigiil Maarko 2:18-22; ꞌLuuka 5:33-39)
14Ma kõr umwa, iita ijinit nuyyiooha cĩg Yõaannẽ Yeesu ĩĩttĩk, “Inni baa hedettiaawa naag hĩ Variꞌtheei eleeti ꞌgẽẽna nẽ iittiõõ nuyyiooha cugunnig hõllõngaa ẽdẽta ho?”
15Ẽdẽcĩ Yeesu ĩhõõggõ anneek, “Occa gõõng ẽdẽta heerinniooha cĩg nyattaraanak eleeti ꞌgẽẽna, hatĩ nga arũmĩ hĩ ĩhõõggõ hutuno? Aku hatĩ kõrra ꞌcĩ aggammaanĩ lõõcĩ ĩhõõggõ nyattaraan, nẽẽthĩ hatĩ edettia nẽẽg eleeti ꞌgẽẽna.
16“Aitiõõ ẽẽtĩ ꞌcĩ ahubeek cẽrẽm ꞌcĩ ĩĩn ngeju cẽrẽmaa ꞌcĩ ũnũũk tõõ. Hĩnĩngĩtĩ ẽrrẽẽc hinnia hatĩ cẽrẽm ꞌcĩ ĩĩn ngeju ho ꞌcĩ ũnũũk hĩĩ maka loppulacĩ. 17Aitiõõ ẽẽtĩ ꞌcĩ adũddeek mẽrtĩ cĩ viinoo ꞌcĩ ĩĩn ngeju hutubẽẽtĩĩ ꞌcĩg ũnũũhĩtõ#9:17 Hutuba ꞌcĩ ũnũũha: Haarĩk naag mẽrtĩ hutubaawa, nẽẽthĩ, baa alũũlla eeta cĩg ꞌJudeei cẽrẽm cĩ eetho nẽ utududdeek mẽrtĩ cĩ viinoo. Baa õthõõth Yeesu thõõth cĩ ꞌlimman cĩnnĩ ꞌcĩ ĩĩn ngeju, baa ĩthahĩtheek nẽẽ ꞌlimman cĩnnĩ mẽrtĩ ꞌcĩ ĩĩn ngeju cĩ viinoo. tõõ. Má uduu mẽrta cĩ viinoo ho, alib hinnia hatĩ hutubẽẽt ꞌcĩg ũnũũhĩtõ ho, hudduuti hũũk tuua. Occa adũddoothĩk mẽrta cĩ viinoo ꞌcĩ ĩĩn ngeju hutubẽẽtĩĩ ꞌcĩg ĩĩn ngeju, hátĩ hiittiõõ hõllõngaa alibi hutubẽẽta nẽ iittiõõ hõllõngaa adduuti mẽrta cĩ viinoo ho.”
Bũhẽẽc ꞌcĩ adaahĩ hĩ ngaa ꞌcĩ õmmõõrĩ
(Tigiil Maarko 5:21-43; ꞌLuuka 8:40-56)
18Ma baa nga õthõõth Yeesu, uppwaanna ꞌgaalacĩ umwaa hikia hakat huruꞌnyia nẽ ĩĩ, “Nga adaakna loholeec aa iyyohoothong. Ijjia taadĩk aꞌthiit cunni ẽllaa cĩnnĩ, hátĩ hũrũga.” 19Nĩngĩtĩ ĩꞌngaannĩ Yeesu hĩ nuyyiook cĩgĩnnĩg nẽ ookorit hĩ eet tĩho.
20Ma nĩngaata, ikia ũnũ ngaa umwaa ꞌcĩ baa arik ẽlẽ irkiꞌnyia õmmõtõ hĩ ꞌramma Yeesu uruta, ĩꞌthõng hikia huhum eetoc cĩ cẽrẽm cĩnnĩ. 21Baa ammuk ngaa ciee ꞌthĩnĩtatõõ cĩnnĩ aĩ, “Má huhuma eetoc cĩ cẽrẽm cĩnnĩ haaga, habũnna hatĩnĩ.”
22Ma ho, ubbuudi Yeesu nẽ udtuuha ĩnõõnnõ nĩngĩtĩ annẽẽkĩ, “Aꞌnyĩĩk ꞌthĩnĩt hõkõm tĩnaatĩ. Aaꞌnyi lemiiniti cunni bũna.” Ma ꞌthẽk nĩngaata noho, ũbũna ngaa niccieeni.
23Ma baa uduhun Yeesu halang cĩ ꞌgaalacõ, ũũk udtuuha eet ꞌcĩg adtak loboruẽẽt hĩ lothippit ꞌcĩ awacak gẽrrẽẽt, 24nĩngĩtĩ annẽẽkĩ, “Õõt battaala, nga hadaak loholeeca, oongi nẽẽ haaga.” Baa hinnia arannĩ eeta Yeesu thõng. 25Ma baa urutaa ꞌcĩ ũũhĩ lothippiti battaala, ikia uduhun Yeesu ꞌcieetõõ hũũk haggam loholeec aꞌthiit, nĩngĩtĩ ĩꞌngaannĩ loholeec ꞌjieena. 26Nĩngĩtĩ aku ĩꞌthanõthõõthĩkĩ nyeemuut ciee looc tĩho vẽlẽk.
Aaꞌnyĩk Yeesu eet ꞌcĩg rubettĩg hũbũttaathõ
27Ma baa nga õvvõ Yeesu ꞌgõõla, iita ũnnẽẽcõ eeta ũgẽẽgĩ ꞌramma ꞌcĩg rubettĩg ĩnõõnnõ nẽ ĩĩtõ, “Ngeertĩ Daavide,#9:27 Ngeertĩ Daavide: Baa aga eeta cĩg ꞌJudeei ngaatĩ hatĩ aku arrittiaanĩ Krĩstõ hattũũgaa cĩ habu Daavide. Tigiil ꞌBuuk ꞌcĩ ĩĩn 1 cĩ Thamueele 16:1-13; Tegellwaanu 132:11-12. tamaatĩheet ngagĩĩta!”
28Ma baa uduhun Yeesu ꞌcieetõõ, iita rubenniaaha hĩ ĩnõõnnõ nẽ ijin nẽẽ ĩhõõggõ ĩĩnnĩk, “Elemmu niig occa hũũlũ naa ngaatĩ heelluung ngagiit ũbũttaathõ?”
Ẽdẽcĩ nẽẽg aĩ, “Eei Makayyioohit.”
29Nĩngĩtĩ ahumi Yeesu hẽbẽrĩ cĩggĩĩng nẽ ĩĩ, “Hĩnĩngĩtĩ lemiinit cunuung aꞌnyĩĩk thĩ da haau hĩcĩ adiimmu niig ko.” 30Ma nĩngaata, iita ĩcĩttĩ hẽbẽrĩ cĩggĩĩng. Ma ho, itilo Yeesu ĩhõõggõ gẽrrẽẽt ĩĩnnĩk, “Ma hooyyu haduhaaku eet umwa thõõth icci ũdũt.” 31Baa hinnia õõ ĩꞌthaanĩk nẽẽg nyeemuut icci looc tĩho hũtũrũũr.
Aaꞌnyĩk Yeesu eet ꞌcĩ hõllõngaa õthõõth hũbũna
32Ma baa nga õõ Yeesu hĩ nuyyiook cĩgĩnnĩg battaala, iita aꞌnyaktaak eeta ũgẽẽgĩ ĩnõõnnõ, eet umwa ꞌcĩ hõllõngaa õthõõth, hĩnĩngĩtĩ aꞌnyak lori ꞌcĩ abathĩ. 33Ma urutaa cĩ itiggiaĩ Yeesu lori ꞌcĩ abathĩ, ikia õthõõth ẽẽtĩ lõꞌngõõc. Baa akuleek lothippiti ꞌjieen nĩngĩtĩ õthõõthĩ eeta aĩnnĩ, “Gõõng nga hedeeꞌnyia thõõth ꞌcĩ aaĩ hoti Ĩꞌthĩraẽla hũtũrũũr!”
34Baa hinnia aĩ Variꞌtheei, “Habu cĩ loriẽẽt ꞌcĩg abathĩ ꞌcĩ aaꞌnyĩk ĩnõõnnõ makaaꞌthĩt ꞌcĩ iiggiaĩ loriẽẽt ꞌcĩg abathĩ ho.”
Ammaannĩk Yeesu eeta
35Baa õkõ Yeesu ꞌtaaũnnioohĩ hĩ olooyyiohĩ vẽlẽk alliman eet ꞌCieethinii cĩg Laiittak, irrioon nyeemuut ꞌcĩ abũnnaa cĩ habuccieet cĩ Nyekuci nẽ aaꞌnyĩk eet ꞌcĩg õmmõõrĩ vẽlẽk hũbũttaathõ. 36Ma baa acĩn nẽẽ lothippiꞌnya ho, ikia atamaatĩk ĩhõõggõ, hĩnĩngĩtĩ baa atalmaanyanni nẽẽg nẽ ippiirria gẽrrẽẽt haauto hĩ aꞌtha ꞌcĩg aitiõõ tũhayyioohiti tõõ. 37Nĩngĩtĩ annẽẽkĩ nuyyiook cĩgĩnnĩg, “Maka janiiniti gẽrrẽẽt, hĩdĩcĩg hinnia dticcianniooha. 38Nẽẽthĩ hoti ho, ijinit Makayyioohit cĩ manu haꞌnyaha dticcianniook cĩg janiittak manatõõ cĩnnĩ.”
လက်ရှိရွေးချယ်ထားမှု
Maatteeo 9: did
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2017, Wycliffe Bible Translators, Inc., All rights reserved.
