Mat. 12

Chenani Yesu Fun Tum Ju Tim Hiisi Wuzu

(Maak 2.23-28; Luk 6.1-5)

1Hiisi wuzu digi Yesu awa a gantɛl tiŋsi ta fun la zu kiparɛ tuha aa la. Ba funɛ la chene, lɔsa fun kpak o gantɛl tiŋsi ta ba pini kiparɛ ta a se. 2Farisi tim ta bɔnɛ funɛ na chenani ba tum, ba fun ŋɔ Yesu ni, “Yɛrɛ i gantɛl tiŋsi ta chɔk ya chiili wuzu hiisi ti?”

3Yesu fun burgi a pɛɛsi ba, “Ma yaa karimi koor Devid wɛ a li Koosa sɛm tɔn ti ni chen, ma wa zim o munn? 4Wuzu digi lɔsa funɛ kpak Devid awa o dɔŋtima, o fun kaali a la zu Koosa bar jɛɛmi dam ti a la zer boroboro, a chɔk a se a kpa nyɛ o dɔŋtim ni ba gbanko fun se. Nan boroboro nɔ funɛ chi wa sɛɛliu, see Koosa dam kɔkɔɔrsi ta duŋduŋ funɛ se. 5Ma ha wa karimi chenani Mosis fun sɔbi a li Koosa sɛm tɔn ti ni di Koosa dam kɔkɔɔrsi ta tum o bar jɛɛmi dam ti ni hiisi wuzuu? Ba waa yaa chɔk ya chiili wuzu hiise ta, amaa nandigi wa na ba galimsa. 6Ma nyɛ mu ŋɔ ma di n waa nibine be awa n biksi kaali Koosa bar jɛɛmi dam ti. 7Ba funɛ sɔbi a li Koosa sɛm tɔn ti ni di o ŋɔ,

‘Chenani ma kpak dɔŋa wa siki ya min lɛmlɛmu a kaali chenani ma kɔɔrigi kina a nyɛ min papaha nan.’

Ma zim sɛm na mun, ma wa zi di ba naa vɛ tum galimsa sɛria a ŋɔ di ba chelu. 8Mu waa nibine be dɔ hiisi wuzu ti gbanko.”

Yesu Fun Tiibi Baal Naa Nin Siwɛɛ

(Maak 3.1-6; Luk 6.6-11)

9Yesu funɛ li dooni a la zu ba bar lagmi dɛ digi. 10Baal digi funɛ nyɛn doon. O nin fun sou. Ba naa funɛ nyɛn dooni nyini di ba na Yesu galimsa a koti a fiksi un. Ba fun wa pɛɛsi un, “I tiibi nar ya hiisi wuzu, i chɔk ya chi tiuu?”

11Yesu fun ŋɔ ba, “Ma nidigi kpak piisi ka o chel bugil ni hiisi wuzu, ma wa zi la lisi unuu? 12Nibine kaali piisi kinkan. Chendaha nar suŋɛ o dɔŋtiina hiisi wuzu, o wa chɔk ma chi ti.” 13O fun ŋɔ baal naa nin sou chen di o tuuni o nin ti.

O fun tuuni un. O nin ti fun vaan peti. 14Farisi tim ta fun li kaali aa daŋni nyinbaan chenani ba zi ya a kpu Yesu.

Yesu Funɛ Ya Koosa Tumtumna

15Yesu funɛ nu nan wɛ, o funɛ li dooni a kaali. Nidamata fun tiŋ un. O fun tiibi ba wichɔɔrsa maga, 16a fun ŋɔ ba di ba fiɛŋ ba ŋɔ o wɛ nandigi ni. 17O fun sɛm nan, chen ni sɛm naa Koosa witiina Azaaya fun sɔbi saha digi chen zi ya wutiu. 18O funɛ sɔbiu di Koosa ŋɔ,

“Mu tumtumna nɛɛnɛ,

naa mu fun lisi a nyɛ mu titi ni.

Mu daŋni unu.

Waa la ya min lɛmlɛm kinkan.

N zi kpa mu siim weri tiu a du un ni,

chen ni o zi biksi ba naa vɛ ya Ju tima chenani Koosa daŋni o nyɛ ba nyinbaan deŋli o suwachak ni.

19O biksi ba nan,

o wa ba wa zi di amɔrɛ akoo tɛsi ba yau ni.

20O zi wa suŋi fara tima ba naa chi kɔ borke chenu.

O zi wa kpa o kpok a nyɛ jɛɛgɛ tima ba naa chi fitin nyiksi ni.

O wa zi wa gil nan yaali hali o biksi ti wa di.

21Nara maga zi kpa ba bambi bɛgimu a du un ni.”

Chenani Yesu Fun Duŋni Alizin Tagna A Li Nara Ni

(Maak 3.20-30; Luk 11.14-23; 12.10)

22Doone nara bɔnɛ fun kpa baal digi a wa Yesu wati. O funɛ ya nyulumnɛ awa wom, domi alizin tagin funɛ nyɛn un ni. Yesu fun tiibi un, chen ni o fun bur a na a la sɛm. 23Alaazibu fun kpak zɛmɛ ta. Ba funɛ pɛɛsi dɔŋa, “Baal nɔ, waa ya Devid bi luli naa Koosa ŋɔ di o zi tumu chenn?”

24Farisi tim ta funɛ nu chenani ba sɛm dɔŋ ni, ba fun ŋɔ ba, “Biɛlzɛbub, naa ya alizin tagna maga koora, nyɛn un ni a la nyɛ un kpok saha maga, chen ni o zi koti a duŋni alizin tagnau a li nara ni.”

25Yesu funɛ zim chenani ba lisiu a ŋɔ Farisi tim ta ni, “Tɔhɔn tima vɛ kpak nɔ bɛgim, ba dɔma wa zi wa a chɔk ba tɔhɔn tii? Dam bɛgim nara burgi a yo dɔŋa, chen dam ti zi pisiu a chel. 26Sintana wa o nitumɛ yo dɔŋa, o wa zi chɔk o koor tii? O gbanko wa zi chiŋ vusi. 27Ma wa ŋɔ zɛmɛ ta ni di Biɛlzɛbub yaa kpa o kpok a nyɛ min, chen ni mu zi kotiu aa duŋni alizin tagna a li nara ni. Ma gantɛl tiŋsa gbanko koti a duŋni a a li nara ni. Anti nyɛ ba chen kpok ti? Ba waa biksi di chenani ma sɛm mu wɛ wa ya wuti. 28Koosa siim weri ti ka nyɛ min kpok mu yaa duŋni alizin tagna a li nara ni. Nan biksi ma di saha ti telu di Koosa wa dɔ ma.

29“Nara vɛ te kpak nikpok a vɔwi, yɛrɛ ba kaa ya a zu o dama a fuksi o kina?

30“Nar kaa vɛ di o wa chiŋi mu gantɛl ni, waa la chɔk chenani mu tum. Nar kaa vɛ gbaari min ni a gbaŋ mu piisisa, o pisi au. 31Wutirɛ mu ŋɔ ma, Koosa koti a gil nara tum tagna maga awa chenani ba pini un. Nara pini Koosa siim weri ti, Koosa ka wa zi gil chen a nyɛ ba. 32Nara pini n waa nibine be, Koosa zi koti a gil chen a nyɛ bau. Nara ka pini Koosa siim weri ti, Koosa wa zi gil chen a nyɛ ba, hali saha naa vɛ kpak bɔ.”

Bugil Weri La Nɔn Nɔn Weri

(Luk 6.43-45)

33Yesu fun bu ŋɔ Farisi tim ta ni, “Bugil weri la nɔn nɔn were, amaa bugil tagin ka la nɔn nɔn tagna. Nara zi zim bugil weri awa bugil tagin a li a nɔn nɛɛ. 34Ma chi dumwa. Maa tum tum tagniwa, yɛrɛ ma kaa ya a sɛm sɛm were? Ma sɛm chenani nyɛn ma bambe nee. 35Nibine bambi chi o kina bar chiŋsirɛ. Kiwere nyɛn doon, o zi kpa a a li sɛmu. Kitagna ka nyɛn doon, o zi kpa a a li sɛmu.

36“Wutirɛ n ŋɔ ma nan, a wuzu naa Koosa zi wa di tɛɛnɛ nɔ tim maga sɛria, o zi wa pɛɛsi nara magau ba sɛm yɔrisa naa ba fun sɛm wɛ. 37Koosa zi di ma sɛriau a li ma sɛm ni. Chenani o nu ma sɛma, o zi ŋɔ mau di ma tum galimsau akoo ma nisa wa to.”

Ju Tima Funɛ Daŋni Ba Na Alaazibu Tum

(Maak 8.11-12; Luk 11.29-32)

38A saha ti Koosa chiksɛ nibiksɛ ta awa Farisi tim ta bɔnɛ fun wa ŋɔ un, “Ya kunyana, tum alaazibu tum a nyɛ ya.”

39Yesu fun ŋɔ ba, “Ma zinan nibinsa vɛ Koosirɛ kinkan a la tum tum tagna. Mu wa la nɔɔni di mu tum alaazibu tum a nyɛ ma lalaknɔ. Alaazibu tum naa ma zi wa na wuzu digi kaa wa chi chenani Koosa fun tum nyɛ o witiina Joona ni saha digi chene. 40Koosa fun tum nyin zen di o lil Joona. O nyɛn o tuha ni wuzu butora a li. Chen vɛɛna ba wa kpu n waa nibine be, ba zi wa te sogli minu wuzu butora wuzu ka mu wa si mu sou ni. 41Koosa wa wa di o wa di tɛɛnɛ nɔ tim maga sɛria, ba naa nyɛn doonani ba yir Ninivi chen, zi wa siu a fiksi ma. Joona funɛ biksi ba Koosa wɛ saha digi, ba fun gil ba tum tagna a tiŋ un. Mu waa naa nyɛn ma wati bar nɔ nan, min kaali Joona kinkan. 42Koosa wa wa di o wa di tɛɛnɛ nɔ tim maga sɛria, koor nihaan naa nyɛn doonani ba yir Siba chen, zi wa siu a fiksi ma. O funɛ li bar bolire a wa koor Solomon wati di o wa nu o zima sɛma. Mu waa naa nyɛn ma wati bar nɔ nan, min kaali Solomon kinkan.”

Alizin Tagin Awa O Chɛnsa Nɔpɛ

(Luk 11.24-26)

43O fun bu ŋɔ ba, “Alizin tagin li nar nyuhu ni, o ya gbau a kaali nyabaan a la nyini doonani o zi nyɛn. O vɛ koti a na bar digi doonani o zi nyɛn, 44o zi ŋɔ o titi niu, ‘N zi bur la zu baal naa nyuha mu fun li chenu.’ Adaha o bur kaali a la zu dooni a na un ka o chiŋi a wer. 45O bukoo li a gba a dɛu o dɔŋtima alizin tagna kina nɔpɛ a kpa a a bur wa zu dooni. Alizin tagna nɔpɛ ta tum tagna kaali o tuma. Saha naa alizin tagin ti fun tum o tuma peti, chenani baal ti du fun bukoo tagini a kaali o piili ti ni. Nannɛ o zi wa du zinan nara ba naa la tum tum tagna ni.”

Yesu Nitiŋɛ Ya O Wuti Walɛ

(Maak 3.31-35; Luk 8.19-21)

46Yesu funɛ sɛm chene, o niina awa o niinbisa fun wa tel a wa chiŋi dam ti dentil ni a tum nara di ba zu a yir un. 47Ba fun wa zu o wati a ŋɔ un di o niina awa o niinbisa nyɛn dentil ni a pɛɛsi o wɛ.

48Zɛmɛ ba naa funɛ kani a go un, o fun pɛɛsi ba, “Anti ya mu niin wuti awa mu niinbisa?” 49O fun a nyini nibinsa ba naa kanɛ a go un chen, a ŋɔ, “Ma na mu numa awa mu niinbisa nɛɛnɛ. 50Ba naa maga la tum chenani mu kunyana Koosa naa nyɛn o tɔhɔn ti ni daŋni ba tum, ba waa ya mu numa awa mu niinbisa.”

လက်ရှိရွေးချယ်ထားမှု

Mat. 12: tpmNT

အရောင်မှတ်ချက်

မျှဝေရန်

ကူးယူ