Utandiko 15
15
Upangano wakwe Leza na Abulamu
1Pacisila ca vintu vii Yawe aloleka kuli Abulamu mu cilolwa, nga amunena ati, “Utuvwa intete, Abulamu, kunuli indi wa cisyangu cakukucinga. Ndakupeela uwila ukulu cuze.”
2Lelo Abulamu ati, “Endi we Yawe Simwandalali, uzye icani cino ndatumbula mu wila uwo, pano ntakwata umwana? Mpyanyi ino nkweti sile a Elieza waku Damasiko. 3Utampeela ana, nga wenga uwamu azya yane aalapyana vyuma vyane.”
4Nga Yawe nupya amunena ati, “Elieza, muzya wako atalapyana vyuma vyako, lelo umwana wako umonsi, uwa munuli alaya mpyanyi yako.” 5#Lom 4:18; Aye 11:12 Alino Yawe amufumya panzi, nga amunena ati, “Lingamila umwiyulu nga upende intanda, ndi ungazipenda. Vii avino ana yako yalavula wa ntanda.”
6 #
Lom 4:3; Gal 3:6; Yak 2:23 Abulamu ataila Yawe, nga pamulandu wa utailo wakwe Yawe azangila munoli amuzumila ukuya mololoke.
7Lyene Yawe anena Abulamu ati, “Nene indi Yawe wino wakufumizye ku Uli mu mpanga ya ina Kalideya, kuti nkupele impanga ii iye iyakwako.”
8Lelo Abulamu auzya Yawe ati, “Yawe Simwandalali, uzye ningamanya uli ukuti impanga ii ilaya iyakwane?”
9Nawe amwaasuka ati, “Ndetele zyakaci ing'ombe ni mbuzi na suuku, cila nyama iye iya myaka itatu nga na kaondo ka nkunda ni cipele.” 10Alino Abulamu atwalila Yawe inyama zii, aziputula pakasi nga atantika vimpilinsya mu milongo iili, cila cimpilinsya ulunga ni cuze. Ivyunyi vyene ataviputwile.
11Lyene lino makozi yiiza ku kuwa pa nyama, Abulamu azila.
12 #
Yob 4:13, 14 Lino ilanzi lyatemba, Abulamu akasula cuze, nga, ku tulo ntete zyangofyo zimulema cuze. 13#Kuf 1:1-14; Mil 7:6 Lyene Yawe amunena ati, “Cumi manya vino amu mupanda wako yalaya alowezi mu mpanga yacilendo kuno yalaya yakaye azya nu kucula pa myaka imyanda ini. 14#Kuf 12:40, 41; Mil 7:7 Lelo nani ndavunuka umutundu ulayacuzya, na lino yalafuma mu mpanga ilya yalasenda vyuma vingi. 15Lelo wemo ulikala mutende kufika lino ulakota cuze, lino ulafwa nu kuzikwa pacisila cakwikala imyaka ingi. 16Palapita mikulo ini lino amu mupanda wako yalaweluluka kuno mpanga, pano lyene ukwifya kwa ina Amoli ala kwafika pa kuyavunuka.”
17Lino ilanzi lyawa na kakuku katola, mu kupumikizya kuloleka icinga icikusuka umoto ni cisonsololwa cikwaka, vii vyoili ala vili pakasi ka vimpilinsya vya nyama zizi. 18#Mil 7:5 Pa wanda ulya Yawe acita upangano na Abulamu, avwanga ati, “Nakulaya ukuti namapeela impanga ii yonsi ku amu mupanda wako, ukufuma ku Luzi lwa Eguputo kufika nu ku luzi lukulu lwa Yufulate, 19impanga ya ina Kenite, ya ina Kenizi, ya ina Kedimoni, 20ya ina Hiti, ya ina Pelizi, ya ina Lefaimu, 21ya ina Amoli, ya ina Kenani, ya ina Giligasi, ni ya ina Yebusi.”
လက်ရှိရွေးချယ်ထားမှု
Utandiko 15: MamL13
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Mambwe-Lungu Bible © The Bible Society of Zambia, 2013