Génesis 15
15
Tumpa jei uyapota oï ikawi wae Abram pewarä
1Kua jaɨkue rupi, Tumpa umbɨpau echa Abram jare jei chupe: “Awɨye ekɨye, Abram. Che nduepɨta, jare ayandareko kawita nderé. Jare che numbɨyekoueteta nde,” jei Tumpa Abram pe.
2-3Erëi Abram jei chupe: “CheYa Tumpa, jaekawita’ä ko nde chembɨyekou waerä, echa’ä amanota aï cheraɨ mbae rewe ramo. Jare amano yawe, chepione reta itenondewa Eliezer – Damasco pewa ko – upɨtata opaete chembaembae reta chupe, echa’ä nemee’ä ma ko chewe pëti awe cheraɨrä,” jei.
4Jayawe Tumpa jei chupe: “Eliezer pe upɨtata’ä nembaembae reta. Nderaɨ pe ko upɨtata oï,” jei. 5Jare Tumpa onoe Abram oka pe pɨ̈tu yawe jare jei chupe: “Emae ara kotɨ yasɨtata reta re. Mbaetɨ kía ipuere uipapa yasɨtata reta, echa’ä jetaete ye ye ramo. Jukuärái wi mbaetɨta kía ipuere uipapa niñemoñaa reta, echa’ä jetaete ye ikota ramo,” jei. 6Jayawe Abram wɨrowia Tumpa jei wae re; jáeramo Tumpa umae jese jeko mbae wae rami.
7Jare Tumpa jei chupe: “Che ko jae Tumpa nonoe tëta wasu Ur jee wae wi, caldeo reta iɨwɨ wi wae, amee waerä ndewe kua ɨwɨ,” jei chupe.
8Erëi Abram upɨrandu Tumpa pe: “CheYa Tumpa, ¿këraita pa aikuaa che ko jae kua ɨwɨ iyarä wae?” jei chupe.
9Jayawe Tumpa jei chupe: “Ekua eru emee chewe pëti waka taurusu wae, jare pëti kapura kuña taurusu wae, jare pëti owecha kuimbae taurusu wae, pëti pëti mbapɨ año onoi wae. Jare eru wi chewe pëti yeruti taurusu wae, jare pëti pɨkasu taurusu wae wi,” jei chupe.
10Jayawe Abram uipɨsɨ ueru jokua reta jare uyuka opaete. Joko wi kɨse pɨpe umbɨperaso jokua mbapɨ mbaemɨmba reta mbɨte mbɨte rupi puku rupi. Jare omboyowaiyowai oñono ɨwɨ re upɨta waerä tape raɨ ipäu rupi. Erëi umbɨperaso’ä yeruti jare pɨkasu.
11Joko wi amokue uruwɨ reta ou jou waerä mbaemɨmba uyukakue reta, erëi Abram omondo chuwi. 12Jare pɨ̈tuta ma iko yawe, Tumpa omonge täta Abram. Jare Abram oke iko rambuewe, uyeyapo chupe pëti pɨ̈tumimbiete yakɨye rape wae.
13Jare Tumpa umɨngeta Abram ipau pe jare jei chupe: “Ikuaa kawi nde kuärái: Niñemoñaa reta uiporarata ñonoï irundɨ chiëto año rupi ambɨe ɨwɨ pewa reta iɨwɨ pe. Jokua ɨwɨ pewa reta uyapota ipione retarä täta rupi uyeyokui chupe reta waerä,” jei. 14“Erëi che aiporarakata aï jokua ɨwɨ pewa reta pe, jare joko wi niñemoñaa reta oëta yuraa jokua ɨwɨ wi jeta mbaembae ikawiete wae rewe,” jei.
15-16“Jare irundɨ chiëto año uasa yawe, niñemoñaa reta yuweru yeta kua ɨwɨ pe,” jei. “Jokua ara rupi kua ɨwɨ pewa reta – jae ko jokua amorreo jee wae reta – jeko kachi ukuakuaaeteta oï. Jare che aiporarakata aï chupe reta jare amoëta amombo reta kua ɨwɨ wi,” jei. “Jayawe aru yeta niñemoñaa reta kua ɨwɨ pe,” jei. “Erëi awɨye ndepɨatɨtɨ, echa’ä nemanota neï jare niñeñotɨkata neï ndepɨakatu rewe nendechi ma yawe, nderekowe puku wae uasa ma yawe,” jei Tumpa Abram pe.
17Jayawe warasɨ uike ma yawe jare pɨ̈tumimbi ma iko yawe, uyekuaa aramoiño chupe pëti horno jatäti wae jare pëti tatasɨwe jendɨ wae. Jare mokui rewe uasa jokua mbaemɨmba umbɨyao wae reta mbɨte rupi. 18Jayawe jokua ara etei Tumpa uikuaaka Abram pe mbae uyapota iko Abram iñemoñaa reta pewarä wae, jare jei chupe: “Niñemoñaa reta pe ameeta aï kua ɨwɨ, ɨ wasu Egipto pewa wiwe ɨ wasu tuicha wae Éufrates jee wae pe rewa. Kua ɨwɨ ameeta aï chupe reta,” jei chupe. 19-21“Kua ɨwɨ ko añawe ceneo jee wae reta iɨwɨ, jare cenezeo jee wae reta iɨwɨ, jare cadmoneo jee wae reta iɨwɨ, jare heteo jee wae reta iɨwɨ, jare ferezeo jee wae reta iɨwɨ, jare refaíta jee wae reta iɨwɨ, jare amorreo jee wae reta iɨwɨ, jare cananeo jee wae reta iɨwɨ, jare gergeseo jee wae reta iɨwɨ, jare jebuseo jee wae reta iɨwɨ. Opaete jae reta iɨwɨ ameeta aï niñemoñaa reta pewarä,” jei Tumpa Abram pe.
လက်ရှိရွေးချယ်ထားမှု
Génesis 15: gnwPB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2017, Ethnos360 (New Tribes Mission). All rights reserved.