Génesis 11
11
Tëta ɨwatete wae Babel jee wae
1Arakaete opaete ɨwɨ pewa reta uyemɨngetase pëti ñee peño. 2Jare jeta wae reta yuraa warasɨ oë wae kotɨ. Jare yuraa uwäe reta yawe pëti ɨwɨ ipe tuicha wae Sinar jee wae pe, uñemɨëta reta joko pe. 3Joko wi uñemɨkɨrëɨ reta jare jei reta iyupe: “Yayapo jeta ladriyo jare yamboyɨ tata pe,” jei reta. Jare uiporu reta ladriyo ita ipepɨka pe. Jare uiporu ɨwɨñau jü wae ipomoete wae “brea” jee wae mezcla ipepɨka pe. 4Jare jei reta iyupe: “Añawe yaparawɨkɨ yayapo waerä yanemaerä pëti tëta wasu jare pëti tëta ɨwatete wae oo ara re oya wae. Jare yayapo ñanereräkua waerä jare awɨye ñañemɨái waerä opaete ɨwɨ rupi,” jei reta.
5Jayawe Tumpa uweyɨ ou umae waerä jokua tëta wasu re jare jokua tëta ɨwatete wae uyapo yureko reta wae re. 6Joko wi Tumpa oo yewɨ ara pe jare jei: “¡Mase! Kua kuimbae reta jaeramo umbɨpɨ uparawɨkɨ ñonoï jare jeta mbaembae uyapo ma reta, echa’ä uyeyapo ñonoï pëti ramiño jare uyemɨngeta reta pëti ñee peño ramo. Jayawe ɨmambaeño ipuereta tëi opa uyapo reta opaete mbaembae ipɨayemɨngeta jese wae,” jei. 7Jayawe Tumpa jei: “Yaweyɨ ye yambɨambɨe iñee chuwi reta awɨye pëti pëti wae uikuaa waerä japicha jei wae,” jei.
8Jayawe Tumpa opa umɨái reta opaete ɨwɨ rupi. Jare jae reta opa ueya jokua tëta wasu uyapo yureko wae. 9Jáeramo jokua tëta wasu jeese Babel,#11.9 Tee Babel uipota jei hebreo ñee pe “yembopa” ñee reta pewa. echa’ä joko pe Tumpa opa ombojopa reta ambɨe ñee ñee rupi, jare joko wi opa umɨái reta opaete ɨwɨ rupi.
Sem iñemoñaa reta
10Kuärái ko Sem iñemoñaa pewa reta rewa: Sem 100 año wɨreko yawe, oa jae taɨ Arfaxad mokui año ma ɨporu wasu uasa wiwe. 11Joko wi Arfaxad oa wiwe, Sem iko ïru 500 año ye. Oa wi Sem pe ïru taɨ reta jare tayɨ reta.
12Arfaxad 35 año wɨreko yawe, oa jae taɨ Sala. 13Joko wi Sala oa wiwe, Arfaxad iko ïru 403 año ye. Oa wi Arfaxad pe ïru taɨ reta jare tayɨ reta.
14Sala 30 año wɨreko yawe, oa jae taɨ Heber. 15Joko wi Heber oa wiwe, Sala iko ïru 403 año ye. Oa wi Sala pe ïru taɨ reta jare tayɨ reta.
16Heber 34 año wɨreko yawe, oa jae taɨ Peleg. 17Joko wi Peleg oa wiwe, Heber iko ïru 430 año ye. Oa wi Heber pe ïru taɨ reta jare tayɨ reta.
18Peleg 30 año wɨreko yawe, oa jae taɨ Reu. 19Joko wi Reu oa wiwe, Peleg iko ïru 209 año ye. Oa wi Peleg pe ïru taɨ reta jare tayɨ reta.
20Reu 32 año wɨreko yawe, oa jae taɨ Serug. 21Joko wi Serug oa wiwe, Reu iko ïru 207 año ye. Oa wi Reu pe ïru taɨ reta jare tayɨ reta.
22Serug 30 año wɨreko yawe, oa jae taɨ Nacor. 23Joko wi Nacor oa wiwe, Serug iko ïru 200 año ye. Oa wi Serug pe ïru taɨ reta jare tayɨ reta.
24Nacor 29 año wɨreko yawe, oa jae taɨ Taré. 25Joko wi Taré oa wiwe, Nacor iko ïru 119 año ye. Oa wi Nacor pe ïru taɨ reta jare tayɨ reta.
26Taré 70 año wɨreko yawe, ime ma wɨreko mbapɨ taɨ reta. Jae reta ko Abram, jare Nacor, jare Harán jee wae reta.
Taré iñemoñaa reta rewa
27Kua reta ko jae Taré iñemoñaa reta: Taré taɨ reta ko jee Abram, Nacor, jare Harán. Harán taɨ ko jee Lot. 28Jare Harán umano ndei tu Taré umano mbowe caldeo pewa reta iɨwɨ Ur jee wae pe. Jokua ɨwɨ jae oa wae pe, joko pe umano wi.
29Abram umenda Sarai jee wae ndiwe. Jare Najor umenda Milca jee wae ndiwe. Milca ko jae Harán tayɨ. Milca tɨke jae ko Isca jee wae. 30Erëi Sarai mbaetɨ imembɨ, echa’ä ipuere’ä imembɨ ramo.
31Jayawe Taré wɨraa taɨ Abram jare Abram jembireko Sarai, jare yuraa reta tëta wasu Ur wi. Kua tëta wasu oï caldeo pewa reta iɨwɨ pe. Taré wɨraa wi jumɨmino kuimbae Lot. Lot Harán taɨ ko. Taré uipota tëi oo iko ɨwɨ Canaán jee wae pe. Erëi yuraa uwäe reta yawe tëta wasu Harán jee wae pe, upɨta reta yureko waerä joko pe. 32Jayawe Taré ime wɨreko mokui chiëto pandepo año yawe, umano Harán pe.
လက်ရှိရွေးချယ်ထားမှု
Génesis 11: gnwPB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2017, Ethnos360 (New Tribes Mission). All rights reserved.