ဟေရှာယအနာဂတ္တိကျမ်း 63:1-6

အနီရောင်​ဝတ်ရုံ​ကို​ဝတ်​လျက် ဧဒုံ​ပြည်​၊ ဗောဇရ​မြို့​မှ​လာ​သော ဤ​သူ​ကား မည်သူ​နည်း​။ ထည်ဝါ​သော​အဝတ်တန်ဆာ​ကို​ဆင်​လျက် ကြီးမား​သော​ခွန်အား​နှင့် ချီတက်​လာ​သော ဤ​သူ​ကား မည်သူ​နည်း​။ ဖြောင့်မတ်​စွာ​မိန့်ဆို​သော​၊ ကယ်တင်​နိုင်​စွမ်း​ရှိ​သော ငါ​ပင်​ဖြစ်​၏​။ ကိုယ်တော်​၏​အဝတ်တန်ဆာ​သည် အဘယ်ကြောင့် နီ​နေ​ပါ​သနည်း​။ ကိုယ်တော်​၏​ဝတ်ရုံ​သည် အဘယ်ကြောင့် စပျစ်သီးနယ်ရာကျင်း​၌ နင်းနယ်​သော​သူ​၏​အဝတ်​ကဲ့သို့ ဖြစ်​နေ​ပါ​သနည်း​။ စပျစ်သီး​နယ်​ရာ​ကျင်း​၌ ငါ တစ်ပါးတည်း နင်းနယ်​၏​။ လူ​တစ်​ယောက်​မျှ ငါ​နှင့်​မ​ရှိ​။ သူ​တို့​ကို ငါ့​အမျက်​ဖြင့် နင်းနယ်​ပြီ​။ ငါ့​ဒေါသ​ဖြင့် နင်းချေ​ပြီ​။ သူ​တို့​သွေး​သည် ငါ့​ဝတ်ရုံ​ကို​စဉ်​သဖြင့် ငါ့​အဝတ်အစား​ရှိသမျှ စွန်းထင်း​လေ​ပြီ​။ လက်တုံ့ပြန်​ရာ​နေ့​ကို ငါ့​စိတ်​ထဲ၌​မှတ်ထား​၏​။ ငါ​ရွေးနုတ်​ရာ​နှစ်​သည် ရောက်လာ​ပြီ​။ ငါ​ကြည့်လိုက်​သော် ကူညီမစ​မည့်​သူ​မ​ရှိ​။ ထောက်မ​မည့်​သူ​လည်း​မ​ရှိ​သည်​ကို ငါ​အံ့ဩ​၏​။ ထို့ကြောင့် ငါ့​လက်ရုံး​သည် ကယ်တင်​ခြင်း​အမှု​ကို​ပြု​ပြီ​။ ငါ့​အမျက်ဒေါသ​သည် ငါ့​ကို​ထောက်မ​ပြီ​။ လူ​တို့​ကို ငါ့​အမျက်​ဖြင့်​နင်းချေ​ပြီ​။ ငါ့​ဒေါသ​ဖြင့် ယစ်မူး​စေ​ပြီ​။ သူ​တို့​၏​သွေး​ကို မြေ​ပေါ်သို့​ကျ​စေ​ပြီ​။