ကောရိန္သုဩဝါဒစာပထမစောင် 11:23-30

အကြောင်းမူကား သခင်​ဘုရား​ထံမှ ငါ​ခံယူ​ရရှိ​သော​အရာ​ကို သင်​တို့​အား ငါ​ပေးအပ်​၏။ ထို​အရာ​မှာ သခင်​ယေရှု​သည် အပ်နှံ​ခြင်း​ခံရ​သော​ည​၌ မုန့်​ကို​ယူ​၍ ကျေးဇူး​တော်​ချီးမွမ်း​ပြီးမှ မုန့်​ကို​ဖဲ့​၍“ဤ​မုန့်​ကား သင်​တို့​အတွက်​ချိုးဖဲ့​သော ငါ​၏​ကိုယ်ခန္ဓာ​ဖြစ်​၏။ ငါ့​ကို​အောက်မေ့​ဖို့​ရန် ဤသို့​ပြု​ကြ​လော့”​ဟု မိန့်​တော်မူ​၏။ ထိုနည်းတူ ညစာ​စား​ပြီးမှ ခွက်​ကို​လည်း​ယူ​၍“ဤ​ခွက်​ကား ငါ​၏​သွေး​၌​တည်​သော ပဋိညာဉ်​သစ်​ဖြစ်​၏။ ဤ​ခွက်​ကို​သောက်​သောအခါ​တိုင်း ငါ့​ကို​အောက်မေ့​ဖို့​ရန် ဤသို့​ပြု​ကြ​လော့”​ဟု မိန့်​တော်မူ​၏။ ထို့ကြောင့် သင်​တို့​သည် ဤ​မုန့်​ကို​စား​၍ ဤ​ခွက်​ကို​သောက်​သောအခါ​တိုင်း သခင်​ဘုရား​၏​အသေခံ​တော်မူ​ခြင်း​ကို ကိုယ်တော်​ကြွလာ​တော်မူ​သည်​အထိ ကြေညာ​ကြ​၏။ သို့ဖြစ်၍ သခင်​ဘုရား​၏​မုန့်​နှင့်​ခွက်​ကို မ​ထိုက်တန်​ဘဲ စား​သောက်​သော​သူ​သည် သခင်​ဘုရား​၏​ကိုယ်ခန္ဓာ​တော်​နှင့်​သွေး​တော်​ကို ပြစ်မှား​ရာ​ရောက်​၏။ ထို့ကြောင့် လူ​တိုင်း ကိုယ့်ကိုယ်ကိုယ်​စစ်ဆေး​ပြီးမှ မုန့်​ကို​စား​စေ။ ထိုနည်းတူ ခွက်​ကို​လည်း​သောက်​စေ။ အကြောင်းမူကား သခင်​ဘုရား​၏​ကိုယ်ခန္ဓာ​တော်​ကို ပိုင်းခြား​၍​မ​သိ​ဘဲ စား​သောက်​သော​သူ​သည် မိမိ​အပေါ်သို့ ပြစ်ဒဏ်​စီရင်​ခြင်း​ကို​သက်ရောက်​စေရန် စား​သောက်​သော​သူ​ဖြစ်​၏။ ဤ​အကြောင်း​ကြောင့် သင်​တို့​တွင် အားနည်း​သော​သူ​နှင့်​မ​ကျန်းမာ​သော​သူ များစွာ​ရှိ​၍ အိပ်ပျော်​သော​သူ​လည်း အများအပြား​ရှိ​ကြ​၏။