Mwanzo 8
8
Mwinsho wa mwanalukaya nkulu
1Fala sambi, Mwenyezimungu aanriware Nnu wala piya wadudu wa nnundu na wa kufuwiwa wákiwa pamoja naye nsafina, Mwenyezimungu akipereka mepo ikanza kuvuma, maji akanza kupunguka. 2Wakati-wo, mure múkibubuka maji mure iri mufungiwe, miryango ya binguni ifungiwe, na nvula ikinya ire yaamúke. 3Maji are apunguka-pungukanga aba-aba. Mpaka pazipitire suku miya na amusini, maji akizidi kupunguka nfululu, 4novirevire, suku ya mwezi kumi na saba, mwezi wa saba, safina ire ikuka ikipwerera pajulu ya myango ya kwitiwa Ararati. 5Maji akizidi kupunguka tena. Mwezi wa kumi, iri mwezi mosi, iwoneka myango ikanza kulawira panja.
6Zipita tena suku arubaini, Nnu akifungula janela yaatendire nsafina, 7na akintwala baruku mmoja nsafina akimwirusa. Baruku ire aaludire tena nsafina, akiruka akuka kuno na kuno, mpaka maji akikakama nfululu na ardhi piya ikumiliya. 8Basi sambi, Nnu akinlavya pomba mmoja oke akanang'anize kuwa kweli-kwelini maji apunguka pansi pare. 9Novyo-sivyo, maji ákiwa saanamba kukakama piya, sambi pomba ire aapatire mahala pakumota, akiludira tena nsafina. Nnu akikinga makono, akinkola pomba akuka naye nkati. 10Nnu akirinda zikipita suku saba, akinlavya tena pomba ire. 11Pomba kaludi usiku, mama! Kaja naro kukanywa samba riwisi ra muti wa kupa visumo vítendiwanga mafuta a renu. Kweli-kwelini, Nnu akijiwa kuwa maji ankuzidi kupunguka. 12Sambi akirinda zikipita suku saba, akimpereka tena pomba ire, fala aaludire tena ka Nnu.
13Noure mwaka waatimize Nnu myaka miya sita na mmoja ure, suku ya mwezi mosi, mwezi wa kwanza, maji akikakama futi-futini. Nnu akifunula kifiniko ca safina na akinang'aniza panja, kawona maji piya akakama kukutu. 14Noure mwaka ure, suku ya tarehe shirini na saba, mwezi wa piri, ardhi piya ikumiliya cwaa. 15Basi sambi, Mwenyezimungu kamwambira Nnu kaamba: 16“Ulawe nsafina, uwe pamoja na nkawako, wanawo, waka wa wanawo, 17na piya wari kuinshi nawe, piya namuna ya manyuni na manyama na wa kurikweta pansi. Újuzi ulawe nawo, ipate wapongolane na wawe nawo rutuba sana-sana, wejare fó ulumwengu piya.” 18Basi Nnu, nkawake, wanawe pamoja na wakweze wakilawa kweli, 19na wakilawa piya manyama, manyuni na wadudu wa kurikweta pansi. Basi nsafina mure walawa kila kiyumbe na namuna yake jisijisi.
Nnu atenda kafara yake
20Basi sambi, Nnu akinjengera Mola uralu ca kafara, akiwatwala kila namuna ya manyama halali, akiwasinja akiwatula nopare akiwoca akitenda kuwa ndi kafara yake ya kunshukuru. 21Mola, kwa kuwona ire arufu ngema ya kafara ire, kimoyomoyo akamba javi: “Silani tena ulumwengu, sababu ya wanadamu. Nukwijiwa kamba tangu usimana wake mwanadamu áwazanga vinu vibaya, falakini sipereka tena hukumu kwa kila ciri hai kamba vyanitendire. 22Mpaka kiyama, awisa wakati wa kuvyala na wa kuvuna, wakati wa baridi na wa kuvujusa, wakati wa kirangazi na wa kinja, usiku na nsana. Piya-vyo avina mwinsho.”
လက်ရှိရွေးချယ်ထားမှု
Mwanzo 8: wmwBI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2013, Wycliffe Bible Translators, Inc. All rights reserved.