Mwanzo 11
11
Ukuta wa Babeli
1Kwa nowo wakati-wo, wanu piya duniya luga yawo íkiwa moja tu basi, wákisowera usowezi mmoja. 2Basi kwa wakati siwo, noware wanu ware walawa upande wa malawira-juwa wakuka wakifika langa ra Mezopotamiya#11:2 Mezopotamiya zina rengine ndi Shinari, sambi kukwitiwa Iraki. wakikala noko. 3Ikisa, wakambirana javi: “Tukeni titende tinjolu toce moto sana-sana nforunu.” Tinjolu wâtumira ukosofu wa mawe na balaki wâtumira kwa ukosofu wa simenti. 4Wakisema javi: “Tukeni tirijengere kaya na ukuta nrefu wakurepa kuka julu, tipate zina, satinamba kwisa kutawanyikana.” 5Kwa javyo, Mola wetu ndi paanang'anize pansi awone kaya ire pamoja na ukuta wawajengire wanu ware. 6Basi, Mola wetu akisema akamba: “Epa, ewa wanu-wa piya rikolo rawo rimoja na wásowera luga moja. Ikiwa evi ndi vyawanzire kutenda, hapana kinu tena cisaka kuwatenda mushikili kwa mipango yawo. 7Vyema tisuke tuke tikawasiyánise luga yawo wasisikízane munu na mwenziwe!” 8Kwa javyo, Mola wetu akiwatawanya mahala pare, wakenera duniya piya. Wakasa kujenga kaya ire. 9Ntamana kaya ire ikibaki ikitiwa Babeli, konta Mola wetu ndi asiyanise luga ya wanadamu piya. Basi mwanzo wa noparepare akiwatawanya duniya nzima.
Kupongola ka Shemu
10Ewa wafulata-wa ndi ujukulu wa rikolo ra Shemu. Shemu ákiwa na myaka miya pampongore Aripakisadi bandi ya kupita myaka miwiri ya mwanalukaya nkulu. 11Shemu wakati wampongore Aripakisadi kainshi tena myaka miya ntanu, kâwapongola wana wengine waka na walume.
12Aripakisadi paatimize humuri wa myaka talatini na mitanu akimpongola mwana wakwitiwa Shela. 13Aripakisadi, bandi ya kumpongola Shela, kainshi tena myaka miya nne na mitatu na kâwapongola wana wengine waka na walume.
14Shela paatimize myaka talatini, akimpongola Heberi. 15Shela, bandi ya kumpongola Heberi, kainshi tena myaka miya na mitatu. Kâwapongola wana wengine waka na walume.
16Heberi paatimize myaka talatini na mine akimpongola mwanawe Pelegi. 17Heberi, bandi ya kumpongola Pelegi, kainshi tena myaka miya nne na talatini, na kâwapongola wana wengine waka na walume.
18Pelegi paatimize myaka talatini akimpongola Reu. 19Pelegi, bandi ya kumpongola Reu, kainshi tena myaka miyateni na kenda kâwapongola wana wengine waka na walume.
20Reu, paatimize myaka talatini na miwiri, akimpongola Serugi. 21Reu, bandi ya kumpongola Serugi, kainshi tena myaka miyateni na saba, kâwapongola wana wengine waka na walume.
22Serugi, patimize myaka talatini, akimpongola Nahori. 23Serugi, bandi ya kumpongola Nahori, kainshi tena myaka miyateni kâwapongola wana wengine waka na walume.
24Nahori paatimize humuri wa myaka shirini na kenda, akimpongola Tera. 25Bandi ya kupongola Tera, kainshi tena myaka miya na kumi na kenda, kâwapongola wana wengine waka na walume. 26Tera, paatimize humuri wa myaka sabini, akiwapongola wana watatu: Buraimu, Nahori, na Harani.
Rikolo ra Tera
27Eya ndi mazina a rikolo ra Tera. Tera akimpongola Buraimu (Iburahima noyo), Nahori, na Harani. Harani akimpongola Loti. 28Harani kafwira kwawo kaapongoriwe kaya ulu ya Uri, inti ya Kaldeya, kábula yakufwa wawaye. 29Buraimu na Nahori wakilomba. Muka wa Buraimu ákitiwa Sarai na muka wa Nahori Milka, mwana wa Harani wawaye Milka na Iska. 30Fala sambi Sarai ákiwa nata, aâwere na mwana.
31Basi Tera akilawa kaya ulu ya Uri inti ya Kaldeya kure, akinsukula mwanawe Buraimu na njukuluwe Loti mwana wa mwanawe Harani, pamoja na nkwewe Sarai muka wa Buraimu, kwa ánzima ya kuka Kanaa. Fala pawafikire kaya ya Harani, wakitenda mekazi awo nopare. 32Tera kainshi humuri wa myaka miyateni na mitanu, na kafwira Harani.
လက်ရှိရွေးချယ်ထားမှု
Mwanzo 11: wmwBI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2013, Wycliffe Bible Translators, Inc. All rights reserved.