Kuö Dëdrä, Jenɛɛsë, Rutë  https://bakwe.org/ 

Bakwé - WBT (NT) Non Drama

Bakwé - WBT (NT) Drama

Nyɔsʋaa 'Papawii bä kä ‑plɩɩ 'fɩɔwʋ 'plä nya 'mä 'kä kolo. Nyɔsʋaa 'Papawii nyra Nyɔsʋa kʋ kä ‑wälɩ; Nyɔsʋaa 'Papawii bä kä Nyɔsʋalɔ.
'A 'ii ‑bɛ Nyɔsʋa kʋ kä ‑wälɩ 'pläa 'käkolofa 'wʋ.
'Ii diia 'fɩɔ ‑srörö kälɩ 'inya nrörö, ima 'nyɩ 'lɩ ‑a bä, dɩjɔ 'doo ‑nëmä nrörö ‑a nrörö.
'Ii 'lɩ 'klä bä kä, 'klä nya bä nyüüa ‑srɩ.
‑Srɩlɩ pala 'jöjrüükpü 'lɩ, 'jöjrüükpü 'nyɩ 'lɩ ‑srɩ ‑a 'kʋɛɛ.
Nyɔsʋa nya blɔ kä nyɔɔ 'doo, 'ɔɔ 'ü 'dara Jaan.
'Ɔɔlɔ nɩ, wii 'ɔ ji 'lɩsa; 'ɔ ji ‑srɩa ‑gä 'pa, nyüüa 'fɩɔ 'mä 'ɔa 'papawii kälɩ ‑srörö 'ümä ‑srɩ plɛtoro.
‑Mää 'ɔɔ 'nyɩ kä ‑srɩ bä, ‑maa ‑srɩa ‑gä 'ɔ ji kä 'pa.
'Iili ni, 'iibä kä 'tasɩrɩa ‑srɩ. ‑Srɩlɩ jöa' 'pläa 'mlɩ nɩ, 'ii pala nyüüa 'fɩɔ ‑gälɩ.
'I bä kä 'pläa 'mlɩ, 'ii 'plä ‑srörö kälɩ 'änya nrörö, ‑maa 'plä 'nyɩ 'imɩ ‑a jre.
'Inya ji 'ia 'mʋgbɛa ‑glügbö 'klɩ, ‑maa 'ia ‑glügbönyüü 'nyɩ 'iin 'lɩ ‑a 'kʋɛɛ.
‑Mülü kä 'fɩɔ 'nyierea' 'iin 'klɩ, ü toroa' 'iin plɛ nɩ, 'i nrörö 'üün Nyɔsʋaa 'tasɩrɩa 'jü 'lɩ. ‑Mää 'sɩrɩ nyɔɔ ‑guuöa' 'jʋ, ‑mää 'sɩ 'ünyɩ Nyɔsʋa 'jü bä, ‑mää nyɔɔa plɛ 'klɩa wii ‑a, ‑mää nyɔɔa 'jrʋpa ‑a, ‑maa Nyɔsʋa 'ɔɔ nrörö 'üün 'ɔa 'jü 'lɩ.
Nyɔsʋaa 'Papawiili nya srörö nyɔɔ 'lɩ, 'ɔnya kʋ ana ‑tɔrʋpɩɔ. Anya 'jä 'ɔa 'wliklɩ 'bʋabʋakʋ; 'wliklɩ 'bʋabʋakʋlʋ Tʋ ‑nyɩa' 'ɔa 'Jʋ 'doo 'doo. ‑Gbinanakʋ ‑bɛ 'cɩcasa 'si 'ɔɔn 'lɩ.
'A 'ɔɔ kä ‑gä Jaan 'paa' ‑bɛ 'ɔ ‑gbolo käa' mlɩ: «‑Jää nyɔɔlɔ kä ‑gä 'n ‑gbala käa' 'amɩ ‑bɛ 'n 'daaa' ‑maa: ‹Ɔ nëmäa' 'mɩ 'klɩtroro ‑si 'mɩ 'wʋ, 'be 'ɔ bä kä ‑plɩɩ 'fɩɔwʋ 'nyaa nëmä ji.› »
'Sɩrɩ 'i 'sia' 'ɔɔn 'lɩ nɩ, 'asɩ 'ɔ ‑nyɩ amɩ 'iin. Nyɔsʋaa ‑gbinanakʋ 'wʋä 'lɩ, ‑bɛ ‑mɩdoo blö 'lɩ.
'Iibä, ‑Dɔ jara Moisë kälɩ; Nyɔsʋaa ‑gbinanakʋ nyra 'cɩcasa nya jara Jesu 'Kriisë kälɩ.
Nyɔɔ ‑kaapɩɔ Nyɔsʋa 'jä. 'Jʋ 'doo 'doolɔ sɔa' Tʋa ‑nyɛɛ, 'ɔɔ 'lɩ a 'järä 'ɔɔn.




Jerusalɛɛmëa juifënyüü blɔ ‑gbɔsapɛrɩnyüü nyra Leviitënyüü ü ji ü 'bete Jaan nyɔɔ 'plɛɛ 'ɔ bä le? ‑Jää 'sɩ 'ɔ ‑gbala 'üün nɩ, 'ɔnyɩ 'iin ‑sisie ‑a ‑sisie, 'ɔnya ‑gbala 'üün: «‑Mää 'mɔɔ 'nyɩ 'Kriisë bä.» 'Ünya 'bete 'ɔɔn: «‑Bɛ nyɔɔ 'plɛɛ ‑bä le? ‑Ale Elii ‑bä?» 'Ɔ ‑nëma: «'Nyɩ Elii ‑a bä. ‑Mɔ bä ‑plɩɩ nyɔsʋaamlɩpalanyɔɔ 'e?» 'Ɔ ‑nëma: «'Woo.» 'Ünya ‑gbala 'ɔɔn: «‑Bɛ nyɔɔ 'plɛɛ ‑bä le? Amä nyüülü blɔa' amɩ ‑gälɩsakalɩ mi. ‑Asɩ ‑gbaaa ‑na 'mʋgbɛa ‑gʋ le?» 'Iibäa' Jaan nɩ:
«'Mɔɔ bä wiili nyɔsʋaamlɩpalanyɔɔ Esaii 'paa': Nyɔɔa wewewii ja ‑aaga 'lɩ:
'Ba ‑gägä 'Pläkänyɔɔa 'nyʋfɔ 'klɩ .»
Nyüülü 'ü blɔa' nɩ, Farisinyüü bäsaa. 'Ünya 'patä 'ünya 'bete Jaan: «‑Bɛ ‑nyɩa' 'Kriisë bä, ‑nyɩa' Elii bä, ‑nyɩa' 'sɔɔwʋ nyɔsʋaamlɩpalanyɔɔ bä nɩ, ‑bɛ 'iɛ ‑paaa nyüü 'nɩ 'wli le?» 'Ɔnya 'sa 'üün ‑gälɩ: «'Mɔɔlɔ nɩ, 'nɩ 'n 'paa nyüü 'wli; nyɔɔ 'doo bä 'ana ‑tɔrʋpɩɔ, 'anyɩ 'ɔɔn jre ‑a jre. Ama 'wʋ 'lɩ 'ɔɔ jö; 'nyɩ 'nɩmɩ 'lɩ ‑a bɩa ‑a ‑jie 'ɔa 'siia pɩa.» ‑Jää ‑nyɛɛ Jurëdɛɛn a 'wlugbaa bätälä 'ü 'daraa' Betanii, 'a ‑nyɛɛ wiilia 'fɩɔ ‑srörö. 'A 'ii Jaan 'palaa' nyüü 'nɩ 'wli.

‑Srɩ ‑gbaa' kä nɩ, Jaan 'jääa' Jesu ‑bɛ 'ɔ jaraa' 'ɔa 'pɛlɩ nɩ, 'ɔ ‑nëma: «‑Jää Nyɔsʋaa ‑Bablëëjʋlɔ 'baa' 'lɩ 'pläa ‑balʋ. 'A 'ɔ kä ‑gä 'n ‑gbala käa' 'amɩ ‑bɛ 'n 'daaa' ‑maa: ‹Nyɔɔlɔ nëmäa' 'mɩ 'klɩtroro ‑si 'mɩ 'wʋ, 'be 'ɔ bä kä ‑plɩɩ 'fɩɔwʋ 'nyaa nëmä ji.› 'Na 'mʋgbɛlɔ nɩ, 'nyɩ ɩ 'saa 'ɔmɩ ‑a jre, ‑maa Israɛɛlë 'mä 'ɔɔn jre, 'ia ‑gʋ 'n 'paa nyüü 'nɩ 'wli.» ‑Jäsɩ Jaan ‑gbaa' 'sɔɔwʋ nɩ: «'N 'jä ‑Susu, 'unya ja cɛlɩ; 'unya 'cere 'ɔɔn ‑gälɩ ‑beere ‑sögö. 'Nyɩ ɩ 'saa 'ɔmɩ ‑a jre; ‑maa ɔ blɔa' 'mɩ ‑a 'pa nyüü 'nɩ 'wli nɩ, 'ɔ ‑gbala 'mɩ ‑maa: ‹Nyɔɔlɔ ‑nëmäa' 'jä, ɔ ‑Susu 'mäa' ‑gälɩ 'cere ‑bɛ 'umäa' 'lɩ kʋ nɩ, 'a nyɔɔlɔ 'cerea' nyüü 'Nyüna ‑Susu 'wli.› 'Mɔɔlɔ ni 'n 'jä 'iin, 'nyaa 'sa 'iin 'lɩ, 'sɩrɩ 'ɔ bäa' Nyɔsʋaa 'Jʋ.»




‑Srɩ ‑gbaa' 'kä nɩ, Jaan nyra 'ɔa 'wʋnyɛrɛnyüüa ‑tɔrʋpɩɔa nyüü 'sɔɔ kʋ ɩ ‑plɩɩ, 'Ɔnya 'jä Jesua ‑sisidɛɛ, 'ɔ ‑nëma: «‑Jää Nyɔsʋaa ‑Bablëëjʋ.» 'Ɔa 'wʋnyɛrɛnyüü 'sɔɔ 'nua' wiili 'ɔ 'paa' 'wli nɩ, 'ünya ‑mɛ Jesu ‑gälɩ. Jesu ‑siea' kälɩ ‑bɛ 'ɔ 'jäa' 'üün nɩ, 'ɔnya 'bete 'üün: «Dɛplɛɛ 'a 'bata le?» 'Ünya 'bete 'ɔɔn: «Rabii, ‑a 'plɛɛ kʋ le?» Rabiia ‑gbaa bä «'Kpɩkpɩanyɔɔ». 'Ɔnya ‑gbala 'üün: «'Ba ji amä mi, 'amä 'lɩ 'jä.» 'Ünya mi 'kä 'ünya 'jä ‑plɩɩlɩ 'ɔ kʋa'. 'I bä kä ‑gbiajrʋa ‑gliiibei mlɔɔa dii 'lɩ; 'ünya kʋ kä 'ɔɔn ‑gba 'ia ‑srɩ nya ‑si.
Nyüü 'sɔɔlü 'nua' wiili Jaan 'paa' 'wli ‑bɛ 'ü ‑mɛa' Jesu ‑gälɩ nɩ, 'doo bälɩ, 'ɔɔ 'ü 'dara Andree, Simɔɔ Piɛɛrëa ‑wlajʋ. 'Ɔnya mi dotro, 'ɔnya ‑gbala 'ɔa ‑wlajʋ Simɔɔ: «Anyaa' Mesii 'jä.» Mesiia ‑gbaa bä «'Kriisë». 'Ɔnya fa 'ɔɔn ‑tɛ Jesu bäa'. Jesu nya tɛ 'ɔɔn 'klɩ, 'ɔ ‑nëma: «‑Na 'nyrɩ bä Jonaasëa 'jʋ Simɔɔ; ‑na 'nyrɩ bä ‑mlatɩ Sefasë.» 'Ia ‑gbaa bä «'Täkä».
'Ia ‑srɩ ‑gbaa' 'kä nɩ, Jesu nëmä ɩ Galilee mi, 'ɔnya 'jä Filipë, 'ɔnya ‑gbala 'ɔɔn: «Prɛ 'mɩ dɛrɩ.» Filipëlɔ nɩ Bɛtësaidaa nyɔɔ 'ɔ bä, 'ɔ ‑bɛ Andree nyra Piɛɛrë bä bätä 'döö 'wʋa nyüü. Filipë nya mi bɩa Natanaɛɛlë ‑gbala: «Nyɔɔlɔ kä ‑gä Moisë 'palaa' ‑Dɔa ‑pɔɔkʋa 'mlɩ, i nyɔsʋaamlɩpalanyüü ‑gbalaa' amɩ, anya 'ɔɔn 'jä. Josɛɛfëa 'jʋ Jesu bäsaa, Nasarɛɛtënyɔɔ.» 'Iibäa' Natanaɛɛlë nɩ: «'Cɩcadɛɛ 'plɛɛ 'mä ‑plɩɩ Nasarɛɛtë sɔ le?» Filipë ‑nëma: «Ji, ‑mä 'iin 'jä.» Jesu 'jäa' Natanaɛɛlë ‑bɛ 'ɔ jaraa' 'ɔa 'pɛlɩ nɩ, 'ɔ ‑nëma: «‑Jää 'tasɩrɩa Israɛɛlënyɔɔ 'nyɩa' yrʋ kä.» 'Iibäa' Natanaɛɛlë nɩ: «‑A 'plɛɛ jrere 'mɩ le?» Jesu ‑nëma: «'N 'järä ‑mɩ figietuu ‑wälɩ 'fɩɔwʋ Filipë nya nëmä ‑mɩ we.» 'Iibäa' Natanaɛɛlë nɩ: «Rabbi, Nyɔsʋaa 'Jʋ bä! Israɛɛlëa 'kɩɩ bä!» 'Iibäa' Jesu nɩ: «Dɛɛlɛ kä ‑gʋ 'n 'daaa' ‑maa 'n 'järä ‑mɩ dɛrɩ figietuu ‑wälɩ nɩ, 'a 'ia ‑gʋ toro 'mɩ plɛ, ‑bɛ i ‑nëmäa' 'jä 'inya ‑taa nɩ 'wʋsia.» 'Ɔnya ‑gbala 'ɔɔn 'sɔɔwʋ: «'Tasɩrɩa 'cɩcasa 'n ‑gbala ‑mɩ, 'bala 'saarɩ ‑gälɩ anya 'iin 'jäa 'sɩrɩ cɛ ‑gaaamlɩ, ‑bɛ Nyɔsʋaa 'aanjë nya 'jra ‑bɛ 'ünya Nyɔɔa 'Jʋ ‑gälɩ 'cere.»

နားထောင်ပါ။ Jaan 1