If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

तेबे हुन समया माहापुरू चो आत्मा ईशु के छिड़ा ने निली बल्ले शयतान हुनचो परीक्षा धरो। ईशु चालीस दिन, आउर चालीस राती, नीराहार रलो, तेबे हुनके भुक लागली। तेबे परकतो बिता शयतान लगे ऐऊन भाती ईशु ले बल्लो, “अगर तुय माहापुरू चो बेटा आस, तो बोलुन देस, कि ऐ पकना रोटीमन बनुन जाओ।” ईशु जबाप दिलो, “लिकलोर आसे,
‘माने मात्र रोटी ची ले नाई,
मान्तर हर एक बचन ले जोन माहापुरू चो टोंड ले निकरू आय जीव रयदे।’”
तेबे शयतान ईशु के पवितर नंगर ने नीलो आउर मंदिर चो गुबा उपरे उबा करलो। आउर ईशु ले बल्लो, “अगर तुय माहापुरू चो बेटा आस, तो आपन खुद के खाले घसराऊन देस; कसनबल्लोने लिकलोर आसे, ‘हुन तुचो बारे ने आपलो सरग दूतमन के हुकुम देये दे, आउर हुनमन तुके हाथो-हाथ उठादे; काहांय असन नी होओ कि तुचो पाँयमन ने पकना ले ठेस पाओ।’” ईशु हुनचो ले बल्लो, “ऐ बले लिकलोर आसे, ‘तुय परबु आपलो माहापुरू चो परीक्षा नी धर।’” फेर शयतान हुनके गोटक खुबे डेंग डोंगरी उपरे निलो आउर सपाय जगत चो राज आउर हुनचो धनमाल दकाऊन भाती हुनचो ले बल्लो, “अगर तुय घसरुन भाती मोके पाँय पड़से, तेबे मय ऐ सपाय काई तुके देऊन देयेंदे।” तेबे ईशु हुनचो ले बल्लो, “हे शयतान दूर होऊन जा, कसनबल्लोने लिकलोर आसे: ‘तुय परबु आपलो माहापुरू के पाँय पड़, आउर मात्र हुनचेई उपास कर।’” तेबे शयतान हुनचो लगले जाते गेलो, आउर सरगदूत ऐऊन भाती हुनचो सेवा करूक मुरयाला।

जिदलदाय ईशु ऐ सुनलो कि यूहन्ना बन्दी बनाया गेलोसे, तेबे हुन गलील परदेश ने जाते गेलो। आउर हुन नासरत नंगर के छांडुन भाती कफरनहूम नंगर ने जोन झील चो कटा जबूलून आउर नप्ताली चो देश ने आसे जाऊन भाती रऊक मुरयालो। बल्ले जोन यशाया अगम गिआनी चो बाटले बल्ला जाऊ रये, हुन पुरा होओ।
“जबूलून आउर नप्ताली चो देश,
झील चो बाटले यरदन लंदी चो लगे दुसर जातिमन चो गलील
जोन लोग माहापुरू चो सत के नी जानते रवत हुनमन माहापुरू चो बड़े सत के दकला; आउर जोन मरना चो देश आउर छांय ने बसु रवत, हुनमन उपरे उजर बरली।”
हुन समया ले ईशु परचार करतोर आउर ऐ बोलतोर मुरयालो, “मन फिरावा कसनबल्लोने सरग चो राज लगे ईलीसे।”

ईशु गलील चो झील चो कटा बुलते-बुलते हुन दुई भाईमन बल्लोने शिमोन के जोन पतरस बलाया जाऊ आय, आउर हुनचो भाई अन्द्रियास के झील ने झारी पकातोर दकलो; कसनबल्लोने हुनमन मछरी धरतो बितामन रवत। आउर हुनमन ले बल्लो, “मोचो पाट-पाट ईआ, तेबे मय तुमके मानेमन के धरतो बिता बनायेंदें।” हुनमन तुरते झारीमन के छांडुन भाती हुनचो पाट-पाट गेला। आउर हुता ले पुरे जाऊन भाती, ईशु आउर दुय भाईमन बल्लोने जबदी चो बेटा याकूब आउर हुनचो भाई यूहन्ना के आपलो बुआ जबदी चो संगे ड़ोंगा थाने आपलो झारीमन के जतनातोर दकलो; आउर हुनमन के बले हाग दिलो। हुनमन तुरते ड़ोंगा आउर आपलो बुआ के छांडुन भाती हुनचो पाट-पाट गेला।

आउर ईशु सपाय गलील परदेश ने बुलते-बुलते हुनमन चो आराधना घरमन ने उपदेश करते, आउर राज चो नगतखबर परचार करते, आउर लोगमन चो सपाय परकार चो बेमार आउर कमजोरी के दूर करते रलो। आउर सपाय सीरिया देश ने हुनचो किरती फयलुन गेली; आउर लोग सपाय बेमारीमन के, जोन नाना परकार चो बेमारमन आउर दुखमन ने पडु रवत, आउर जोनमन ने दुष्टआत्मामन रली आउर बापुर बितामन आउर लकवा चो रोगाहामन के हुनचो लगे आनला आउर हुन हुनमन के चेंगा करलो। आउर गलील परदेश, दिकापुलिस, यरूशलेम, यहूदिया परदेश आउर यरदन लंदी चो हुनपाट ले भीड़ चो भीड़ हुनचो पाट-पाट होली।

နားထောင်ပါ။ मत्ती 4