If you have would like a copy of this version please contact info@davaraudiobibles.org

Inner Seraji New Testament, CC-BY-SA-4.0, The Love Fellowship (Text). Inner Seraji New Testament Audio Bible, CC-BY-SA-4.0, Davar Partners International, The Love Fellowship, 2022 (Audio).

Inner Seraji New Testament

Inner Seraji 2017 BI (NT) NonDrama

Inner Seraji 2017 BI (NT) Drama

Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.

स्वर्गा रा राज्य त्या दस कुआरी रे बराबर हूँणा जोह आपणे मशाला नी करे आपणे लाडे संघे मिलदी निकती। त्या मेज़ा पाँज़ मुर्ख होर पाँज़ समझदार थी। मूर्खे आपणी मशाले तअ आणी, पर आपु संघे तेल नांई निउं; पर समझदारे आपणे मशाले संघे आपणी कुपी में तेल भी भरू। जेबा लाडे रे ईहंणे में देर होई, तेबा त्या सभी टुली लागी होर सूती।
आधी राची में धूम मची हेरा, लाडअ इहंदअ लागअ! तेऊ संघे मिलदी चाला। तेबा सभे कुआरी उठी करे आपणे मशाला ठीक करदी लागी। होर मूर्खे समझदारा बे बोलू, आपणे तेला मेजा का कुछ हमा बे भी देया, किबेकि माहरी मशाले हिशी चाली। पर समझदारे उतर दिंना, केह जाणे कई यह तेल हामा होर तमाबे पूरा नांई होए; भला यह साहा की तमे बेचणे आले सेटा नाहीं करे आपुबे तेल लआ। तेबा त्या लउंदी चाली, तेबा लाडअ आउअ, होर जोह त्यारअ थी, त्या तेऊ संघे घरा बे नाठी होर दुआर बन्द करू। एता बाद त्या दूजी कुआरीया भी बोलदी लागी, हे मालक, हे मालक, हामा बे दुआरा खोला! तेऊ उतर दिंना, हाऊं तमाबे सच बोला, हाऊं तमा नांई ज़ाणदअ। एतकी तणी ज़ागदे रहा, किबेकि तमे नांई तेसा धियाड़ी जाणदे, नाह तेसा घड़ी।


किबेकि यह तेऊ मणशा री दशा साही साहा जूणी प्रदेशा बे नाहंदे वक्ते आपणे नोकर शादी करे आपणी संपति त्याहबे दीनी। तेऊ एकु बे पाँज़ तोड़े होर दूजे बे दुई, होर चिउंणे बे एक; मतलब हर एकु बे तेऊरी सामर्थ्या रे साबे दीना, होर तेबा प्रदेशा बे नाठअ। तेबा जासु पाँज़ तोड़े भेटे, तेऊ तेभरी नाहीं करे त्या संघे लेन देन करू, होर पाँज़ तोड़े होर कमाई। एऊ साबे संघे जासु दुई भेटे, तेऊ भी दुई होर कमाई। पर जासु एक भेटअ, तेऊ नाहीं करे धरती रा माटा कोतू, होर आपणे मालका रअ ढबअ गझयाई डाहु।
बहू वक्ता बाद त्या नोकरा रअ मालक इच्छी करे त्याका साबा माँगदअ लागअ। जासु पांज तोड़ भेटे, तेऊ पांज़ तोड़े होर आणी करे बोलू, हे मालक, तांई महा बे पांज तोड़े दीने थी, हेर, मांई पांज़ तोड़े होर खटी। तेऊरे मालके तेऊबै बोलू, धन्य, हे शोभले होर बुशाह लायक नोकर, तूह थोड़े में बुशाह लायक रहू; महा तूह बहु चीजा रअ अधिकारी बणाउणं। आपणे मालका रे आनन्दा में सहभागी हो।
होर जासु दुई तोड़े भेटे, तेऊ भी इच्छी करे बोलू, हे मालक, तांई महा बे दुई तोड़े दिने, हेर, मांई दुई तोड़े होर कमाई। तेऊरे मालके तेऊबै बोलू, धन्य, हे शोभले होर बुशाह लायक नोकर, तूह थोड़े में बुशाह लायक रहू; महा तूह बहू चिज़ा रअ अधिकारी बणाउणअं। आपणे मालक री खुशी में सहभागी हो।
तेबा जासु बे एक तोड़अ भेटअ, तेऊ इच्छी करे बोलू, हे मालक, हाऊं ताह जाणा कि तूह कठोर मणश साहा तूह ज़धे कंधी नांई बउंदअ तखे लउंदा होर ज़खे नांई बऊन्द तखा का बटोरा। एतकी तणी हाऊं डरु होर तेरअ तोड़अ नी करे धरती माटे में गझयाउ। हेर, जोह तेरअ साहा, यह सह साहा।
तेऊरे मालके उतर दीना, हे दुष्ट होर आलसी नोकर, जेबा तूह यह जाणा, कि जखे मांई नांई बऊ तखा का लउंदा, होर ज़खे मांई नांई बऊ तखा का बटोरा, तेबा ताह लोडी, कि मेरअ रपई शाहूकार बे दींदअ, तेबा हाऊं इच्छी करे आपणा धन ब्याज समेत माँगदअ। एतकी तणी तेऊ तोड़े तेऊका माँगा, होर जासू सेटा दस तोड़े साहा, तेऊबै देआ । किबेकि जासू कासी सेटा साहा, तेऊबै होर दींणा; होर तेऊ सेटा बहू हूँणा, पर जासू सेटा किछे नांई आंदा, तेऊका सह भी जोह तेऊ सेटा भी साहा, सह भी माँगणा। होर एउ नकामे नोकरा बागले न्याहरे में फेकी दीणे, ज़खे लेरना होर दाँद चाबणा हूँणा।

जेबा मणशा रअ शोहरू आपणी महिमा में इलअ होर सबे स्वर्गदूत तेऊ संघे ईहंणे, तेबा सह आपणी महिमा रे सिंहासना पैंदे बिराजमान हूँणअं। होर सबे जाति तेऊरे सामने कठे करणी; जेड़अ फुआल भेडा बाकरी का अलग करा, तेड़े ही तेऊ त्या एकु दूजे का अलग करणी। तेऊ भेडा आपणी धूरा फेरा बे होर बाकरी बाईं फेरा बे खड़ी करणी। तेऊ भेडा आपणी धूरा फेरा बे होर बाकरी बाईं फेरा बे खड़ी करणी। तेबा राजा आपणे धुरा फेरा आले बे बोलणा, हे मेरे बापू रे धन्य लोको, ईच्छा, तेऊरे राज्य रे अधिकारी होआ, जोह संसारा में पहिले का त्यार करूदा साहा। किबेकि हाऊं भोछअ थी, होर तमे महाबे खांणे बे दिंना; हाऊं शोखअ थी, तमे महाबे पाणी पलाऊ; हाऊं परदेशी थी, होर तमे हाऊं आपणे घरे बशयागु; हाऊं नेगअ थी, होर तमे महाबे झिकड़े पनेई, होर बमार, होर तमे मेरी सेवा करी, हाऊं जेला में थी, होर तमे महा बे मिलदे आउए।
तेबा धर्मी तेऊबै उतर दींणा, हे परमेश्वर, हामे कधू तूह भोछअ हेरू होर रोटी खयाई? या शोखअ हेरू होर पाणी पलाऊ? हामे कधू तूह परदेशी हेरू होर आपणे घरे बश्यागु? या नेगअ हेरू होर झिकड़े पनई? हामें कधू बमार होर जेला में हेरू होर तांई संघे मिलदे आउए? तेबा राजे त्याबे उतर दींणा, हाऊं तमाबे सच बोला कि तमे जोह मेरे होछे का होछे भाई मजा का तमे कासु एकु संघे करू, सह मांई ही संघे करू। तेबा राजे बाई फेरा आले बे बोलणाा, हे शापित लोको, मेरे सामने का तेसा अनन्त आगि में नाहाँ, जोह शैताना होर दूता बे त्यार करी दी। किबेकि हाऊं भोछअ थी, होर तमे महाबे खाणे बे नांई दिंना; हाऊं शोखो थी, तमे महा बे पाणी नांई पलाऊ; हाऊं परदेशी थी, तमे हाऊं आपणे घरे नांई ठहराउ, हाऊं नेगअ थी, तमे महाबे झिकड़े नांई पनेई; हाऊं बमार थी होर जेला में थी, तमे मेरी सुधि नांई लई थी।
तेबा त्या उतर दींणा, हे प्रभु, हामें तूह कधू भोछो, या शोखो, या परदेशी या नेगअ या बमार या जेला में हेरु, होर तेरी सेवा ठहीले नांई करी? तेबा तेऊ तयाबे उतर दींणा, हाऊं तमाबे सच बोला कि तमे जोह याह होछे का होछे मेंज़ा का कासु एकु संघे नांई करू, सह मांई संघे भी नांई करू। होर याह अनन्त दण्ड भोगणा पर धर्मी अनन्त जीबना में भेटणा।

နားထောင်ပါ मत्ती 25