Ilagano Ipya

Ɨpo abhagoosi bhaala bhonti abha Bhayahuudi bhahɨmɨɨlɨla, bhahanʼtwala ʉYeesu hwa Pilaato, ʉnʼnongozi wa Bhaluumi. Bhahanda hunʼtaake bhahaga, “Tahamʼmwajile ʉmuntu ʉnʉ, ahubhateezya abhantu. Ahubhakhaana abhantu afumye ɨsonko hwa mwɨnɨ ʉnʼgoosi ʉKayisali, nantele bhasi ayiga ʉmwene yʉ Mʼfyʉli, ʉMwɨnɨ.”
ɄPilaato ahamʼmʉzɨɨlɨzya ʉYeesu ahaga, “Aawe ʉli Mwɨnɨ wa Bhayahuudi?” ɄYeesu ahamʼmwamula ahaga, “Weewe wayanga.” Ɨpo ʉPilaato ahabhabhʉʉzya abhalongozi bha bhasayi bha Ngʉlʉbhɨ peeka nɨ mpʉga ya bhantu ahaga, “Saga ɨlola amalando hwa muntu ʉnʉ.” Abhantu bhaala bhahakhajiilizya bhahaga, “Ɨmanyizyo zyakwe zisonzya abhantu aleete ʉvwalanganu! Anyampɨɨnye ɨmanyizyo zyakwe ɨnsi ɨnɨ yonti ɨya Bhayahuudi, ahandile hu mukowa ʉgwɨ Galilaaya afishe ʉhwu.”
ɄPilaato lwa wʉmvwa ɨgo, ahabhabhʉzɨɨlɨzya huje, “Wɨlɨ, ʉmuntu ʉnʉ wa hu Galilaaya?” Lwa waamanya huje, ali muntu wa hu Galilaaya afume hu wumwɨnɨ ʉwa Heloode ʉAntipa, ahanʼtwala hwa Heloode hu nongwa ya‑aje, ɨnsiku ɨzyo ʉmwɨnɨ ʉHeloode ahali papaala pa Yelusaleemu.

ɄHeloode ʉAntipa lwa wanʼnola ʉYeesu, ahasha tee hu nongwa ya‑aje, ahʉmvwaga ɨnongwa zyakwe. Nantele afume halɨ ahanzaga hunʼnole, pɨpo ahasʉbhɨlaga huje, ahwilolele yʉʉyo ʉYeesu lwa‑abhomba amayele. Ɨpo ʉHeloode ahamʼmʉzɨɨlɨzya amazwi gaminji, leelo ʉmwene saga ahaamula izwi nka limo. Abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose bhahɨmɨɨlɨla na hunʼtaake tee.
Ɨpo ʉHeloode ʉAntipa na bhalwi bhaakwe bhahanʼkenyensya ʉYeesu na hunʼsʉfwanye. Bhahanʼkwatizya amenda agɨ mpɨɨya ɨngoosi nanshi abhamwɨnɨ sha bhakwata, na hunʼseshe. Ɨpo ʉHeloode ahamʼmwezya ʉYeesu hwa Pilaato. Afume isiku ɨlyo, ʉHeloode nʉ Pilaato bhahabha bhamanyani, leelo ʉhwo hwisinda bhahabhanga bhalʉgʉ.


Ɨpo ʉPilaato ahabhabhʉngaanya abhalongozi bha bhasayi bha Ngʉlʉbhɨ, abhagoosi bha Bhayahuudi peeka na bhantu abhanjɨ. Ahabhabhʉʉzya ahaga, “Munʼneetile ʉmuntu ʉnʉ huliinɨ, muyiga ahubhateezya abhantu. Ɨshi hwɨ‑ɨzyo zya muhunʼtaakila, namʼmʉzɨɨlɨzya pitagaalila lyenyu, leelo saga ɨndolile amalando hwa mwene. Wope ʉmwɨnɨ ʉHeloode ʉAntipa saga agalolile amalando nka gamo hwa mwene, sha shɨɨsho amʼmweziizye huliinɨ. Ɨshi, mumanye shinza huje, ʉmuntu ʉnʉ, saga lilɨɨho nka limo lya‑abhombile ɨlya‑aje, akhondɨɨye huje, agogwe. Ɨshi, ashetwe nɨ nsanzʉ, nkɨ‑ɨmʼmwigulile.” Gahali miiho pi‑isiku ɨlyɨ shikulukulu ɨshɨ Paasaka, ʉPilaato hubhigulile abhantu ʉnʼkʉngwe weeka.
Leelo abhantu bhaala bhonti bhahabwaga ibwago peeka bhahaga, “Nʼgoje ʉmuntu ʉyo! Tihwanza ʉmʼmwigulile ʉBalaaba!” ɄBalaaba ahakʉngwɨlwe mu hoobhe hu nongwa ya‑aje, ahabhombile ʉvwalanganu nʉ goji mwi‑ibooma.
ɄPilaato ahayanga nabho ʉlwa bhɨɨlɨ, pɨpo ahanzaga humʼmwigulile ʉYeesu. Leelo abheene bhahonjela abwaje ibwago bhahagaga, “Nʼkhomeele pa shikhobheehanyo! Nʼkhomeele pa shikhobheehanyo!”
ɄPilaato ahayanga nabho ʉlwa taatu ahaga, “Akhomeelwe hu nongwa yeenu? Ʉmuntu ʉnʉ ananjile nshi? Anɨ saga ɨndolile amalando hwa mwene ga gakhondɨɨye huje, agogwe! Ɨshi, ashetwe nɨ nsanzʉ, nkɨ‑ɨmʼmwigulile.” Leelo abhantu bhaala bhahonjela abwaje ibwago tee, bhahanzaga aje, ʉYeesu akhomeelwe pa shikhobheehanyo. Hu malishilo, ibwago lyabho lyahabhomba aje, bhɨtɨshɨlwe.
Ɨpo ʉPilaato ahaamula abhombe nanshi sha bhahanzaga. Ahabhigulila ʉBalaaba. Ʉmuntu ʉla wa bhahamʼmwanzaga hwope na‑aje, ahakʉngwɨlwe hu nongwa yɨ vwalanganu nʉ goji. Ɨpo ahamʼfumya ʉYeesu hwa bhalwi huje, bhabhombe nanshi abhantu sha bhahwanza.


Abhalwi lwa bhahunʼtwala ʉYeesu, bhahakhomaana nʉ muntu ʉmo wa bhahagaga Siimoni ʉwa hwi‑ibooma ɨlyɨ Kileene. Ʉmuntu ʉyo ahashilaga afume hu shipanga. Bhahanʼkhata, bhahamʼbijiilizya huje, abhʉʉsye ɨshikhobheehanyo sha Yeesu. Ɨpo ahashibhʉʉsya na humʼmɨnjɨɨlɨle ʉYeesu hwisinda.
Yope ɨmpʉga ɨngoosi ɨya bhantu yahamʼmɨnjɨlɨzyaga ʉYeesu. Muuhati yaabho bhahali abhashɨ bha bhahalilaga na‑azugumile hu nongwa ya Yeesu. ɄYeesu ahabhagalushila, ahabhabhʉʉzya ahaga, “Amwɨ mubhashɨ bha hu Yelusaleemu! Leshi hundilile anɨ! Lyoli, lilaji hu nongwa yɨ wʉʉmi weenyu na bhaana bheenyu! Mumanye shinza huje, ɨnsiku zya zihwɨnza abhantu bhahayiga, ‘Bhasayiiwe abhashɨ bha saga bhapaapa, bha saga bhapɨɨpe na hwonsye abhaana!’ Hu habhaazyo ɨho,
‘Abhantu bhahayihugabhʉʉzya amagamba huje, “Mutigwɨle!”
Nantele bhahayihutubhʉʉzya ʉtugamba huje, “Mutisyɨle!” ’
Nkashele bhabhomba ɨshi hwi‑ikwi ɨlyolo ɨlinza, ɨshi, zyahayibha wɨlɨ hwi‑ikwi ɨlyʉmu?”
Ahabhaazyo hɨnɨɨho, abhalwi bhahabhatwalaga abhabhomba mbiibhi bhabhɨɨlɨ peeka nʉ Yeesu hubhakhomeele pa shikhobheehanyo. Lwa bhaafiha pa bhahagaga Pi‑Ifupa li‑Itwe, bhahanʼkhomeela ʉYeesu pa shikhobheehanyo. Bhope abhabhomba mbiibhi bhaala bhabhɨɨlɨ bhahabhakhomeela mu vikhobheehanyo vyabho, weeka hu lubhazu ʉlwa hu lɨɨlo ʉlwa Yeesu, nʉ wamwabho hu lubhazu ʉlwa hu mongo. ɄYeesu ahaga, “Wee Daada! Ʉbhakhobhoshele hu nongwa ya‑aje, saga bhamɨɨnye zya bhabhomba.” Abhalwi bhaala bhahagabhana amenda ga Yeesu, hwi‑idala ɨlya‑aduunye ɨnduunya.   Abhantu bhahɨmɨlɨɨye pa pɨɨpɨ na paala, bhahenyaaga.
Abhagoosi bha Bhayahuudi bhahanʼsʉfwanyaaga ʉYeesu bhahagaga, “Bhaya, abhanjɨ ahabhafyʉlaga, ɨshi, ahwifyʉle yʉʉyo, nkashele ʉmwene yʉ Mʼfyʉli ʉyo ahasaluliilwe nʉ Ngʉlʉbhɨ!” Abhalwi bhope bhahanʼsyonshela. Bhahabhalaga na humʼpeele ɨdivaayi ɨndozu, bhahamʼmʉzyaga bhahagaga, “Oogo! Aawe nkashele ʉli Mwɨnɨ wa Bhayahuudi, ʉhwifyʉle weewe!”
Pa mwanya pa shikhobheehanyo pahali nɨ nsimbo zya zyahagaga,
ɄNʉ Yʉ MWɨNɨ WA BHAYAHUUDI
Weeka mwa bhabhomba mbiibhi bhaala bhabhɨɨlɨ ahanda hunʼnije ʉYeesu ahaga, “Aawe saga we Mʼfyʉli? Ʉhwifyʉle weewe, naatɨ!” Leelo ʉmʼmomba mbiibhi ʉwamwabho ahanʼdaamila ahaga, “We! Saga ʉhumʼmwogopa ʉNgʉlʉbhɨ? Tenti tilongwilwe afwe nanshi ʉmwene. Atɨ tikhondɨɨye ahwambɨɨlɨle ʉlufundo ʉlwu hu nongwa ya‑aje, tilongwilwe hu mbiibhi zya tizibhombile. Leelo ʉnʉ, saga abhombile ibhiibhi nka limo.” Ɨpo ahaga, “Wee Yeesu! Ɨhulaabha ʉnizuhaje lwʉ‑ʉtʉʉha mu wumwɨnɨ waaho!” ɄYeesu ahamʼmwamula ahaga, “Lyoli ɨhubhʉʉzya huje, ɨleelo ɨli ʉnza‑abhe peeka naanɨ hu Paladiiso.”


Ahwande mu saala nʼtanda ɨshi pasanya afishe mu saala ɨya fundihandwɨmo (9), isanya lyahazima, hwahabha hiisi mu nsi yonti. Mu nyumba ɨmfinjile ɨya Ngʉlʉbhɨ ʉwiizigo ʉwi‑igolole wahazembuha pabhɨɨlɨ.
Ɨpo ʉYeesu ahakhoola ɨhoolo ɨngoosi ahaga, “Wee Daada! Ɨhuwubhɨɨha ʉwʉʉmi waanɨ mu nyoobhe zyaho.” Lwa wayanga ɨsho, ahafwa pɨnɨɨpo.
Ʉnʼnongozi ʉwa bhalwi lwa waalola zya zyabhombeha, ahamʼmwamiha ʉNgʉlʉbhɨ ahaga, “Lyoli, ʉmuntu ʉnʉ ahali nʼgolosu!”
Abhantu bhonti bha bhahabhʉngɨɨne paala, lwa bhaalola zya zyabhombeha, bhahaweela humwabho ʉhwu bhahwikhoma‑khoma ɨvifubha vyabho hu zugumizu. Leelo bhonti bha bhahamanyɨɨne nʉ Yeesu, peeka na bhashɨ bha bhahamʼmɨnjɨlɨlaga afume hu mukowa ʉgwɨ Galilaaya, bhahɨmɨlɨɨye sha hutali ahwenye zya zyahabhombehaga paala.


Hwahali nʉ muntu ʉmo wa bhahagaga Yoosefu, ʉnʼkhaaya ʉwa hwi‑ibooma ɨlyɨ Alimasaaya, mu mukowa ʉgwɨ Yudeeya. Ʉmwene ahali muntu mwinza nantele nʼgolosu wa‑ahasʉbhɨlaga ahwɨnze hu wumwɨnɨ ʉwa Ngʉlʉbhɨ. Nantele ahali palishimo mwi‑ikoloti igoosi ɨlya Bhayahuudi. Leelo saga ahɨtɨhɨɨne na bhamwabho hunʼgoje ʉYeesu.
Ʉmuntu ʉyo ahabhala hwa Pilaato hunʼnaabhe huje, amʼmwɨtɨshɨzye abhale agweje ʉmʼvimba gwa Yeesu. ɄPilaato lwa wamʼmwɨtɨshɨla, ʉYoosefu ahabhala, ahiisya ʉmʼvimba pa shikhobheehanyo. Ɨpo ahaguniempeela ni‑ikɨbha ɨlyɨ mpɨɨya ɨngoosi, ahagusyɨla mu nkʉngwa ya yahabaniilwe mwi‑ilyalawe. Ɨnkʉngwa ɨyo, saga bhahasyɨlɨle ʉmʼvimba gwa muntu nalumo. Isiku ɨlyo lyahali lisiku lya hwilɨngaanye hu nongwa yɨ Sabaato ya yahali pa pɨɨpɨ ahwande.
Abhashɨ bha bhahɨnzɨle peeka nʉ Yeesu afume hu mukowa ʉgwɨ Galilaaya, bhahabha peeka nʉ Yoosefu hu nkʉngwa. Bhahayilola ɨnkʉngwa, nantele bhahalola sha bhahagulambaliishe ʉmʼvimba. Pamandɨ bhahaweela hu khaaya, bhahalɨngaanya ɨnyemba ɨzyɨ waaji wuwinji zya zinunshila shinza. Isiku ɨlyɨ Sabaato bhahatʉʉya, nanshi ɨndajizyo zya Moose sha zyahalajiziizye.

နားထောင်ပါ။ Luuka 23