If you have would like a copy of this version please contact info@davarpartners.org

Text: Garasia Adiwasi New Testament, CC-BY-SA-4.0, The Love Fellowship. -- Audio: Garasia Adiwasi New Testament Audio Bible, CC-BY-SA-4.0, Davar Partners International, The Love Fellowship, 2022

Garasia Adiwasi New Testament

Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.

તર પવિત્ર આત્મા ઇસુ નેં ઉજોડ જગ્યા મ લેંજ્યો, એંતરે કે શેતાન થકી ઇસુ નું પરિક્ષણ થાએ. ઇસુ સાળી દાડા, અનેં સાળી રાત તક ખાદા વગર રિયો, તર ઇસુ નેં ભુખ લાગી. શેતાનેં ઇસુ કનેં આવેંનેં હેંનેં કેંદું, “અગર તું હાસેં પરમેશ્વર નો બેંટો હે, તે એંનં ભાઠં નેં રુંટજ્યી બણવાનું હોકમ આલેંનેં સાબિત કર દે.”
ઇસુવેં જવાબ આલ્યો, “પવિત્ર શાસ્ત્ર મ લખ્યુ હે, મનખં ખાલી રુટી થીસ જીવતં નહેં રેંતં, પુંણ દરેક વસન ઝી પરમેશ્વર ના મોડા થી નકળે હે હેંનેં માનેંનેં જીવતં રેંહે.”
તર શેતાન ઇસુ નેં પવિત્ર સેર યરુશલેમ મ લેંજ્યો, અનેં મંદિર ની ટેકરી ઇપેર ઇબો કર્યો. અનેં ઇસુ નેં કેંદું, “અગર તું હાસેં-હાસ પરમેશ્વર નો બેંટો હે, તે નિસં કુદેંનેં સાબિત કર દે. કેંમકે પવિત્ર શાસ્ત્ર મ લખ્યુ હે, કે પરમેશ્વર તારી હારુ પુંતાનં હરગદૂતં નેં હોકમ આલહે, અનેં વેયા તનેં હાથોં-હાથ તુંકેં લેંહે. ખેંતુંક એંવું નેં થાએ કે તારં પોગં મ ભાઠા થી ઠેંહ વાગે.” ઇસુવેં હેંનેં કેંદું, “પવિત્ર શાસ્ત્ર મ ઇયુ હુંદું લખ્યુ હે, તું પ્રભુ તારા પરમેશ્વર નું પરિક્ષણ નહેં કરે.”
ફેંર શેતાન ઇસુ નેં ઘણાસ ઉંસા ડુંગોર ઇપેર લેંજ્યો અનેં આખી દુન્ય નું રાજ અનેં વૈભવ વતાડેંનેં, હેંનેં કેંદું, “અગર તું નમેંનેં મનેં પોગેં લાગે, તે ઇયુ બદ્દુંસ હૂં તનેં આલ દેં.” તર ઇસુવેં હેંનેં કેંદું, “હે શેતાન સિટી થાએં જા, કેંમકે પવિત્ર શાસ્ત્ર મ લખ્યુ હે, તું પ્રભુ તારા પરમેશ્વર નેં પોગેં લાગ, અનેં ખાલી હીનીસ ભક્તિ કર.”
તર શેતાન ઇસુ કન હો જાતોરિયો, અનેં ભાળો, હરગદૂત આવેંનેં હીની સેવા કરવા મંડ્યા.


ઝર ઇસુવેં ઇયુ હામળ્યુ કે યૂહન્ના નેં જેલ મ નાખેં દેંદો હે, તે વેયો યહૂદિયા પરદેશ નેં સુંડેંનેં પાસો ગલીલ પરદેશ મ જાતોરિયો. અનેં નાજરત ગામ નેં સુંડેંનેં કફરનહૂમ ગામ મ ઝી દરજ્યા ની ધેડેં જબૂલૂન અનેં નપ્તાલી ની જગ્યા હે, જાએંનેં રેંવા મંડ્યો. ઇયુ એંતરે હારુ થાયુ કે ઝી યશાયાહ ભવિષ્યવક્તા દુવારા કેંવા મ આયુ હેંતું, વેયુ વસન પૂરુ થાએ.
“જબૂલૂન અનેં નપ્તાલી ની જગ્યા, ઇયુ ગલીલી દરજ્યા ના રસ્તા મ અનેં યરદન નદી ની ઉગમણી બાજુ હે. ઝાં ઘણં બદં બીજી જાતિ વાળં મનખં રે હે, ઝી યહૂદી જાતિ ન નહેં.
વેય મનખં ઝી ઇન્દારા મ જીવન જીવે હે, હેંનવેં મુંટું ઇજવાળું ભાળ્યુ, ઇયુ ઇજવાળું હેંનં મનખં નેં સુટકારા નો રસ્તો વતાડહે, ઝી પરમેશ્વર નેં જાણ્યા વગર જીવન જીવે હે, અનેં અમર મોત ના રસ્તા મ હે.”
હેંના ટાએંમ થી ઇસુવેં પરસાર કરવું અનેં એંમ કેંવું સરુવાત કર્યુ, કે “પાપ કરવા નું બંદ કરો, કેંમકે હરગ નું રાજ ટીકે આવેંજ્યુ હે.”


ગલીલ દરજ્યા ની ધેડેં ફરતે જાએંનેં ઇસુવેં બે ભાજ્ય નેં એંતરે શમોન નેં ઝી પતરસ કેંવાએ હે, અનેં હેંના નાના ભાઈ અન્દ્રિયાસ નેં દરજ્યા મ જાળ નાખતં ભાળ્યા. કેંમકે વેયા માસલજ્યી હાવા વાળા હેંતા. ઇસુવેં હેંનનેં કેંદું, “મારી હાતેં આવો, તે હૂં તમનેં હિકાડેં કે મનખં નેં મારી કન વિશ્વાસ મ કેંકેંમ લાવવાનં હે.” હેંનવેં તરત માસલજ્યી હાવાનું વાળેં મિલ્યુ અનેં ઇસુ ના સેંલા બણેંજ્યા.
વેંહાં થી અગ્યેડ વદેંનેં, બીજં બે ભાજ્ય નેં એંતરે જબ્દી ના સુંરા યાકૂબ અનેં હેંના નાના ભાઈ યૂહન્ના નેં ભાળ્યા. વેયા પુંતાના બા જબ્દી નેં હાતેં નાવ મ પુંતાની જાળેં તિયાર કરેં રિયા હેંતા, ઇસુવેં હેંનનેં હુંદા બુંલાયા. વેયા તરત નાવ અનેં પુંતાના બા જબ્દી નેં સુંડેંનેં ઇસુ ના સેંલા બણવા હારુ હેંનેં હાતેં સાલેંજ્યા.


ઇસુ ગલીલ પરદેશ ની ઘણી-બદ્દી જગ્યા મ ફરતો જાએંનેં હેંનં ન ગિરજં મ ભાષણ કરતો, અનેં પરમેશ્વર ના રાજ ના તાજા હમિસાર નો પરસાર કરતો, અનેં મનખં ની દરેક રિત ની બેંમારી અનેં નબળાઈ નેં સિટી કરતો રિયો. અનેં સિરિયા પરદેશ ઝી ગલીલ પરદેશ ની હુરી ની પાક્તી હેંતું, તાં ઇસુ ના બારા મ હમિસાર ફેલાએંજ્યો. અનેં મનખં બદ્દ બેંમારં નેં, ઝી અલગ-અલગ રિત ની બેંમારી અનેં દુઃખ મ પડેંલં હેંતં, અનેં ઝેંનં મ ભૂતડં હેંતં, અનેં ફુંર વાળં અનેં લખુવા ન બેંમારનેં, ઇસુ કનેં લાય અનેં હેંને હેંનનેં હાજં કર્ય. ગલીલ પરદેશ અનેં દિકાપુલિસ, ઝી દસ સેર વાળી જગ્યા કેંવાએ હે, અનેં યરુશલેમ સેર, યહૂદિયા પરદેશ, અનેં યરદન નદી ની પાર થી મનખં નો એક મુંટો ટુંળો ઇસુ નેં વાહે થાએંજ્યો.

နားထောင်ပါ။ મત્તિ 4