Palaung, Rumai: Palaung, Rumai (New Testament)

Palaung, Rumai

အီးနီးမိုႈ ဒီတဇူႈ ခါဝ်ဆတာင်းအီးမှေဲမ်ခိုည်း လော်င်ယေဆုခရီတ် အီးမိုႈကော်န်းစံဝ်ဖြားဟာ့်။ ဘည်ဘာည်းကိက်ဒေဲႈအူန်း တီင်ဘေဲႇကျာမ်းပရောဖဲတ်ဟေဆာယ မိုႈ
“တိူဝ်ႈဟံင်း၊ အံဝ်းနံင်ပ္လေႈဟာဝ်း စံင်နာင်းအီးကလာင်းခါဝ်အံဝ်း လအာည်ႇမည်း
စာနံင်အီုမ်ဘျာည်းရဲန်း တာ့်အီုန်ဒါ်န်းႎံက်မည်း။
ဟာ်မ်းကျောႈအီးပါဝ်ကလာင်းခါဝ် ခေဲင်းဘျည်းပါင်ဒါင်း မိုႈ
‘အီုမ်ဘျာည်းရဲန်း အီုန်ဒါ်န်း စာနံင်ဒေဲႈ စံဝ်ကညျားနာ်ႏ။
ရေဲန်းဒဲႈအီုန်ဒါ်န်းအန်း နှာင်းဆီုဝ်နာ်ႏ’။”
နှာင်းဘာည်းပံင်ဟောကလာင်းဟေဆာယ ယောဟာန် စီပေါ်ဒေဲႈဖာ်ႈ ပါ့်ဘျည်းပါင်ဒါင်း၊ စီဟောကလာင်း တြားလော်င်ဘပ်တိစမ် ဒါ်ႈ “လှေဲႇနောႈကဘ္လည်အကျာင်းပဲ၊ စီခံမ်ဘပ်တိစမ်နာ်ႏ။ ဆာ်ဘာည်းဇေဲန်း စံဝ်ဖြားစီနံင် ပ္လိုတ်ဒဲႈဒို့လာ် ပံင်ကလူည်ႇပဲ။” ဇူႈတူ တူအီးလှံင်းယေရုဆလိင် စံမ့်တူအီးအရာပ်ယုဒ ကဲဟာဝ်းဇူးဖာ်ႈ ပါ့်ယောဟာန် စီပ္လိူဝ်ႈကလာင်းလာ်ပံင်ကလူည်ႇကဲ၊ စီခံမ်ဘပ်တိစမ် တာ့်ယောဟာန် ခေဲင်းလလေဲင်းအေဲမ်းယော်ဒန်။
ယောဟာန်ဒီး အန်းစီချှေဲပ်လာ်ဒါး တဆီးပံင်တံက်ဒါး ဟီုက်ကလာအိုက်၊ တီင်ညျော်ည်းအန်းမာ် အန်းဘက်ဒါး ႎည်းဆကျောႇဟူး၊ စီဂေါ်ည်းဟိုမ်းလာ်ဒါး အဒိုး ကာည်း ငါမ်းဖျိူဝ်းဘျည်း။ ကျောႈပံင်ဟောအန်းမိုႈ “ချှေႈအီးကံတ်အီးဒါင်းဇားမှယ်ခူအံဝ်း နံင်ဒေဲႈလဘာ်န်းအံဝ်း။ ႎည်းခနဲပ်ချှေႈဒီးလိူည်းမာ် အံဝ်းအာဝ်ကီုင်မလာ် မူႇကာ်ႈပူည်ႇဒဲႈ။ အံဝ်းမိုႈလိူည် ချှေႈအီးဒဲႈ ဘပ်တိစမ် ဒါးအေဲမ်းတာ့်ပဲ။ ချှေႈဒီးမိုႈ ချှေႈအီးနံင်ဒါးႎိညေန်ချှီႇဆငါးစံဝ် ဒဲႈဘပ်တိစမ် တာ့်ပဲဟာ့်။”


ဇိုယာမ်းဇေဲန်း စံဝ်ယေဆုမာ် ယာ်ည်ႇဒေဲႈလာ်ပါ့်လှံင်းနာဆရဲတ် ပါ့်အရာပ်ဂါလိလဲ၊ စီခံမ်ဘပ်တိစမ် တာ့်ယောဟာန် ပါ့်လလေဲင်းအေဲမ်းယော်ဒန်။ စံန်အန်းစံဝ် ယာ်ည်ႇဒ စိူမ်တာ်အေဲမ်းဒီး၊ အန်းစီယေဲဝ်း တေဲင်းပ္လါ်န်း ဟည်ႎိူဝ်ႈဒေဲႈ၊ အီးမိုႈႎိညေန်စံဝ်မာ် လေႈဒေဲႈ ဘာည်းဆီမ်းအပ္လိုည်း တံက်တေဲင်းအန်း။ စီမေဲႈလာ် ဟာ်မ်းကျောႈလေႈဒေဲႈပါ့်ပ္လါ်န်း ဒါ်ႈ “မည်းနီး ဟည်မိုႈပေါႇ ကော်န်းကမေဲႈအံဝ်း၊ မိုႈပေါႇ ချှေႈအီးလံက်နောႈအံဝ်းဟာ့်။”
ႎါည်းဒီး ႎိညေန်စံဝ် စီတေဲႇယိုင်းဟာဝ်းလာ်ပေါႇ အန်းစံဝ် ပါ့်ခေဲင်းဘျည်းပါင်ဒါင်း အူစာ်န်း။ အန်းစံဝ်မာ် ကတူႈလာ် ဂေါ်ည်းခေဲင်းဘျည်းပါင်ဒါင်း ဖိုန်းကိူဝ်းဆငည်း၊ စီကညားလာ် ခူန်ဆိုင် ကံဝ်းယော်ခလံဝ်းအန်း။ အန်းစီကတူႈဂေါ်ည်းတောႇ စံမ့်တိုဆံတ်အီးဟာည်းကဲ။ ဘည်ဘာည်းမာ် စံင်နာင်းပါ့်ပ္လါ်န်းကဲ စီလေႈဒေဲႈ ရေဲန်းချှိုင်းဒဲႈအန်းစံဝ် ခည်ယာမ်းဇေဲန်း။


ႎါည်းဒီး ဘိူဝ်ကတူႈဇောႈ ယောဟာန်တာ် ခေဲင်းကဘေဲမ်းဒီး၊ ယေဆုမာ် ဟည်ယာ်ည်ႇဟာဝ်းစာ်မ်း ပါ့်အရာပ်ဂါလိလဲ၊ စီဟောကလာင်း ခါဝ်ဆတာင်းအီးမှေဲမ်ခိုည်းစံဝ်ဖြား။ ပံင်ဟောဒါ်ႈအန်းအခည်း မိုႈ “အချီုင်မာ် ဟည်နိုက်စာ်မ်းဒေဲႈ။ အီးမိုႈ ကီုင်းစံဝ်ဖြားမာ် ဟည်မိုႈပေန်ဒေဲႈဟာ့်။ ဂေါႇမိုႈဘာည်းဇေဲန်း လှေဲႇနောႈကဘ္လည်အကျာင်းပဲ စီညျှေဲမ်ရံပ်လာည်း ခါဝ်ဆတာင်းအီးမှေဲမ်ခိုည်းနီးနာ်ႏ။” ခည်ဒုင်ဟာဝ်းအန်းစံဝ် ညျှာပါင်းတီုင်းအေဲမ်းဂါလိလဲဒီး၊ အန်းစံဝ် စီယေဲဝ်းလာ် ဆိမိုန်ကာည်း ႎါးအန်း အီးမိုႈအန်ဒရေ၊ ကာည်းဂီဒါးရာပ် ဟြာည်ႇကမ်းကား ဂေါႇမိုႈကာည်းရေဲန်းဇီုင်းကမ်းဟိုမ်းကား။ စံဝ်ယေဆုစီ ဒါ်ႈလာ် တာ့်ကာည်း “ဒေဲႈပါည်း၊ တောႇဒေဲႈလဘာ်န်းအံဝ်း။ အံဝ်းစီနံင် ပနံဝ်းဒဲႈပါည်း ပေန် အီးဘိူန်းကမ်းလာည်းတူအီး။” ဘိူန်ဇေဲန်း ကာည်းဒီးမာ် ပ္လေႈႎီုန်အူန်းလာ် ရာပ်ကာည်းဒီး ပေါႇအူစာ်န်း၊ စီတောႇဟာဝ်းလာ် လဘာ်န်းအန်းစံဝ်ဟာ့်။ ဘိူဝ်ဟာဝ်းဘိုး အန်းစံဝ် အူတည်ဒဲ့လိူည်၊ အန်းစီယေဲဝ်းလာ်ဘိုး ရာကိုပ် ကာည်း ႎါးအန်းယောဟာန် အီးမိုႈ ကော်န်းတားဆေဘေဒဲ။ ကာည်းပီႎါး စီဂီုည်ရေဲန်း အီုမ်ဘျာည်းတဘာင်းလာ် ရာပ်ကာည်း ခေဲင်းကလေဲႇ။ ဘိူန်ဇေဲန်း စံဝ်ယေဆုစီယေဲဝ်းလာ် ကာည်း၊ စီတေဲပေါႇကာည်းအူစာ်န်း။ ကာည်းပီႎါးမာ် စီတောႇဟာဝ်းပေါႇအန်းစံဝ်၊ စီအူန်းဖာ်ႈကူန်ကာည်း အီးမိုႈတားဆေဘေဒဲ ဂေါ်ည်းတောႇ တူအီးစာင်ကဲ ခေဲင်းကလေဲႇဒီး။


စံဝ်ယေဆုကာည်း တပဲအန်းကဲ စီဟာဝ်းစာ်မ်းလာ်ပါ့်လှံင်းကပေရနော်င်။ ဘိူဝ်စာ်မ်းဆငည်းဆတာင်း အန်းစံဝ် စီလေဲပ်ဖာ်ႈ ခေဲင်းတရော်ပ်၊ စီဟောကလာင်းပနံဝ်းဒဲႈ တာ့်တူအီး။ တူအီးကဲမာ် အာမ်းဒို့လာ် ဘည်ဘာည်းဟောအန်းစံဝ်ဟာ့်။ ဆီမ်ဘာည်းဆံမ်ဒါ်ႈလာ်ဘည်ဇေဲန်း အန်းစံဝ်အာဝ်ဟောမ ဘာည်း တားဆြာကံတ်ကျာမ်းကဲ၊ အန်းစံဝ်ဟောကလာင်း ဘာည်းပေါႇ တူအီးအီးမေဲႈကနေဲႈအူချှေႈ။
ဂေါ်ည်းအူတည်ဒဲ့ စီမေဲႈတူအီးကနာ်မ်းဇေဝ်လေဲပ် အီးဂေါ်ည်းခေဲင်းတရော်ပ်ဒီး စီရိုင်းအောင်းဒါ်ႈ “အိူဝ် ယေဆုအီးမိုႈတူအီးလှံင်းနာဆရဲတ်၊ ဘာည်းမှေဲ မည်းစံဝ် လည်ဆဲင်ႏတာ့်ယေး။ မည်းစံဝ် ဒေဲႈပါ့်နီး စာနံင်ယာ်ႈလှဲဝ်ႎီုန် ယေး ဟီုဝ်။ အံဝ်းနာ်ႇအူန်း မည်းစံဝ်မိုႈဆီ။ မည်းစံဝ်ဒီး မိုႈ ချှေႈအီးချှီႇဆငါးပံင်တိုန်းဒေဲႈစံဝ်ဖြားဟာ့်။”
စံဝ်ယေဆု စီဇာဝ်းတာ့်အန်း ဒါ်ႈ “မည်ခူအောင်း၊ လည်လေႈဒဲဝ်းဒ အန်းပေါႇ။” ဘိူန်ဇေဲန်း ကနာ်မ်းဇေဝ်ဒီးမာ် စီဒဲႈလာ်တူအီးချှေႈဒီး ကဘည်းယယူႈဒါင်းဒါင်း၊ စီရိုင်းအောင်းဖာ်ႈ လည်လေႈဒဲဝ်းဟာဝ်းလာ် ဒအန်းဟာ့်။ တူအီးကဲမာ် ကံပ်အာမ်းဒို့ ပေါႇခည်း၊ စီလည်ကအုပ်ကမိုန်ဒါ်ႈ “အီးနီး နံင်မိုႈဘာည်းမှေဲ။ နံင်မိုႈကျောႈပနံဝ်းအီတမာည်း ဟီုဝ်။ အန်းစံဝ်ဒါးကနေဲႈအန်း၊ ဒဲႈလိူည်ကျောႈဆူည်ႇ ကလာင်း တာ့်ကနာ်မ်းဇေဝ်ကဲ၊ ကဲမာ် ကံပ်တညာဝ်းလာည်းပေါႇခည်း။” ဘိူန်ဇေဲန်း လော်င်ခါဝ်ဆတာင်းအန်းစံဝ်မာ် ကံပ်ကရော်တ်ဟာဝ်းပေါႇ အူစာ်န်း ပါ်အရာပ်ဂါလိလဲ။


ႎါည်းဒီး စံန်ကဲလည်လေႈဟာဝ်း ဒတရော်ပ်ႇ၊ ရာကိုပ်ကာည်း ယောဟာန်မာ် တောႇအန်းစံဝ် ဟာဝ်းလာ်ပါ့်ခလေဲပ် ဆိမိုန်ကာည်း အန်ဒရေဟာ့်။ ပါ့်ခလေဲပ်ဒီး ယားနှာည်ဆိမိုန်မာ် ပေန်လာ်ယော်က်ကာ်ႇဆဲဝ်းဒါင်း ဂေါ်ည်းအိအူန်း တံင်ဒီအိအန်း။ ကဲစီကနဲတ်ဟာဝ်းကလာင်းလာ် ဘည်ဘာည်းအန်း တာ့်အန်းစံဝ်။ အန်းစံဝ်မာ် စီဒေဲႈဇူးလာ် အီးပဲန့်ဒီး တီုတ်ႏတည်းအန်းယာ်ည်ႇ။ ဘိူန်ဇေဲန်း ကာ်ႇဆဲဝ်းအန်းမာ် ဟည်ဂဲန်း အန်းစီရဲန်းပ္လေႈလာ် ပံင်ဟိုမ်းစာကဲဟာ့်။
ဘိူဝ်စာ်မ်းဒေဲႈတာ် အချီုင်ခည်ဆေမ်း ႎါည်းကတ်ဆာင်ငည်း အီးစီယိုင်းဒေဲႈလာ်တူအီးဆဲဝ်းကဲ ကာည်း တူအီးကဲအီးကနာ်မ်းဇေဝ်လေဲပ်။ ဘိူန်ဇေဲန်းတူအီးပါ်လှံင်း ကဲစီဒေဲႈကစုဂေါ်ည်း လာ်ခရာ်ည်ႇမိုည်ႇပလိုႈ။ အန်းစံဝ်စီဆားနှာမ်းဒဲႈ ကဲအီးမေဲႈယောကာဂည်မျိုး တော်ကံပ်ဂဲန်း ကံပ်ကမာ်ႈဒို့၊ အာဝ်ႎါ်န်း ချူႈႎီုန်လေႈဘိုး ကနာ်မ်းဇေဝ်ကဲ။ အီးမိုႈကနာ်မ်းဇေဝ်ကဲဒီး ကဲနာ်ႇပေါႇ ဆီအန်းစံဝ်မိုႈ၊ ဂေါႇဘာည်းဇေဲန်း အန်းစံဝ်စီအာဝ်ဒဲႈမ ကနာ်မ်းဇေဝ်ကဲ ကလာင်းကျောႈခံဝ်ခေါ်။


ႎါည်းဒီးစာ်မ်းဒေဲႈ ချီုင်အာည်ႇဘျည်းႎါႈ စံဝ်ယေဆုယာ်ည်ႇအိဖာ်ႈ စီဟာဝ်းမှာန်းဆူး ပါ့်ဒီယေဲန်ဒီဘူမေဲႈတူအီး။ ဘိူန်ဇေဲန်း ဆိမိုန်ကဲဘံဝ်ဖီုင်းဘံဝ်ဘိုက်အန်း စီလှယ်လာ်ဟြာ်ည်ႇ အန်းစံဝ်။ ဘိူဝ်ယေဲဝ်းကဲ တာ့်အန်းစံဝ် ကဲစီကလာင်းဒါ်ႈ “တူအီးပါ်ဒို့ဒို့ကဲမာ် ဂီလှယ်လာ်ဟြာ်ည်ႇမည်းစံဝ်။”
အန်းစံဝ် စီႎီးဒါ်ႈ တာ့်ကဲ “အဲဟာဝ်းဇူး ပါ့်ကဇိုင်းရီမ်းကဲကဲနီး စာအံဝ်းနံင်ဘိူန်းလာ်ဘိုးဟောတြား၊ ဂေါႇမိုႈလီုင့်ကဲကဲနီး အံဝ်းစီဒေဲႈဟာ့်။”
အန်းစံဝ်စီလေဲပ်ဟာဝ်း ပါ်အရာပ်ဂါလိလဲဒီး လှယ်လာ်ဟောတြား ပါ့်တရော်ပ်ကီုင်းဒီး စီချူႈႎီုန်ဒို့ ကနာ်မ်းဇေဝ်ကဲဟာ့်။


မေဲႈလာ်အူဆငည်း တူအီးတူတ်ႇအူချှေႈ စီဒေဲႈအံက်တကေဲပ်ကေဲန်းဂျိုင်း လအာည်ႇစံဝ်ယေဆု၊ ကလာင်းဒါ်ႈ “ဆာ်မည်းစံဝ်မေဲႈနောႈ ဒဲႈ ယောကာတေဲင်းအံဝ်းကဲနီး နှာင်းကမာ်ႈဂဲန်းဟာဝ်းဒို့ နံင်ကံပ်ပေန် ချှီႇဆငါးဒေဲႈနာ်ႏ။”
အန်းစံဝ်စီမေဲႈလာ် နောႈကႎါ်ည်းတီင်ချှေႈဒီး စီဆီုဝ်ဖာ်ႈတည်းအန်း စုတံင်ချှေႈဒီး ဒါ်ႈ “အံဝ်းမေဲႈအိူဝ်နောႈ။ ဒဲႈမည်းဂဲန်း၊ ဆငါးချှီႇနာ်ႏ။” စံန်အန်းစံဝ်ဒဲႈကျောႈဆူည်ႇဘာည်းဇေဲန်း ယောကာတူတ်ႇအန်းမာ် ဟည်ဂဲန်း၊ ဟည်ဆငါးချှီႇဟာဝ်းပေါႇ။ စံဝ်ယေဆုစီ ကလာင်းတာ်မ်းအူန်းတာ့်အန်း ကရီးကတီး၊ စီဒါ်ႈ “ပံင်ဘာည်းလှေနီး မည်းခူလှယ်ကလာင်းနှဲတာ့်ဆိ။ ဘည်ဘာည်းမာ် မည်းဟာဝ်းဇူး ပါ့်တားစော်င်း၊ နှဲကဲတိူဝ်ႈတိုးမည်း။ မည်စီလှူဒဲႈ ပံင်လှူပံင်တာ်မ်းဒါ်ႈအူန်းမောဆေ နှာင်းပေန်ဆံက်ဆေ လအာည်ႇအီး ဂေါႇမိုႈတိုးမည်း ဟည်ဂဲန်းဟည်ဆငါးချှီႇဒေဲႈ။” အန်းစံဝ် စီဆူည်ႇအန်းလည်လေႈဟာဝ်း ပေါႇအူစာ်န်း။
ချှေႈဒီးမာ် လည်လေႈဟာဝ်း၊ ဘည်ဘာည်းမာ် အန်းစီလှယ်လာ်ကလာင်း ပံင်ကညားဒေဲႈအန်း၊ ခါဝ်ဆတာင်းလှေဒီး အန်းဟည်ကရော်တ်ဘိူန်ဒီယာဝ်း။ ဂေါႇမိုႈဘာည်းဇေဲန်း စံဝ်ယေဆု စီဘူဘိူန်းမလေဲပ် ဒဲႈအီးယေဲဝ်းအန်း ခေဲင်းလှံင်းဒီး။ အန်းစံဝ်စီကတူႈလိူည်ဂေါ်ည်း ပါ့်ရာ်ည်ႇလှံင်းဒီဘူမေဲႈတူအီး။ ဘည်ဘာည်းမာ် တူအီးကဲတော်န်းဒီတော်န်းဒဲန် စီနာ်ႇလိူည်ဒေဲႈဇူးဒို့ ပါ့်ဂေါ်ည်းအန်းစံဝ်။

နားထောင်ပါ။ မာကု 1