St. Lawrence Island Yupik - WBT - (NT) Drama

St. Lawrence Island Yupik - WBT - (NT) Non Drama

Та̄хкын иляңи Фарисеитлъю, Саддукеитлъю тагикат Иисусымун анагнӣлъқавигиӷналюку. Ынка̄м алъя̄ҳлъюхўаҳтисқыхка̄т ысҳа̄сиҳқа̄люку аҳтуӷьяҳқа̄нӷилъҳа Кияӷныӷмың пиңутаңа. Иўырңа Иисусым кӣмсиқӣ: «Сиқинық тывиӷьяҳтуңыстанӷани ыслъя кавиӷругунӷани пӣқуси: “Уна̄ми пиниӷнақуқ”. Сиқинық пӣтыкыстанӷани қиляга кавиӷругунӷанилъю, қилягӣнӷанилъю пӣқуси: “Аӷныӷми ыслъя сыӷлыӷунақуқ”. Ысҳапаглюку қиляга лӣсимакақаҳси ыслъя натынъақутаңа. Иўырңа ысҳапаныҳпысики сялъҳыт аӷныӷни ма̄ни лӣгикыпагниңитаси сямың писӣтаңи. Аӷныӷым ӯм юги сыӷлыҳқумаңӯт, ата̄сӣӷныӷилңӯт Кияӷныӷмун, нақам алъя̄ҳлъюхўаҳтитысқут хўаңамнун. Йыӷлыгилъю! Та̄наңинаҳақ алъя̄ҳлъюхўаҳтилъық ысҳаҳлъықаҳси Кияӷныӷым алъя̄ҳлъюхўа̄ҳтилъҳа Ионамун».
Та̄хкын Иисусым унилъюки аӷуляқыхкат.

Малихся̄ҳтыкулъҳӣт иңлюңанун на̄йвам ка̄лъютың, малихся̄ҳтыт пиялӷӣмың пуйгумалӷӣт нықыкшагмың кылъқыхпынатың. Иисусым пикӣ: «Кылыңалюси Фарисеитлъю, Саддукеитлъю закваскаңитның».
Лъмыхның акузимҳуткыхка̄т: «Таўатын пӣқ қаюҳлъяк кылъқынӷилңӯкут нықыкшагмың».
Иисусым лӣсимакыхкаңи сямың пикатаңи ынка̄м пикӣ: «Лъпыси югни, ухпықилъыҳқыста̄пигӯси! Сяңафси нықыкшаңлъӣгаси? Та̄ўа лӣгикигатсӣ? Нықамикынӷистыкӣ талъимат нықыкшагыт а̄вгуқанка 5,000 югнун, қафсингутаңилъю корзинат сӣпныӷмың имиқаси ыслъықаӷаҳлъюки? Та̄кутлъю нықамикынӷистыкӣ ма̄ӷраӷвинлык нықыкшагыт 4,000 югнун ныӷыстыканка, қафсингутаңитлъю корзинат сӣпныӷмың имиқаси ыслъықаӷаҳлъюки? Натын сяңан лӣгикынӷитыстыху нықыкшаңлъя̄нӷилңуқ акузиткыхкыхка? Кылыңалюси Фарисеитлъю, Саддукеитлъю закваскаңитның!»
Та̄хкын малихся̄ҳтыт лӣгикыхка̄т сямың пӣқутаңа. Закваскаңунӷитыфтуқ нықыкшаңлъямылңуқ кылыңася̄ӷуткыхка̄, иўырңа кылыңасқақыфтӣ апыҳтӯсӣтның Фарисеитлъю, Саддукеитлъю.

Та̄хкын Иисус ка̄сями туңаңанун Кесария Филипповам, а̄птыкӣ малихся̄ҳтыни: «Югыт кинаңунӣқатху Иӷныӷа Югым?»
Кӣмсиқа̄т: «Иляңи пӣқут Иоанныңунилюку Крестителым, иляңита Илия, паниның иляңита Иеремияңунӣқа̄т налиӷмың налӣт ӯкналиқистыт».
А̄птыкӣ: «Лъпысими кинаңунӣқыстыңъа?»
Симон Петырым кӣмсиқа̄: «Христосыңӯтын, Иӷныӷа уңувалӷӣм Кияӷныӷым».
Иисусым пика̄: «Қуястылъылгӯтын, Симон, иӷныӷа Ионам! Қаюҳлъяк югмың лӣсимаңитан, Атама қилягмылңӯм лъпынун лӣтыстыкақа̄. Ынка̄м пӣмкын, Петырыңӯтын, Уйӷак. Хўагун уйӷахкун ныкыфлъықақа юӷаӷвика, туқулъҳым аҳтуӷьяҳқа̄нӷилъҳан кая̄лъқысяҳқақынӷитңхўа̄ӷа̄. Лъпынун тӯнылъықанка қипыти Атаныҳпагулъҳан Қилягым. Сяңўа̄ алңунак асиҳтыкувгу нунами хўани, асиҳсяҳқа̄гуқ қилягмилъю. Сяңўа̄ алңунак итымускувгу нунами хўани, итымусяҳқа̄гуқ қилягмилъю».
Та̄хкын Иисус малихся̄ҳтыминун апыҳтыснаниӷўа̄қақ китумун алңунак Христосыңунилюни.

Та̄хкын кынляңа Иисусым лӣгикыснақыхкӣ малихся̄ҳтыни, Иерусалимтыпыста̄ӷьяҳқа̄нилюни, таўани алъя̄ҳӣнакун икфиқыслъықнилюни Старейшинынун, первосвященнигнун, апыҳтуӷикаюгнунлъю Лӣлиҳтӯсямың. Уңипа̄ткӣ туқусяҳқа̄нилюни та̄хкын пиңая̄ни аӷныӷым Кияӷныӷмун уңуваҳсяҳқа̄нилюни.
Петырым иқитулъюку аӷью̄нӣқа̄: «Атанық, Кияӷныӷым писна̄нӷита̄тын! Таўатын пина̄нӷитутын!»
Иисусым қӣвлюку Петр пика̄: «Туӷныӷақ, иқитын хўаңамның! Амигиӷаҳпыңа, қаюҳлъяк сюмыҳтаӷалъҳын югым сюмыҳтаӷалъқа̄, Кияӷныӷым сюмыҳтаӷалъқынӷита̄!»
Та̄хкын Иисусым малихся̄ҳтыни пикӣ: «Китум алңунак малихсюкумиңа, лъми катам пиюкылъыни пыхлъюку, қақӯрани уямиглюку малихлъиңа. Қаюҳлъяк китум алңунак уңувалъыни лъңанун катам пикникумигу ифлъяяҳқақа̄. Китум алңунак пыхтыкумигу уңувалъыни хўаңа апалъюқлъюңа алъхыҳлъықа̄. Сяңўа̄ңам югым пиниҳқусиқылъықагу пилӣлъюку нунаҳлъяк, ифлъякумигу уңувасигни? Та̄ўа аваңитуқ выҳтусиҳқамың уңувасигминун. А̄пҳанка тама̄кут лъпысинун қаюҳлъяк Иӷныӷа Югым тагияҳқа̄гуқ Атаминың аҳтуӷьяҳқа̄нӷилъылиӷлюни яқулыхтӯмаӷми. Та̄хкын тамаҳа̄ ю̄к налъяңиҳтуҳлъықа̄ апыӷӣӷутылъҳатун. Ипа уңипа̄тамси, хўа̄нлыңӯт иляхпыси уңувалъыӷмыхни ысҳаӷьяҳқақа̄т Иӷныӷа Югым тагилӷӣ Умӣлгулюни».

နားထောင်ပါ။ От Матфея 16