Muria, Far Western: Muria Far Western (NT)

Muria Far Western

अनि पसहा हनुमता मुने नावा इद दुनिया तासिस बाबोना हेरे हन्दाना ओना बेरा अवता इन्जोर येसु पुतुर, अनि ओर इद दुनियाते मतोर आपुना लोकुरकुन बदाम मया किन्दुर अदामे आकरिवनाह मया किसोर मतोर। बसके येसु अनि ओनोर चेलालोरक नरका जेवन कियाला आस मतोरक असके सयतान शिमोना मरि यहुदा इसकरियोतिना मन्दिगा येसुन ओनोर दुश्मना कयदे पयपियान साटि बुतो किस मता। अनि बाबो सबोय अदिकार नावा कयदे हितुर अनि नना परमेस्वरनिकेडाल वातोना अनि परमेस्वरना हेरे दान्तोना इन्जोर येसु इदाम पुन्दुर। अनि जेवनताल तेदचुन येसु आपुना मेन्दुल पोरोडा कुरता टन्डतुर अनि दुपटा पयसुन आपुना नळितुन दोहतुर। असके दडियातिगा एर निहच चेला लोकुरा काल्क नोराना अनि नळितिगा दोहच मतोर अद दुपटाते उमसिला लागतुर। येसु शिमोन पतरासिना हेरे वातुर असके पतरस येसुन इतुर, “हे प्रबु बाताल निमा नावा काल्क नोरान्तोन?” अनि येसु ओन उत्तर हितुर, “नना कियाला आतोनान अदेन निमा इदेक पुनवि, मति इदेना पजा पुन्कि।” अनि पतरस ओन इतुर, “निमा नावा काल्क बसकेन नोर परवि आयकि।” अनि इद केन्जुन येसु ओन इतुर, “नना निकुन नोरोन आयका ते नावासंग निया बारायि संबन्द हिले।” अनि शमोन पतरस ओन इतुर, “हे प्रबु नावांग कालके आयो मति नावा कय अनि तला वने नोरसिम।” अनि येसु ओन इतुर, “एर तुंगतोर ओना काल सिवायि असा बारायि नोराना जरुरि हिले। ओर सबोय शुद्ध मन्तोर। अनि निमाट शुद्ध मन्तोरिट मति सबोय लोकुरक शुद्ध हिलेरक।” अनि नाकुन दुश्मना कयदे पयपिहच हेवाल बोर मन्तोर इदाम ओर पुन्दुर इन्जोर निमाट सबोय लोकुरक शुद्ध हिलविट इदाम ओर इतुर।
अनि बसके ओर ओरांग काल्क नोरतुर आपुना कुरता करसुन असा उदितुर असके ओरकुन इन्दिला लागतुर, “नना मियासंग बाताल कितान? इन्जोर बाताल निमाट समजेमातिट बहे? अनि निमाट नाकुन ‘गुरु अनि प्रबु’ इन्तोरिट, अनि नना ओरे आन्दान इन्जोर निमाट इन्तोरिट खरोय मन्ता। अनि नना प्रबु अनि गुरु आस मियांग काल्क नोरतान ते निमाट वने वरोन दुसरोना काल्क नोरिला पहाजे। बाक्याकि नना मिया संग कितोना अदामे निमाट वने किम्ट इन्जोर नना मिकुन उन्दि नमुना तोहतोना। नना मिकुन खरोय खरोय इन्तोना, दास आपुना मालकानताल हजोर हिलेर, अनि लोहतोर मानेय आपुना लोहवालताल वने हजोर आयोर। अनि निमाट इद पोल्लोंग पुन्तोरिट इन्जोर निमाट अदामे कियाकिट ते परमेस्वर मिकुन आशिरवाद हियानुर। नना मिया सबोय लोकुरा बारेते इनोन, नना बोरकुन आचतोना ओरकुन नना पुन्तोना, बाक्याकि ‘बोर नावा रोटिंग तिन्तोर ओरे नावा दुश्मन आतुर’ इन्जोर पवित्र पुस्तकता कोटस मतोर ओद पोल्लो पुरा आयिला पहाजे। अनि इद घटना आयार असके ओर मसि ननाय आन्दान इन्जोर निमाट विस्वास किम्ट इन्जोर इद घटना आयनाता मुने नना मिकुन इतोना। नना बोन लोहका ओन बोर स्विकार किन्तोर ओर नाकुन स्विकार किन्तोर इन्जोर नना मिकुन खरोय खरोय इन्तोना अनि बोर नाकुन स्विकार किन्तोर ओर केवल नाकुने आयो मति नावोर लोहवाल बाबोन स्विकार किन्तोर।”


अनि इव पोल्लोंग इन्जुन येसु पकाय दुःखि आतुर अनि ओरकुन साप साप इतुर, “मियागडाल वरोर नाकुन दुश्मना कयदे पयपियानुर इन्जोर नना खरोय खरोय इन्तोना।” असके ओर बोना बारेते इन्दिला आतोर इन्जोर चेला लोकुरक शन्काते वरोर दुसरोन हुळिला लागतुरक। अनि ओनोर चेलानिगाडाल वरोर चेला मतोर, येसु ओन पकाय मया किन्दुर ओर येसुना चाति हेरे वकसुन उदस मतोर। असके शमोन पतरस ओर चेलानिके इशारा किस इतुर, “ओर बोना बारेते इन्दिला आतोर?” इन्जोर येसुन पुच्चेमाम। अनि ओर अदामे येसुना चाति हेरे वकसुन ओन पुच्चेमातुर, “हे प्रबु ओर बोर आन्दुर?” अनि येसु उत्तर हितुर, “बोन नना इद हारिता तुकडा आहचुन हियाका ओरे आन्दुर।” अनि ओर तुकडातुन आहचुन शिमोन इसकरियोतिनोर मरि यहुदान हितुर। अनि ओर हारिता तुकडा तितुर अनि सयतान ओनागा होळियतु। असके येसु ओन इतुर, “बोद निमा कियाला आतोन अद सान्डे किम।” मति ओर इद पोल्लो ओन बाक्या इतुर इन्जोर जेवन साटि उदवालोरिगडाल बोरे पुनोर आतुर। अनि यहुदाना हेरे डबुंग इराना जोरिया मता पसहाता हनुम साटि माकुन बाताले लागिन्ता ओद असान साटि या गरिब लोकुरकुन बाराय दान हियाना बारेते येसु यहुदातुन इतुर इन्जोर हुचुलोर चेलालोरक समजेमातुरक। अनि आकरिते ओर हारिता तुकडा तिन्जुन सान्डे बाहरो हतुर। अनि अद नरका मता।

बसके यहुदा बाहरो हतुर असके येसु इतुर, “नना मानेयतोर मरि बचोन महान मन्तोना इन्जोर इदेक परमेस्वर लोकुरकुन तोहानुर। अनि परमेस्वर वने बचोन महान मन्तोर इन्जोर नना मानेयतोर मरिना द्वारा लोकुरकुन समजेमायार। नावागा परमेस्वरना महानता पुरा आता ते परमेस्वर वने नना मानेयतोर मरि बचोन महान मन्तोर इन्जोर लोकुरकुन तोहानुर अनि ओर अदेन सान्डे तोहानुर। हे बालक, नना हुडुक बेरावनाह मिया हेरे मन्तोना पजा निमाट नाकुन पळकिकिट, नना बगा दान्तोना अगा निमाट वायिला परविट इन्जोर नना यहुदिलोकुरकुन इतोना अदामे इदेक नना मिकुन वने इन्तोना। अनि वरोन दुसरोन मया इराट इन्जोर नना मिकुन उन्दि पुनाल आग्या हिन्तोना। नना बदाम मियागा मया इरतोना अदामे निमाट वने वरोन दुसरोन मया इराट। अनि निमाट आपसते मया इरकिट ते इदेनते निमाट नावोर चेला आन्दिट इन्जोर सबोय लोकुरक पुन्दानुरक।”


अनि शमोन पतरस ओन इतुर, “हे प्रबु निमा बगा दान्तोन?” अनि येसु उत्तर हितुर, “बगा नना दान्तोना अगा निमा इदेक नावा परके वायिला परवि मति अदेना पजा नावा परके वायिकि।” अनि पतरस ओन इतुर, “हे प्रबु इदेक नना निया परके बाक्या वायिला परोन? नना ते निया साटि नावा जिवाता बलिदान कियाका।” अनि येसु ओन उत्तर हितुर, “खरोय निमा नावा साटि आपुना जिवाता बलिदान हियाकि? नना निकुन खरोय खरोय इन्तोना, कोर कुसाना मुने निमा नाकुन मून्ड बेरांग पुनोन इन्जोर इन्कि!”

နားထောင်ပါ။ युहनाल 13